1. a) ¿Jas xkibʼan che uchʼobʼik ri kubʼij ri Biblia ri qachalal Russell xuqujeʼ ri e rachiʼl? b) ¿Jas xkichʼobʼo?

QʼAXINAQ chi más che cien junabʼ, ri qachalal Russell xuqujeʼ e nikʼaj rachiʼl xkimulij kibʼ rech kkichʼobʼ ri kukʼut ri Biblia chrij ri Jehová, Jesucristo, ri kamikal xuqujeʼ ri tojbʼal mak. Ri xkibʼano are che jun chke kubʼan jun pregunta, tekʼuriʼ kojonel kkitzukuj ri texto che kchʼaw chrij ri kʼutunem. Tekʼuriʼ kkitzʼibʼaj ri xkichʼobʼo. Rukʼ ri utobʼanik ri Jehová ri cristianos riʼ xkichʼobʼ ri kubʼij ri Biblia che kimik nim upatan chqe oj.

2. ¿Jasche weneʼ kojsach che uchʼobʼik jun profecía re ri Biblia?

² Are chiʼ xqʼax ri qʼij, ri estudiantes re ri Biblia riʼ xkichʼobʼo che ri uchʼobʼik ri qastzij kubʼij ri Biblia chrij jun kʼutunik junam ta rukʼ ri uchʼobʼik jas kraj kubʼij jun profecía. ¿Jasche kʼax uchʼobʼik jun profecía? Ri nabʼe, are che más kʼax ta uchʼobʼik jun profecía are chiʼ tajin ktzʼaqatik o xtzʼaqatik. Ri ukabʼ are che, rajawaxik kqil ri nikʼaj chi textos jachiʼ kriqitaj wi ri profecía. We xa jun texto kqilo, kubʼano che utz ta uchʼobʼik kqabʼan che jun profecía. Weneʼ jeʼ xkʼulmataj rukʼ ri profecía re Joel. Chqilaʼ jasche rajawaxik kqakʼex ri qachomanik chrij ri profecía riʼ.

3, 4. ¿Jas ri qabʼanom che ubʼixik ri profecía re Joel 2:7-9?

³ (Chasikʼij uwach Joel 2:7-9). Joel xubʼij che e kʼiʼalaj sakʼ kkisachisaj uwach ri ulew re Israel. Ri e sakʼ riʼ kʼo kiware junam rukʼ re jun koj, ronojel ri kʼo pa kibʼe kkisachisaj uwach (Joel 1:4, 6). Pa kʼi junabʼ, xqachʼobʼo che ri profecía riʼ kraj kubʼij ri utinamit ri Jehová, che kkitanabʼaʼ ta  utzijoxik utzij ri Dios junam kukʼ ri e kʼiʼalaj sakʼ. Xqachomaj che ri chak riʼ kʼo kubʼan che ri «tinamit» kraj kubʼij ri e winaq che e kʼo pa kiqʼabʼ ri e kʼamal bʼe re ri e kojonem. *

⁴ We xaq xiw kqasikʼij ri kubʼij pa Joel 2:7-9, weneʼ kqachomaj che utz xqabʼan che uchʼobʼik. Are kʼu, we kqil ri nikʼaj chi textos, kqachʼobʼo che rajawaxik kqakʼex ri qachomanik chrij ri profecía re Joel. ¿Jasche? Chqilaʼ kajibʼ rumal.

5, 6. a) ¿Jas pregunta kpe pa qajolom are chiʼ kqil ri kubʼij Joel 2:20? b) Xuqujeʼ ¿jas pregunta kpe pa qajolom are chiʼ kqil ri kubʼij Joel 2:25?

⁵ Nabʼe, chqilaʼ ri kutzujuj ri Jehová pa Joel 2:20: «Keʼennajtajisaj taq na chiwe ri sakʼ ri kepe pa ri elebʼal qʼij [norte, La Biblia. Traducción del Nuevo Mundo]». We ri e sakʼ riʼ kraj kubʼij ri testigos rech Jehová, che kkitzijoj ri utzij ri Dios xuqujeʼ kkitoʼ ri winaq rech keʼux tijoxelabʼ junam che xubʼij kan ri Jesús, ¿jasche ri Jehová naj keʼukʼam wi bʼik? (Ezeq. 33:7-9; Mat. 28:19, 20). Ri Dios keʼukʼam ta bʼi naj ri e sukʼ taq upatanelabʼ, xaneʼ are ri e winaq o jastaq che kkibʼan kʼax chke.

⁶ Ukabʼ, chojchoman chrij ri kubʼij ri Jehová pa Joel 2:25: «In kinya na rajil kikʼexelal ri junabʼ chiwe ri xeʼitzaqo kimak kech ri kʼaxalaj taq sakʼ, we juqʼat bʼanal kʼax riʼ ri xeʼentaq uloq pa iwiʼ». Kqilo che ri Dios kubʼij che kusukʼumaj na ri kʼax xkibʼan kan ri e sakʼ. We ri e sakʼ kchʼaw chkij ri testigos rech Jehová, ¿jasche kubʼij che ri kkiya ubʼixik kubʼan kʼax? Qastzij wi, ri kkiya ubʼixik kukol kikʼaslemal ri e winaq xuqujeʼ kubʼano che e jujun chke kkikʼex ri kikʼaslemal (Ezeq. 33:8, 19). Wariʼ kukʼutu che ri kkibʼij kuya utzilal chke ri e winaq.

7. ¿Jasche nim ubʼanik ri tzij «bʼantajinaq chik» che kubʼij pa Joel 2:28, 29?

⁷ (Chasikʼij uwach Joel 2:28, 29). Urox, chqilaʼ ri ucholajil ri jastaq pa wajun profecía riʼ. Jehová kubʼij: «Are taq e bʼantajinaq chik we jastaq riʼ kinjamij na ri wuxlabʼal» kraj kubʼij, are chiʼ ri e sakʼ kibʼanom chi ri kichak. We ri e sakʼ riʼ kraj kubʼij ri kkitzijoj ri uQʼatbʼal tzij ri Dios, ¿jasche ri Jehová kʼateʼ kuya ri ruxlabʼixel pa kiwiʼ are chiʼ bʼantajinaq chi ri kichak? Rumal che, we mat xkʼojiʼ ri ruxlabʼixel ri Dios kukʼ, mat xekun riʼ xkitzijoj ri utzij ri Dios pa kʼi junabʼ rumal che ri e winaq utz ta kkilo xuqujeʼ ri e qʼatal taq tzij kkiqʼatej ri kichak.

8. ¿Jachin chkij kchʼaw wi ri e sakʼ che kubʼij pa Apocalipsis 9:1-11? (Chawilaʼ ri wachbʼal re ri uwach ri wuj).

⁸ (Chasikʼij uwach Apocalipsis 9:1-11). Chqilaʼ ri ukaj. Ojer kanoq, xqabʼij che ri e sakʼ che xubʼij Joel kraj kubʼij ri utzijoxik ri utzalaj taq tzij, rumal che pa ri wuj Apocalipsis kʼo jun profecía che kjunamataj rukʼ. Pa wajun profecía riʼ kchʼaw chkij e sakʼ che kebʼuchuwik che ri kipalaj jeʼ jas ri kipalaj winaq xuqujeʼ «pa uwiʼ ri kijolom e kʼo corona ri e jetaneʼ re qʼan pwaq» (Apoc. 9:7). Kkibʼan kʼax «chke ri winaq ri man kojom ta ri utʼiqbʼal ri Dios cho ri umetzʼal ri kipalaj» —kraj kubʼij, ri e ukʼulel ri Jehová— pa jobʼ ikʼ, junam rukʼ ri tiempo che kekʼasiʼ ri e sakʼ (Apoc. 9:4, 5). Wariʼ kqʼalajinik che tajin kchʼaw chkij ri upatanelabʼ ri Dios che e uchaʼom, rumal che e areʼ rukʼ kowil kʼuxaj kkiya ubʼixik ri uqʼatoj tzij ri Dios pa  kiwiʼ ri itzel taq winaq, che e kʼi chke utz ta kkilo.

9. ¿Jasche kejunamataj ta ri e sakʼ xril ri Joel rukʼ ri xril ri Juan?

⁹ Qastzij che pa ri profecía re Apocalipsis xuqujeʼ re Joel e kʼo jujun jastaq kejunamatajik. Are kʼu kʼo jastaq che kjunamataj taj che nim ubʼanik. Jun kʼutbʼal, ri e sakʼ che kubʼij ri profecía re Joel kkibʼan kʼax che ronojel ri tikoʼn, are kʼu ri visión che xril ri Juan «xbʼix kʼu chke chi makibʼan kʼax che ri qʼayes re ri uwach Ulew» (Joel 1:4, 6, 7; Apoc. 9:4). Ri e sakʼ che xril ri Joel e petinaq pa ri norte, are kʼu ri xril ri Juan xeʼel lo pa jun qʼequʼmalaj jul (Joel 2:20; Apoc. 9:2, 3). Pa ri wuj Joel, Jehová kubʼij che naj keʼukʼam wi bʼi ri e sakʼ, are kʼu pa Apocalipsis kyaʼ bʼe chke kkikʼis ri kichak. Kʼo ta kkʼutuwik che ri e sakʼ kubʼij Apocalipsis keqaj ta chuwach ri Dios (chawilaʼ ri recuadro « Ri e sakʼ re ri profecías: kejunamataj jubʼiqʼ, are kʼu junam ta kubʼij»).

10. Chayaʼ jun kʼutbʼal che kukʼutu che ri Biblia kkunik kukoj jun etal rech kuya ubʼixik chrij jalajoj taq jastaq.

¹⁰ Ri e jastaq che kejunamataj taj kukʼut chqawach che ri e kebʼ profecías riʼ e junam taj. Ri kraj kubʼij, are che ri e sakʼ kubʼij ri wuj re Joel xaq ta e junam rukʼ ri kubʼij ri wuj re Apocalipsis. Wariʼ kqamay taj, rumal che ri Biblia jujun taq mul kukoj  jun etal rech kuya ubʼixik jalajoj taq jastaq pa jalajoj taq bʼantajik. Jun kʼutbʼal, pa Apocalipsis 5:5 kubʼij che ri Jesús are «ri koj ajramaqʼ Judá», are kʼu pa 1 Pedro 5:8 kubʼij che ri Itzel xaq junam rukʼ «jun koj kuraq uchiʼ». Rumal che xpe pa qajolom jujun taq preguntas chrij ri profecía re Joel, rajawaxik kqanikʼoj chi jumul. Chqilaʼ.

11. ¿Jas kojutoʼ wi ri kubʼij pa Joel 1:6 xuqujeʼ 2:1, 8, 11 rech kqachʼobʼo e jachin riʼ ri e sakʼ?

¹¹ Are chiʼ kqil nikʼaj chi versículos re ri profecía re Joel, kqachʼobʼo che ri profeta riʼ are tajin kchʼaw chrij jun chʼoj che kbʼantaj na (Joel 1:6; 2:1, 8, 11). Jehová xubʼij che kukoj na «juqʼat bʼanal kʼax» (ri ajchʼojabʼ babilonios) rech kukʼajisaj kiwach ri israelitas che keniman taj (Joel 2:25). Kubʼij che ri ajchʼojabʼ riʼ kepe pa ri norte rumal che ri babilonios chilaʼ kepe wi rech kkibʼanaʼ kʼax che ri tinamit Israel (Joel 2:20, TNM). Wajun jupuq ajchʼojabʼ riʼ kjunamax kukʼ e sakʼ che kebʼuchuwik xuqujeʼ kicholajim kibʼ. Joel kuya ubʼixik wariʼ chkij ri ajchʼojabʼ: «Chkijujunal kkitakʼelaʼ taq ri kibʼe, [...] kekikʼaqaʼ kibʼ chupam ri tinamit, kexikʼinilobʼ pa kiwiʼ taq ri nimaʼq taq tapya, kepaqiʼ pa kiwiʼ taq ri ja e jachaʼ taneʼ taq elaqʼomabʼ kekitzayabʼalaʼ taq kibʼ chke taq ri wentaʼn» (Joel 2:8, 9). Chachomaj wariʼ: sibʼalaj e kʼi soldados e kʼolik. Kʼo ta jun kʼolbʼal jachiʼ kkowaj wi kibʼ. Kʼo ta jun kkunik kanimaj bʼi chkiwach ri babilonios.

12. ¿Jas xbʼan che utzʼaqatisaxik ri profecía re Joel chkij ri e sakʼ?

¹² Ri babilonios (o caldeos) kejunamataj kukʼ e sakʼ che xeʼok pa Jerusalén pa ri junabʼ 607 chuwach ri e qaqʼij. Ri Biblia kuya ubʼixik ri xubʼan «ri kajawinel ri aj caldeyibʼ chkij, xeʼuqʼoqʼej kʼut ri e ukʼojolabʼ chi chʼichʼ re chʼoj [...] man xel ta kʼu ukʼuʼx chke ri kʼojolabʼ mawi chke ri qʼapojibʼ, chke ri riʼjabʼ mawi chke ri man utz ta kaqan kiqʼabʼ. Konojel xeʼujach ri Ajawaxel pa uqʼabʼ». Xuqujeʼ kuya ubʼixik: «Xkiporoj kʼu ne ri rachoch ri Dios, xkitʼaqij ri utapya ri Jerusalén, xkitʼiq qʼaqʼ chke taq ri e rachoch ri ajawinel xkisachisaj uwach ronojel ri kʼolik ri paqal rajil» (2 Crón. 36:17, 19). Are chiʼ ri babilonios xkisach uwach ri tinamit Jerusalén, ri e winaq che keqʼax chilaʼ kkibʼij wariʼ: «Ri man e kʼo ta chi wi winaq mawi awaj, chi kqaj kʼu na pa kiqʼabʼ ri aj caldeyibʼ, keloqʼ chi na ulew» (Jer. 32:43).

13. ¿Jas kraj kubʼij ri e tzij kʼo pa Jeremías 16:16, 18?

¹³ Are chiʼ Joel xubʼij wajun profecía riʼ weneʼ qʼaxinaq chi doscientos junabʼ, ri Jehová xubʼij che Jeremías jas más kbʼantaj pa wajun chʼoj riʼ: are chiʼ xeʼok ri babilonios konojel ri israelitas che kkibʼan itzelal xkitzukuj xuqujeʼ xkichap bʼik. Jeremías 16:16, 18 kubʼij: «Kenbʼanaʼ kʼu na chi kepe kʼi taq tzukunelabʼ che kitzukuxik kkesaj kʼu uloq pa konojel taq ri kʼacheʼlaj xuqujeʼ pa kiwiʼ taq ri juyubʼ xuqujeʼ kʼa pa taq ri pek ri e kʼo xoʼl taq ri tzakʼatzaq taq abʼaj». Xuqujeʼ xubʼij: «Kinbʼan na chke chi kkikamulij kitojik taq ri ketzelal xuqujeʼ taq ri kimak». Ri israelitas kekun taj kakowaj kibʼ pa ri plo xuqujeʼ pa ri kʼicheʼlaj we kkikʼex ta ri kikʼaslemal. Qas keriqitaj na kumal ri babilonios.

14. ¿Jampaʼ xtzʼaqat ri kubʼij pa Joel 2:28, 29?

¹⁴ Joel kuya ubʼixik utz taq tzij: ri ulew kuya chi jumul uwachinik (Joel 2:23-26).  Tekʼuriʼ, xubʼij che, kriqitaj na kʼi tobʼanik rech ri kojonik. Jehová kutzujuj: «Kinjamij na ri wuxlabʼal pa uwiʼ ronojel winaq: ri e ikʼojolabʼ xuqujeʼ ri e imiʼaʼlaxelabʼ kechʼaw na wumal [...]. Xuqujeʼ pa kiwiʼ taq ri pataninelabʼ chi achijabʼ chi ixoqibʼ kinjamij na ri wuxlabʼal» (Joel 2:28, 29). ¿Jampaʼ xtzʼaqat we tzij riʼ? Xtzʼaqat taj are chiʼ ri israelitas xetzalij pa ri kitinamit, xaneʼ xtzʼaqat pa ri Pentecostés re ri junabʼ 33. ¿Jasche kqabʼij?

15. Junam rukʼ ri kubʼij pa Hechos 2:16, 17, ¿jas tzij xukʼex ri Pedro are chiʼ xchʼaw chrij ri kubʼij pa Joel 2:28, jas kukʼut wariʼ?

¹⁵ Rukʼ ri utobʼanik ri uxlabʼixel, ri apóstol Pedro xujunamaj ri kubʼij pa Joel 2:28, 29 rukʼ ri xkʼulmataj pa ri Pentecostés re ri junabʼ 33. Weneʼ a las nueve aqʼabʼil, ri Dios xuya ri ruxlabʼixel pa kiwiʼ ri e kʼo chilaʼ rumal laʼ xechʼaw chrij ri «nimaʼq taq mayibʼal ri e ubʼanom ri Dios» pa jalajoj taq chʼabʼal (Hech. 2:11). Are kʼu ¿la xqilo che ri Pedro xukoj jujun taq tzij che junam ta rukʼ ri kubʼij ri profecía re Joel? (Chasikʼij uwach Hechos 2:16, 17). Jehová xubʼano che, Pedro xukoj ta ri tzij «bʼantajinaq chik», xaneʼ xukoj ri tzij «kʼisbʼal taq qʼij» —kraj kubʼij ri kʼisbʼal taq qʼij re Jerusalén xuqujeʼ ri rachoch Dios— ri Dios kuya na ri ruxlabʼixel «pa kiwiʼ konojel ri winaq». Wariʼ kraj kubʼij che xqʼax kʼi junabʼ rech xbʼantaj ri xubʼij kan ri Joel.

16. a) Rukʼ ri utobʼanik ri ruxlabʼixel ri Dios, ¿jas xkʼulmataj rukʼ ri utzijoxik utzij ri Dios pa ri nabʼe siglo? b) ¿Jas tobʼanik uyaʼom chqe kimik?

¹⁶ Are chiʼ ri Dios xujamij ri ruxlabʼixel pa kiwiʼ ri cristianos re ri nabʼe siglo, ri utzijoxik ri utzij ri Dios xuya utz uwachinik. Are chiʼ ri apóstol Pablo xutzʼibʼaj ri ucarta chke ri Colosenses, weneʼ pa ri junabʼ 61, xubʼij che ri utzijoxik ri utz taq  tzij bʼanom chi pa «ronojel kʼolbʼal cho ri uwach Ulew» (Col. 1:23). Are chiʼ Pablo xubʼij «ronojel kʼolbʼal», tajin kchʼaw chkij konojel ri e winaq o tinamit che e kʼo pa taq uqʼij. Rumal ri ruxlabʼixel ri Jehová, kimik tajin ktzijox ri uTzij chke «konojel ri winaq cho ri uwach Ulew» (Hech. 13:47; chawilaʼ ri recuadro « Kinjamij na ri wuxlabʼal»).

17. ¿Jas chomanik kʼextajinaq chrij ri uchʼobʼik ri profecía re Joel chkij ri e sakʼ?

¹⁷ ¿Jas kʼextajinaq? Che kimik qas kqachʼobʼ ri kubʼij ri profecía re Joel 2:7-9. Pa kebʼ oxibʼ tzij, ri versículos riʼ kchʼaw ta chrij ri utzalaj utzijoxik ri utzij ri Dios, xaneʼ chrij ri kʼax che xuriq Jerusalén pa kiqʼabʼ ri babilonios pa ri junabʼ 607 chuwach ri e qaqʼij.

18. ¿Jas chak kiyaʼom ta kan ubʼanik ri upatanelabʼ ri Jehová?

¹⁸ ¿Jas xkʼextaj taj? Are che ri upatanelabʼ ri Jehová tajin kqatzijoj na ri utzalaj taq tzij pa ronojel lugar xuqujeʼ kqakoj ronojel ri qachuqʼabʼ che ubʼanik (Mat. 24:14). Kʼo ta nijun taqanik re ri qʼatbʼal tzij kubʼano che kqaya kan utzijoxik ri utzalaj taq tzij. Xuqujeʼ, rukʼ ri utewchibʼal ri Jehová, más tajin kqabʼan ri qachak, rukʼ kowil kʼuxaj tajin kqaya ubʼixik ri uQʼatoj tzij ri Dios. Rukʼ machʼachʼem kqatzukuj ri utobʼanik ri Jehová rech kqachʼobʼ ri profecías che kʼo pa ri Biblia xuqujeʼ qas qetaʼm che kopan na ri qʼij rech qas kqachʼobʼ «ronojel ri qastzij» (Juan 16:13).