Pa ronojel ri kojonem e kʼo winaq che kkibʼan ta nim che kibʼ xuqujeʼ utz kanimaʼ. Wariʼ are jun chike ri utz täq jastaq rumal che ri Ajawaxel kok il chike xuqujeʼ nim kerilo. Tekʼuriʼ, sibʼalaj bʼisobʼal, rumal che bʼanom kʼi itzelal pa ubʼiʼ ri kojonem (2 Corintios 4:3, 4; 11:13-15). Qatom ri kbʼix chikij jujun chike ri kojonem che kʼo kibʼanik rukʼ ri chʼoj, ri kikamisaxik winaq rech jun chik tinamit xuqujeʼ jujun chike ri winaq rech ri kojonem riʼ rukʼ choqʼabʼ keqʼoyiʼ kukʼ akʼalabʼ. ¡Wariʼ sibʼalaj uyaʼom bʼis chike ri kojonelabʼ che utz kanimaʼ! Chasikʼij uwach Mateo 24:3-5, 11, 12.

Ri qastzij kojonem kuya uqʼij ri Jehová, ri qastzij täj kojonem xa kuyoqʼo. Kukʼut molom täq tzij chirij ri Ajawaxel xuqujeʼ chirij ri keriqtaj wi ri kaminaqibʼ, xuqujeʼ kuya ubʼixik chirij jastaq che kʼo ta pa ri Loqʼalaj Pixabʼ. Tekʼuriʼ Jehová kraj che ri winaq kketaʼmaj ri qastzij chirij areʼ. Chasikʼij uwach Ezequiel 18:4 xuqujeʼ 1 Timoteo 2:3-5.

Ri Ajawaxel kukoj täj ri kkibʼij o kkibʼan ri winaq rech ri kojonem che kkibʼij che kkiloqʼoqʼej, tekʼuriʼ are kkiloqʼoqʼej ri jastaq rech ri Satanás (Santiago 4:4). Ri Loqʼalaj Pixabʼ kubʼij «Nimalaj Babilonia» chike ronojel ri kojonem che e qastzij täj, wajun bʼiʼaj are ubʼiʼ ri tinamit ojer jachiʼ xumaj lo ri qastzij täj kojonem chiʼ qʼaxinaq chi ri Nimalaj Jabʼ che xbʼan pa uqʼij ri Noé. Xaq jubʼiqʼ kraj, ri Ajawaxel kusachisaj kiwach ri e kojonem che tijan kkisachisaj kichomanik ri winaq xuqujeʼ kkibʼan kʼäx chike. Chasikʼij uwach Apocalipsis 17:1, 2, 5, 16, 17 xuqujeʼ 18:8.

Tekʼuriʼ, Jehová kol il chike ri e utz winaq che e kʼo pa kojonem che e qastzij täj cho ronojel ri uwach Ulew rumal laʼ tijan keʼumulij. ¿Jas kbʼan che kimulixik? Tijan kkʼut ri qastzij chkiwach. Chasikʼij uwach Miqueas 4:2, 5.

Jehová kol il chike ri winaq che kkiloqʼoqʼej ri qastzij xuqujeʼ kkaj kkibʼan ri utz. Rumal laʼ kubʼij chike che kkiya kan ri qastzij täj kojonem. We qastzij kkiloqʼoqʼej, kkaj riʼ kkiya kan ronojel rech kkibʼan ri jastaq che utz krilo. Chasikʼij uwach Apocalipsis 18:4.

Pa ri nabʼe 100 junabʼ, kʼi winaq che utz kanimaʼ utz xkita ri xbʼix chike kumal ri apóstoles. Jehová xukʼut chkiwach wa winaq riʼ jun kʼakʼ ubʼanik ri jastaq pa kikʼaslemal rech kʼo upatan, kʼo kikotemal xuqujeʼ xuya jun kubʼsal kʼuʼx chike. Junam kukʼ wa winaq riʼ, öj xuqujeʼ kojkunik kqakʼutu che utz kqata ri kubʼij ri Loqʼalaj Pixabʼ chiʼ nabʼe kqaya uqʼijilaxik ri Jehová pa qakʼaslemal. Chasikʼij uwach 1 Tesalonicenses 1:8, 9 xuqujeʼ 2:13.

Jehová sibʼalaj keraj ri winaq che kkiya kan ri qastzij täj kojonem xuqujeʼ kkiloqʼoqʼej ri qastzij kojonem. Konojel ri winaq riʼ kkiriq jun utz kachilanik rukʼ, kkiriq ri kiloqʼoqʼenik e kʼi winaq che tijan kkibʼan ri kraj ri Ajawaxel xuqujeʼ kekunik kkiriq jun kikʼaslemal che kʼot ukʼisik. ¿La kawaj at kariq wa täq tewchibʼal riʼ? Chasikʼij uwach Marcos 10:29, 30 xuqujeʼ 2 Corintios 6:17, 18.

Chiʼ ri Jehová kusachisaj uwach ronojel ri kojonem che e qastzij täj, kukʼam lo kikotemal chike konojel ri e kʼo pa ri uwach Ulew. Ri e kojonem riʼ kkisachisaj ta chi ri kichomanik ri winaq xuqujeʼ kubʼan ta chik che kʼo chʼoj chkixoʼl ri winaq. Konojel ri winaq kkiya uqʼij ri xa jun Ajawaxel kʼolik. ¿La utz kata wariʼ? Chasikʼij uwach Apocalipsis 18:20, 21 xuqujeʼ 21:3, 4.