XQʼAX ri täq junabʼ... ¡10 junabʼ, 20 junabʼ, 30 junabʼ, 39 junabʼ! Ri täq israelitas e kʼo na pa ri chaqiʼj ulew. Jehová xeʼuchajej ronojel wa täq junabʼ riʼ. Xuya maná chike rech kewaʼik. Xeʼuchajej pa qʼij rukʼ jun nimalaj sutzʼ, xuqujeʼ chaqʼabʼ rukʼ jun nimalaj qʼaqʼ. Xjar ta katzʼyaq xuqujeʼ xubʼan ta kʼäx kaqan.

Are waʼ ri nabʼe ikʼ rech ri junabʼ 40 che e elenäq chi lo pa ri Egipto. Ri täq israelitas e kʼo chi Qadés. Chilaʼ e kʼo wi ojer chiʼ xetaq bʼi ri 12 achijabʼ che urilik ri tinamit Canaán. Ri ranabʼ ri Moisés ubʼiʼ Míriam xkam pa ri Cades. Junam che ojer kʼo kʼi täq kʼäx chilaʼ.

Ri winaq kkeriq ta jaʼ. Rumal laʼ xkebʼij wariʼ che Moisés: ‹Are utz wet xojkam kan Egipto. ¿Suche xojawesaj lo Egipto tekʼuriʼ xojakʼam lo pa jun itzelalaj ulew che kʼot kel lo chuwäch? Waral kʼot ktijowik, kʼot higos, kʼot uvas, kʼot karnata. Ni kʼot jaʼ rech kqatijo›, xechaʼ.

Chiʼ Moisés rukʼ Aarón xebʼe pa ri tabernáculo che ubʼanik chʼawem, Jehová xubʼij wariʼ che Moisés: ‹Cheʼamolij ri winaq. Tekʼuriʼ, che kiwäch konojel chachʼabʼej ri abʼaj. Chilaʼ kel lo wi jun nimalaj jaʼ kech ri tinamit xuqujeʼ kech ri täq kichikop›, xchaʼ.

Rumal laʼ ri Moisés xeʼomolij ri winaq, tekʼuriʼ xubʼij: ‹¡Chitampeʼ, winaq che ikubʼsan ta ikʼuʼx chirij Ajawaxel! Rajawaxik che in xuqujeʼ ri Aarón kqesaj lo jaʼ chupam ri abʼaj chiwe, xchaʼ. Tekʼuriʼ, Moisés xuchʼiy ri abʼaj kebʼ mul rukʼ ri ucheʼ, tekʼuriʼ xel lo jun nimalaj jaʼ. Kʼo chi jaʼ kech ronojel ri winaq xuqujeʼ kech ri chiköp e kʼo chilaʼ.

Ri Jehová sibʼalaj xpe riwal rukʼ Moisés xuqujeʼ rukʼ Aarón. ¿La awetaʼm suche? Rumal che Moisés xuqujeʼ ri Aarón xkebʼij che e areʼ (kë) xkebʼan che ri abʼaj kresaj lo jaʼ. Tekʼuriʼ are ri Ajawaxel xesan lo ri jaʼ. Tekʼuriʼ rumal che xkebʼij ta ri qastzij, Jehová xubʼij chike che kukʼajsaj (castigar) kiwäch. ‹Kinya ta chiwe che kiwoksaj ri nutinamit pa ri Canaán›, xchaʼ Jehová.

Tekʼuriʼ ri israelitas xeʼel bʼi Cades. Chanim xeʼopan pa ri juyubʼ (jïbʼ) ubʼiʼ Hor. Chilaʼ, puwiʼ ri juyubʼ xkam ri Aarón. Kʼo 123 ujunabʼ chiʼ xkamik. Sibʼalaj xebʼison ri täq israelitas, xeʼoqʼ 30 qʼij rumal ri Aarón. Ri ukʼojol ri Aarón ubʼiʼ Eleazar xubʼan kan ajkojol tabʼal toqʼobʼ rech ri tinamit Israel.