¿La knaʼtaj chawe ri awilom kan pa ri wuj Ri Chajinel? Chawilaʼ we katkunik kaya urespuestas ri preguntas riʼ:

¿Jas kukʼut Santiago 5:11 chrij ri Jehová are chiʼ kubʼij che «kutoqʼobʼisaj kiwach ri winaq» y «kel ukʼuʼx chke»?

Kukʼutu che ri Jehová kraj kukuy qamak rumal che kutoqʼobʼisaj qawach. Santiago 5:11 xuqujeʼ kubʼij che kel ukʼuʼx chqe y kraj kojutoʼo. Utz riʼ kqabʼano we kqesaj uwach (w21.01, uxaq 21).

¿Jasche ri Jehová xubʼano che kʼo jun ktaqan pa qawiʼ?

Rumal ri uloqʼoqʼebʼal. Rumal ri taqanik ukojom, ri e kʼo pa ri ufamilia kechakun pa jamaril y cholajil. Pa taq ri familias, chkijujunal ri nim kkil wi ri taqanik uyaʼom ri Jehová ketaʼm jachin kchaʼow ubʼanik jun jastaq y jachin kmajin ubʼanik ri xchaʼ ubʼanik (w21.02, uxaq 3).

¿Jasche rajawaxik kqachajij qibʼ ri oj cristianos are chiʼ kqakoj ri aplicaciones re mensajes?

We jun winaq kuchomaj ukojik waʼ ri aplicaciones, rajawaxik qas kril na jas kibʼanik ri e winaq e kʼo chilaʼ. Wariʼ kʼax ubʼanik are chiʼ jun winaq kunim ribʼ pa jun grupo jawiʼ e kʼo wi kʼi winaq che kkitaq mensajes chbʼil taq kibʼ (1 Tim. 5:13). Xuqujeʼ chupam wariʼ weneʼ kbʼix jastaq che qas ta nikʼom uxeʼ we qastzij kʼulmatajinaq y weneʼ kʼo jun xa kuchʼak urajil chkij ri e qachalal chupam (w21.03, uxaq 31).

¿Jas jujun taq rumal che ri Dios xuya bʼe che ri Jesús xuriq kʼax y xkamik?

Ri nabʼe rumal, are che are chiʼ xxekebʼax ri Jesús chuwach jun cheʼ, xkunik xeresaj ri judíos chuxeʼ ri etzeletajik xbʼix chkij (Gál. 3:10, 13). Ri ukabʼ rumal, are che ri Jehová xutijoj ri Jesús rech kux Kinimal Kojol tabʼal toqʼobʼ. Y, ri urox rumal, are chiʼ ri Jesús xukʼutu che ri e winaq kekunik kkiya ta kan upatanixik ri Jehová paneʼ kkiqʼaxej nimaʼq taq kʼax (Job 1:9-11) (w21.04, uxaq 16 y 17).

¿Jas kojkunik kqabʼano we kʼax kqabʼan che kiriqik ri e winaq cho taq ri kachoch?

Kojkunik kqatzijoj ri utzij ri Dios pa taq ri horas are chiʼ weneʼ más kekʼojiʼ ri winaq cho taq ri kachoch. Xuqujeʼ kojkunik kqatzijoj pa jalajoj taq lugares. Y kojkunik kqakʼex ri kqabʼan che utzijoxik, junam rukʼ ri utzʼibʼaxik cartas (w21.05, uxaq 15 y 16).

¿Jas xraj xubʼij ri apóstol Pablo rukʼ ri e tzij riʼ: «Are ri Pixabʼ [Taqanik] xbʼanow chwe chi xinkamik»? (Gál. 2:19).

Ri Taqanik xyaʼ che ri Moisés xuqʼalajisaj ri kimak ri e winaq y xujaq ri bʼe chkiwach ri israelitas rech kkichʼobʼ uwach ri Cristo (Gál. 3:19, 24). Are waʼ ri xbʼanow che ri Pablo rech xkojon chrij ri Jesús. Rumal laʼ xkunik xubʼij: «Are ri Pixabʼ xbʼanow chwe chi xinkamik»; ri Pixabʼ o ri Taqanik xyaʼ che ri Moisés kʼo ta chi utaqanik pa uwiʼ (w21.06, uxaq 31).

¿Jas kʼutbʼal re kochʼonik uyaʼom ri Jehová chqawach?

Ri Jehová uchʼijom kʼi kʼax, nim ta ilom wi ri ubʼiʼ, nimam ta ri nimalaj taqanik kʼo pa uqʼabʼ, e jujun taq ralkʼwal xeniman ta che, ri Satanás amaqʼel ubʼanom tzij chrij, ri upatanelabʼ kiriqom kʼax, e kaminaq ri rachiʼl, ri itzel taq winaq kkibʼan kʼax chke ri e nikʼaj chik y ri uwach Ulew tajin kbʼan kʼax che (w21.07, uxaq 9 kopan 12).

¿Jas kukʼut chqawach ri ukʼutbʼal ri José chrij ri paciencia?

Ri José xbʼan kʼax che kumal ri e rachalal paneʼ kʼo ta umak. Rumal wariʼ, pa Egipto xmol tzij chrij y kʼi junabʼ xtzʼapix pa cárcel (w21.08, uxaq 12).

¿Jas kibʼanik riʼ ri yikopem che xetzʼibʼax kan pa Ageo 2:6-9, 20-22?

Ri e qʼatal taq tzij re kʼi nimaʼq taq tinamit utz ta kkita are chiʼ ktzijox ri uQʼatbʼal tzij ri Dios, are kʼu e kʼi winaq kikʼamom ri kuya ubʼixik ri uTzij ri Dios. Pa kebʼ oxibʼ qʼij konojel ri qʼatal taq tzij re ri nimaʼq taq tinamit keyikopisaxik are chiʼ ksachisax kiwach (w21.09, uxaq 15 kopan 19).

¿Jasche rajawaxik kubʼan ta kebʼ qakʼuʼx che utzijoxik ri utzij ri Dios?

Ri Jehová are kril ri chuqʼabʼ kqakojo y kuya kikotemal che. We kojkos taj y kubʼan ta kebʼ qakʼuʼx, kqariq na ri kʼaslemal kʼo ta ukʼisik (w21.10, uxaq 25 y 26).

¿Jas kubʼan Levítico 19 che qatoʼik rech kqabʼan waʼ taq tzij riʼ: «Chixux tastalikalaj taq winaq pa ronojel ri kibʼano»? (1 Ped. 1:15).

Weneʼ pa Levítico 19:2 xelesax wi ri chomanik kʼo chupam wajun versículo riʼ. Ri capítulo 19 kuya kʼi kʼutbʼal chqawach rech kojkunik kqabʼan pa qakʼaslemal ri kubʼij 1 Pedro 1:15 (w21.12, uxaq 3 y 4).