Ri ajqʼatal tzij re ri Imperio romano, César Augusto, xubʼij che konojel ri judíos kebʼe jachiʼ xeʼalax wi rech kkitzʼibʼaj ri kibʼiʼ. Rumal laʼ José xuqujeʼ María xebʼe pa Belén, rumal che ri ufamilia ri José chilaʼ keʼel wi. Xa jubʼiqʼ chik rech kalax ri ral ri María.

Are chiʼ xeʼopan pa Belén, xaq xiw xkiriq jun kikʼolbʼal chikop, chilaʼ xalax wi ri Jesús. María xupis ri alaj akʼal pa chʼuchʼuj taq atzʼyaq tekʼuriʼ xuqʼoyobʼaʼ pa ukʼolbʼal kiwa ri e chikop.

Naqaj che Belén, jujun ajyuqʼabʼ tajin kkichajij ri kichij chaqʼabʼ. Xaq kʼateʼ, xkʼutun jun ángel chkiwach, xuqujeʼ xkil ri usaqil ri unimal ri uqʼij ri Jehová xkʼojiʼ naqaj chke. Ri ajyuqʼabʼ xkixibʼij kibʼ, are kʼu ri ángel xubʼij chke: «Kixibʼij ta iwibʼ, wukʼam lo utzalaj taq tzij. Kimik xalax ri Mesías pa Belén». Pa ri tiempo riʼ, xekʼutun kʼi ángeles pa ri kaj  che kkibʼij: «Chyoq uqʼij ri Dios pa ri kaj xuqujeʼ jororibʼal cho ri uwach Ulew». Tekʼuriʼ ri ángeles xesachik. ¿Jas xkibʼan ri ajyuqʼabʼ?

Ri ajyuqʼabʼ kkibʼij chbʼil kibʼ: «Chanim joʼ pa Belén». Rumal laʼ chanim xebʼek, xkiriq ri José xuqujeʼ María pa ri kikʼolbʼal ri e chikop rukʼ ri alaj akʼal che kʼateʼ xalaxik.

Konojel ri xkita ri xubʼij ri ángel chke ri ajyuqʼabʼ sibʼalaj xkimayo. María sibʼalaj xchoman chrij ri utzij ri ángel xuqujeʼ xsach ta che. Ri ajyuqʼabʼ xetzalij kukʼ ri kichij, sibʼalaj kemaltyoxin che ri Jehová rumal ri xkilo xuqujeʼ ri xkito.