1. ¿Jas kubʼan ri winaq che ukʼutik che kubʼan arrepentir ribʼ che ri umak?

 ARE chiʼ kqabʼan jun mak, rajawaxik kqabʼan arrepentir qibʼ. Junam rukʼ ri kubʼij ri Biblia, ri winaq che kubʼan arrepentir ribʼ itzel kril ri makaj xubʼano y kubʼan ta chi jumul (chawilaʼ jawiʼ kubʼij «arrepentimiento» re ri Glosario).

2. ¿Jasche rajawaxik kqetaʼmaj chrij ri arrepentimiento? (Nehemías 8:9-11).

² Qonojel rajawaxik kqetaʼmaj chrij ri arrepentimiento. Rumal che oj kalkʼwal ri Adán y Eva, qonojel kojmakunik y kojkamik (Rom. 3:23; 5:12). Qonojel xqechbʼej wariʼ. Xuqujeʼ, jujun winaq xkipatanij ri Jehová rukʼ sukʼilal xkikoj kichuqʼabʼ chuwach ri makaj, junam rukʼ ri apóstol Pablo (Rom. 7:21-24). Pero kraj ta kubʼij che ronojel taq qʼij kojbʼisonik rumal che oj ajmakibʼ. Ri Jehová kel ukʼuʼx chqe y kraj kojkikotik. Chojchoman chkij ri judíos pa taq uqʼij ri Nehemías (chasikʼij Nehemías 8:9-11). Ri Jehová xraj taj che sibʼalaj xebʼison rumal ri kimak, xaneʼ xraj che rukʼ kikotemal kepatanin che. Ri areʼ retaʼm che kojkikotik are chiʼ kqabʼan arrepentir qibʼ, rumal laʼ kraj kqetaʼmaj chrij wariʼ. Qas qetaʼm che ri Jehová che sibʼalaj kloqʼoqʼenik, kukuy na ri qamak we kqabʼan arrepentir qibʼ.

3. ¿Jas kqil na pa wajun kʼutunem riʼ?

 ³ Pa wajun kʼutunem riʼ kqetaʼmaj na más chrij ri arrepentimiento. Nabʼe, kqil na ri xubʼij ri Jehová chke ri israelitas chrij ri arrepentimiento. Tekʼuriʼ, kojchʼaw chrij ri xubʼan ri Jehová che kitoʼik ri winaq rech xkibʼan arrepentir kibʼ. Y kqil na ri xketaʼmaj ri utijoxelabʼ ri Jesús chrij ri arrepentimiento.

RI XUKʼUT RI JEHOVÁ CHKIWACH RI ISRAELITAS CHRIJ RI ARREPENTIMIENTO

4. ¿Jas xukʼut ri Jehová chkiwach ri israelitas chrij ri arrepentimiento?

⁴ Are chiʼ ri Jehová xeʼuchaʼ ri israelitas che utinamit, xubʼan jun pacto kukʼ. Xubʼij chke che amaqʼel keʼutoʼo y keʼutewchij we keniman che. Y xubʼij chke: «We taqomal riʼ ri kinya chiwe kimik man sibʼalaj kʼax taj, ri ma ta kixkun che ubʼanik, mawi ma ta kixkun che uriqik» (Deut. 30:11, 16). Pero we keniman ta che —kekiqʼijilaj nikʼaj chi dioses— keʼutoʼ ta chik. We kkʼulmataj wariʼ, ¿la kraj kubʼij che kexutux kan rumal ri Dios? Kexutux taj, rumal che ri taqanik kubʼij che kekunik ketzalij rukʼ ri Dios y kkitatabʼej ri uchʼabʼal (Deut. 30:1-3, 17-20). Kraj kubʼij, che kekunik kkibʼan arrepentir kibʼ. We je waʼ kkibʼano, ri Jehová keʼukʼam chi jumul y keʼutewchij chi na.

5. ¿Jas xubʼan ri Jehová che ukʼutik che xuxutuj ta kan ri utinamit are chiʼ xemakunik? (2 Reyes 17:13, 14).

⁵ Ri tinamit che xuchaʼ ri Jehová kʼi taq mul xniman ta che. Are kʼu, xaq xiw ta xekiqʼijilaj ri dioses. Xaneʼ xkibʼan nikʼaj chi itzel taq jastaq, rukʼ ri xkibʼano xkiriq kʼax. Pero ri Jehová xeʼuya ta kan kitukel, xaneʼ amaqʼel xeʼutaq bʼi profetas che kitoʼik rech kkibʼan arrepentir kibʼ (chasikʼij 2 Reyes 17:13, 14).

6. ¿Jas xubʼan ri Jehová che kikojik ri profetas rech xkikʼut chkiwach ri israelitas che rajawaxik kkibʼan arrepentir kibʼ? (Xuqujeʼ chawilaʼ ri wachbʼal).

⁶ Ri Jehová amaqʼel xeʼukoj profetas rech kkibʼij chke ri israelitas che kkikʼex ri  kikʼaslemal y kkiya kan ubʼanik ri utz taj. Jun kʼutbʼal, xukoj ri Jeremías rech xubʼij wariʼ: «¡Chattzelej uloq wukʼ, Israel kʼulelanel! Man xaq ta kʼax chwe katinkʼamowaj mawi kinjeqebʼaʼ ri woyowal amaqʼel chbʼe qʼij saq, rumal rech chi in aj utzil [...]. Xuwi ta ne we qas kachʼobʼ ri awetzelal, chi xakʼulelaj ri Ajawaxel ri a Dios» (Jer. 3:12, 13). Xukoj ri Joel rech xubʼij wariʼ: «Chixtzelej bʼaʼ wukʼ rukʼ ronojel iwanimaʼ» (Joel 2:12, 13). Xukoj ri Isaías che ubʼixik wariʼ: «¡Chichʼajaʼ iwibʼ, chijosqʼij iwibʼ! ¡Cheʼinajtajisaj ri iwetzelal chnuwach! ¡Chiqʼilaʼ iwibʼ che ubʼanik ri man utz taj!» (Is. 1:16-19). Xukoj ri Ezequiel rech xubʼij wariʼ: «In man kinwaj taj chi kakam ri bʼanal etzelal, xaneʼ chukʼexaʼ ri ukʼaslemal chkʼasal kʼut». [...] «Ri in man kinwaj taj chi kʼo jachin kakamik. Cheʼiyaʼ kan ri etzelal, chitaqej kʼu kʼaslemal» (Ezeq. 18:23, 32). Ri Jehová sibʼalaj kkikotik are chiʼ ri winaq kkibʼan arrepentir kibʼ che ri kimak rumal che kraj kekʼasiʼ amaqʼel. We xqilo, ri areʼ xaq ta kreyej jampaʼ ktzalij lo ri ajmak tekʼuriʼ kutoʼo. Chqilampeʼ nikʼaj chi kʼutbʼal.

7. ¿Jas xukʼut ri Jehová chke ri israelitas rukʼ ri ukʼutbʼal ri Oseas y ri rixoqil?

⁷ Chqilampeʼ ri xukʼut ri Jehová chuwach ri utinamit rukʼ ri ukʼutbʼal ri Oseas y ri rixoqil Gómer ubʼiʼ. Areʼ xmakun kukʼ achijabʼ y xuya kan ri Oseas utukel. ¿La xuchomaj ri Jehová che ri ixoq riʼ kubʼan ta chi arrepentir ribʼ? Rumal che ri Jehová kril ri kʼo pa kanimaʼ ri winaq, xubʼij wariʼ che ri Oseas: «Jat chaloqʼoqʼej chik ri awixoqil ri loqʼoqʼem rumal ri rach chʼabʼen, xqaj kʼu pa mak kukʼ achijabʼ. Je waʼ ri uloqʼoqʼenik ri Ajawaxel chqe ri aj israelibʼ, e areʼ ta kʼut ri e are kekiyaʼ taq ri e kibʼaqʼwach chke taq ri diosibʼ» (Os. 3:1; Prov. 16:2). Masach pa qajolom che ri Gómer tajin kmakun na kukʼ achijabʼ. Pero ri Jehová xubʼij che ri Oseas che kukuy umak y ktzalij rukʼ. a Rukʼ wajun kʼutbʼal riʼ, ri Jehová xukʼut chuwach ri utinamit che kraj kkibʼan arrepentir kibʼ. Paneʼ majaʼ kiyaʼom kan ubʼanik ri kimak, are kʼu ri Jehová uyaʼom ta kan kiloqʼoqʼexik y amaqʼel xutaq bʼi profetas che kitoʼik rech kkikʼex ri kikʼaslemal. ¿La kraj kubʼij wariʼ che ri Jehová, ri kril ronojel ri ko pa ranimaʼ ri winaq, kutoʼ jun ajmak rech kubʼan arrepentir ribʼ? (Prov. 17:3). Chqilampeʼ.

¿JAS KUBʼAN RI JEHOVÁ CHE KITOʼIK RI AJMAKIBʼ RECH KKIBʼAN ARREPENTIR KIBʼ?

8. ¿Jas xubʼan ri Jehová che utoʼik ri Caín rech kubʼan arrepentir ribʼ? (Génesis 4:3-7; xuqujeʼ chawilaʼ ri wachbʼal).

⁸ Ri Caín are ri nabʼe kalkʼwal ri Adán y Eva. Y xrechbʼej ri makaj che xkibʼano. Ri Biblia kubʼij che ri Caín xubʼan itzelal (1 Juan 3:12). Weneʼ rumal laʼ ri Jehová xukʼam ta ri usipanik are chiʼ xuya jun sacrificio che. Pero xukʼex ta ri tajin kubʼano, xaneʼ «sibʼalaj xpe royowal» y «xqʼalajin che ri upalaj». ¿Jas xubʼan ri Jehová? Xtzijon rukʼ (chasikʼij Génesis 4:3-7). Ri Jehová rukʼ loqʼoqʼebʼal xutoʼo. Xubʼij che che we kukʼex ri tajin kubʼano ri areʼ kutewchij na y kuriq ta kʼax. Pero ri Caín xukʼex ta ri tajin kubʼano y xuya taj che xtoʼ rumal ri Jehová rech kubʼan arrepentir ribʼ. ¿Jas xubʼan ri Jehová are chiʼ je waʼ xubʼan ri Caín? ¿La rukʼ wariʼ kraj ta chik keʼutoʼ ri winaq rech kkibʼan arrepentir kibʼ? ¡Je taj!

9. ¿Jas xubʼan ri Jehová che utoʼik ri David rech xubʼan arrepentir ribʼ?

 ⁹ Ri Jehová sibʼalaj xuloqʼoqʼej ri David. Je waʼ xubʼij chrij: «Are jun achi je ranimaʼ je jas ri kraj ri wanimaʼ» (Hech. 13:22). Ri David xmakun rukʼ jun ixoq y xkamisanik y rumal laʼ taqal che kkamisaxik junam rukʼ ri kubʼij ri taqanik xyaʼ chke ri israelitas ojer (Lev. 20:10; Núm. 35:31). Pero rumal che ri Jehová sibʼalaj utz, xuya ta bʼe xkamisax ri David, xaneʼ xutaq bʼi ri profeta Natán che utoʼik paneʼ ubʼanom ta arrepentir ribʼ. b Natán xukoj jun kʼutbʼal rech qas kopan pa ranimaʼ ri David ri tajin kubʼij che. Rukʼ wariʼ xrilo che tajin kmakun chuwach ri Jehová y xubʼan arrepentir ribʼ (2 Sam. 12:1-14). Xutzʼibʼaj jun salmo jawiʼ kukʼut ri bʼis che xunaʼo (Sal. 51, encabezamiento). Wajun salmo riʼ pa kʼi taq junabʼ e utoʼm e kʼi winaq che e makunaq y e utoʼm rech kkibʼan arrepentir kibʼ. ¿La mat qastzij che kojkikotik che ri Jehová rukʼ loqʼoqʼebʼal xutoʼ ri David rech kubʼan arrepentir ribʼ?

10. ¿Jas kanaʼo are chiʼ kawetaʼmaj che ri Jehová kukʼut paciencia y kukuy qamak?

¹⁰ Ri Jehová itzel kril ronojel uwach makaj (Sal. 5:4, 5). Pero retaʼm che oj ajmakibʼ, rumal laʼ kojutoʼo rech kojkunik kojchʼakan chuwach ri makaj. Amaqʼel kraj kojutoʼo xuqujeʼ kraj keʼutoʼ ri winaq che kkibʼan tzʼilalaj taq makaj rech kkibʼan arrepentir kibʼ. Wariʼ ¡sibʼalaj kukubʼsaj qakʼuʼx! Are chiʼ kojchoman chrij ri u paciencia ri Jehová y che kukuy qamak, kojutoʼo rech aninaq kqaya kan jun makaj y rech kqaya ta kan upatanexik rukʼ sukʼilal. Chanim riʼ chqilampeʼ jas xketaʼmaj ri utijoxelabʼ ri Jesús chrij ri arrepentimiento.

RI XKETAʼMAJ RI UTIJOXELABʼ RI JESÚS CHRIJ RI ARREPENTIMIENTO

11, 12. ¿Jas kʼutbʼal xukoj ri Jesús rech xukʼutu che ri Jehová amaqʼel kukuy makaj? (Chawilaʼ ri wachbʼal).

¹¹ Pa ri nabʼe siglo, xopan ri tiempo che xqʼalajin ri Mesías. Junam rukʼ ri xqetaʼmaj  pa ri jun kʼutunem kanoq, ri Jehová xukoj ri Juan el Bautista y ri Jesús che ukʼutik chkiwach ri winaq che rajawaxik kkibʼan arrepentir kibʼ (Mat. 3:1, 2; 4:17).

¹² Ri Jesús xukʼutu che ri Jehová amaqʼel kukuy kimak ri winaq. Xukʼut wariʼ are chiʼ xchʼaw chrij ri kʼutbʼal re ri ala ri xel bʼi pa rachoch. Wajun ala riʼ xel bʼi pa rachoch y xubʼan itzel taq jastaq. Pero, are chiʼ xqʼax ri tiempo, xul pa saq ri uchomanik y xtzalijik. ¿Jas xubʼan ri utat? Ri Jesús xubʼij che, are chiʼ ri ala «kʼa kʼo kʼu chi naj, xilitaj apan rumal ri utat. Ri areʼ kʼut xel ukʼuʼx che, xxikʼinik xbʼek, xuqʼaluj ri ala, xutzʼumaj». Ri ala kutaʼ che ri utat che kuya bʼe che che kchakun rukʼ. Pero ri utat xukuy ri umak y xukʼulaj chi jumul pa ri u familia. Xubʼij wariʼ chrij ri ukʼojol: «Xsach na [...], xriqtaj kʼut» (Luc. 15:11-32). Are chiʼ ri Jesús majaʼ kpe pa ri uwach Ulew, qastzij riʼ che xrilo are chiʼ ri Jehová xutoqʼobʼisaj kiwach ri ajmakibʼ ri xkibʼan arrepentir kibʼ. Rumal laʼ qas xkun che ukʼutik che ri Jehová kutoqʼobʼisaj kiwach ri winaq.

13, 14. ¿Jas xretaʼmaj ri Pedro chrij ri arrepentimiento y jas xukʼut chrij wariʼ? (Xuqujeʼ chawilaʼ ri wachbʼal).

¹³ Ri Pedro kʼi xretaʼmaj rukʼ ri Jesús chrij ri arrepentimiento y ri ukuyik makaj. Kʼi xsach wi, pero ri Jesús amaqʼel xukuy umak. Jun chke ri xubʼano are che oxmul xubʼij che kuchʼobʼ ta uwach ri Jesús rumal laʼ sibʼalaj xbʼisonik (Mat. 26:34, 35, 69-75). Pero are chiʼ xkʼastajisax ri Jesús xukʼut ribʼ chuwach ri Pedro y weneʼ are chiʼ xaq utukel kʼolik (Luc. 24:33, 34; 1 Cor. 15:3-5). Ri Jesús retaʼm che ri Pedro ubʼanom chi arrepentir ribʼ, rumal laʼ xukubʼsaj ukʼuʼx y xubʼij che che ukuyum chi ri umak (chawilaʼ Marcos 16:7 y ri nota de estudio «y a Pedro»).

 ¹⁴ Ri Pedro qas xretaʼmaj chrij ri arrepentimiento y ri ukuyik makaj. Rumal laʼ xkunik xtzijon chrij wariʼ kukʼ nikʼaj chik. Are chiʼ qʼaxinaq chi ri Pascua, ri Pedro xuya jun chʼabʼal chke ri judíos jawiʼ xubʼij wi che e areʼ xekamisan ri Mesías, are kʼu rukʼ loqʼoqʼebʼal xubʼij chke: «Rumal riʼ kʼexaʼ kʼuʼx alaq, tzelej alaq rukʼ ri Dios, rech ri Dios keʼuchupisaj taq ri e mak alaq, kraj kʼu ne ri Ajawaxel keʼutaq uloq taq qʼijol re jamaril chech alaq» (Hech. 3:14, 15, 17, 19). Rukʼ ri e tzij riʼ, ri Pedro xraj xukʼut chkiwach ri tajin kemakunik che rajawaxik kkikʼex ri kichomanik y are kkibʼan ri kqaj chuwach ri Dios. Xubʼij chke che ri Jehová kukuy ri kimak y che knaʼtaj ta chi che. Are chiʼ qʼaxinaq chi kʼi junabʼ, ri Pedro xubʼij wariʼ chrij ri Jehová: «Xaneʼ ix reyem rukʼ kochʼonik, man kraj taj chi kʼo jun ksach uwach, xaneʼ are kraj chi konojel kkikʼex na kikʼuʼx» (2 Ped. 3:9). ¡Sibʼalaj kuya kikotemal chqe retaʼmaxik che ri Jehová kukuy ri qamak, paneʼ sibʼalaj itzel ri xqabʼano!

15, 16. a) ¿Jas xubʼan ri Pablo che retaʼmaxik chrij ri kuybʼal mak? (1 Timoteo 1:12-15). b) ¿Jas kqil na pa ri jun chi kʼutunem?

¹⁵ Xaq e jujun winaq kibʼanom arrepentir kibʼ junam rukʼ ri xubʼan ri Saulo de Tarso. Ri areʼ xeʼuterenej ri utijoxelabʼ ri Jesús rukʼ itzelal y xubʼan kʼax chke. Rumal laʼ, weneʼ e kʼi xkichomaj che kukʼex ta ri ukʼaslemal. Pero ri Jesús are ta laʼ ri xuchomaj. Ri areʼ y ri Jehová are xkil ri utz taq ubʼantajik ri Saulo. Ri Jesús xubʼij: «Nuchaʼom kʼut we achi riʼ» (Hech. 9:15). Xuqujeʼ xubʼan jun milagro chuwach rech kubʼan arrepentir ribʼ (Hech. 7:58–8:3; 9:1-9, 17-20). Are chiʼ ri Saulo xux cristiano xbʼix Pablo che, kʼi mul xumaltyoxij ri xubʼan ri Jehová y ri Jesús che ukuyik umak (chasikʼij 1 Timoteo 1:12-15). Rumal che sibʼalaj kmaltyoxinik, xubʼij: «Ri Dios, man kʼu kachʼobʼ taj chi qas areʼ ri rutzil ktajin katkʼamow bʼik che aqʼaxexik rukʼ» (Rom. 2:4).

¹⁶ Jumul, ri Pablo xretaʼmaj che xkʼulmataj jun chʼoj pa ri congregación re Corinto rumal ri inmoralidad sexual. ¿Jas xubʼan che usukʼumaxik wariʼ? Ri xubʼano kukʼut chqawach ri toqʼobʼisal wachaj y ri loqʼoqʼebʼal che kukʼut ri Jehová y che rajawaxik kqatoqʼobʼisaj kiwach ri nikʼaj chik. Kqetaʼmaj na más chrij wariʼ pa ri jun chi kʼutunem.