1. ¿Jachin kkunik kubʼij chqe ri kqabʼan che uyaʼik uqʼij ri Dios?

E KʼI chke ri e kojonem o religiones kkibʼij che kkikʼut ri qastzij chrij ri Dios. Are kʼu qastzij ta ri kkibʼij, rumal che ri e kojonem kkikʼut kʼi taq jastaq chrij ri ubʼantajik ri Dios xuqujeʼ ri kbʼan che uqʼijilaxik. Rumal laʼ, ¿jas kqabʼan che retaʼmaxik ri qastzij kojonem? Xaq xiw ri Jehová kkunik kubʼij chqe ri kqabʼan che uqʼijilaxik.

2. ¿Jas rajawaxik kabʼano rech kawetaʼmaj ri kabʼan che uqʼijilaxik ri Dios?

² Jehová uyaʼom ri Biblia chqe rech kqetaʼmaj ri kqabʼan che uqʼijilaxik, rumal laʼ chawetaʼmaj chrij ri Biblia. Dios katutoʼ che uriqik ri utzilal kuya ri kukʼutu, rumal che sibʼalaj kel ukʼuʼx chawe (Isaías 48:17).

3. ¿Jas kraj ri Dios kqabʼano?

³ E kʼo jujun winaq kkibʼij che ri Dios utz keril konojel ri e kojonem, are kʼu are ta laʼ ri xukʼut ri Jesús. Areʼ xubʼij: «Ronojel ta ri kbʼin chwe: ‹Wajaw, Wajaw›, kok ta na pa ri rajawbʼal ri Dios, xaneʼ xuwi ri kebʼanow ri urayibʼal ri nuTat ri kʼo pa ri kaj». Rumal laʼ Dios kraj che kqetaʼmaj ri urayibʼal xuqujeʼ ri kqabʼano. Wariʼ are jun jastaq che nim ubʼanik, rumal che Jesús xubʼij che ri keniman ta che ri Dios e «bʼanal taq itzelal» (Mateo 7:21-23).

4. ¿Jas xubʼij Jesús chrij ri ubʼanik ri urayibʼal ri Dios?

⁴ Jesús xubʼij che, kqariq kʼax we kqaj kqabʼan ri kraj ri Dios. Xujunamaj ri ukʼaslemal ri cristiano rukʼ jun nitzʼ bʼe che e kʼi ta winaq kkaj kebʼe chupam. Areʼ xubʼij: «Chixok chupam ri okibʼal ri latzʼ uwach. Nim kʼu kiwach  xuqujeʼ nim kipam ri okibʼal xuqujeʼ ri bʼe ri kkʼaman bʼik chupam ri sachbʼal wachaj, e kʼi kʼut ri keʼok bʼik chupam. Latzʼ kʼu uwach ri okibʼal, xuqujeʼ alaj uwach ri bʼe ri kekʼaman bʼik pa ri kʼaslemal. Man e kʼi ta kʼut ri keriqowik» (Mateo 7:13, 14). Ri bʼe latzʼ uwach kukʼutu che are ri qastzij kojonem xuqujeʼ kojukʼam bʼi che uriqik ri kʼaslemal che kʼo ta ukʼisik. Ri bʼe che nim uwach kukʼutu che are ri e kojonem che kkibʼij ta ri qastzij xuqujeʼ kekikʼam bʼi ri winaq pa ri kamikal. Are kʼu ri Jehová kraj taj che jun winaq kkamik, rumal laʼ keʼusikʼij ri e winaq rech kketaʼmaj más chrij areʼ (2 Pedro 3:9).

5. ¿Jas kabʼan che uchʼobʼik kiwach ri e kʼo pa ri qastzij kojonem?

⁵ Jesús xubʼij che kojkunik kqachʼobʼ kiwach ri e winaq che e kʼo pa ri qastzij kojonem. Rumal laʼ, rajawaxik kqetaʼmaj chrij ri kikojonik xuqujeʼ ri kkibʼano. Areʼ xubʼij: «Kumal taq ri e kiwachinik kiwetaʼmaj kiwach». Xuqujeʼ xubʼij: «Ronojel utzalaj cheʼ kuya utzalaj uwachinik» (Mateo 7:16, 17). Wariʼ kraj ta kubʼij che ri keqʼijilan che ri Dios e tzʼaqat. Are kʼu ri upatanelabʼ ri Dios amaqʼel kkikoj kichuqʼabʼ rech kkibʼan ri utz. Chqilaʼ ri kqabʼan che uchʼobʼik ri qastzij kojonem.

6, 7. a) ¿Jasche pa ri Biblia kkesaj wi ri kikʼutunem ri e kʼo pa ri qastzij kojonem? b) ¿Jas kukʼut chqawach ri ukʼutbʼal ri Jesús?

⁶ Ri ukʼutunem ri qastzij kojonem esam pa ri Biblia. Ri Biblia kubʼij: «Ronojel ri Tzʼibʼatalik petinaq rukʼ ri Dios: utz che tijonik, che pixbʼenik, che jikʼonik, che naqʼatisanik che ri sukʼilal. Jeriʼ ri ralkʼwal ri Dios yoʼm ronojel ri rajawaxik che chubʼanik ronojel uwach utzalaj taq chak» (2 Timoteo 3:16, 17). Ri apóstol Pablo xutzʼibʼaj bʼi chke ri cristianos: «Rumal riʼ xuqujeʼ ri uj man kqatanabʼaʼ ta ri qamaltyoxinik che ri Dios, rumal chi are taq xikʼam  ri utzij ri Dios ri xqatzijoj chiwe, man xikʼam taj jas ri utzij winaq. Xaneʼ xikʼamo jas ri qastzij, are ri utzij ri Dios, ri xuqujeʼ kchakun pa ri ikʼaslemal ri kixkojonik» (1 Tesalonicenses 2:13). Ri qastzij kojonem xaq xiw pa ri Biblia kresaj wi ri kukʼutu, rumal che are ri uTzij ri Dios. Kukʼut ta kichomanik xuqujeʼ kinaqʼatisabʼal e winaq.

⁷ Ronojel ri xukʼut ri Jesús xresaj pa ri uTzij Dios (chasikʼij uwach Juan 17:17). Amaqʼel xuya ubʼixik ri kubʼij ri Biblia (Mateo 4:4, 7, 10). Ri oj qastzij upatanelabʼ ri Dios kqabʼan qe ri xubʼan ri Jesús xuqujeʼ ronojel ri kqakʼutu kqesaj pa ri Biblia.

8. ¿Jas xukʼut ri Jesús chrij ri uqʼijilaxik ri Jehová?

⁸ Xaq xiw kqʼijilax ri Jehová. Ri Biblia kubʼij: «Rech ri winaq kketaʼmaj che at ri abʼiʼ are Jehová xiw at qas at nim puwiʼ ri uwach Ulew» (Salmo 83:18, TNM). Jesús xraj che ri winaq qas kketaʼmaj jachin laʼ ri qastzij Dios. Rumal laʼ xukʼut chkiwach ri e winaq ri ubʼiʼ ri Dios (chasikʼij uwach Juan 17:6). Jesús xubʼij: «Chaqʼijilaj ri Ajawaxel [Jehová, TNM ] aDios, xaq xuwi kʼu ri are kapatanij» (Mateo 4:10). Rumal laʼ ri oj upatanel ri Dios kqabʼan qe ri xubʼan ri Jesús. Xaq xiw kqaqʼijilaj ri Jehová, kqakoj ri ubʼiʼ xuqujeʼ kqakʼut chkiwach nikʼaj chik. Xuqujeʼ kqakʼut ri kubʼan na ri Dios pa qawiʼ.

9, 10. ¿Jas kqabʼan che ukʼutik loqʼoqʼebʼal chbʼil qibʼ?

⁹ Rajawaxik kqakʼut loqʼoqʼenik chke ri e nikʼaj chik. Jesús xukʼut chkiwach ri utijoxelabʼ che rajawaxik kkiloqʼoqʼej kibʼ (chasikʼij uwach Juan 13:35). Ri qaloqʼoqʼebʼal chke ri e nikʼaj chik kubʼan riʼ che kʼo utz achilanik chqaxoʼl, paneʼ jalajoj tinamit kojpe wi, ri cultura, we oj mebʼaʼ u oj qʼinom (Colosenses 3:14). Rumal laʼ, kojbʼe ta pa ri chʼoj xuqujeʼ kqakamisaj ta nijun winaq. Ri Biblia kubʼij: «Ri e ralkʼwal ri Dios xuqujeʼ e jachin taq ri e ralkʼwal ri itzel: apachin ta kʼu ne ri man kubʼan ta ri utzil, o  man kuloqʼoqʼej ta ri rachalal, man ralkʼwal ta ri Dios». Xuqujeʼ xubʼij: «Maqabʼan qe jas xubʼan ri Caín, ri xuya ribʼ pa uqʼabʼ ri itzel, xukamisaj ri uchaqʼ» (1 Juan 3:10-12; 4:20, 21).

¹⁰ Kqakoj qatiempo, qachuqʼabʼ xuqujeʼ jastaq qe rech kqatolaʼ qibʼ xuqujeʼ rech kqaya qachuqʼabʼ chbʼil qibʼ (Hebreos 10:24, 25). Chqabʼanaʼ ri utzilal «chke konojel» (Gálatas 6:10).

11. ¿Jasche rajawaxik kqanimaj ri Jesús?

¹¹ Rajawaxik kqanimaj ri Jesús, rumal che xaq xiw rumal areʼ kojkunik kojqebʼ rukʼ ri Dios. Ri Biblia kubʼij: «Man kʼo ta chi jun kʼo ta wi kolobʼal ibʼ, ri Dios kʼut man uyoʼm ta chqe ri ubʼiʼ ta chi jachin jun cho ri uwach Ulew ri kojkun ta wi kojkolotaj ta wi» (Hechos 4:12). Pa ri kʼutunem 5 re wajun wuj riʼ xqetaʼmaj che Jehová xutaq lo ri Jesús rech kuya ri ukʼaslemal pa kiwiʼ ri winaq che kenimanik (Mateo 20:28). Jehová uchaʼom ri Jesús rech kux Qʼatal tzij pa uwiʼ ri uwach Ulew. Rumal ronojel wariʼ, ri Biblia kubʼij che rajawaxik kqanimaj ri Jesús we kqaj kqariq jun qakʼaslemal che kʼo ta ukʼisik (chasikʼij uwach Juan 3:36).

12. ¿Jasche kqabʼan ta jastaq che kʼo ubʼanik rukʼ ri política?

¹² Kqabʼan ta jastaq che kʼo ubʼanik rukʼ ri política. Jesús xunim ta ribʼ kukʼ ri políticos. Are chiʼ tajin kqʼat tzij pa uwiʼ, xubʼij che ri qʼatal tzij romano Pilato: «Ri wajawbʼal man aj uwach Ulew taj» (chasikʼij uwach Juan 18:36). Junam rukʼ ri Jesús, oj sukʼ che ri uQʼatbʼal tzij ri Dios che kʼo pa ri kaj. Rumal laʼ kqabʼan ta jastaq che kʼo ubʼanik rukʼ ri política, apachiʼ taneʼ oj kʼo wi. Are kʼu ri Biblia kubʼij chqe che kqanimaj ri e «qʼatal taq tzij» (Romanos 13:1). Kqanimaj ri e taqanik e kʼo pa ri tinamit oj kʼo wi. Are kʼu, chiʼ kʼo jun taqanik che kunimaj ta ri utaqanik ri Dios, kqabʼan qe ri xkibʼan ri apóstoles. E areʼ xkibʼij: «Rajawaxik  chqe chi are nabʼe kqanimaj ri kubʼij ri Dios chqe man are ta kʼut ri kkibʼij ri winaq» (Hechos 5:29; Marcos 12:17).

13. ¿Jas kqaya ubʼixik chrij ri uQʼatbʼal tzij ri Dios?

¹³ Rajawaxik kyaʼ ubʼixik che xaq xiw ri uQʼatbʼal tzij ri Dios kresaj na ronojel ri e kʼax cho ri uwach Ulew. Jesús xubʼij che «we utzalaj taq tzij riʼ re ri rajawbʼal ri Dios» ktzijox na cho ronojel ri uwach Ulew (chasikʼij uwach Mateo 24:14). Kʼo ta nijun qʼatal tzij re winaq kkunik kubʼan pa qawiʼ ri kubʼan ri uQʼatbʼal tzij ri Dios (Salmo 146:3). Jesús xukʼut chqawach che kqataʼ ri uQʼatbʼal tzij ri Dios pa ri qachʼawem are chiʼ xubʼij: «Chpet ri ajawbʼal la. Chbʼan ri rayibʼal la cho ri uwach Ulew, jachaʼ ri kbʼan chikaj» (Mateo 6:10). Ri Biblia kubʼij chqe che ri uQʼatbʼal tzij ri Dios kusachisaj na kiwach konojel ri kiqʼatbʼal tzij ri winaq xuqujeʼ xaq xiw are «kajeqiʼ kʼu na chbʼe qʼij saq» (Daniel 2:44).

14. ¿Jachin kachomaj at che are ri qastzij kojonem?

¹⁴ Rumal che qilom chi ri e jastaq riʼ, chachomaj wariʼ: «¿E jachin kkikoj ri Biblia are chiʼ kkiya jun kʼutunem? ¿E jachin kkiya ubʼixik ri ubʼiʼ ri Dios? ¿E jachin qas kkiloqʼoqʼej kibʼ? ¿E jachin kkikojo che ri Dios xutaq lo ri Jesús rech kojukolo? ¿E jachin kkinim ta kibʼ pa política? ¿E jachin kkiya ubʼixik che xaq xiw ri uQʼatbʼal tzij ri Dios kkunik kusukʼumaj ri e kʼax?». Xaq xiw ri testigos rech Jehová kqabʼan ronojel ri e jastaq riʼ (Isaías 43:10-12).

15. ¿Jas rajawaxik kqabʼano we kqaj che ri Dios kukʼam ri qaqʼijilanik?

¹⁵ Xaq xiw ta rajawaxik kqakojo che kʼo ri Dios. Xuqujeʼ ri demonios kkikojo che kʼolik, are kʼu keniman ta che (Santiago 2:19). We kqaj che ri Dios kukʼam ri qaqʼijilanik, xaq xiw ta kqabʼij che kʼo Dios rajawaxik kqabʼan ri kojutaq wi.

16. ¿Jasche rajawaxik kqaya kan ri qastzij taj kojonem?

 ¹⁶ Rech kkʼam ri qaqʼijilanik rumal ri Dios, rajawaxik kqaya kan ri qastzij taj kojonem. Isaías ri qʼaxal utzij ri Dios xutzʼibʼaj: «Chixel uloq, chixel uloq pa Babilonia, mebʼinaq chi tzʼil taq jastaq» (Isaías 52:11; 2 Corintios 6:17). Rumal laʼ rajawaxik kqaxutuj ronojel ri jastaq che kʼo ubʼanik rukʼ ri qastzij taj kojonem.

17, 18. a) ¿Jas riʼ ri «Nimalaj Babilonia»? b) ¿Jasche rajawaxik che aninaq kaya kanoq?

¹⁷ ¿Jas riʼ ri qastzij taj kojonem? Are konojel ri kojonem che kkikʼut ta ri kubʼij ri Biblia chrij ri qas kbʼan che uqʼijilaxik ri Dios. Ri Biblia kubʼij «Nimalaj Babilonia» chke konojel ri e qastzij taj kojonem (Apocalipsis 17:5). ¿Jasche? Are chiʼ ubʼanom chi ri Nimalaj Jabʼ o Diluvio, xkʼut pa ri tinamit Babilonia kʼi etaʼmanik che e qastzij taj. Ronojel ri etaʼmanik riʼ xejabʼun bʼi pa ronojel uwach Ulew. Jun kʼutbʼal, ri e winaq re Babilonia xekiqʼijilaj e jupuq taq dioses che e kʼo oxibʼ pa jun dios. Kimik, e kʼi kojonem kkikʼutu che ri Dios are jun trinidad o e oxibʼ pa jun dios, are kʼu ri Biblia kukʼutu che Jehová are ri qastzij Dios xuqujeʼ che ri Jesús are uKʼojol (Juan 17:3). Ri babilonios xuqujeʼ xkichomaj che kʼo jun chʼaqap re ri qacuerpo kkʼasiʼ kanoq are chi kojkamik xuqujeʼ kuriq kʼax pa ri qʼaqʼ. Are kʼu qastzij taj. (Chawilaʼ ri nota 14, «Ri trinidad, jun kʼutunem che qastzij taj», 17, «Ri animaʼ», y 18, «Ri uxlabʼal»).

¹⁸ Dios uyaʼom ubʼixik che konojel ri e qastzij taj kojonem ksachisax na kiwach pa kebʼ oxibʼ qʼij (Apocalipsis 18:8). ¿La kachʼobʼ ri rumal che rajawaxik kaya kan ri qastzij taj kojonem? Jehová kraj che aninaq kaya kan ri qastzij taj kojonem rumal che xa jubʼiqʼ chi kraj ksachisax uwach (Apocalipsis 18:4).

19. ¿Jas kubʼan ri Dios che achajixik we kachaʼ upatanixik?

 ¹⁹ We kaya kan ri qastzij taj kojonem xuqujeʼ kapatanij ri Jehová, weneʼ jujun chke ri afamiliares o awachiʼl kkichʼobʼ ta ri kabʼano xuqujeʼ katkiqʼatej che ubʼanik. Are kʼu Jehová katuchajij na. Kuya jun afamilia che keriqitaj pa ronojel uwach Ulew che qas kkiloqʼoqʼej kibʼ xuqujeʼ kkʼojiʼ jun akʼaslemal che kʼo ta ukʼisik pa ri kʼakʼ uwach Ulew (Marcos 10:28-30). Ri afamiliares o awachiʼl che utz ta kkil ri tajin kabʼano weneʼ pa ri petinaq kkaj kketaʼmaj na chrij ri Biblia.

20. ¿Jasche rajawaxik che katkʼojiʼ pa ri qastzij kojonem?

²⁰ Naj ta chik, ri Dios kusachisaj na uwach ronojel ri itzelal, xuqujeʼ kuqʼat na tzij pa uwiʼ ronojel ri uwach Ulew (2 Pedro 3:9, 13). Qastzij riʼ che are jun utzalaj tiempo. Konojel kkiqʼijilaj na ri Jehová junam che kraj areʼ. Rumal laʼ rajawaxik che kimik kʼo kabʼano xuqujeʼ katkʼojiʼ pa ri qastzij kojonem.