«¡Sibʼalaj utz kwil ri Ja rech Ajawbʼal!». Xcha jun qachalal ali ubʼiʼ Nicole, che kel pa Colombia. ¿Jasche sibʼalaj utz kril ri Ja rech Ajawbʼal? Ri areʼ kubʼij: «Pa ri Ja rech Ajawbʼal kinkunik kinkʼojiʼ kukʼ ri e qachalal re ri congregación». ¿La je kanaʼ at junam rukʼ ri Nicole?

 Pa ronojel ri uwach Ulew, ri oj testigos rech Jehová kqamulij qibʼ weneʼ pa 63,000 Ja rech Ajawbʼal. Pa taq ri e kʼolbʼal riʼ xaq xiw ta kojkunik kqaqʼijilaj ri Dios. Xaneʼ junam rukʼ ri xubʼij ri David, jun precursor regular che kel pa Colombia: «Ri e Ja rech Ajawbʼal, kubʼano che ri e winaq kkaj kketaʼmaj más chrij ri utzij Jehová. Ri winaq che kojkisolij pa ri e Ja rech Ajawbʼal sibʼalaj kkimay are chiʼ kkil ri qabʼanom che kichʼajchʼobʼisaxik». Y wariʼ kʼi chuqʼabʼ kojom che rech amaqʼel e chʼajchʼoj y che kilix jas ri kajwataj chke rech jeʼl kekaʼyik. ¿Jas kqabʼan che kichajixik?

 Are ri qachalal ri kkimulij kibʼ chupam ri Ja rech Ajawbʼal keʼilow ri kajwataj che. Rumal laʼ ri e qachalal amaqʼel kkijosqʼij, kkibʼan chak rech kichajij y kkisukʼumaj ri jastaq che tajin keqʼelobʼik.

 Rech ketoʼ ri congregaciones, ri Departamento Local de Diseño y Construcción (LDC) keʼutaq bʼi jujun qachalal o capacitadores rech kekitijoj ri qachalal che e kʼo pa taq ri congregaciones, jeriʼ utz kkibʼan che uchajixik ri Ja rech Ajawbʼal. Chkijujunal ri capacitadores kkichajij seis o diez Ja rech Ajawbʼal. Waʼ taq qachalal riʼ keʼopan pa taq ri congregaciones rech kekitijoj ri e qachalal rech qas utz kkibʼan che uchajixik ri Ja rech Ajawbʼal. Churox junabʼ, kekilaʼ y kkisolij ri e Ja riʼ rech kkilo we kʼo rajawaxik ksukʼumaxik rech kkiriq ta kʼax ri e qachalal che kkimulij kibʼ chupam.

 Konojel ri e qachalal sibʼalaj kkimaltyoxij ri tijonik che kyaʼ chke. Jun qachalal ixoq che kel pa India, ubʼiʼ Indhumathi kubʼij: «Sibʼalaj utz ri xkʼut chqawach. Kinkikot rumal ri xwetaʼmaj rumal che qas kinkunik chik kinchajij ri Ja rech Ajawbʼal». Ri qachalal Evans, che kel pa Kenia, kubʼij: «Xqilo che nim ubʼanik usukʼumaxik ri jastaq, paneʼ xa jun alaj nitzʼ, rech knimar ta ri kʼax che ri Ja rech Ajawbʼal y ksach ta nim pwaq».

 Uchajixik y ukojik jun Ja rech Ajawbʼal pa jun junabʼ sibʼalaj kʼi dólares kukʼam bʼik. a Rumal ri tinamit che kriqitaj wi, rumal che qʼel chik o kʼakʼ na y jampaʼ congregaciones kekojowik. ¿Jawiʼ kekʼam wi ri pwaq che kkojik?

 Ri pwaq che kkoj che uchajixik ri Ja rech Ajawbʼal pa ri e kuchuj kesax wi. Jun qachalal che kel pa Kazajistán ubʼiʼ Alexander kubʼij: «Ri pwaq kkoj che utojik internet, joron y luz. Y nikʼaj chik kkoj che uloqʼik jastaq junam rukʼ, wuj re baño, guantes, pinturas y ri jastaq che kajwatajik are chiʼ kjosqʼix ri Ja rech Ajawbʼal». Ri pwaq che ktotaj kanoq kyaʼ pa ri obra mundial rech kebʼan nimaʼq taq chak pa nikʼaj chi tinamit.

 Jujun taq mul ri pwaq che kajwataj che ri mantenimiento rech ri Ja rech Ajawbʼal más kʼi na chuwach ri pwaq che ksach pa kebʼ o oxibʼ ikʼ che uchajixik. We jeriʼ ri e kʼamal bʼe ketzijon rukʼ ri qachalal che kchakun rukʼ ri LDC. We ri LDC kubʼij che kuya kbʼan ri chak, are kkoj ri pwaq re ri obra mundial rech kbʼan ri chak. Pa ri junabʼ re servicio 2023, xbʼan 8,793 chak, y xsach 76,6 millones de dólares chrij. Chqilaʼ kebʼ chke ri e chak riʼ.

 Pa Angola, kʼo jun Ja rech Ajawbʼal che 15 junabʼ chik wokom y kʼo kʼi jastaq rajawaxik ksukʼumax che. Rajawaxik kekʼex ronojel ri alambres y nikʼaj chi jastaq re ri luz xuqujeʼ e jisjobʼinaq chi ri taq paredes. Y ri vecinos amaqʼel kkichʼaʼ are chiʼ kqʼax bʼi ri joron che kkoj pa ri Ja rech Ajawbʼal pa taq ri kachoch. Rech kkisukʼumaj ri e kʼax riʼ, ri e qachalal re ri LDC aninaq xkimajij ri chak che xukʼam bʼi 9,285 dólares. Ri vecinos sibʼalaj xkimay ri xbʼan che ri chak y sibʼalaj xkimaltyoxij.

 Pa Polonia, ri Ja rech Ajawbʼal kʼo chi tel che ri uwiʼ, y ri alfombra qʼel chik. Ri LDC xkibʼan jun chak rech kkisukʼumaj ri uwiʼ y ktzʼuj ta chik xuqujeʼ xkikʼex ri alfombra. Ri pwaq che xsach chrij wajun chak riʼ are 9,757 dólares. Rumal ri chak che xbʼanik rajawaxik ta chik ksach kʼi pwaq che usukʼumaxik pa ri petinaq.

 Are chiʼ keqachajij ri e Ja rech Ajawbʼal kubʼano che ksach ta más pwaq chkij y kuya uqʼij ri Jehová rumal che sibʼalaj jeʼl keʼilitajik. Jun qachalal ubʼiʼ Shaun che kel pa ri archipiélago re Tonga kubʼij: «Rumal ri e chak che tajin kebʼan che uchajixik ri Ja rech Ajawbʼal kuya kqaqʼijilaj ri Jehová pa taq chʼajchʼojalaj kʼolbʼal. Xuqujeʼ kubʼano che utz kechʼaw ri winaq chrij ri Jehová. Sibʼalaj kojkikotik are chiʼ keqasikʼij e nikʼaj chik pa ri Ja rech Ajawbʼal».

 Konojel kojkunik kqachajij ri Ja rech Ajawbʼal y kqaya ri qatobʼanik are chiʼ kjosqʼixik. Ri qachalal Marino, jun chke ri capacitadores re mantenimiento pa Australia, kubʼij: «Uchajixik ri e Ja rech Ajawbʼal are jun nimalaj eqeleʼn y konojel kojkunik kqaya ri qatobʼanik. We je waʼ kqabʼano kojkunik kojtobʼanik rech utz kbʼan che ukojik ri kuchuj, jeriʼ kuya ketoʼ ri e nikʼaj chik».

 Jun qachalal che sibʼalaj utz krilo ktobʼan pa ri mantenimiento re ri Ja rech Ajawbʼal ubʼiʼ Joel che kel pa India, kubʼij: «Are chiʼ kinya ri nutobʼanik kukʼ ri qachalal kinutoʼo rech kinchoman chrij ri kqabʼan pa ri kʼakʼ uwach Ulew». Ri qachalal Nicole che xojchʼaw kan chrij nabʼe, kubʼij: «Majaʼ naj kanoq, ri qachalal xkisukʼumaj ri teqʼ che kʼo puwiʼ ri baño, y ri in are xinsuʼ ri piso. Qastzij che are ta in xinsukʼumaj ri kʼax are kʼu xinya ri nutobʼanik rech kʼo ta jun ktzaqik».

 We ri at kawaj kaya ri atobʼanik are chiʼ kesukʼumax ri e Ja rech Ajawbʼal, chattzijon kukʼ ri e kʼamal bʼe che e kʼo pa ri a congregación. Masach chawe che ri akuchuj che kayaʼo xaq xiw ta ktobʼan che ri a congregación xaneʼ ktobʼan chke konojel ri e Ja rech Ajawbʼal che e kʼo pa ronojel ri uwach Ulew. Katkunik kaya ri akuchuj pa ri kaxon re kuchuj che kʼo pa ri a congregación o pa donate.dan124.com. Sibʼalaj maltyox rumal ri akuchuj.