KʼUTUNEM 15
¿Jachin laʼ ri Jesús?
Ri Jesús are jun winaq che kchʼobʼotaj uwach pa ronojel ri uwach Ulew. Paneʼ e kʼi winaq ketaʼm ri ubʼiʼ, are kʼu qas ta ketaʼm jachinoq y jalajoj ri kichomanik chrij. ¿Jas kukʼut ri Biblia chrij ri Jesús?
1. ¿Jachin laʼ ri Jesús?
Ri Jesús are jun uxlabʼal nim uchuqʼabʼ che kʼo pa ri kaj. Are ri nabʼe xbʼan rumal ri Jehová chkiwach ri nikʼaj chi jastaq. Rumal laʼ kbʼix ri «nabʼe chuwach ronojel ri bʼanom» che (Colosenses 1:15). Ri Biblia kubʼij che ri Jesús are ri xa jun ukʼojol ri Dios, rumal che xaq xiw ri areʼ xbʼan rumal ri Jehová (Juan 3:16). Jesús xutoʼ ri uTat che kibʼanik ronojel ri jastaq (chasikʼij Proverbios 8:30). Ri e kebʼ kʼo jun utz kachilanik. Jesús are «ri Tzij», kraj kubʼij ri ajqʼaxal uTzij ri Jehová (Juan 1:14).
2. ¿Jasche xpe ri Jesús cho ri uwach Ulew?
Qʼaxinaq chi 2.000 junabʼ, ri Jehová xukoj ri ruxlabʼixel rech xubʼan jun milagro: xuqʼaxej ri ukʼaslemal ri Jesús—che are jun ángel che kʼo nim uchuqʼabʼ—chupam jun ali ubʼiʼ María. Rumal wariʼ, ri Jesús xkʼojiʼ junam rukʼ jun winaq (chasikʼij Lucas 1:34, 35). Ri areʼ xpe cho ri uwach Ulew rech xux ri Cristo, o Mesías, y rech xeʼukol ri winaq cho ri uwach Ulew. a Ronojel ri profecías che bʼim chrij ri Mesías xetzʼaqatik. Rukʼ wariʼ ri winaq xketaʼmaj che «are ri Cristo, ri ukʼojol ri kʼaslik Dios» (Mateo 16:16).
3. ¿Jawchiʼ kʼo wi ri Jesús kimik?
Are chiʼ xkʼis ri ukʼaslemal cho ri uwach Ulew xkʼastajisaxik junam rukʼ jun uxlabʼal y xbʼe pa ri kaj. Chilaʼ ri «Dios xunimarisaj na uqʼij [ri Jesús] chkiwach konojel» (Filipenses 2:9). Kimik ri Jesús kʼo nim taqanik pa uqʼabʼ, are kʼu xaq xiw ri Jehová ri kʼo más nim uchuqʼabʼ chuwach ri areʼ.
CHANIMARISAJ RI AWETAʼMANIK
Chqanikʼoj más chrij ri Jesús y jasche rajawaxik kqetaʼmaj uwach.
4. Ri Jesús are ta ri Dios ri kʼo nimalaj uchuqʼabʼ
Ri Biblia kubʼij che paneʼ ri Jesús are jun uxlabʼixel che kʼo pa ri kaj are kʼu ri areʼ kunimaj ri Jehová che are ri uDios y uTat. ¿Jasche kqabʼij wariʼ? Chiwilaʼ ri VIDEO rech kichʼobʼ ri kubʼij ri Biblia chrij ri ubʼanik ri Jesús rukʼ ri Dios ri kʼo nimalaj uchuqʼabʼ.
Ri e nikʼaj chi textos che kqil na kojutoʼ che uchʼobʼik jas ubʼanik ri achilanik kʼo chkixoʼl ri Jehová rukʼ ri Jesús. Chisikʼij ri textos pa kijujunal y chixtzijon chrij wariʼ:
Chisikʼij Lucas 1:30-32.
-
Junam rukʼ ri xuya ubʼixik ri ángel, ¿jas ubʼanik ri achilanik kʼo chkixoʼl ri Jesús y Jehová?
Chisikʼij Mateo 3:16, 17.
-
¿Jas xyaʼ lo ubʼixik pa ri kaj are chiʼ xubʼan uqasanjaʼ ri Jesús?
-
¿Jachin xchʼaw loq kachomaj at?
Chisikʼij Juan 14:28.
-
¿Jachin más nim ubʼanik y kʼo más taqanik pa uqʼabʼ, la are ri tat o are ri alkʼwalaxel?
-
¿Jas xraj xubʼij ri Jesús are chiʼ xubʼij Tat che ri Jehová?
Chisikʼij Juan 12:49.
-
¿La xubʼij ri Jesús che e junam rukʼ ri utat? ¿Jas kachomaj at?
5. Ri Jesús are ri Mesías
Pa ri Biblia kʼo kʼi taq profecías che keʼutoʼ ri winaq rech kkichʼobʼ uwach ri Mesías, kraj kubʼij ri xchaʼ rumal ri Dios rech keʼukol ri winaq. Chiwilaʼ ri VIDEO, che kuya ubʼixik jujun taq profecías che xtzʼaqatik are chiʼ xkʼojiʼ ri Jesús cho ri uwach Ulew.
Chisikʼij pa ri Biblia ri e profecías riʼ y chixtzijon chrij wariʼ:
Chisikʼij Miqueas 5:2 rech kiwilo jawchiʼ xalax wi ri Mesías. b
-
¿La xtzʼaqat wajun profecía riʼ are chiʼ xalax ri Jesús? (Mateo 2:1).
Chisikʼij Salmo 34:20 y Zacarías 12:10 rech kiwil jujun taq profecías che xbʼix kan chrij ri ukamikal ri Mesías.
-
¿La xetzʼaqat ri e profecías riʼ? (Juan 19:33-37).
-
¿Jas kachomaj, la are ri Jesús xbʼanowik che xetzʼaqat ri profecías riʼ?
-
¿Jas kukʼut chawach chrij ri Jesús ronojel wariʼ?
6. Retaʼmaxik uwach ri Jesús kuya utzilal chqe
Ri Biblia kubʼij che nim ubʼanik che kqetaʼmaj chrij ri Jesús y ri chak che yoʼm che rumal ri Dios. Chisikʼij Juan 14:6 y 17:3, y chixtzijon chrij wariʼ:
-
¿Jasche nim ubʼanik che kqetaʼmaj uwach ri Jesús?
Ri Jesús xukʼut chqawach ri rajawaxik kqabʼano rech kojux rachiʼl ri Dios y xukʼut ri qastzij chrij ri Jehová. Xuqujeʼ, rumal ri areʼ kojkunik kqariq ri kʼaslemal che kʼo ta ukʼisik.
RI KKICHOMAJ JUJUN WINAQ: «Ri testigos rech Jehová kekojon ta chrij ri Jesús».
-
¿Jas kabʼij riʼ?
RI XQETAʼMAJ
Ri Jesús are jun uxlabʼal che kʼo uchuqʼabʼ, are ri uKʼojol ri Dios y are ri Mesías.
¿La knaʼtaj chawe?
-
¿Jasche kbʼixik che ri Jesús are «ri nabʼe pa ronojel ri e jastaq»?
-
¿Jas chak xubʼan ri Jesús are chiʼ majaʼ kpe cho ri uwach Ulew?
-
¿Jasche qetaʼm che ri Jesús are ri Mesías?
CHAWILAʼ CHI NIKʼAJ
Chawetaʼmaj chi nikʼaj che kukʼutu che ri Jesús are ri Mesías.
«¿La qas kuya ubʼixik ri profecías re ri Biblia che Jesús are ri Mesías?» (Kʼutunem re jw.org)
Chawilaʼ we ri Biblia kubʼij che ri Dios xralkʼwalaj ri Jesús junam rukʼ jun achi che kkʼojiʼ ralkʼwal.
«¿Jasche kbʼixik che ri Jesús are ri uKʼojol ri Dios?» (Kʼutunem re jw.org)
Chawilaʼ jasche ri Biblia kchʼaw ta chrij ri trinidad.
Chawilaʼ jas xubʼan che ukʼexik ri ukʼaslemal jun ixoq are chiʼ xretaʼmaj chrij ri Jesús.
«Jun judía xubʼij jasche xukʼex ri ukojonik» (¡Despertad!, mayo 2013)
a Pa ri e kʼutunem 26 y 27 kyaʼ ubʼixik jasche ri winaq rajawaxik kekolik y jas kubʼan ri Jesús che qakolik.
Wene' xuquje' utz kawilo
PREGUNTAS CHE AMAQʼEL KBʼANIK
¿Jas ubʼanik ri etaʼmanik re ri Biblia che kkiya ri testigos rech Jehová?
Katkunik kakoj apachike Biblia pa ri etaʼmanik che kkiya ri testigos rech Jehová che tojom taj. Y katkunik kabʼij chke konojel ri afamilia y ri e awachiʼl o nikʼaj chik.
