WA TÄQ winaq e rajtijoxel ri Jesús. Xkenimaj ri xbʼix chike, rumal laʼ xekanaj kan Jerusalén. Chiʼ e kʼo chilaʼ konojel, xketa jun nim jininem chupam ri ja. Junam rukʼ jun nimalaj kaqiqʼ, o tew, che kajumumik kqʼaxik. Tekʼuriʼ xumaj ukʼutik ribʼ täq raqʼ qʼaqʼ pa kijolom ri winaq. Chawilampeʼ ri qʼaqʼ kʼo pa kijolom ri täq ajtijoxel ¿su kraj kubʼij wariʼ?

¡Wariʼ jun milagro! Jesús kʼo chi pa ri kaj rukʼ ri Utat, xuqujeʼ tijan kuya lo ixlabʼixel pa kiwiʼ täq rajtijoxel. ¿La awetaʼm su kubʼan ri ixlabʼixel chike rech kkebʼano? Konojel xechʼaw pa jalajoj täq uwäch chʼabʼal.

Kʼi täq winaq rech Jerusalén xketa ri xjininik junam rukʼ ri nimalaj kaqiqʼ tekʼuriʼ xepe che rilik su tijan kbʼantajik. Jujun täq winaq rech nikʼaj chik tinamit e petinäq pa ri kinimqʼij täq israelitas rech ri Pentecostés. ¡Sibʼalaj xel kanimaʼ ri täq winaq! Rumal che ri täq ajtijoxel xechʼaw pa kichʼabʼal ri winaq chiʼ xkeya ubʼixik ri utzalaj täq jastaq ubʼanom ri Ajawaxel.

‹Konojel wa täq winaq aj Galilea›, xechaʼ ri winaq. ‹¿Suche kekunik kechʼaw pa jalajoj täq chʼabʼal rech ri tinamit jachiʼ ojpetinäq wi?›

Tekʼuriʼ Pedro xtakʼeʼ che ubʼixik. Ko xchʼawik tekʼuriʼ xubʼij chike ri winaq su xbʼan che ri Jesús chiʼ xkamsaxik, xuqujeʼ che Jehová xuwalasaj. ‹Kimik ri Jesús kʼo pa ri kaj che uxukut ri Ajawaxel›, xchaʼ Pedro. ‹Are ri Jesús xuya lo ri ixlabʼixel che xubʼij kanoq. Rumal waʼ xbʼan ri täq milagros.›

Chiʼ Pedro xubʼij wariʼ sibʼalaj kʼi täq winaq xebʼison chirij ri xbʼan che Jesús. ‹¿Su rajawaxik kqabʼano?› Xechaʼ. Pedro xubʼij wariʼ: ‹Rajawaxik kikʼex ikʼaslemal xuqujeʼ rajawaxik kibʼan iqasanjaʼ›. Pa wajun qʼij weneʼ 3.000 täq winaq xkebʼan kiqasanjaʼ xuqujeʼ xkebʼan rajtijoxel ri Jesús.