«Majaʼ naj kanoq weneʼ xqachomaj che kojkun taj kqabʼan ko che ri qakojonik rukʼ ri taq wuj pa ri qatabletas o telefónos». ¿La je kachomaj at? Waʼ taq tzij riʼ xubʼij ri qachalal Geoffrey Jackson pa ri Informe 6 re ri Jupuq Ajkʼamal bʼe cho ronojel ri uwach Ulew re ri junabʼ 2020. Xuqujeʼ xubʼij: «Are kʼu kimik kqachomaj, ¿jas kqabʼan riʼ pa wajun pandemia wet mat kʼo ri aplicación JW Library qukʼ? Ri Jehová ukʼutum chqawach jas kqabʼano are chiʼ kkʼulmataj kʼaxkʼolil junam rukʼ wariʼ».

 ¿Jas ubʼanom ri Jehová che ukʼutik chqawach jas kqabʼano? ¿Jas xajwatajik rech xbʼan ri aplicación JW Library? Y, ¿jas kajwatajik rech ronojel qʼij kʼo upatan y kbʼan más utz che?

 Pa ri mayo re 2013, ri Jupuq Ajkʼamal bʼe cho ronojel ri uwach Ulew xubʼij che ri Programación re MEPS, jun departamento re ri central mundial, che kubʼan jun aplicación che kʼo ri Traducción del Nuevo Mundo chupam. Ri qachalal Paul Willies, che kchakun pa wajun departamento, xubʼij: «Ni ta jumul qayaʼom jun aplicación pa internet ri kebʼan wi descargar taq aplicaciones. Rech xqabʼan wariʼ, xqaya na kan ubʼanik nikʼaj taq chak chik, xqabʼan jun equipo y xojchakun kukʼ nikʼaj chi departamentos re Betel. Ronojel taq qʼij xqabʼan qachʼawem che ri Jehová y xqil ri utobʼanik: are chiʼ kʼateʼ cinco meses qʼaxinaq, ri aplicación xyaʼ ubʼixik pa ri reunión anual».

 Tekʼuriʼ xqilo che kʼo chi jun jastaq kʼax ubʼanik: kbʼan jun biblioteca che ri aplicación JW Library, kyaʼ kʼi taq wuj chupam y pa kʼi chʼabʼal. Pa enero re 2015, chupam ri aplicación e kʼo chi kʼi wuj pa inglés y are chiʼ xqʼax seis meses, kʼo chi wuj re kʼi chʼabʼal.

 Ri e qachalal kibʼanom kʼi jastaq rech kbʼan más utz che wajun aplicación. Jun kʼutbʼal, kʼo videos chupam y jun pestaña che kojukʼam bʼi pa ri e wuj che kqanikʼoj pa ri e riqbʼal ibʼ. Xuqujeʼ kojkun chik kqatzukuj ri referencias re ri Guía de estudio chupam ri Biblia.

 Ronojel taq ikʼ kkoj ri aplicación JW Library pa más che 15 millones dispositivos. Chke waʼ 15 millones, 8 millones ronojel taq qʼij kkikojo. ¿Jas kajwatajik rech wajun aplicación utz kchakun pa kʼi taq dispositivos? Ri qachalal Paul Willies kubʼij: «Wajun chak riʼ kkʼis taj, rumal che amaqʼel kkoj kʼakʼ taq chakubʼal chupam rech kʼax ta kbʼan che ukojik. Rumal che ri sistemas che kʼo pa jun teléfono o pa jun tableta amaqʼel kebʼan actualizar, oj xuqujeʼ kqabʼan actualizar ri aplicación rech utz kchakun pa taq ri versiones re ri tabletas o teléfonos. Y rumal che ronojel taq qʼij kʼo kʼakʼ taq grabaciones y e wuj keya pa ri aplicación JW Library, rumal laʼ rajawaxik kqabʼan actualizar ri software kʼo chupam ri aplicación y rech kqʼelobʼ taj». Kimik, pa ri aplicación JW Library kʼo weneʼ 200,000 wuj y más che 600,000 grabaciones re audio y video pa jalajoj taq chʼabʼal.

 Rech ronojel taq qʼij kojkunik kojok pa wajun aplicación, xaq xiw ta rajawaxik equipos informáticos. Xaneʼ rajawaxik kloqʼ licencias re software. Y pa jun junabʼ ktoj 1,500 dólares xa rumal jun licencia. Xuqujeʼ, ri Departamento re Programación re MEPS kusach 10,000 dólares pa jun junabʼ che uloqʼik dispositivos che jalajoj taq ri umarcas rech qas kketaʼmaj we utz kchakun ri aplicación pa taq ri computadoras, tablets y teléfonos che kʼateʼ xeʼel loq.

 Rumal ri JW Library, qas ta kqasach chi uwach nim rajil che ubʼanik imprimir, ukojik rij y utaqik bʼi ri wuj. Jun kʼutbʼal, pa ri junabʼ 2013 xbʼan imprimir 12 millones folletos re ri Unikʼoxik ri uTzij ri Dios ronojel taq qʼij. Are kʼu, pa ri junabʼ 2020, xa 5 millones chik xbʼan imprimir paneʼ xekʼiyar 700,000 publicadores más pa ronojel ri uwach Ulew pa riʼ ri junabʼ. ¿Jas kʼu xkʼulmatajik? Rumal che kimik ri e qachalal sibʼalaj e kʼi kkisikʼij uwach ri texto diario pa JW Library. a

 Ri JW Library katutoʼ pa kʼi jastaq. Jun kʼutbʼal, ri qachalal Geneviève, aj Canadá, kuchomaj che wajun aplicación utoʼom rech sibʼalaj utz kubʼan che unikʼoxik uwach ri Biblia. Areʼ kubʼij: «Kinchomaj che wet ronojel qʼij kwesaj jun montón libros rech kinmaj unikʼoxik uwach ri Biblia, ronojel qʼij ta riʼ kinbʼano. Are kʼu, ri aplicación xaq xiw kintzij ri nutablet y chilaʼ kʼo wi ronojel ri rajawaxik chwe rech kinnikʼoj ri Biblia. Rumal che amaqʼel kinnikʼoj uwach ri Biblia ubʼanom ko ri nukojonik y kinnaʼo che tajin kinqebʼ más rukʼ ri Jehová».

 Wajun aplicación sibʼalaj oj utoʼm pa wajun pandemia re ri COVID-19. Jun kʼutbʼal, ri qachalal Charlyn, aj Estados Unidos, kubʼij: «Are chiʼ xumaj ri COVID-19 apawijeʼ taneʼ ri kinbʼe wi, kʼo ta jumul nukojom chi ri taq wuj kebʼan imprimir. Pa ri aplicación JW Library kinriq wi ronojel ri rajawaxik chwe rech kinbʼan ko che ri nukojonik. Sibʼalaj kinmaltyoxin che ri Jehová rumal che usipam wajun jeʼlalaj jastaq chqe».

 Qonojel kqachomaj che qastzij wi ri kubʼij ri qachalal Faye, aj Filipinas. Areʼ kubʼij: «Wajun aplicación sibʼalaj utz, kinriq ronojel ri rajawaxik chwe rech kinqebʼ más rukʼ ri Jehová. Kinkoj wajun aplicación are chiʼ kinsikʼij uwach apachike kʼutunem aqʼabʼil, rech kinta jun audio are chiʼ kinbʼan nuchak pa ja, are chiʼ kintijoj wibʼ che ri e riqbʼal ibʼ y are chiʼ kinnikʼoj uwach ri Biblia. Are chiʼ kʼo ta tajin kinbʼano kwil videos chupam. Y are chiʼ nubʼanom fila che reyexik jun jastaq, kinsikʼij ri Biblia y ri e wuj che kʼo chupam. ¡Sibʼalaj utz kwil wajun aplicación!».

 Xuqujeʼ sibʼalaj utz wajun aplicación are chiʼ kqatzijoj ri utzij ri Dios. Jun kʼutbʼal, jun qachalal ixoq aj Camerún sibʼalaj utz xril jun texto re ri Biblia che xukoj jun chi qachalal rachiʼl bʼi che utzijoxik ri utzij ri Dios. Are chiʼ qʼaxinaq chi kebʼ oxibʼ semanas xraj xukoj riʼ ri texto, are kʼu knaʼtaj ta che jas texto. Ri areʼ kubʼij: «Ri xintoʼwik are che knaʼtaj jun tzij chwe ri kʼo pa ri texto. Xinok pa ri aplicación, xinok pa ri Biblia y ri tzij che knaʼtaj chwe xintzʼibʼaj pa ri buscador rech xinriqo. Paneʼ ksach pa nujolom ri textos, are kʼu kinriqo rumal che kinutoʼ ri aplicación».

 Rumal ri ikuchuj pa donate.dan124.com, kojkunik kqakoj ri aplicación JW Library y keqakoj ri e chakubʼal chupam rech kʼo upatan ronojel qʼij y kqabʼan más utz che. Rukʼ wariʼ konojel ri e qachalal re ronojel ri uwach Ulew kkiriq ri utzilal kuyaʼo. Sibʼalaj maltyox che ri ikuchuj kiya rukʼ ronojel iwanimaʼ.

1. Pa ri octubre 2013: Xel lo ri aplicación kʼo ri Traducción del Nuevo Mundo pa inglés chupam.

2. Pa ri enero 2015: Xekoj más wuj re ri chʼabʼal inglés chupam, tekʼuriʼ xeya chi e wuj rech kʼi chʼabʼal.

3. Pa ri noviembre 2015: Kbʼan chik kjuchʼ (resaltar) ri texto.

4. Pa ri mayo 2016: Xkoj ri ícono «Reuniones» chupam.

5. Pa ri mayo 2017: Utz chik kbʼan notas chupam.

6. Pa ri diciembre 2017: Utz chik kkoj ri Biblia de estudio pa inglés.

7. Pa ri marzo 2019: Utz chik kbʼan descargar ri audios, kil ri videos rukʼ internet paneʼ bʼanom ta descargar y kriqitaj chi ri referencias re ri Guía de estudio.

8. Pa ri enero 2021: Xekoj chi nikʼaj chakubʼal chupam rech ri kbʼan che uyaʼik etaʼmanik rukʼ ri wuj Kʼaslemal kʼo ta ukʼisik.