1. Junam rukʼ ri kubʼij 1 Tesalonicenses 5:11, ¿jas chak kojtobʼan wi qonojel?

 ¿LA BʼANOM jun Ja rech Ajawbʼal pa ri acongregación o sukʼumam? We bʼanom, qastzij riʼ che knaʼtaj chawe ri nabʼe riqbʼal ibʼ che xixkʼojiʼ pa ri kʼakʼ Ja rech Ajawbʼal. Sibʼalaj xatmaltyoxin riʼ che ri Jehová rumal ri jeʼlalaj sipanik che xuyaʼo. Y weneʼ rumal che sibʼalaj katkikotik qas ta xatkunik xabʼixoj ri nabʼe bʼixonem. Sibʼalaj nim ubʼanik wajun chak riʼ, are kʼu kʼo jun chik che más nim na ubʼanik. ¿Jas riʼ? Are uyaʼik kichuqʼabʼ ri e winaq che keʼopan pa ri Ja rech Ajawbʼal. Are chiʼ ri apóstol Pablo xutzʼibʼaj ri kubʼij ri texto re wajun kʼutunem, 1 Tesalonicenses 5:11 (chasikʼij uwach) ri areʼ xubʼij che konojel ri cristianos rajawaxik ketobʼan pa wajun chak che kjunamataj rukʼ uyakik jun ja rumal che ri tzij griega «uyaʼik chuqʼabʼ» xuqujeʼ kraj kubʼij «uyakik».

2. ¿Jas kqil na pa wajun kʼutunem riʼ?

² Rech kojkunik kqaya kichuqʼabʼ ri qachalal, chqesaj uwach ri utzalaj ukʼutbʼal ri apóstol Pablo. Ri areʼ qas xuchʼobʼ ri tajin kkikʼulmaj ri e nikʼaj chik. Rumal laʼ pa wajun kʼutunem riʼ kqil na jas xubʼan che kitoʼik ri e rachiʼl cristianos rech xkichʼij ri kʼax, rech xkʼojiʼ jamaril chkixoʼl y rech xkinimarisaj ri kikojonik chrij ri Jehová. Chqilampeʼ jas kqabʼan che resaxik uwach (1 Cor. 11:1).

3. ¿Jasche kqabʼij che ri Pablo xkʼojiʼ jun utz uchomanik?

³ Ri Pablo sibʼalaj xeraj ri cristianos. Rumal che ri areʼ xuqujeʼ xuriq jujun taq kʼax, xel ukʼuʼx y xuchʼobʼ ri keriqitaj wi ri xkiriq kʼax. Jumul, ri areʼ xkʼis ronojel ri urajil y rumal laʼ rajawaxik xchakunik rech xuriq ri xajwataj che xuqujeʼ ri ke ri e rachiʼl (Hech. 20:34). Ri uchak ri Pablo are ubʼanik ja re  atzʼyaq. Are chiʼ xopan pa Corinto xchakun kukʼ ri Áquila y ri Priscila, rumal che junam ri kichak. Are kʼu ronojel taq sábados xutzijoj ri utzij ri Dios chke ri judíos y ri griegos. Y, are chiʼ xeʼopan ri Silas y ri Timoteo, «ri Pablo xujach ribʼ che utzijoxik» ri utzij ri Dios (Hech. 18:2-5). Rumal laʼ ri más nim ubʼanik chuwach ri apóstol Pablo are ri upatanexik ri Jehová. Ri areʼ are jun ajchakalaj achi che xkunik xuya kichuqʼabʼ ri cristianos, xuya jujun taq pixabʼ chke rech kekunik kkichʼij ri kʼax y xubʼij chke che we are más ksach kikʼuʼx che uyaʼik ri kajwataj che ri kifamilia wariʼ kubʼano che are ta chi keʼok il che ri más nim ubʼanik, upatanexik ri Jehová (Filip. 1:10).

4. ¿Jas xkibʼan ri Pablo y ri Timoteo che kitoʼik ri cristianos rech xkichʼij ri kʼax?

⁴ Are chiʼ kʼateʼ xbʼan ri congregación pa Tesalónica, ri e winaq re wajun tinamit riʼ xkimaj ubʼanik kʼax chke ri cristianos. Are chiʼ jun jupuq winaq xekiriq ta ri Pablo y ri Silas, «xekicharchatej bʼik [jujun cristianos] chkiwach ri e qʼatal taq tzij re ri tinamit». Xkiraq kichiʼ xkibʼij: «¡Konojel we winaq riʼ kkikʼulelaj ri utaqanik ri nimalaj qʼatal tzij ajRoma, ri César!» (Hech. 17:6, 7). ¡Qastzij riʼ che ri cristianos xkixeʼj kibʼ are chiʼ xkilo che xkimulij kibʼ ri winaq chkij rech kbʼan kʼax chke! Weneʼ wariʼ kubʼano che kekikot ta chi che upatanexik ri Jehová. Are kʼu ri Pablo xraj taj che xkʼulmataj wariʼ. Paneʼ xeʼel bʼi rukʼ ri Silas pa ri tinamit, ri e areʼ xkitzukuj xkibʼano rech xkiya kichuqʼabʼ ri cristianos che e kʼo pa Tesalónica. Are chiʼ xqʼax ri tiempo, ri apóstol xubʼij ri e tzij riʼ chke ri tesalonicenses: «Ri Timoteo [...]. Xqataq bʼik iwukʼ che ipixbʼexik xuqujeʼ che uyaʼik ichuqʼabʼ pa ri ikojonik, rech kʼo jun mubʼan kebʼ ukʼuʼx rumal we kʼaxkʼolil riʼ» (1 Tes. 3:2, 3). Weneʼ ri Timoteo xuqujeʼ xuriq ri kʼax che xbʼan chke ri cristianos are chiʼ xkʼojiʼ pa Listra. Xril ri xubʼan ri Pablo che kitoʼik ri cristianos y ri xubʼan ri Jehová che uyaʼik kichuqʼabʼ. Rumal laʼ, qas retaʼm chik jas kubʼij chke ri cristianos rech kkixeʼj ta kibʼ (Hech. 14:8, 19-22; Heb. 12:2).

5. ¿Jas xuriq ri a Bryant are chiʼ xtoʼ rumal jun kʼamal bʼe?

⁵ ¿Jas más xubʼan ri Pablo rech xuya kichuqʼabʼ ri cristianos? Are chiʼ ri areʼ y ri Bernabé xetzalij chi bʼi pa Listra, Iconio y Antioquía, «xekikoj [...] kan taq ri tatayibʼ ri ketaqan pa jujun komon kojonelabʼ» (Hech. 14:21-23). Qastzij riʼ che ri e achijabʼ riʼ che xyaʼ kan eqeleʼn pa kiqʼabʼ xkiya kichuqʼabʼ ri cristianos, junam rukʼ ri kkibʼan ri kʼamal taq bʼe kimik. Chqilampeʼ ri xubʼij jun qachalal ubʼiʼ Bryant: «Are chiʼ xtzʼaqat 15 nujunabʼ, xojuya kan ri nutat y xesax bʼi ri nunan pa ri congregación. Sibʼalaj xinbʼisonik y xinnaʼo che xaq nutukel chik in kʼolik». ¿Jas xtoʼw ri qachalal riʼ are chiʼ xuriq wajun kʼax? Ri areʼ kubʼij: «Jun kʼamal bʼe Tony ubʼiʼ amaqʼel ktzijon wukʼ pa taq ri e riqbʼal ibʼ y kinuchʼabʼej pa nikʼaj chi qʼij. Xubʼij jujun taq experiencias chwe chkij ri e qachalal che paneʼ kiriqom kʼax rukʼ kikotemal kkipatanij ri Jehová. Xusikʼij chnuwach ri kubʼij Salmo 27:10 y kʼi mul xtzijon wukʼ chrij ri Ezequías, che xupatanij ri Jehová paneʼ ri utat xuya ta jun utz kʼutbʼal chuwach». ¿Jas xuriq ri qachalal Bryant rumal che xtoʼ rumal ri kʼamal bʼe? Ri areʼ kubʼij: «Rumal che ri a Tony xuya nuchuqʼabʼ, are chiʼ xqʼax ri tiempo xinmaj upatanexik ri Jehová pa tiempo completo, y wariʼ sibʼalaj uyaʼom nimalaj kikotemal pa ri nukʼaslemal». Rumal laʼ, ri ix ri ix kʼamal taq bʼe chixok il chke ri qachalal, junam rukʼ ri a Bryant, che kajwataj «tzij re loqʼoqʼebʼal kʼuxaj» chke (Prov. 12:25).

6. ¿Jas xubʼan ri Pablo che ukojik ri kikʼutbʼal ri e sukʼ taq upatanelabʼ ri Dios rech xuya kichuqʼabʼ e nikʼaj chik?

 ⁶ Ri apóstol Pablo xunaʼtasaj chke ri cristianos che «e kʼi qʼalajisanelabʼ» kichʼijom kʼi kʼax rumal che ri Jehová uyaʼom kichuqʼabʼ (Heb. 12:1). Ri areʼ retaʼm che ri kikʼutbʼal ri sukʼalaj taq patanelabʼ re ojer keʼutoʼo rech kkixeʼj ta kibʼ y rech are kechoman chrij «ri utinamit ri kʼaslik Dios» (Heb. 12:22). Xuqujeʼ kojutoʼ oj kimik. ¿La mat qatzij che sibʼalaj kuya qachuqʼabʼ are chiʼ kqasikʼij ri xubʼan ri Jehová che kitoʼik ri Gedeón, ri Barac, ri David, ri Samuel y e nikʼaj chik? (Heb. 11:32-35). Y je kkʼulmataj rukʼ ri kikʼutbʼal ri e utzalaj taq qachalal kimik. Pa ri central mundial kopan kʼi taq cartas kech ri e qachalal jawiʼ kibʼim wi bʼik che sibʼalaj xnimar más ri kikojonik are chiʼ xkisikʼij uwach ri kikʼaslemal jujun taq upatanelabʼ ri Jehová re kimik.

7. ¿Jas kukʼut chqawach ri pixabʼ che xuya ri apóstol Pablo pa Romanos 14:19-21?

⁷ Jun chi jastaq che kojkunik kqabʼano rech kqaya kichuqʼabʼ ri e qachalal are che kojtobʼanik rech kʼo jamaril pa ri congregación. Maqayaʼ bʼe che ri kkichomaj e nikʼaj chik kubʼano che kʼo tasoj ibʼ chqaxoʼl. Xuqujeʼ maqakoj qachuqʼabʼ rech kqabʼan ri kqaj oj are chiʼ kʼo ta jun pixabʼ re ri Biblia che kubʼij che utz ta ri tajin kqabʼano. Chqilampeʼ ri xkʼulmataj pa ri congregación re Roma, jawiʼ xekʼojiʼ wi cristianos judíos y re nikʼaj chi tinamit. Rumal che ri Taqanik che xyaʼ che ri Moisés rajawaxik ta chik knimaxik, ri e areʼ kekun chik kkitij jujun jastaq (Mar. 7:19). Kʼo jujun cristianos judíos kʼo ta kubʼij kikʼuʼx are chiʼ kkitij jujun taq jastaq. Are kʼu e kʼo nikʼaj chik utz ta xkilo. Y wariʼ xubʼano che xkʼojiʼ tasoj ibʼ pa ri congregación. Rumal laʼ ri Pablo xubʼij chke jasche sibʼalaj nim ubʼanik che kkʼojiʼ jamaril chkixoʼl, xubʼij: «Are utz na ri man utijik ta tiʼj, mawi rukʼiʼaxik uwaʼl uva, mawi kabʼan ta jun jasach ri kuchaqʼij ta wi ribʼ ri awachalal» (chasikʼij uwach Romanos 14:19-21). Rukʼ ri e tzij riʼ xeʼutoʼ ri cristianos che uchʼobʼik che ri chʼoj riʼ kubʼan kʼax chke e areʼ y chke ri qachalal pa ri congregación. Rumal laʼ ri Pablo xubʼij che kukʼex ri uchomanik rech umak ta rech ri areʼ ketzaq e nikʼaj chik (1 Cor. 9:19-22). Junam rukʼ ri Pablo, ri oj xuqujeʼ kojkunik kqaya kichuqʼabʼ e nikʼaj chik y kojtobʼanik rech kʼo ta chʼoj pa ri congregación are chiʼ jun qachalal utz ta kril jun jastaq.

8. ¿Jas xubʼan ri Pablo are chiʼ xrilo che kʼo jun jastaq tajin kuya chʼoj pa ri congregación?

⁸ ¿Jas kbʼanik we junam ta ri kichomanik ri qachalal chrij jujun jastaq che nim ubʼanik? Rech kʼo ta chʼoj chkixoʼl ri qachalal, chnaʼtaj chqe ri utzalaj kʼutbʼal che xuya kan ri Pablo. Pa ri congregación re ri nabʼe siglo xekʼojiʼ jujun taq winaq che kkibʼij che ri e judíos taj rajawaxik kkibʼan circuncidar kibʼ we keʼux cristianos, weneʼ xkibʼan wariʼ rech ri e winaq kʼax ta kechʼaw chkij (Gál. 6:12). Paneʼ ri Pablo junam ta ri uchomanik kukʼ, xukoj ta uchuqʼabʼ rech kbʼan ri kuchomaj, xaneʼ rukʼ machʼachʼem xuya ubʼixik chke ri apóstoles y ri e kʼamal bʼe che e kʼo pa Jerusalén (Hech. 15:1, 2). Rumal che xutzukuj tobʼanik, ri e kʼo pa ri congregación xekikotik y xkʼojiʼ jamaril chkixoʼl (Hech. 15:30, 31).

9. ¿Jas kqabʼano rech kqesaj uwach ri ukʼutbʼal ri apóstol Pablo?

⁹ We kkʼulmataj jun chʼoj pa ri congregación rajawaxik kqakoj qachuqʼabʼ rech kkʼojiʼ jamaril chqaxoʼl y kqataʼ kitobʼanik ri e qachalal che e ukojom ri Jehová che uchajixik  ri congregación. Ri e qawuj y ri e pixabʼ che uyaʼom ri utinamit ri Jehová kojkitoʼo rumal che esam pa ri Biblia. We kqakoj qachuqʼabʼ che unimaxik ri e pixabʼ che kuya ri utinamit ri Jehová y are ta kqabʼan ri kqachomaj oj, kojtobʼanik rech kʼo jamaril pa ri congregación.

10. ¿Jas jun chi jastaq xubʼan ri Pablo rech xkʼojiʼ jamaril pa ri congregación?

¹⁰ Ri Pablo xuqujeʼ xukʼutu che kraj che kkʼojiʼ jamaril pa ri congregación are chiʼ xaq xiw ta xchʼaw chrij ri kesach wi ri cristianos, xaneʼ are xril ri utz kibʼantajik. Jun kʼutbʼal, are chiʼ majaʼ kukʼis utzʼibʼaxik ri carta che xutaq bʼi chke ri romanos, xchʼaw chkij e kʼi cristianos y ri utzalaj kibʼantajik. ¿Jas kqabʼan che resaxik uwach ri apóstol Pablo? Che kqabʼij chke ri e qachalal ri jeʼlalaj taq kibʼantajik che kqilo. Je wariʼ kojtobʼanik rech kkaj kibʼ y kkʼojiʼ jun utzalaj achilanik chkixoʼl.

11. ¿Jas rajawaxik kqabʼano rech kkʼojiʼ chi jumul jamaril are chiʼ kʼo chʼoj chqaxoʼl?

¹¹ Weneʼ jujun taq mul ri e qachalal che ko ri kikojonik junam ta ri kichomanik chrij jujun taq jastaq kukʼ e nikʼaj chik o kechʼojinik. Are laʼ ri xkʼulmataj chkixoʼl ri Pablo y ri Bernabé, che paneʼ xkʼojiʼ jun utzalaj achilanik chkixoʼl, xechʼojin chrij jun jastaq rumal che jun chke kraj che kteriʼ bʼi ri Marcos chkij y ri jun chik kraj taj. ¿Y jas xkʼulmataj chkixoʼl are chiʼ xechʼojinik? Ri Biblia kubʼij: «Nim kʼut ri kʼulelanibʼ xwalij chkixoʼl chi xkitas kibʼ ri jun che ri jun chik» (Hech. 15:37-39). Are kʼu ri Pablo, ri Bernabé y ri Marcos xeʼutzir chik. Rukʼ wariʼ xkikʼutu che ri más nim ubʼanik are che kkʼojiʼ jamaril y utzilal pa ri congregación. Are chiʼ xqʼax ri tiempo ri Pablo utz xchʼaw chkij ri Bernabé y ri Marcos (1 Cor. 9:6; Col. 4:10). Oj xuqujeʼ rajawaxik je kqabʼano are chiʼ junam ta ri qachomanik kukʼ nikʼaj chi qachalal pa ri congregación y are chqilaʼ ri utzalaj taq kibʼantajik. Je wariʼ kkʼojiʼ jamaril y utzalaj achilanik chqaxoʼl (Efes. 4:3).

12. ¿Jas kʼax kkiriq ri e qachalal?

¹² Xuqujeʼ kqaya kichuqʼabʼ ri e qachalal are chiʼ keqatoʼo rech knimar más ri kikojonik chrij ri Jehová. E jujun kkiriq kʼax rumal che keyoqʼ kumal ri kifamilia che e Testigos taj o kumal ri e kachiʼl pa ri kichak o pa ri tijobʼal. E nikʼaj chik kiriqom yabʼil o kiriqom jun chi kʼax pa ri kikʼaslemal. Y e kʼo chi nikʼaj che kʼi junabʼ kibʼanom chi kiqasanjaʼ y keyeʼm na jampaʼ kpe ri ukʼisbʼalil ri kʼaxkʼolil. Ronojel ri e jastaq riʼ kubʼano che ri e qachalal kqaj uchuqʼabʼ ri kikojonik. Are waʼ ri xkiriq ri cristianos re ri nabʼe siglo che xuqujeʼ xkiriq kʼax. Are kʼu, ¿jas xubʼan ri Pablo che kitoʼik?

13. ¿Jas xubʼan ri Pablo che kitoʼik ri cristianos che xtzeʼx kiwach?

¹³ Ri Pablo xukoj ri uTzij ri Dios rech xeʼutoʼ ri cristianos che ukowirisaxik ri kikojonik. Jun kʼutbʼal, weneʼ ri cristianos judíos ketaʼm taj jas kkibʼij chke ri kifamilia are chiʼ kbʼix chke che ri judaísmo are más nim na ubʼanik chuwach ri cristianismo. Qastzij riʼ che ri carta che xutaq bʼi ri Pablo chke ri hebreos sibʼalaj xeʼutoʼo (Heb. 1:5, 6; 2:2, 3; 9:24, 25). Ri cristianos riʼ xekunik xkikoj ri utzalaj taq chomanik che xuya ri Pablo chke rech xkitoʼ kibʼ chkiwach ri winaq che ketzeʼn chkij. ¿E kʼu ri oj? ¿Jas kqabʼan che kitoʼik ri e qachalal che ktzeʼx kiwach? Kojkunik kqakʼut chkiwach jas kkibʼan che ukojik ri e qawuj rech kkitoʼ uwiʼ ri kikojonik. Jun kʼutbʼal, rukʼ ri e wuj ¿Es la vida obra de un Creador? y El origen de la vida. Cinco cuestiones dignas de análisis  kojkunik keqatoʼ ri alabʼom alitomabʼ rech kkiriq ri kkibʼij are chiʼ ktaʼ chke jasche kkikojo che kʼo xbʼanow ronojel ri jastaq.

14. Paneʼ ri Pablo sibʼalaj latzʼ uwach, ¿jas xuya ta kan ubʼanik?

¹⁴ Ri Pablo xubʼij chke ri cristianos che kkiya ta kan ukʼutik loqʼoqʼebʼal rukʼ ubʼanik «utzalaj taq chak» (Heb. 10:24). Ri areʼ xaq xiw ta xeʼutoʼ ri cristianos rukʼ ri e tzij che xubʼij chke, xaneʼ xuqujeʼ xukʼutu. Jun kʼutbʼal, are chiʼ ri cristianos re Judea xkiriq wiʼjal, ri Pablo xrilo jas xubʼano rech xeʼutoʼo (Hech. 11:27-30). Paneʼ sibʼalaj latzʼ uwach che utzijoxik ri utzij ri Dios y che kitijoxik ri winaq, ri areʼ amaqʼel xutzukuj jas xubʼano rech xeʼutoʼ ri cristianos che kʼo kajwataj chke (Gál. 2:10). Je wariʼ xukʼut chkiwach ri cristianos che amaqʼel kʼo ri Jehová che kitoʼik. Kimik xuqujeʼ oj kojkunik keqatoʼ ri e qachalal are chiʼ kqaya ri qatiempo, ri qachuqʼabʼ y ri qatobʼanik pa ri labores de socorro y are chiʼ amaqʼel kqaya qakuchuj pa ri obra mundial. Je wariʼ keqatoʼ ri e qachalal rech kkikubʼsaj kikʼuʼx che kewonobʼax ta kan rumal ri Jehová.

15, 16. ¿Jas kqabʼan che kilik ri e qachalal che qajinaq ri kikojonik?

¹⁵ Ri Pablo xuchomaj taj che kbʼan ta chi kitoʼik ri cristianos che xqaj uchuqʼabʼ ri kikojonik. Ri areʼ xel ukʼuʼx chke ri cristianos riʼ, utz xchʼaw chkij y xukʼut loqʼoqʼebʼal chke (Heb. 6:9; 10:39). Jun kʼutbʼal, pa ri carta che xutaq bʼi chke ri hebreos, kʼi mul are chiʼ xtzijonik xukoj ri tzij «oj» y are ta xukoj ri tzij «ix» rech xukʼutu che ri areʼ xuqujeʼ rajawaxik kubʼan pa ri ukʼaslemal ri pixabʼ che xutzʼibʼaj bʼik (Heb. 2:1, 3). Junam rukʼ ri Pablo, oj xuqujeʼ maqachomaj che kbʼan ta chi kitoʼik ri e qachalal che xqaj uchuqʼabʼ ri kikojonik. Xaneʼ rajawaxik keqatoʼo rech knimar chi jumul ri kikojonik  y jeriʼ kqakʼutu che keqaj. Chnaʼtaj chqe che ri tzij kqabʼij chke sibʼalaj nim ubʼanik, rumal laʼ rajawaxik kqabʼij rukʼ ronojel qanimaʼ are chiʼ kojtzijon kukʼ.

¹⁶ Ri Pablo xubʼij chke ri cristianos che ri Jehová usachom ta ronojel ri utzalaj taq chak che kibʼanom (Heb. 10:32-34). Oj xuqujeʼ kojkunik kqabʼij wariʼ che jun qachalal che qajinaq ri ukojonik. Kojkunik kqataʼ che che kubʼij chqe jas xubʼan che retaʼmaxik ri qastzij o chqanaʼtasaj che are chiʼ xtoʼ rumal ri Jehová. Are chiʼ kojtzijon rukʼ chqabʼij che che sachinaq ta che ri Jehová ri loqʼoqʼebʼal che xukʼut kan che ojer y che kyaʼ ta kan rumal (Heb. 6:10; 13:5, 6). Wariʼ keʼutoʼ ri e qachalal rech kkiya ta kan upatanexik ri Jehová.

17. ¿Jas rajawaxik kqabʼano rech kojnaw che uyaʼik kichuqʼabʼ ri e nikʼaj chik?

¹⁷ Are chiʼ kqʼax ri tiempo, jun winaq che kuyak ja nojimal kkʼojiʼ más retaʼmabʼal che ri chak. Oj xuqujeʼ kojkunik kqabʼan más utz che ri qachak rech kqaya kichuqʼabʼ ri qachalal. Chqayaʼ kichuqʼabʼ ri e qachalal rech kkichʼij ri kʼax are chiʼ kqanaʼtasaj chke ri utzalaj kikʼutbʼal ri e nikʼaj chi upatanelabʼ ri Jehová. Chqakojoʼ qachuqʼabʼ rech kʼo jamaril pa ri congregación are chiʼ utz kojchʼaw chkij ri e nikʼaj chik, kqatzukuj tobʼanik are chiʼ kʼo jun chʼoj chqaxoʼl y kqakoj qachuqʼabʼ rech junam kojchoman kukʼ. Y chqayaʼ uchuqʼabʼ ri kikojonik ri e qachalal are chiʼ kojchʼaw kukʼ chrij ri kukʼut ri Biblia, keqatoʼ rukʼ jujun taq jastaq ke y keqatoʼ ri qajinaq ri kikojonik.

18. ¿Jas kawaj kabʼano?

¹⁸ Ri qachalal che ketobʼan che uyakik Ja rech Ajawbʼal sibʼalaj kekikotik. Oj xuqujeʼ kqanaʼ wariʼ are chiʼ kqaya kichuqʼabʼ ri e qachalal pa ri kikojonik. Are chiʼ kqʼax ri junabʼ rajawaxik ksukʼumax jun ja rumal che kqʼelobʼik, are kʼu ri tobʼanik che kqaya oj chke ri e qachalal más naj tiempo kuchʼijo. Rumal laʼ chqakojoʼ qachuqʼabʼ rech kqabʼan ri kubʼij 1 Tesalonicenses 5:11: «Chikubʼisalaʼ ikʼuʼx, chiyalaʼ ichuqʼabʼ, jas ri tajin kibʼano».