Ri Jehová a Dios xeʼukʼulbʼaʼ ri nabʼe kʼulaj. Ri Biblia kubʼij che are xbʼanow ri nabʼe ixoq xuqujeʼ «xujach kʼu pa uqʼabʼ ri Adán». Ri Adán sibʼalaj xkikotik rumal laʼ xubʼij: «¡Are qas utzʼaqatil ri nutiʼjal waʼ xuqujeʼ utzʼaqatil ri nubʼaqil!» (Génesis 2:22, 23). Jehová kraj che kʼo kikotemal pa ri kʼulanem.

Chiʼ kebʼ winaq kekʼuleʼik, weneʼ kkichomaj che utz kelik ronojel. Ri qastzij are che konojel ri kʼulaj kkiriq jujun kʼax, pa neʼ sibʼalaj kkiloqʼoqʼej kibʼ (1 Corintios 7:28). Chupam wajun wuj riʼ kkiriq pixabʼ rech ri Utzij ri Dios che, we kkibʼan pa ri kikʼaslemal, kuya kikotemal pa ri kikʼulanem xuqujeʼ pa ri kifamilia (Salmo 19:8-11).

RI KUBʼIJ RI BIBLIA: Ri achi are kkʼamow ubʼe ri familia (Efesios 5:23).

Achi, we at kʼulanik, Jehová kraj che katok il che ri awixoqil rukʼ loqʼoqʼebʼal (1 Pedro 3:7). Ri Jehová xubʼan ri ixoq rech kux toʼl awech xuqujeʼ kraj che nim kawil wi xuqujeʼ kaloqʼoqʼej (Génesis 2:18). Rumal laʼ, sibʼalaj rajawaxik che kaloqʼoqʼej xuqujeʼ are más katok il che ri kajwataj che areʼ chuwach ri kajwataj chawe at (Efesios 5:25-29).

Ixoq, we at kʼulanik, Jehová kraj che nim kawil wi ri awachajil xuqujeʼ katoʼ rech kkunik kubʼan ri ubʼim ri Jehová che (1 Corintios 11:3; Efesios 5:33). Chatoʼ rukʼ ri kuchaʼ ubʼanik xuqujeʼ rukʼ ronojel awanimaʼ chabʼanaʼ ri kubʼij (Colosenses 3:18). We je kabʼano, ri awachajil xuqujeʼ ri Jehová nim katkilo (1 Pedro 3:1-6).

RI KATKUNIK KABʼANO:

• Chataʼ che ri akʼulaj jas rajawaxik kabʼano rech katux más utz. Qas chatatabʼej ri kubʼij xuqujeʼ chakojoʼ achuqʼabʼ che ubʼanik ri kubʼij chawe

• Chkʼol apaciencia. Kukʼam bʼi tiempo rech kiwetaʼmaj ukikotemaxik iwibʼ

RI KUBʼIJ RI BIBLIA: Are rajawaxik che qas katok il che ri kajwataj che ri akʼulaj (Filipenses 2:3, 4). Qas chaloqʼoqʼej ri akʼulaj, chnaʼtaj chawe che Jehová kraj che ri rajpataninelabʼ amaqʼel e utz taq winaq (2 Timoteo 2:24). Qas chachomaj na ri kabʼij, ri Biblia kuya wajun pixabʼ riʼ: «E kʼo jachin taq kesokon kumal ri kitzij, kechʼaw kʼu ri kʼo kinoʼj kakiyaʼ kʼu utzil» (Proverbios 12:18). Ri uxlabʼixel katutoʼ rech katchʼaw rukʼ utz taq tzij xuqujeʼ rukʼ loqʼoqʼenik (Gálatas 5:22, 23; Colosenses 4:6).

RI KATKUNIK KABʼANO:

• Chiʼ kawaj kabʼij jun jastaq che ri akʼulaj che sibʼalaj nim ubʼanik, nabʼe chataʼ che ri Dios che katutoʼ rech chanim taj kpe awoyowal xuqujeʼ rech utz ri achomanik

• Qas chachomaj ri kabʼij xuqujeʼ ri kabʼan che ubʼixik

RI KUBʼIJ RI BIBLIA: Chiʼ kekʼuleʼik, ri e kʼulaj keʼux «xaʼ e jun winaq» (Mateo 19:5). Are kʼu e kebʼ winaq na che kʼo jujun taq mul jalajoj ri kichomanik. Rumal laʼ rajawaxik che kiwetaʼmaj ubʼanik junam che ri ichomanik xuqujeʼ che ri kinaʼo (Filipenses 2:2). Sibʼalaj nim ubʼanik che junam ri ichomanik chiʼ kichaʼ ubʼanik jun jastaq. ¿Jas kibʼano rech kubʼan junam? Ri Biblia kubʼij: «Ri chomanik kejikibʼax rumal jun utzalaj yoʼw noʼj» (Proverbios 20:18). Chiyaʼ che ri upixabʼ ri Dios kukʼam ibʼe chiʼ junam kichaʼ ubʼanik jun jastaq che sibʼalaj nim ubʼanik (Proverbios 8:32, 33).

RI KATKUNIK KABʼANO:

• Xaq xiw ta kabʼij che ri akʼulaj ri jastaq che ix kebʼ iwetaʼm; xuqujeʼ chabʼij che ri kʼo pa awanimaʼ

• Chiʼ kʼo jun jastaq kawaj kabʼano, chataʼ che ri akʼulaj we utz krilo