Are chiʼ qʼaxinaq chi kebʼ ikʼ che ri israelitas xeʼel lo pa Egipto, xeʼopan pa ri juyubʼ Sinaí xuqujeʼ xekʼojiʼ chilaʼ. Tekʼuriʼ Jehová xubʼij che Moisés che kpaqiʼ pa ri juyubʼ tekʼuriʼ xubʼij che: «In xinkol ri israelitas. We e areʼ kinkinimaj xuqujeʼ kkibʼan ri nutaqanik, keʼux jun tinamit nim ubʼanik chnuwach». Are chiʼ ri Moisés xtzalij lo pa ri juyubʼ, xutzijoj chke ri israelitas ri xubʼij ri Jehová che. ¿Jas xkibʼij? Xkibʼij: «Kqabʼan ronojel ri kubʼij ri Jehová».

Tekʼuriʼ, Moisés xpaqiʼ chi jumul pa ri juyubʼ. Chilaʼ ri Jehová xubʼij che: «Pa oxibʼ qʼij kinchʼaw rukʼ ri tinamit. Chabʼij chke ri winaq che kepaqiʼ ta pa ri juyubʼ Sinaí». Xqaj lo ri Moisés, xubʼij chke ri israelitas che kkeyeʼj ri qʼij rech kkitatabʼej ri Jehová.

Are chiʼ qʼaxinaq chi oxibʼ qʼij, ri israelitas xkil ri kaypaʼt xuqujeʼ jun qʼequʼm sutzʼ pa uwiʼ ri juyubʼ. Xuqujeʼ xkita jun qʼaqʼ xuqujeʼ ri uchʼabʼal jun rukʼaʼ wakax. Tekʼuriʼ ri Jehová xqaj lo pa ri juyubʼ rukʼ qʼaqʼ. Ri israelitas sibʼalaj kixibʼim kibʼ. Ronojel ri juyubʼ nojinaq che sibʼ xuqujeʼ sibʼalaj xubʼan kabʼraqan. Ri uchʼabʼal ri rukʼaʼ wakax ktatajik, sibʼalaj ktataj rukʼ chuqʼabʼ. Tekʼuriʼ ri Jehová xubʼij: «In, in Jehová. Kiqʼijilaj ta chi jun dios».

Moisés xpaqiʼ chi jumul pa ri juyubʼ, chilaʼ ri Jehová xuya taqanik che ri tinamit. Pa ri e taqanik riʼ xubʼij ri kkibʼan che uqʼijilaxik xuqujeʼ ri kkibʼan pa kikʼaslemal. Moisés xutzʼibʼaj tekʼuriʼ xusikʼij uwach pa kijolom ri israelitas. E areʼ xkitzujuj: «Kqabʼan ronojel ri kutaʼ ri Jehová chqe». Rumal laʼ xkibʼan jun tzujunik che ri Dios, are kʼu ¿la kkibʼano?