1. ¿Jas jun chʼawem nim ubʼantajik kqil na?

SIBʼALAJ e kʼi winaq cho ri uwach Ulew che kkichʼobʼ ri jun chʼawem che xukʼut kan ri Jesús. Qas are ri Jesucristo xukʼut kan jun kʼutbʼal re ri ubʼanik jun chʼawem xuqujeʼ che kʼo nim upatan. Chqilaʼ ri oxibʼ nabʼe taq jastaq xutaʼ pa ri chʼawem, rech kqachʼobʼ ri qas kukʼut ri Biblia.

2. Chabʼij oxibʼ jastaq che ri Jesús xubʼij chke ri rajtijoxelabʼ che rajawaxik che kkitaʼ pa ri chʼawem.

² Chiʼ Jesús xumajij wajun chʼawem xubʼij wariʼ chke ri winaq: ‹Ri ix je chʼawem waʼ chibʼanaʼ: Qatat ri kʼo la pa ri kaj, chtastaj ri bʼiʼ la. Chpet ri Ajawbʼal la. Chbʼan ri rayibʼal la pa ri kaj xuqujeʼ cho ri uwach ulew› (Mateo 6:9-13). ¿Jas kraj kubʼij ri oxibʼ taq jastaq riʼ?

3. ¿Jas e bʼantajik sibʼalaj nim ubʼanik che rajawaxik kqetaʼmaj chrij ri Rajawbʼal ri Dios?

³ Qilom chik kʼi chrij ri ubʼiʼ ri Dios, Jehová. Xuqujeʼ chrij ri kraj ri Dios, xuqujeʼ ri ubʼanom chik xuqujeʼ ri kubʼan na che kitoʼik ri winaq. Tekʼuriʼ ¿jas xraj xubʼij ri Jesús rukʼ ri tzij «chpet ri Ajawbʼal la»? Xuqujeʼ ¿jas riʼ ri Ajawbʼal rech ri Dios? ¿Jasche kbʼixik che kubʼan saq o chʼajchʼoj che ri ubʼiʼ ri Dios chiʼ kpetik? Xuqujeʼ ¿jas kraj kubʼij ri upetik ri Ajawbʼal rukʼ ubʼanik ri kraj ri Dios?

4. ¿Jas ri Rajawbʼal ri Dios, xuqujeʼ jachin laʼ ri Ajawinel che?

⁴ Ri Ajawbʼal rech ri Dios are jun qʼatbʼal tzij che Jehová ubʼanom. Xuqujeʼ areʼ xuchaʼ ri Ajawinel che wajun Ajawbʼal riʼ. ¿Jachin laʼ ri Ajawinel che? Are Jesucristo. Rumal che are nim ubʼanik chkiwach ri ajawinelabʼ rech ri uwach Ulew; rumal laʼ kbʼix «ri xa jun Ajawinel pa kiwiʼ ri ajawinelabʼ, ri Kajaw ri ajawibʼ» che (1 Timoteo 6:15). Ri Jesús kʼo uchuqʼabʼ che ubʼanik sibʼalaj kʼi jastaq utz chke ri winaq, chuwach jun chik ajqʼatbʼal tzij che xa winaq, xuqujeʼ chkiwach ri e utz.

5. ¿Jachiʼ kuqʼat wi lo tzij ri Ajawbʼal rech ri Dios, xuqujeʼ jas puwiʼ kukoj wi ri uchuqʼabʼ?

⁵ ¿Jachiʼ kuqʼat wi lo tzij ri Rajawbʼal ri Dios? Tekʼuriʼ, ¿jachiʼ kʼo wi ri Jesús? Junam rukʼ ri qilom chik xqʼax kebʼ oxibʼ qʼij chiʼ xkamisax cho jun cheʼ ri Jesús, xwalij bʼik tekʼuriʼ xbʼe pa ri kaj (Hechos 2:33). Rumal laʼ chilaʼ kʼo wi ri Ajawbʼal rech ri Dios: pa ri kaj. Rumal laʼ ri Biblia kubʼij «rajawibʼal chikaj» che (2 Timoteo 4:18). Tekʼuriʼ pa ri kaj kuqʼat wi lo tzij puwiʼ ri uwach Ulew (chasikʼij uwach Apocalipsis 11:15).

6, 7. ¿Jasche ri Jesús are jun Ajawinel che nim ubʼanik?

⁶ Jesús are jun Ajawinel che nim ubʼanik. ¿Jasche kqabʼij wariʼ? Jun rumal are che kkam taj. Ri ajawinelabʼ che xa e winaq kekamik, tekʼuriʼ ri Biblia kubʼij, che xaq xiw are «ri xa Jun ri man kkam taj, ri kakʼojiʼ pa ri saqil, ri man kʼo ta jun kakuʼinik kanaqajin rukʼ» (1 Timoteo 6:16). Rumal laʼ ronojel ri utz taq jastaq kubʼano ksach ta kiwach. Tekʼuriʼ qas kubʼan sibʼalaj e kʼi.

⁷ Chqilampeʼ ri xubʼij kanoq ri Biblia chrij ri Jesús: «Ri ruxlabʼal ri Dios kajeqiʼ na amaqʼel puwiʼ; kuya kʼu na unoʼj, kʼoxomanik, utzalaj chomanik, chuqʼabʼ, etaʼmanik xuqujeʼ uyaʼik uqʼij ri Dios. Ri areʼ are taq kuqʼat tzij man are ta karil ri uwachbʼal ri winaq, mawi kuqʼat ta tzij jas ri kuto. Kuqʼat na tzij rukʼ sukʼil pa kiwiʼ ri [e utz taq winaq], kutoʼ na kiwiʼ ri mebʼayibʼ ri e kʼo pa ri tinamit» (Isaías 11:2-4). Wa taq tzij riʼ  kukʼutu che Jesús kuqʼat tzij pa kiwiʼ ri winaq rukʼ sukʼilal xuqujeʼ rukʼ rutzil ranimaʼ. ¿La utz kawilo we kʼo jun ajawinel je ubʼanik wariʼ?

8. ¿E jachin kekitoʼ ri Jesús che uqʼatik tzij?

⁸ Chqilaʼ jun chik bʼantajik puwiʼ ri Ajawbʼal rech ri Dios: ri Jesús kuqʼat ta tzij utukel, are kerachilaj nikʼaj chik ajawinelabʼ. Jun kʼutbʼal re, are ri xubʼij ri apóstol Pablo che ri Timoteo: «We kaqachʼij ri kʼax, kyaʼ na taqanik pa qaqʼabʼ, rukʼ ri areʼ» (2 Timoteo 2:12). Jelaʼ, ri Pablo, Timoteo xuqujeʼ nikʼaj chik e sukʼ winaq e chaʼom rumal ri Dios che kekitoʼ ri Jesús che uqʼatik tzij pa ri Ajawbʼal rech ri Dios. ¿E jampaʼ kkiriq wajun utzalaj chak riʼ?

9. ¿E jampaʼ ri winaq kkitoʼ ri Jesús che uqʼatik tzij, xuqujeʼ jumpaʼ xumajij kichaʼik ri Dios?

⁹ Junam rukʼ ri xbʼix pa ri kʼutunem 7 rech ri wuj riʼ, ri apóstol Juan xril pa jun kʼutwachinik, xubʼij wariʼ: «Xinwil ri Alaj Chij [Jesucristo] takʼal puwiʼ ri juyubʼ Sión [ri ukʼolbʼal rech Ajawinel pa ri kaj]. E kʼo jun sient kawinaq kijebʼ mil (144.000) winaq rukʼ. Tzʼibʼatal kʼu ri ubʼiʼ ri Alaj Chij xuqujeʼ ri ubʼiʼ ri Utat cho ri metzʼal kipalaj». ¿E jachin waʼ ri e 144.000 riʼ? Ri Juan xubʼij e jachin laʼ: «Are waʼ ri keterenem ri Alaj Chij apawijeʼ ta ne ri kabʼe wi. Ri xeloqʼ che kixoʼl ri winaq che ri Dios xuqujeʼ che ri Alaj Chij je ta ne ri e nabʼe taq uwachinik ri tikoʼn» (Apocalipsis 14:1, 4). Qastzij wi, ri e winaq riʼ e sukʼ ajpatanel rech ri Jesucristo ri xechaʼ che utoʼik ri Jesús che uqʼatik tzij pa ri kaj. Chiʼ e kaminaq chik tekʼuriʼ e walajinaq chik, «keʼajawin kʼu na pa kiwiʼ ri uwach ulew» rukʼ ri Jesús (Apocalipsis 5:10). Pa taq ri kiqʼij ri apóstoles, ri Dios xumajij kichaʼik ri e sukʼ cristianos rech ktzʼaqat ri 144.000.

10. ¿Jasche sibʼalaj utz ri Jehová chiʼ xubʼij che are ri Jesús xuqujeʼ ri e 144.000 kkiqʼattzij pa kiwiʼ ri winaq?

¹⁰ Ri Jehová sibʼalaj utz chiʼ xuya che ri Jesús rukʼ ri e 144.000 kkiqʼat tzij pa kiwiʼ ri winaq. Rumal che ri Jesús xubʼan achi pa ri uwach Ulew rumal laʼ kuchʼobʼ ri kʼaxkʼolil kkinaʼ ri winaq. Are chiʼ xchʼaw chrij ri Jesús, Pablo xubʼij che  are «ri kojol tabʼal toqʼobʼ ri kʼo qukʼ, kakunik kel ukʼuʼx che qatuqaril, rumal rech chi xtaqchiʼx che ronojel uwach kʼambʼejenik je jas ri uj, man xmakun ta kʼut» (Hebreos 4:15; 5:8). Xuqujeʼ ri kkitoʼ che uqʼatik tzij pa kiwiʼ ri winaq e areʼ kiriqom ri kʼaxkʼolil kech ri winaq. Xuqujeʼ kichʼijom ri mak xuqujeʼ xkichʼij ronojel uwach taq yabʼil. Qastzij wi kqachʼobʼo, che kel kikʼuʼx chke ri winaq che tajin kkiriq kʼax.

11. ¿Jasche ri Jesús xeʼutaq ri ajtijoxelabʼ che utaʼik che ri Dios che kbʼan ri kraj ri Dios pa ri kaj?

¹¹ Ri Jesús xaq xiw ta xubʼij chke ri ajtijoxelabʼ che kkitaʼ pa ri kichʼawem che kpe ri Ajawbʼal rech Dios; xuqujeʼ xubʼij chke che kkitaʼ che kbʼan ri kraj ri Jehová pa ri kaj xuqujeʼ cho ri uwach Ulew. Pa ri kaj, jachiʼ kʼo wi ri Dios, ri e sukʼ ángeles kkibʼan ri kraj ri Dios. Tekʼuriʼ pa ri kʼutunem 3 rech wajun wuj riʼ xqilo che jun ángel che xubʼan itzel che ribʼ xuya kan ubʼanik ri kraj ri Dios xuqujeʼ xubʼan chke ri Adán rukʼ Eva che xkibʼan kimak. Pa ri kʼutunem 10 kqetaʼmaj na nikʼaj chik chrij ri kukʼut ri Biblia chrij wajun ángel riʼ, che xbʼix Satanás che. Ri Dios xuya che ri Satanás rukʼ ri rajpatanelabʼ, che kbʼix itzel taq uxlabʼal chke, xekʼojiʼ na kebʼ oxibʼ qʼij pa ri kaj. Rumal laʼ pa ri uqʼij ri Jesús, konojel ta ri e kʼo pa ri kaj tajin kkibʼan ri kraj ri Dios. Tekʼuriʼ wariʼ xkʼextajik chiʼ ri Jesucristo xumajij ubʼanik Ajawinel rech Rajawbʼal ri Dios. Xuqujeʼ xchʼojin rukʼ ri Satanás (chasikʼij uwach Apocalipsis 12:7-9).

12. ¿Jas kebʼ jastaq che nim ubʼanik kubʼij Apocalipsis 12:10?

¹² Ri e tzij che bʼim kan ojer kkibʼij ri kbʼan na: «Tekʼuriʼ xintaʼ jun nimalaj chʼabʼal pa ri kaj ri xubʼij: ‹Opaninaq ri kolonik, ri ukuʼinem ri Dios, xuqujeʼ ri rajawinik. Kʼo chik ri taqanik pa uqʼabʼ ri Cristo. Are kʼut [Satanás] ri tzujul kech ri qachalal, ri kebʼutzujuj chuwach ri qaDios chi pa qʼij chi chaqʼabʼ kʼiʼaqom bʼik›» (Apocalipsis 12:10).  ¿La xawilo che pa wajun texto riʼ kubʼij kebʼ jastaq che nim ubʼantajik? Nabʼe kumajij uqʼatik tzij ri Ajawbʼal rech ri Dios pa uqʼabʼ ri Jesucristo. Ukabʼ ubʼantajik, are chiʼ ri Satanás xesax lo pa ri kaj xuqujeʼ xkʼaq lo cho ri uwach Ulew.

13. ¿Jas tajin kbʼanik rumal che xesax lo ri Satanás pa ri kaj?

¹³ Junam rukʼ kqil na, ri e kebʼ jastaq riʼ che nim kibʼanik e bʼanom chik. ¿Jas uyaʼom wariʼ? Chqasikʼij ri xbʼan pa ri kaj: «Rumal rech waʼ chixkikotoq, kaj xuqujeʼ ri ix ri ix jeqel pa ri kaj» (Apocalipsis 12:12). Jewaʼ xbʼanik, ri e sukʼ ángeles xekikotik rumal che ri Satanás xuqujeʼ ri itzel taq uxlabʼal xeʼesax lo pa ri kaj, xuqujeʼ konojel ri xekanaj kan chilaʼ e sukʼ che ri Dios Jehová, xuqujeʼ kukʼ kʼo jun nimalaj jororibʼal xuqujeʼ achilanik. Rumal laʼ pa ri kaj tajin chik kbʼan ri kraj ri Dios.

14. ¿Jas tajin kbʼan cho ri uwach Ulew rumal che ri Satanás xkʼaq loq?

¹⁴ ¿Jas xbʼan cho ri uwach Ulew? Ri Biblia kubʼij: «¡Kʼax iwe ri ix ri ix kʼo cho ri uwach ulew xuqujeʼ ri e kʼo pa ri plo, rumal rech chi qajinaq bʼik ri itzel iwukʼ, sibʼalaj kʼo royowal! Retaʼm kʼut chi xa kebʼ oxibʼ qʼij chik kʼolik» (Apocalipsis 12:12). Ri Satanás sibʼalaj petinaq royowal rumal che xesax lo pa ri kaj xuqujeʼ retaʼm che xa kebʼ oxibʼ qʼij chik kʼo che. Rumal ri nim royowal tajin kuya kʼaxkʼolil cho ri uwach Ulew. Pa ri kʼutunem 9 kqil na ri e kʼaxkʼolil riʼ. Tekʼuriʼ rumal laʼ kqataʼ wariʼ: ¿jas kubʼan ri Ajawbʼal che ubʼanik ri kraj ri Dios cho ri uwach Ulew?

15. ¿Jas riʼ ri kraj ri Dios che ri uwach Ulew?

¹⁵ Rumal laʼ, chnaʼtaj chawe ri kraj ri Dios che ri uwach Ulew. Junam rukʼ ri xqetaʼmaj pa ri kʼutunem 3, ri Jehová xukʼut pa ri kotzʼiʼjalaj Edén che kraj che wajun Ulew kubʼan na jun kotzʼiʼjalaj uwach xuqujeʼ knoj che e sukʼ winaq che kekam taj. Chiʼ ri Satanás xkun chke ri Adán rukʼ Eva che xkibʼan kimak, rukʼ wariʼ xetzlax ri kraj ri Dios che ri uwach Ulew, rukʼ ta wariʼ che ukʼexom ri kraj ri Dios. Ri Jehová kraj  che kbʼan wariʼ: «Ri e utzalaj taq winaq kakechbʼej na ri ulew kejeqiʼ kʼu na chuwach chbʼe qʼij saq» (Salmo 37:29). Ri Rajawbʼal ri Dios kkunik kubʼan wariʼ. ¿Jas kubʼan che ubʼanik?

16, 17. ¿Jas kubʼij Daniel 2:44 chrij ri Ajawbʼal rech ri Dios?

¹⁶ Pa Daniel 2:44 kqariq ri e tzij riʼ che bʼim kan ojer: «Pa taq kʼut ri qʼijol ri kebʼajawin taq we ajawinelabʼ riʼ, ri Dios ri kʼo pa ri kaj kujeqebʼa na jun ajawibʼal ri mawi jubʼiqʼ kasachisax ta uwach mawi kʼo jun tinamit kataqan ta chi na puwiʼ, xane kebʼusachisaj na kiwach konojel taq nikʼaj ajawibʼal chik, kajeqiʼ kʼu na chbʼe qʼij saq». ¿Jas kubʼij ri e tzij riʼ che bʼim kan ojer chrij ri Ajawbʼal rech ri Dios?

¹⁷ Nabʼe, kubʼij che wajun Ajawbʼal riʼ kopan «pa taq kʼut ri qʼijol ri kebʼajawin», wariʼ kraj kubʼij che chiʼ e kʼo na ajawinelabʼ cho ri uwach Ulew. Ri ukabʼ, are kraj kubʼij che ri Rajawbʼal kʼot ukʼisik. Kʼot jun chik ajawinel kuchʼako xuqujeʼ kkunik kok pa ukʼolbʼal. Urox kukʼutu che kʼo jun chʼoj chkixoʼl ri Ajawbʼal rech ri Dios kukʼ ri e ajawbʼal rech ri uwach Ulew, xuqujeʼ ri kchʼakanik are ri Ajawbʼal rech ri Dios. Kʼisbʼal re xaq xiw are kubʼan Ajawinel pa kiwiʼ ri winaq xuqujeʼ are ri qas utz che kqachʼobʼ uwach.

18. ¿Jas ubʼiʼ ri chʼoj chkixoʼl ri Ajawbʼal rech ri Dios rukʼ ri ajawinelabʼ rech ri uwach Ulew?

¹⁸ Ri Biblia kubʼij kʼi tzij chrij wajun chʼoj chkixoʼl ri Ajawbʼal rech ri Dios xuqujeʼ ri ajawbʼal rech ri winaq. Jun kʼutbʼal re, are chiʼ naqaj chik kʼo wi wajun chʼoj riʼ, ri itzel taq uxlabʼal kkimol taq tzij rech kkisachisaj «ri ajawinelabʼ re ronojel ri uwach Ulew». ¿Jasche kkibʼan wariʼ? Rech «xekimolij che ubʼanik ri chʼoj re ri nimalaj uqʼij ri Dios ri kʼo ronojel Ukuʼinem». Ri e ajawinel kemolix «pa ri kʼolbʼal Armagedón, are ri ubʼiʼ pa ri chʼabʼal Hebreo» (Apocalipsis 16:14, 16). Rumal ri kubʼij ri texto riʼ, ri chʼoj che kubʼan ri Ajawbʼal rech ri Dios kukʼ ri qʼatbʼal tzij kech ri winaq kbʼix Armagedón che.

19, 20. ¿Jasche tajin ta kbʼan ri kraj ri Dios kimik cho ri uwach Ulew?

¹⁹ ¿Jas kuchʼak na ri Ajawbʼal rech ri Dios rukʼ ri chʼoj ubʼiʼ  Armagedón? Chojchoman chi chrij ri kraj ri Jehová che ri uwach Ulew: che kubʼan jun kotzʼiʼjalaj che ri uwach Ulew xuqujeʼ knoj che winaq che e sukʼ e tzʼaqat xuqujeʼ che xaq xiw kkiya uqʼij areʼ. ¿Jasche tajin ta kbʼan ri kraj ri Dios kimik cho ri ruwach Ulew? Ri nabʼe, are rumal che xa oj ajmak, rumal laʼ kojrijobʼik xuqujeʼ kojkamik. Rumal laʼ xqil pa ri kʼutunem 5 che ri Jesús xkam rumal qech rech kojkunik kqariq jun qakʼaslemal che kʼot ukʼisik. Knaʼtaj ri e utzij ri Juan chawe: «Chiʼ kaqil wi chi ri Dios sibʼalaj kebʼuloqʼoqʼej ri winaq cho ri uwach Ulew, xuya kʼut ri Ukʼojol ri xa jun kʼolik, rech konojel ri kekojon che, man kasach ta kiwach, xaneʼ kakʼoji na junalik kikʼaslemal» (Juan 3:16).

²⁰ Jun chik rumal rech are che e kʼo kʼi winaq che e itzel. Kkibʼan molom taq tzij xuqujeʼ kkisachisaj nikʼaj chik xuqujeʼ e tzʼil pa kikʼaslemal. Kkaj taj kkibʼan ri kraj ri Dios. Tekʼuriʼ jachin kkibʼan ri itzelal ksachisax na kiwach pa ri Armagedón, ri uchʼoj ri Dios (chasikʼij uwach Salmo 37:10). Jun chik rumal che tajin ta kbʼan ri kraj ri Dios cho ri uwach Ulew kimik, are rumal che ri ajqʼatbʼaltzij kkibʼij ta chke ri winaq che kkibʼan wariʼ. E kʼi chke ri ajqʼatbʼaltzij xa kʼot kichuqʼabʼ, xuqujeʼ e itzel. Rumal laʼ ri Biblia kubʼij wariʼ «xuqujeʼ ri kuʼinem ri kʼo rukʼ ri winaq che ubʼanik kʼax che ri rajil utzʼaqat» (Eclesiastés 8:9).

21. ¿Jas kubʼan ri Ajawbʼal che ubʼanik ri kraj ri Dios cho ri uwach Ulew?

²¹ Tekʼuriʼ chiʼ qʼaxinaq chi ri Armagedón, ri winaq kekʼojiʼ rukʼ xa jun ajqʼatbʼaltzij, are ri Ajawbʼal rech ri Dios. Wajun Ajawbʼal riʼ kkunik kubʼan ri kraj ri Dios cho ri uwach Ulew xuqujeʼ kukʼam lo kʼi taq tewchibʼal. Jun kʼutbʼal re are chiʼ keʼuxim na ri Satanás xuqujeʼ ri itzel taq uxlabʼal pa jun mil junabʼ (Apocalipsis 20:1-3). Xuqujeʼ kubʼan na che kkoj ri uchuqʼabʼ ri kʼax xuriq ri Jesús xuqujeʼ rumal wariʼ, ri e sukʼ winaq kkiriq ta chi yabʼil xuqujeʼ kekam ta chik, are kkiriq na jun kikʼaslemal che kʼot ukʼisik (chasikʼij uwach Apocalipsis 22:1-3). Xuqujeʼ kubʼan na jun kotzʼiʼjalaj uwach che ri Ulew.  Rukʼ wariʼ ri Ajawbʼal kkunik kubʼan ri kraj ri Dios cho ri uwach Ulew xuqujeʼ kubʼan na saq chʼajchʼoj che ri ubʼiʼ ri Dios. ¿Jas kraj kubʼij wariʼ? Are che rumal ri Ajawbʼal, konojel ri winaq kekunik che nim kkil wi ri ubʼiʼ ri Jehová.

22. ¿Jasche qetaʼm che ri Ajawbʼal xpe taj chiʼ kʼo ri Jesús cho ri uwach Ulew xuqujeʼ chiʼ kʼateʼ xbʼe pa ri kaj?

²² Chiʼ ri Jesús xubʼij chke ri rajtijoxelabʼ che kkitaʼ pa kichʼawem che ri Dios «chpet ri ajawbʼal la», wariʼ kubʼij che chiʼ xubʼij wariʼ ri Ajawbʼal majaʼ na kpetik. ¿La xpetik chiʼ kʼateʼ xbʼe ri Jesús pa ri kaj? Je taj, rumal che ri Pedro xuqujeʼ Pablo xkibʼij che chiʼ ri Jesús kkʼastajik, kbʼan rukʼ ri kubʼij Salmo 110:1: «Ri Dios xubʼij che [...]: ‹Chattʼuyul pa ri nuwikiʼaqʼabʼ, kʼa kinbʼan na chke ri kibʼanom kikʼulel chawe chi kebʼux e utakʼalibʼal ri e awaqan›» (Hechos 2:32-35; Hebreos 10:12, 13). Rumal wariʼ ri Jesús kreyej na kebʼ oxibʼ qʼij rech kubʼan Ajawinel.

23. a) ¿Jumpaʼ xumajij uqʼatik tzij ri Ajawbʼal? b) ¿Jas kqil pa ri kʼutunem 9?

²³ ¿Jumpaʼ junabʼ kreyej na? Pa taq kʼisbʼal junabʼ rech 1800 xuqujeʼ ri nabʼe taq junabʼ rech ri 1900, jupuq ajtijoxelabʼ rech ri Biblia xkimaj retaʼmaxik che ri tajin reyem ri Jesús xopan na pa 1914. (We kawaj che kawetaʼmaj nikʼaj chik chrij wariʼ chawilaʼ pa ri nikʼaj chik etaʼmanik ubʼiʼ «1914: junabʼ nim ubʼantajik chrij ri bʼim kan pa ri Biblia».)  Ri e bʼantajik che xmajtaj ubʼanik cho ronojel ri uwach Ulew pa ri junabʼ 1914 kukʼutu che qastzij ri ketaʼmabʼal ri e ajtijoxelabʼ rech ri Biblia. Rech kbʼan ri bʼim kan ojer xukʼutu che pa ri junabʼ 1914 Jehová xubʼan Ajawinel che ri Jesús xuqujeʼ ri Ajawbʼal rech ri Dios xumaj uqʼatik tzij. Rumal laʼ oj kʼo pa ri «kebʼ oxibʼ qʼij» che kʼo che ri Satanás (Apocalipsis 12:12; Salmo 110:2). Xuqujeʼ kqabʼij che ri Ajawbʼal rech ri Dios kubʼan na chanim che kbʼan ri kraj ri Dios cho ri uwach Ulew. ¿La utz wariʼ? ¿La kakojo che qastzij kbʼan wariʼ? Ri jun chik kʼutunem kukʼut chawach ri qastzij che kukʼut ri Biblia chrij wariʼ.