Kʼutunem 3

¿Chinlaʼ ri Jesucristo?

¿Suche kbʼix «nabʼeʼal» Ukʼojol ri Ajawaxel che? (1)

¿Suche kbʼix «ri Tzij» che ri Jesús? (1)

¿Suche xpe ri Jesús cho ruwäch Ulew junam che jun achi? (2-4)

¿Suche xeʼuyik ri kamnäq, xukunaj yabʼil xuqujeʼ xubʼan nikʼaj chik? (5)

¿Su kubʼan na ri Jesús? (6)

1. Chiʼ majaʼ kpe cho ruwäch ulew ri Jesús are jun uxlabʼal xuqujeʼ kʼo pa ri kaj. Are nabʼe xubʼan ri Ajawaxel; rumal waʼ kbʼix «nabʼeʼal» ukʼojol ri Ajawaxel che (Colosenses 1:15; Apocalipsis 3:14). Xaq utikel ri Ajawaxel xubʼan ri ukʼojol, kʼot nijun xutoʼo. Ri Jehová xukoj ri Jesús rech xutoʼ che ubʼanik ronojel nikʼaj chik täq e kʼo pa ri kaj xuqujeʼ pa ri Ulew chiʼ majaʼ kpe cho ruwäch Ulew (Proverbios 8:22-31; Colosenses 1:16, 17). Ri Ajawaxel xukoj ri Jesús rech xuqʼaxej utzij. Rumal waʼ xbʼix «ri tzij» che ri Jesús (Juan 1:1-3; Apocalipsis 19:13).

2. Ri Ajawaxel xutaq lo ri ukʼojol cho ruwäch Ulew, chiʼ xuqʼaxej ri ukʼaslemal ri ukʼojol rukʼ ri María. Rumal waʼ ri Jesús kʼot utat cho ruwäch ulew; rukʼ wariʼ xukʼam ta ri mak pa ukʼaslemal. Ri Ajawaxel xutaq lo ri Jesús rumal oxibʼ ukolmil (o ubʼantajik): 1) rech kukʼut ri qastzij rech ri Ajawaxel che qawäch (Juan 18:37), 2) are xubʼan jun sukʼalaj winaq rech xukʼut kan che qawäch rech kqabʼan qe (1 Pedro 2:21), 3) xuya ri ukʼaslemal rech kojresaj pa ri mak xuqujeʼ pa ri kamikal. ¿Suche rajawaxik ri jun tobʼal mak (sacrificio)? (Mateo 20:28.)

3. Rumal che ri nabʼe achi Adán xunimaj täj su xubʼij ri Ajawaxel che, xubʼan ri kbʼix «mak» che pa ri Loqʼalaj Pixabʼ. Rumal laʼ ri Ajawaxel xuya pa ri kamikal (Génesis 3:17-19). Rumal che kkun ta chik kubʼan ri utaqonik ri Ajawaxel, ri Adán xusach kan ri utzʼaqat ukʼaslemal. Xubʼan riʼj tekʼuriʼ xkamïk. Ri Adán xuqʼaxej ri mak chike ronojel ralkʼwal. Rumal waʼ kojriʼjobʼik, kpe yabʼil chaqe xuqujeʼ  kojkamïk. ¿Su xbʼan na che ketoʼik ri winaq? (Romanos 3:23; 5:12.)

4. Ri Jesús are jun tzʼaqatalaj winaq junam rukʼ ri Adán. Ri Jesús sibʼalaj xunimaj ri Ajawaxel xuqujeʼ chiʼ kʼo pa täq nim kʼäx, je täj xubʼan ri Adán. Rumal waʼ xkunik xuya ri utzʼaqat ukʼaslemal waral cho ruwäch ulew, rech kutoj umak ri Adán. Ri Loqʼalaj Pixabʼ kubʼij che wariʼ su xubʼano ubʼiʼ «tojbʼal mak». Rukʼ wariʼ ronojel ralkʼwal ri Adán keʼesax pa ri kamikal. Ronojel chin täq kkekubʼsaj kikʼuʼx chirij ri Jesús kyaʼ kuybʼal kimak xuqujeʼ kkekʼam jun kikʼaslemal che kʼot ukʼisik (1 Timoteo 2:5, 6; Juan 3:16; Romanos 5:18, 19).

5. Chiʼ ri Jesús xkʼejeʼ cho ruwäch Ulew xukunaj yabʼil, xuya kiwa ri winaq che kenumik, xuqujeʼ xresaj ri nimaq täq jabʼ. Xuqujeʼ xeʼuyik täq e kamnäq. ¿Suche xubʼan ronojel wariʼ? 1) Xeʼutoʼ ri winaq rumal che xrilo che tijan kkeriq kʼäx. 2) Ronojel su xubʼano xukʼutu che are ukʼojol ri Ajawaxel. 3) Wariʼ xukʼutu su kubʼan na puwiʼ ruwäch Ulew chiʼ kubʼan jun Ajawinel (Rey) (Mateo 14:14; Marcos 2:10-12; Juan 5:28, 29).

6. Ri Jesús xkamïk, tekʼuriʼ ri Ajawaxel xuwalsaj, junam che jun uxlabʼal tekʼuriʼ xtzalij pa ri kaj (1 Pedro 3:18). Tekʼuriʼ ri Ajawaxel xubʼan Ajawinel che. Ri Jesús kukʼis na ri itzelal xuqujeʼ ri qʼoxomal cho ruwäch Ulew (Salmo 37:9-11; Proverbios 2:21, 22).

[Täq wachbʼäl pa ri 7 uxaq wuj]

Pa ri uchak kʼi xukʼutu, xeʼukunaj yabʼil xuqujeʼ xuya ukʼaslemal pa qawiʼ