Pa wajun kʼutunem xqetaʼmaj che ri más nim ubʼanik chqawach ri oj winaq y ri ángeles, are ri uchʼajchʼobʼisaxik ri ubʼiʼ Jehová. Chupam wariʼ kʼo kebʼ jastaq, ri nabʼe, ri Jehová xaq xiw ri areʼ taqal che kuqʼat tzij. Ri ukabʼ, are ri winaq kekʼutuwik we keʼux sukʼ che o keʼux taj.

¿Jasche sibʼalaj nim ubʼanik ri uchʼajchʼobʼisaxik ri ubʼiʼ ri Jehová kimik? Chqilaʼ oxibʼ rumal.

Nabʼe, pa ri kotzʼiʼjalaj Edén, ri Satanás xutzʼilobʼisaj ri ubʼiʼ ri Jehová. Ri pregunta che xubʼan ri Satanás che ri Eva xukʼutu che jetaneʼ ri Dios kuya ta ronojel ri utz taq jastaq chqe. Tekʼuriʼ, ri Satanás xubʼij che qastzij ta ri ubʼim ri Jehová, jetaneʼ xubʼij che ri Jehová are jun bʼanal tzij. Rukʼ wariʼ, xutzʼilobʼisaj ri ubʼiʼ ri Jehová. Rumal laʼ xux «ri Itzel», che kraj kubʼij «bʼanal tzij» (Juan 8:44). Rumal che ri Eva are xunimaj ri xubʼij ri Satanás che, xniman ta chi che ri Jehová (Gén. 3:1-6). Kimik, ri Satanás tajin kumol na tzij chrij ri ubʼiʼ ri Dios. Y ri winaq che kekojon chrij ri molom taq tzij che kubʼij ri Satanás keniman ta chi che ri Jehová. Ri más itzel kkil ri upatanelabʼ ri Jehová are ri molom taq tzij che kbʼix chrij ri ubʼiʼ ri Dios. Rumal ri molom taq tzij kʼo kʼaxkʼolil cho ri uwach Ulew.

Ukabʼ, rech kkiriq utzilal ri winaq, ri Jehová kuchʼajchʼobʼisaj na ri ubʼiʼ. Are waʼ ri más nim ubʼanik chuwach ri Jehová. Rumal laʼ kubʼij: «Ri in kenkʼutuʼ na ri utastajik ri nimalaj nubʼiʼ» (Ezeq. 36:23). Pa ri chʼawem che xubʼan ri Jesús xubʼij: «Chtastaj ri bʼiʼ la». Rukʼ wariʼ xukʼut chqawach jas chrij rajawaxik kqabʼan wi qachʼawem (Mat. 6:9). Ri Biblia kukʼut chqawach jasche rajawaxik kqaya ta kan uchʼajchʼobʼisaxik ri ubʼiʼ ri Jehová. Chqilaʼ jujun kʼutbʼal. «Chiyaʼ ri nim ilik che ri» ubʼiʼ ri Jehová (1 Crón. 16:29; Sal. 96:8). «Cheʼibʼixoj bʼix che ri ubʼiʼ ri nim uqʼij» (Sal. 66:2). «Kinyaʼ uqʼij ri bʼiʼ la amaqʼel» (Sal. 86:12). Y ri jujun mul che ri Jehová xchʼaw lo pa ri kaj, ri Jesús kʼo pa ri templo re Jerusalén y xubʼij che ri uTat: «Tat, chnimarisaj uqʼij ri bʼiʼ la». Y ri Jehová xubʼij wariʼ: «Nunimarisam chik, kinnimarisaj chi kʼu na jumul» (Juan 12:28). a

Urox, ri urayibʼal ri Jehová are che amaqʼel kyaʼ uqʼij ri ubʼiʼ. Chojchoman chrij ri ubʼiʼ ri Jehová are chiʼ qʼaxinaq chi ri Mil junabʼ che kuqʼat tzij ri Jesús. ¿Jas kkichomaj na riʼ ri winaq y ri ángeles chrij ri uchʼajchʼobʼisaxik ri ubʼiʼ ri Jehová? Rech kqetaʼmaj wariʼ, chqilaʼ ri kebʼ jastaq che xojchʼaw kan chrij nabʼe che kʼo ubʼanik rukʼ  ri ubʼiʼ ri Jehová: Ri kisukʼilal ri winaq y che xaq xiw ri areʼ taqal che kuqʼat tzij. Kil ta chi riʼ we e sukʼ ri winaq che ri Jehová, rumal che e tzʼaqat chik y kekunik kekʼasiʼ amaqʼel. ¿E kʼu ri uQʼatbʼal tzij ri Jehová? Rajawaxik ta chik kilik che xaq xiw ri areʼ taqal che kuqʼat tzij. Rumal che qʼalajisam chik che xaq xiw ri uQʼatbʼal tzij ri Jehová ri más utz na. Konojel ri winaq y ri ángeles kkitoʼ na uwiʼ ri uQʼatbʼal tzij ri Jehová. Are kʼu, ¿jas kkʼulmataj na rukʼ ri ubʼiʼ ri Jehová?

Chʼajchʼobʼisam chi riʼ ri ubʼiʼ ri Jehová, y kʼo ta chi molom tzij kbʼix chrij. Ri ubʼiʼ ri Jehová are ri más nim na ubʼanik chkiwach ri ángeles y ri winaq. ¿Jasche? Rumal che kkil na che ri Jehová kubʼan na mayibʼal taq jastaq. Rumal che ri Jesús rukʼ machʼachʼem kutzalij na ri Qʼatbʼal tzij che ri Jehová, «ri Dios kux na ronojel, puwiʼ ronojel» (1 Cor. 15:28). Y ri kekʼasiʼ kan cho ri uwach Ulew kkiriq na «ri juluwemalaj kitzoqopitajik» (Rom. 8:21). Y ri Jehová kubʼan na che kkʼojiʼ junamil chkixoʼl ri ufamilia pa ri kaj y cho ri uwach Ulew (Efes. 1:10).

¿Y jas kunaʼ na riʼ ri ufamilia ri Jehová are chiʼ kbʼantaj ronojel wariʼ? Konojel ri ángeles y ri winaq kkinaʼ na jun nimalaj kikotemal y kkiya ta kan uyaʼik uqʼij ri Jehová, wariʼ kux jetaneʼ jun qʼaqʼ che kjuluw pa ri kanimaʼ. Rukʼ ri uxlabʼixel ri David xutzʼibʼaj wariʼ: «Tewichital ri Dios, ri Ajawaxel [...]. tewichital ri ubʼiʼ ri nim uqʼij» (Sal. 72:18, 19). Pa ronojel ri qakʼaslemal kqaya na uqʼij ri Jehová.

Ri ubʼiʼ ri Jehová kʼo ubʼanik rukʼ ronojel ri ubʼantajik. Rumal laʼ, are chiʼ kojchoman chrij ri ubʼiʼ, are kojchoman chrij ri uloqʼoqʼebʼal (1 Juan 4:8). Amaqʼel kqanaʼtaj na chqe che ri Jehová xojubʼan rumal ri uloqʼoqʼebʼal, xuya ri uKʼojol chqe rumal ri uloqʼoqʼebʼal y are waʼ ri kbʼanowik che jun utzalaj qʼatal tzij. Y kqil na jas kubʼan ri Jehová che kitewchixik ri upatanelabʼ. Pa ronojel ri qakʼaslemal más kojqebʼ na rukʼ ri Jehová, kojbʼixon che y kqaya uqʼij ri ubʼiʼ (Sal. 73:28).