KʼI CHIKE ri täq tinamit rech Canaán keyeʼm ri chʼoj rukʼ Israel. Kkebʼij che kechʼakanik. Tekʼuriʼ ri winaq rech ri tinamit Gabaón kkekoj ta wariʼ. Ketaʼm che ri Ajawaxel tijan keʼuto ri täq israelitas, rumal laʼ kkaj täj kechʼojin rukʼ ri Ajawaxel. Rumal laʼ, ¿la awetaʼm su xkebʼan ri täq gabaonitas?

Xkebʼan che kibʼ che naj kepe wi. Rumal laʼ jujun chike xkekoj bʼi qʼeʼl täq katzʼyaq rukʼ jarnäq täq kixajabʼ. Kiyaʼom bʼi qʼeʼl täq koxtar (sak) puwiʼ ri täq kibʼur xuqujeʼ kekʼam bʼi ko täq kaxlanwa kʼo pus che. Tekʼuriʼ xebʼe rukʼ Josué tekʼuriʼ xkebʼij wariʼ che: ‹Ojpetinäq pa jun tinamit che naj kʼo wi, rumal che xqato chirij ri qas nimalaj iDios Jehová. Xqato ronojel ri xixutoʼ chiʼ ixkʼo Egipto. Rumal laʼ ri täq ajkʼamal bʼe chaqe xkebʼij che kqakʼol lo kaxlanwa rech kojpe waral, rech kqabʼij chiwe che: Kqabʼan ipatinel. Chibʼij chaqe che kibʼan ta chʼoj qukʼ. Ix kixkunik kiwilo che xjar ri qatzʼyaq chiqij rumal che naj ri bʼe xqabʼano, xuqujeʼ ri kaxlanwa xubʼan ko xuqujeʼ pus›.

Josué rukʼ ri nikʼaj chik ajkʼamal bʼe xkekoj ri xkebʼij ri gabaonitas. Rumal laʼ xketzujuj chike che kkebʼan ta chʼoj kukʼ. Tekʼuriʼ qʼaxnäq chi oxibʼ qʼij xkilo che qastzij ta wariʼ xkilo che naqaj e kʼo wi ri gabaonitas.

‹¿Suche xibʼij chaqe che naj kixpe wi?› Xchaʼ ri Josué.

Tekʼuriʼ ri gabaonitas xkebʼij wariʼ: ‹Rumal che xbʼix chaqe che ri iDios Jehová xutzujuj che kuya ronojel ri ulew rech Canaán chiwe. Rumal laʼ xqaxibʼij qibʼ che kojikamsaj›. Tekʼuriʼ ri täq israelitas xkebʼan chike ri xketzujuj, xkekamsaj ta ri täq gabaonitas. Xa xkebʼan ajpatinel kech ri israelitas.

Ri ajawinel rech Jerusalén sibʼalaj xpe riwal rumal che ri täq gabaonitas xkebʼan ta chʼoj rukʼ ri Israel. Rumal laʼ xubʼij wariʼ chike ri kajibʼ ajawinel: ‹Chixpetoq tekʼuriʼ chojitoʼ che ri chʼoj rukʼ ri Gabaón›. Are laʼ xkebʼan ri jobʼ ajawinel. ¿La kʼo kinoʼjibʼäl ri gabaonitas chiʼ xkaj täj xkebʼan chʼoj rukʼ Israel, rumal laʼ ri täq ajawinel xpe koyowal chikij? Chqilampeʼ.