CHAWILAMPEʼ ri winaq tijan ketzeʼn chirij wajun ala. ¿La awetaʼm jachin laʼ? Are Jeremías, jun ajqʼaxal utzij ri Ajawaxel.

Chiʼ qʼaxnäq chi kebʼ oxibʼ qʼij che ri ajawinel Josías xok che usachik kiwäch ri täq tyox kʼo pa ri tinamit, Jehová xubʼij che Jeremías che kubʼan Ajqʼaxal utzij. Tekʼuriʼ, Jeremías kunaʼo che alaj na rech kubʼan ajqʼaxal utzij. Tekʼuriʼ Jehová xubʼij che, che kutoʼo.

Jeremías xubʼij chike ri täq israelitas che kkeya kan ubʼanik ri itzelal. ‹Ri täq tyox che ri winaq kkeya uqʼij rech ri täq tinamit kʼot upatan›, xchaʼ. Kʼi täq israelitas xkaj xketaqej uyaʼik kiqʼij ri täq tyox, are ta xkeya uqʼij ri qastzijalaj Ajawaxel Jehová. Chiʼ Jeremías xubʼij chike, che ri Ajawaxel kukʼajsaj kiwäch rumal ri itzelal xkebʼano, Konojel ri winaq xetzeʼn chirij Jeremías.

Xeqʼax ri junabʼ. Josías xkamik, tekʼuriʼ che oxibʼ ikʼ ri ukʼojol ubʼiʼ Joaquim xubʼan ajawinel. Jeremías xutaqej ubʼixik wariʼ chike ri tinamit: ‹Ksach na uwäch Jerusalén we ix kijal ta inoʼj›. Chiʼ ri täq ajkojol tabʼal toqʼobʼ xketa ri Jeremías xkebʼij wariʼ: ‹Rajawaxik che kkam Jeremías; rumal che itzel xchʼaw chirij ri qatinamit›.

¿Su kubʼan Jeremías kimik? ¡Jeremías kuxibʼij ta ribʼ! Xubʼij wariʼ chike: ‹Jehová xinutaq che ubʼixik wa täq tzij chiwe. We kijal ta ri ikʼaslemal, Jehová kusach na Jerusalén. Tekʼuriʼ chiwetaʼmaj che: we kinikamsaj, kikamsaj jun achi che kʼot ubʼanom chiwe›.

Ri täq ajkʼamal bʼe xkekamsaj ta ri Jeremías, tekʼuriʼ ri winaq israelitas xkejal ta ri itzelal kkebʼano. Tekʼuriʼ xpe Nabucodonosor, ri ajawinel rech Babilonia, xchʼojin rukʼ Jerusalén. Kʼisbʼal re, Nabucodonosor xeʼubʼan ajpatinel chike ri israelitas. Xeʼukʼam bʼi e sibʼalaj e kʼi pa Babilonia. ¿Su kabʼij at we katkikʼam bʼi winaq che kachʼobʼ ta kiwäch pa jun tinamit che awetaʼm ta uwäch?