1. ¿Jasche Jehová xubʼan ri kʼaslemal?

PA JUN tiempo, ri Jehová xkanaj utukel, are kʼu rumal ta wariʼ xbʼisonik. Rajawaxik ta jun jastaq che rech kkikotik. Are kʼu kraj che e nikʼaj chik kkiriq ri kikotemal che kuya ri kʼaslemal. Rumal ri uloqʼoqʼebʼal xubʼan ri kʼaslemal (Sal. 36:9; 1 Juan 4:19).

2. ¿Jas xkinaʼ ri ángeles y ri Jesús are chiʼ ri Jehová xubʼan ri nikʼaj chi jastaq?

² Nabʼe, Jehová xubʼan ri uKʼojol, Jesús. Rumal laʼ rumal ri areʼ «xebʼan konojel ri jastaq» jun chke are ri millones re ángeles (Col. 1:16). Ri Jesús sibʼalaj xkikotik che xchakun rukʼ ri uTat (Prov. 8:30). Ri ángeles xuqujeʼ xekikotik rumal che xkil ri Jehová y ri Jesús are chiʼ xkibʼan ri kaj y ri uwach Ulew. Ri Biblia kubʼij che ri ángeles «kebʼixon» rukʼ kikotemal, qastzij riʼ che xkiya ta kan ubʼixoxik che ri Jehová kʼa chiʼ xtotaj che kibʼanik ri e winaq (Job 38:7; Prov. 8:31). Ronojel ri jastaq che xubʼano kukʼut ri uloqʼoqʼebʼal y ri unojibʼal (Sal. 104:24; Rom. 1:20).

3. Junam rukʼ ri kubʼij 1 Corintios 15:21, 22, ¿jas kkiriq ri winaq rumal ri tojbʼal mak xuya ri Jesús?

³ Jehová kraj che ri e winaq kekʼasiʼ chbʼe qʼij saq pa ri jeʼlalaj uwach Ulew che xubʼano. Are kʼu chiʼ ri Adán y Eva xkinimaj ta ri loqʼalaj kiTat, xekun ta chik xkiriq ri kʼaslemal kʼo ta ukʼisik (Rom. 5:12). ¿Jas xubʼan ri Jehová? Aninaq  xuya ubʼixik ri kubʼan che utoqʼobʼisaxik kiwach ri e winaq (Gén. 3:15). Xuchomaj che are kuya ri ukʼaslemal ri uKʼojol rech keresaj ri kalkʼwal ri Adán y Eva pa ri makaj y ri kamikal. Rukʼ wariʼ, xuya bʼe chke ri winaq pa kijujunal che kkichaʼ we kkaj kkipatanij y we kkaj ri kʼaslemal che kʼo ta ukʼisik (Juan 3:16; Rom. 6:23; chasikʼij uwach 1 Corintios 15:21, 22).

4. ¿Jas kqanikʼoj na pa wajun kʼutunem riʼ?

⁴ Kʼo jujun preguntas chrij ri kʼastajibʼal che utzujum ri Dios. Jun kʼutbʼal, ¿jas ubʼanik riʼ ri kʼastajibʼal?, ¿la kqachʼobʼ na kiwach ri qachalal o qachiʼl chiʼ kekʼastaj loq?, ¿jasche ri kʼastajibʼal kuya nimalaj kikotemal? xuqujeʼ ¿jas kubʼan ri kʼastajibʼal che qatoʼik rech nim kqil wi ri uloqʼoqʼebʼal, ri unojibʼal y ri upaciencia ri Jehová? Chqilaʼ ri respuestas.

5. ¿Jasche kqachʼobʼo che xaq ta junam tiempo kekʼastaj lo konojel ri kaminaqibʼ?

⁵ Rumal ri uKʼojol ri Jehová keʼukʼastajisaj na millones y millones winaq. Are kʼu, weneʼ xaq ta junam tiempo kekʼastajisax lo konojel ri kaminaqibʼ. ¿Jasche kqabʼij wariʼ? Rumal che we xaq kʼateʼ kekʼastaj lo kʼiʼalaj winaq cho ri uwach Ulew, kubʼano che kʼo ta jamaril y cholajil. Are kʼu ri Jehová utz ta kril wariʼ. Retaʼm che, rech kʼo jamaril rajawaxik kʼo cholajil (1 Cor. 14:33). Jehová xukʼutu che kʼo unojibʼal y upaciencia are chiʼ nojimal chi nojimal xkibʼan ri uwach Ulew rukʼ ri Jesús. Qastzij riʼ che ri Jesús, kukʼut ri bʼantajik riʼ pa ri Mil Junabʼ chiʼ kuQʼat tzij are chiʼ keʼutoʼ ri winaq ri kekam ta kan pa ri Armagedón che usukʼumaxik ri uwach Ulew chke ri kekʼastaj loq.

6. Junam rukʼ ri kubʼij Hechos 24:15, ¿e jachin e kʼo chkixoʼl ri kekʼastaj loq?

 ⁶ Are kʼu ri más rajawaxik che kkibʼan ri winaq che kekʼasiʼ kan pa ri chʼoj Armagedón, are ukʼutik chrij ri uQʼatbʼal tzij y ri utaqanik ri Dios chkiwach ri kekʼastaj na loq. ¿Jasche rajawaxik kbʼan wariʼ? Rumal che e kʼi chke ri kekʼastaj na loq are ri winaq e «lawalo» o e sukʼ taj che kubʼij ri Biblia (chasikʼij uwach Hechos 24:15). Rajawaxik che e areʼ kkikʼex kʼi jastaq pa ri kikʼaslemal rech kkiriq ri utzilal che kuya ri tojbʼal mak che xuya ri Cristo. Qastzij riʼ che kajwataj nim chak che kitoʼik ri millones winaq rech kketaʼmaj ri qastzij chrij ri Dios. ¿La pa kijujunal kqaya ri etaʼmanik chke, junam rukʼ ri kqabʼan kimik? ¿La kbʼix chke jas congregación kebʼe wi y la ketijoxik rech kkikʼut chi chkiwach ri kekʼastaj loq? Rajawaxik kqeyej na rech kqetaʼmaj ri respuestas. Ri qetaʼm are che chiʼ kkʼis ri uQʼatoj tzij ri Cristo pa ri Mil Junabʼ «ri etaʼmanik ri kuyaʼ ri Ajawaxel kunojisaj na ronojel ri uwach Ulew» (Is. 11:9). ¡Sibʼalaj kʼi qachak pa ri mil junabʼ!

7. ¿Jasche ri upatanelabʼ ri Jehová rukʼ ronojel kanimaʼ kkitoʼ ri kekʼastaj loq?

⁷ Pa ri tiempo re ri mil junabʼ, konojel ri upatanelabʼ ri Jehová rajawaxik kkikʼex ri kikʼaslemal rech keqaj chuwach. Rumal laʼ, kkichʼobʼo che rajawaxik kkitoʼ ri kekʼastaj loq rumal che kajwataj chuqʼabʼ chuwach ri makaj y ubʼanik ri utz chuwach ri Jehová (1 Ped. 3:8). Are chiʼ ri winaq riʼ kkil ri upatanelabʼ ri Dios che kemachʼachʼik, kkikoj kichuqʼabʼ che ukʼexik ri kikʼaslemal y ubʼanik ri utz chuwach ri Jehová, qastzij riʼ che e areʼ xuqujeʼ kkaj kkiqʼijilaj ri Jehová (Filip. 2:12).

8. ¿Jasche kojkunik kqabʼij che kchʼobʼotaj na kiwach ri kekʼastaj loq kumal ri kifamiliares o kachiʼl?

⁸ Kʼo kʼi kkʼutuwik che qas kqakojo che ri kaminaq kifamiliar o kachiʼl kkichʼobʼ na kiwach chiʼ kekʼastaj loq. Jun kʼutbʼal, rumal ri kʼastajibʼal che kubʼij ri Biblia, kukʼutu che weneʼ ri winaq che kekʼastaj loq ukʼexom ta ri kikaʼybʼal, ri kechʼawik y ri kichomanik. Xuqujeʼ, chnaʼtaj chqe che ri Jesús xubʼij che ri kamikal kjunamataj rukʼ ri waram y ri uwalajisaxik jun winaq pa ri kamikal kjunamataj rukʼ ukʼusaxik jun winaq che waram (Mat. 9:18, 24; Juan 11:11-13). Are chiʼ ri e winaq kekʼastaj che waram, ri kekaʼyik, ri kipuqul y ri kichomanik kkʼextaj taj, xaq junam rukʼ are chiʼ xewarik. Chojchoman chrij ri xukʼulmaj ri Lázaro. Are chiʼ ri Jesús xukʼasuj, kaminaq chi kajibʼ qʼij, rumal laʼ tajin kqʼayik. Are kʼu ri e ranabʼ chanim xkichʼobʼ uwach, y qastzij riʼ che areʼ xuqujeʼ xuchʼobʼ kiwach (Juan 11:38-44; 12:1, 2).

9. ¿Jasche ri kekʼastaj loq tzʼaqat ta ri kikʼaslemal?

⁹ Jehová kutzujuj che, chiʼ ri Cristo kuqʼat tzij kʼo ta chi jun winaq kubʼij: «In yawabʼ» (Is. 33:24; Rom. 6:7). Rumal laʼ, are chiʼ ri Dios kubʼan chi jumul ri e winaq che e kaminaq kuya jun utzalaj kicuerpo, e yawabʼ ta chik. Are kʼu, aninaq taj keʼux tzʼaqat. Rumal che we tzʼaqat chi ri kikʼaslemal, kchʼobʼotaj ta chi kiwach riʼ kumal ri kifamilias. Wariʼ kukʼutu, che nojimal chi nojimal ri winaq kkiriq ri tzʼaqatalaj kʼaslemal pa ri tiempo re ri Mil Junabʼ che kuQʼat tzij ri Cristo. Are chiʼ kkʼis ri tiempo re ri mil junabʼ, ri Jesús kutzelej ri Qʼatbʼal tzij che ri uTat. Rumal  ri qʼatbʼal tzij re mil junabʼ ktzʼaqatisax ronojel ri xraj ri Jehová xuqujeʼ ri winaq kkiriq na ri tzʼaqatalaj kʼaslemal (1 Cor. 15:24-28; Apoc. 20:1-3).

10. ¿Jas kqanaʼ riʼ rumal ri kʼastajibʼal?

¹⁰ Chqachomaj ri kqanaʼo are chiʼ kqil kiwach ri qachiʼl o qafamiliar chiʼ kekʼastaj loq. ¿La kojtzeʼnik? ¿La are kojoqʼ rukʼ kikotemal? ¿La rumal ri nimalaj kikotemal kojbʼixon che ri Jehová? Ri qas kqakojo are che kqanaʼ jun nimalaj loqʼoqʼebʼal riʼ che ri loqʼalaj qaTat Jehová y ri uKʼojol rumal che xkiya ri kʼastajibʼal.

11. Junam rukʼ ri xubʼij ri Jesús pa Juan 5:28, 29, ¿jas kkiriq na ri kekʼastaj lo pa ri kamikal we kkinimaj ri utaqanik ri Dios?

¹¹ Chqachomaj ri kikotemal che kkinaʼ ri kekʼastaj loq rumal che kʼo chi jun kʼakʼ kikʼaslemal y are chiʼ kkinimaj ri sukʼalaj taq utaqanik ri Dios. Ri kkinimaj ri Dios «kkʼojiʼ na kikʼaslemal», are kʼu ri kkinimaj taj kyaʼ ta bʼe chke che kekʼojiʼ pa ri kotzʼiʼjalaj uwach Ulew rech kʼo jamaril (chasikʼij uwach Juan 5:28, 29; Is. 65:20).

12. ¿Jas tewchibʼal kuya ri Jehová chke ri kekʼasiʼ na chuwach ri Ulew?

¹² Pa ri uQʼatbʼal tzij ri Dios, konojel ri upatanelabʼ qas kkil na ri tzujunik kubʼij pa Proverbios 10:22: «Ri utewchibʼal ri Ajawaxel qʼinomal waʼ man kʼo ta kʼu qʼoxomal keʼukʼam uloq pa re wi». Rukʼ ri utobʼanik ri ruxlabʼixel ri Jehová, kojux qʼinom pa ri qakojonik, kraj kubʼij, kojux más junam rukʼ ri Cristo rumal che nojimal chi nojimal kojux tzʼaqat taq winaq (Juan 13:15-17; Efes. 4:23, 24). Ronojel qʼij kojux más utz taq winaq xuqujeʼ ri qacuerpo kux más utz. ¡Sibʼalaj kojkikot riʼ! (Job 33:25). Tekʼuriʼ, ¿jas utzilal kuya chqe kimik ri uchomaxik chrij ri kʼastajibʼal?

13. Junam rukʼ ri kubʼij Salmo 139:1-4, ¿jas kubʼan che ukʼutik ri kʼastajibʼal che Jehová qas retaʼm qawach?

¹³ Junam rukʼ ri qilom chik, are chiʼ ri Jehová keʼuwalajisaj ri e winaq, kutzalij ri kibʼantajik xuqujeʼ kuya pa kijolom ronojel ri kibʼanom kan ojer are chiʼ majaʼ kekamik. Chojchoman chrij ri kraj kubʼij wariʼ. Jehová sibʼalaj kojuloqʼoqʼej pa qajujunal, rumal laʼ retaʼm ri kqachomaj, ri kqanaʼo, ri kqabʼij xuqujeʼ ri kqabʼano. Rumal laʼ, we rajawaxik kojuwalajisaj, kʼax ta kubʼan riʼ che uyaʼik chi jumul ri qabʼantajik xuqujeʼ ri qachomanik. Ri qʼatal tzij David retaʼm che Jehová qas retaʼm qawach chqajujunal (chasikʼij uwach Salmo 139:1-4). ¿Jas kqanaʼ are chiʼ kqachʼobʼo che Jehová sibʼalaj kojuloqʼoqʼej?

14. ¿Jas kqanaʼo are chiʼ kqachomaj che Jehová qas retaʼm qawach?

¹⁴ Uchʼobʼik che Jehová retaʼm qawach kubʼan taj che kqaxibʼij qibʼ. ¿Jasche? Chnaʼtaj chqe che areʼ sibʼalaj kojraj xuqujeʼ nim kojril wi. Xuqujeʼ, retaʼm ri jastaq che ubʼanom kʼax chqe. ¿La qastzij che wariʼ kuya jamaril chqe? Man kqachomaj taj che xaq qatukel, rumal che Jehová amaqʼel kʼo qukʼ, kril ri kubʼan che qatoʼik (2 Crón. 16:9).

15. ¿Jasche ri kʼastajibʼal are jun etal re ri unojibʼal ri Jehová?

¹⁵ Ri xibʼin ibʼ chuwach ri kamikal kʼo uchuqʼabʼ. Ri e kʼo pa uqʼabʼ ri utaqanik  ri Satanás kkikoj ri xibʼin ibʼ rech kkitaqchij ri e winaq rech kkibʼan kʼax chke ri e kachiʼl o kkiya kan ri kikojonik. Wajun xibʼin ibʼ riʼ kʼo ta kubʼan chqe oj. Qetaʼm che we ri qakʼulel kojkikamisaj, Jehová kuya chi jumul ri qakʼaslemal (Apoc. 2:10). Qas qetaʼm che kʼo ta jastaq kkibʼano che kojkʼojiʼ ta naqaj che ri qaDios (Rom. 8:35-39). Sibʼalaj nim ri unojibʼal ri Jehová are chiʼ xuya ri eyebʼal re ri kʼastajibʼal chqe. Rukʼ wajun eyebʼal riʼ, kresaj che ri Satanás jun chke ri jastaq che más kukojo y chqe oj kuya jun kowil kʼuxaj che man ksach taj.

16. ¿Jas preguntas rajawaxik kqabʼano, y jas kukʼut ri qarespuesta?

¹⁶ We ri qakʼulel kkibʼij che kkaj kojkikamisaj, ¿la kqakubʼsaj qakʼuʼx che Jehová kojuwalajisaj na? Rech kqetaʼmaj wariʼ, chojchoman chrij ri preguntas riʼ: «¿La kinkʼut rukʼ ri kinbʼan ronojel taq qʼij che kinkubʼsaj nukʼuʼx chrij ri Jehová?» (Luc. 16:10). «¿La kinkʼut rukʼ ri kinbʼan pa ri nukʼaslemal che qas kinkojo che Jehová kuya ri kajwataj chwe we nabʼe kinya ri uQʼatbʼal tzij pa ri nukʼaslemal?» (Mat. 6:31-33). We jeʼ tajin kqabʼano, wajun kubʼsal kʼuʼx riʼ kojutoʼ rech kqachʼij apachike kʼax (Prov. 3:5, 6).

17. a) ¿Jasche ri tiempo che ukojom ri Jehová che ri kʼastajibʼal are jun kʼutbʼal re ri upaciencia? b) ¿Jas kqabʼan che ukʼutik che kqamaltyoxij ri upaciencia ri Jehová?

¹⁷ Jehová uchaʼom chi ri qʼij xuqujeʼ ri hora rech kusachisaj kiwach ri itzel taq winaq re wajun uwach Ulew riʼ (Mat. 24:36). Paneʼ sibʼalaj kraj keʼukʼastajisaj ri kaminaqibʼ, amaqʼel kukʼut paciencia xuqujeʼ kubʼan ri jastaq pa ri tiempo che ubʼim (Job 14:14, 15). Tajin kreyej ri tiempo rech kubʼan ri uchomam (Juan 5:28). Kʼo kʼi rumal che kqamaltyoxij ri upaciencia ri Jehová. Jun kʼutbʼal, rumal wariʼ, e kʼi winaq e kunaq kikʼexom ri kikʼaslemal, oj xuqujeʼ (2 Ped. 3:9). Jehová kraj che e kʼi winaq kkiriq jun kikʼaslemal che kʼo ta ukʼisik. Rumal laʼ, kqakʼutu che kqamaltyoxij ri upaciencia are chiʼ kqakoj qachuqʼabʼ che kitzukuxik ri e winaq che kkaj «kkʼojiʼ junalik kikʼaslemal» xuqujeʼ cheqatoʼ rech kkiloqʼoqʼej xuqujeʼ kkipatanij ri Jehová (Hech. 13:48). Jewaʼ ri e areʼ xuqujeʼ  kekunik kkiriq ri tewchibʼal kuya ri upaciencia.

18. ¿Jasche rajawaxik kqakʼut paciencia chke ri e nikʼaj chik?

¹⁸ Rukʼ paciencia, Jehová kreyej na che ktzʼaqat ri mil junabʼ rech kux tzʼaqat ri qakʼaslemal. Xuqujeʼ kʼateʼ riʼ qas kraj kukuy ri qamak. Rumal laʼ, kqesaj uwach are chiʼ kojchoman chrij ri utz taq kibʼantajik ri e nikʼaj chik xuqujeʼ chiʼ kqakʼut paciencia chke. Chqilaʼ ri xukʼulmaj jun qachalal ixoq. Ri rachajil xuya ataques re ansiedad che y xbʼe ta chi pa ri e riqbʼal ibʼ. Areʼ xubʼij: «Wariʼ kʼax xubʼan chwe. Ri qachomam che kqabʼan rukʼ ri familia pa ri petinaq xqabʼan ta chik». Paneʼ xuriq wariʼ, wajun qachalal riʼ xukʼut loqʼoqʼenik xuqujeʼ paciencia che ri rachajil. Xukubʼsaj ukʼuʼx chrij ri Jehová y kʼo ta jumul xqʼitajik. Junam che kubʼan ri Jehová, are ta xchoman chrij ri kʼax xaneʼ are xchoman chrij ri utz taq ubʼantajik ri rachajil. Kubʼij: «Kʼo utz taq ubʼantajik ri wachajil xuqujeʼ tajin kukoj uchuqʼabʼ rech nojimal kkunatajik». Sibʼalaj nim ubʼanik che kqakʼut paciencia chke ri qafamiliares o chke ri e qachalal pa ri congregación che kiriqom kʼax.

19. ¿Jas rajawaxik kqachaʼ ubʼanik?

¹⁹ Jesús xuqujeʼ ri ángeles sibʼalaj xekikotik are chiʼ xbʼan ri uwach Ulew. Chojchoman chrij ri kikotemal kkinaʼ na are chiʼ kkilo che ri uwach Ulew knoj che e winaq che tzʼaqat kikʼaslemal, che kkiloqʼoqʼej xuqujeʼ kkipatanij ri Jehová. Xuqujeʼ chojchoman chrij ri kikotemal kkinaʼ ri keqʼatow tzij rukʼ ri Cristo pa ri kaj are chiʼ kkilo che ri e winaq kkiriq utzilal rumal ri kichak (Apoc. 4:4, 9-11; 5:9, 10). Xuqujeʼ chqachomaj ri ubʼanik ri kʼaslemal are chiʼ kʼo ta chi oqʼej rumal kʼax xaneʼ oqʼej rumal kikotemal, chiʼ ksach uwach ri yabʼil, ri bʼis xuqujeʼ ri kamikal (Apoc. 21:4). Kʼa chiʼ kopan ri qʼij riʼ, chqakojoʼ qachuqʼabʼ che resaxik uwach ri uloqʼoqʼenik, ri unojibʼal xuqujeʼ ri upaciencia ri qaTat Jehová. We jeʼ kqabʼano, amaqʼel kojkikot riʼ apastaneʼ uwach ri kʼax kqariqo (Sant. 1:2-4). Sibʼalaj kqamaltyoxij ri utzujunik ri Jehová che «kekʼastaj na ri kaminaqibʼ» (Hech. 24:15).