JOSÉ xiw kʼo 17 ujunabʼ chiʼ xkʼam bʼi pa Egipto. Chilaʼ xkekʼayij che jun achi ubʼiʼ Potifar. Ri Potifar are kchakun rukʼ jun ajawinel (rey) rech Egipto, ubʼiʼ Faraón.

Sibʼalaj nim chak xubʼan José rukʼ Potifar. Rumal laʼ chiʼ ri José xubʼan nim, ri Potifar xuchilbʼej rachoch che José. Tekʼuriʼ ¿Awetaʼm suche xtzʼapix ri José? Are umak rixoqil Potifar.

Chiʼ ri José xkʼiyik xubʼan jun jeʼlikalaj o tzʼoʼy achi, rumal laʼ rixoqil ri Potifar xraj xok rukʼ ri José. Ri José retaʼm che wariʼ utz täj, rumal laʼ xraj täj xqʼoyiʼ, o xktzʼeʼ, rukʼ. Ri rixoqil Potifar sibʼalaj xpe riwal. Rumal laʼ chiʼ xopan ri Potifar che rachoch, ri rixoqil xumol tzij chirij ri José, xubʼij wariʼ che: ‹¡Ri jun itzel José xraj xubʼan kʼäx chwe, rumal che xraj xinuchapo!› Ri Potifar xukoj ronojel chike xubʼij rixoqil che, rumal laʼ sibʼalaj xpe riwal rukʼ José. Xubʼano che ri José xtzʼapixik.

Ri ajchajinel che ri tzʼapibʼal xrilo che ri José jun utzalaj achi. Rumal laʼ xukoj che ajchajinel pa kiwiʼ nikʼaj chik e tzʼapalik. Kʼo jun qʼij che ri Faraón sibʼalaj xpe riwal rukʼ ri ajqʼaxal vino xuqujeʼ rukʼ ri ajbʼanal ukaxlanwa, rumal wariʼ xeʼutzʼapij. Xopan jun aqʼabʼ che jujun chike xubʼan jun achikʼ, ketaʼm ta kʼut su kraj kubʼij. Pa ukabʼ qʼij ri José xubʼij wariʼ chike: ‹Chibʼij ri iwachikʼ chwe›. Tekʼuriʼ rukʼ ri utoʼnik ri Ajawaxel ri José xkunik xubʼij chike su kraj kubʼij ri achikʼ xkebʼano.

Are waʼ ri xubʼij che ajqʼaxal vino: ‹Pa oxibʼ qʼij katel bʼi chupam ri tzʼapibʼal, kabʼan chi na ajqʼaxal vino rech ri Faraón›. Rumal laʼ xubʼij wariʼ che: ‹Chiʼ katel bʼik, chabʼana jun toqʼobʼ (utzil) chwe, chatchʼaw pa nuwiʼ rech kinel bʼi waral›. Tekʼuriʼ ri José are waʼ xubʼij che ri ajbʼanol kaxlanwa: ‹Pa oxibʼ qʼij ri Faraón kresaj na ajolom›, xchaʼ che.

Xopan ri oxibʼ qʼij tekʼuriʼ xbʼantajik sulaʼ xubʼij José. Ri Faraón xresaj ri ujolom ri ajbʼanol kaxlanwa. Tekʼuriʼ xesax bʼi pa tzʼapibʼal ri ajqʼaxal vino tekʼuriʼ xok chik kupatanej ri Faraón. ¡Xsach pa ujolom ri xuta José che! Kʼot xubʼij che ri Faraón, rumal wariʼ José xkanaj kan pa tzʼapixik.