MOISÉS xopan pa jun juyubʼ (jïbʼ) ubʼiʼ Horeb rech kutzukuj kiwa täq uchij. Chiʼ xril jun alaj kʼix cheʼ umajon qʼaqʼ. ¡Tekʼuriʼ kkʼat täj!

‹¡Su wariʼ!›, xchaʼ Moisés. ‹Kinwila na sulaʼ›, xchaʼ. Chiʼ naqaj chik kʼo wi, jun chʼabʼal xchʼaw loq chupam ri alaj kʼix cheʼ, jewaʼ xubʼij che: ‹Xaq matqebʼ loq. Chawesaj axajabʼ, rumal che atkʼo pa jun loqʼalaj ulew›. Are ri Ajawaxel xukoj jun ángel rech xuqʼaxej ubʼixik nikʼaj tzij che Moisés, xa rumal wariʼ che ri Moisés xuchʼuq upalaj.

Tekʼuriʼ xubʼij ri Ajawaxel: ‹Inwilom ri nutinamit kʼo pa qʼoxomal chilaʼ Egipto. Kwaj kinwesaj nutinamit chupam ri kʼäx, rumal waʼ, in katintaq bʼik rech keʼawesaj loq›. Jehová xubʼij che keʼukʼam na bʼi pa ri tinamit Canaán.

Ri Moisés jewaʼ xubʼij: ‹In kʼot inpatan. ¿Su kinbʼan che ubʼanik wariʼ? We kinbʼek, kkita chwe: «¿Chin xatutaq loq?» ¿Su kinbʼij?›

‹Are wariʼ kabʼij chike›, xchaʼ ri Ajawaxel. ‹JEHOVÁ ruDios Abrahán, ruDios Isaac xuqujeʼ ruDios Jacob inutaqom lo iwukʼ.› Tekʼuriʼ Jehová xubʼij: ‹Are wariʼ nubʼiʼ›, xchaʼ.

‹¿E we kkikoj täj che are at xinataq bʼi kukʼ?›, xchaʼ Moisés.

‹¿Su kʼo pa qʼabʼ?›, xchaʼ ri Ajawaxel che ri Moisés.

‹Jun cheʼ›, xchaʼ Moisés.

‹Chaqasajampeʼ pulew›, xchaʼ ri Ajawaxel. Chiʼ ri Moisés xuqasaj ri ucheʼ, ri cheʼ xubʼan jun kumätz. Tekʼuriʼ, Jehová xuya jun chik etal che Moisés. Jewaʼ xubʼij che: ‹Chayampeʼ aqʼabʼ chupam awatzʼyaq›. Moisés xubʼan wariʼ, tekʼuriʼ chiʼ xresaj uqʼabʼ chupam ratzʼyaq, ¡xrilo che kʼo jun yabʼil che ruqʼabʼ junam che kkaʼy rukʼ lepra! Tekʼuriʼ Jehová xuya bʼi uchoqʼabʼ ri Moisés rech kuya ukʼutik jun chik etal, ri urox retal. Kʼisbʼal re jewaʼ xubʼij che: ‹Wanikʼaj täq etal xinkʼut chawäch kubʼano che ri täq israelitas kkekojo che are in xatintaq bʼik›.

Ri Moisés xtzalij pa rachoch tekʼuriʼ jewaʼ xubʼij che Jetró: ‹Chabʼana jun utzil (toqʼobʼ) chaya chwe che kintzalij pa Egipto rech kinwila täq wachalal e kʼo chilaʼ›. Ri Jetró xubʼij che Moisés che utz chumaja bʼi ubʼe rech ktzalij Egipto.