Lot xkʼojiʼ rukʼ ri utío ubʼiʼ Abrahán pa ri ulew re Canaán. Ri e kebʼ xkimulij e kʼi awaj che kʼo ta chi kekʼojiʼ wi konojel. Rumal laʼ, Abrahán xubʼij che ri Lot: «Kojkun ta chik kojkʼojiʼ xa pa jun lugar. Chabʼanaʼ toqʼobʼ, chachaʼ ri katbʼe wi, in kinbʼe pa ri jun chi lugar». ¿La kawilo che qas utz ri Abrahán?

Lot xrilo che kʼo jubʼiqʼ che ri ulew che sibʼalaj utz, sibʼalaj kʼo joron xuqujeʼ rax qʼayes chuwach. Rumal laʼ xuchaʼ wajun kʼolbʼal riʼ rech xbʼe chilaʼ rukʼ ri ufamilia, chunaqaj jun tinamit ubʼiʼ Sodoma.

Ri e winaq re Sodoma xuqujeʼ ri tinamit che kʼo chunaqaj ubʼiʼ Gomorra sibʼalaj e itzel. Sibʼalaj e itzel che Jehová xuchomaj usachisaxik kiwach. Are kʼu Dios kraj taj che kekam Lot rukʼ ri ufamilia, rumal laʼ xeʼutaq lo kebʼ ángeles rech xkibʼij chke: «¡Chanim! ¡Chixel bʼi pa wajun tinamit riʼ! ¡Jehová kusachisaj uwach!».

Are kʼu Lot xel ta bʼi chanim, xbʼeyetajik. Rumal laʼ ri e ángeles xkichap che ri uqʼabʼ areʼ, ri rixoqil xuqujeʼ ri e kebʼ umiʼal rech panim xekesaj bʼi pa ri tinamit. Xkibʼij chke: «¡Anim! ¡Chixanimajoq rech kixkam taj, xuqujeʼ kixkaʼy ta kan chiwij! We kixkaʼy kanoq, kixkamik».

Are chiʼ xeʼopan pa ri tinamit re Zóar, Jehová xutaq lo qʼaqʼ rukʼ azufre pa uwiʼ Sodoma xuqujeʼ Gomorra. Ri e kebʼ tinamit riʼ xsach kiwach. Ri rixoqil Lot xunimaj ta Jehová, xkaʼy chrij xux jun abʼaj re atzʼam. Are kʼu Lot xuqujeʼ ri e umiʼal xekam taj rumal che xenimanik.  Qastzij riʼ xebʼisonik rumal che ri rixoqil ri Lot xniman taj, are kʼu xuqujeʼ xekikotik rumal che e areʼ xkinimaj ri Jehová.