¿LA KACHʼOBʼ uwäch ri ali kʼo waral cho ri wachbʼäl? Ubʼiʼ Rebeca. Xuqujeʼ ri Rebeca tijan kril ri achi ubʼiʼ Isaac. Ri ali riʼ xubʼan rixoqil ri Isaac. ¿Suche xbʼantaj wariʼ?

Abrahán, rutat Isaac, kraj jun utzalaj ixoq che rukʼojol. Kraj täj che ri ukʼojol kkʼuliʼ rukʼ jun ixoq aj Canaán, rumal che wa nikʼaj riʼ kkeya uqʼij täq tyox. Rumal laʼ ri Abrahán xubʼij che rajchak: ‹Kwaj kat bʼe pa nutinamit ni, o jachiʼ, kʼo wi täq wachalal rech kakʼam lo jun rixoqil ri nukʼojol Isaac›.

Rumal laʼ ri ajchak rech ri Abrahán xukʼam lajuj camellos tekʼuriʼ xubʼan (xukʼam) bʼi jun nimalaj bʼe. Chiʼ naqaj chik kʼo wi che ri tinamit pa e kʼo wi rachalal ri Abrahán, xtakʼe chuchiʼ jun kʼwaʼ. Qajbʼal qʼij chik, chiʼ ri ixoqibʼ rech ri tinamit kkesaj jaʼ chupam ri kʼwaʼ. Rumal laʼ ri ajchak rech ri Abrahán xubʼij pa chʼawem che ri Jehová: ‹Ri ixoq kuya jaʼ chwe xuqujeʼ chike ri camellos are waʼ kachaʼ che rixoqil ri Isaac›.

Chanim xpe Rebeca xukʼama jaʼ. Chiʼ ri ajchak xuta jaʼ che, areʼ xuya jaʼ che. Tekʼuriʼ xbʼek xresaj kʼi jaʼ rech ri täq camellos kchaqij kichiʼ. Wariʼ sibʼalaj chak, rumal che ri täq camellos kʼi jaʼ kketijo.

Chiʼ Rebeca xukʼiso, rajchak ri Abrahán xuta ubʼiʼ rutat. Tekʼuriʼ xuta che we utz kkanaj kan pa rachoch che wajun chaqʼabʼ riʼ. Rebeca xubʼij: ‹Betuel ubʼiʼ nutat, xuqujeʼ we kawaj, utz katkanaj kan pa ja qukʼ›. Ri ajchak rech ri Abrahán retaʼm che ri Betuel are ukʼojol ri Nacor, ri rachalal ri Abrahán. Rumal waʼ ri ajchak rech ri Abrahán xukeʼik xumaltyoxij che ri Jehová rumal che xopan kukʼ rachalal ri Abrahán.

Che wajun aqʼabʼ ri ajchak rech ri Abrahán xubʼij utaqkil chike Betuel xuqujeʼ che uxibʼal Rebeca che ubʼiʼ Labán. Tekʼuriʼ xkebʼij che utz kbʼe ri Rebeca rukʼ, che kkʼuli rukʼ Isaac. ¿Su xubʼij Rebeca chiʼ xtaʼ che we kraj kbʼek? Xubʼij che kraj kbʼek. Rumal waʼ che jun chik qʼij xebʼe chirij täq camellos xkebʼan bʼi jun nimalaj bʼe rech xebʼeʼ pa Canaán.

Qajqʼij chik chiʼ xeʼopanik. Rebeca xril jun achi tijan kbʼin chi bʼe. Are Isaac. Ri Isaac sibʼalaj xkikotik chiʼ xril ri Rebeca. Qʼaxnäq chik oxibʼ junabʼ chiʼ xkäm ri Sara unan ri Isaac, areʼ sibʼalaj kabʼison na che unan. Isaac sibʼalaj xraj ri Rebeca, rumal waʼ sibʼalaj xkikot chik.