XBʼANTAJ jun nimalaj kʼäx. Xkamsax ri Juan Bautista. Herodías, ri rixoqil ri ajawinel, sibʼalaj itzel krilo. Rumal laʼ xkunik xubʼan che ri ajawinel xutaq resaxik ujolom ri Juan.

Chiʼ Jesús xuta wariʼ, sibʼalaj xbʼisonik. Xbʼe utikel pa jun lugar jachiʼ kʼot nijun winaq. Tekʼuriʼ ri winaq xketarneʼj bʼik. Chiʼ Jesús xril ri täq winaq, xel ukʼuʼx chike. Rumal laʼ xukʼut chike chirij ri rajawbʼäl ri Ajawaxel, tekʼuriʼ xeʼukunaj täq yawabʼ.

Che wajun qajbʼal qʼij ri täq rajtijoxel xepe rukʼ tekʼuriʼ xkebʼij wariʼ che: ‹Xqaj ri qʼij, xuqujeʼ kʼot jastaq waral. Chabʼij chike ri winaq che kebʼek rech kkeloqʼo ri täq ktijowik pa ri täq tinamit e kʼo naqaj›.

‹Rajawaxik täj kebʼek›, xchaʼ Jesús. ‹Ix chiya kiwa.› Jesús xuta wariʼ che Felipe: ‹¿Jachiʼ kojkunik kqaloqʼ wi wa rech konojel ri winaq?›

‹Rajawaxik nim pwäq rech kqaloqʼ ri wa tekʼuriʼ xa jubʼiqʼ kqaya chike ri winaq›, xchaʼ Felipe. Andrés xubʼij wariʼ: ‹Wajun akʼal rekʼam jobʼ kaxlanwa xuqujeʼ kebʼ kar. Wariʼ kubʼanaʼ ta chike konojel ri winaq›, xchaʼ.

‹Chibʼij chike ri winaq che kekubʼeʼ, o ketʼuyek puwiʼ ri räx›, xchaʼ ri Jesús. Tekʼuriʼ xumaltyoxij che ri Ajawaxel puwiʼ ri wa, tekʼuriʼ xujach pa täq chʼaqataʼq. Ri täq rajtijoxel xkeqʼaxej ri kaxlanwa xuqujeʼ ri kar chike ri winaq. E kʼo 5.000 achijabʼ, xuqujeʼ sibʼalaj täq kʼi ixoqibʼ xuqujeʼ akʼalabʼ. Konojel xenoj rukʼ wariʼ. ¡Chiʼ ri täq ajtijoxel xkeyak ri xkanaj kanoq, kʼo 12 chakach nojinäq!

Kimik Jesús xubʼij chike ri täq rajtijoxel che keʼok bʼi pa jun jukubʼ rech kkeqʼaxej ri nimalaj jaʼ rech Galilea. Pa chaqʼabʼ xpe jun nimalaj jabʼ rukʼ kaqiqʼ, o tew, xuqujeʼ ri jaʼ kusilabʼej ri jukubʼ. Ri täq ajtijoxel sibʼalaj xkexibʼij kibʼ. Pa ri qʼequʼm, xkilo che kʼo jun winaq tijan kbʼin puwiʼ ri jaʼ. Sibʼalaj xkexibʼij kibʼ, rumal che ketaʼm täj jachin laʼ.

‹Xaq mixibʼij iwibʼ.› ‹¡In waʼ!› Xchaʼ Jesús. Rumal laʼ Pedro xubʼij wariʼ: ‹We at ri Jesús, chabʼij chwe che kinqʼax pa ri jaʼ awukʼ›. Jesús xubʼij wariʼ: ‹¡Chatpetoq!› ¡Tekʼuriʼ ri Pedro xqaj bʼik tekʼuriʼ xbʼin puwiʼ ri jaʼ! Tekʼuriʼ xuxibʼij ribʼ rumal laʼ tijan kok bʼi pa ri jaʼ, tekʼuriʼ ri Jesús xutoʼo.

Qʼaxnäq chi kebʼ oxibʼ qʼij, Jesús xuya chi kiwa e kʼi täq winaq. Kimik xuya kiwa rukʼ wuqubʼ kaxlanwa xuqujeʼ jujun täq kar. Rukʼ wariʼ xenoj konojel. ¡Sibʼalaj utz rilik su xubʼan Jesús che uyaʼik kiwa ri winaq! ¡Pa ri rajawbʼäl ri Jesús kuya ronojel jastaq chaqe!