JUJUN taq mul ri xetzʼibʼan ri Biblia xkikamulij ubʼixik jujun taq tzij. ¿Jasche xkibʼano? Chqilaʼ oxibʼ rumal che xkibʼano:

Are chiʼ xtzʼibʼaxik. Pa ri ojer Israel ri winaq kʼo ta jun copia rech ri uTzij ri Dios kukʼ. Xaq xiw kkitatabʼej are chiʼ kekʼojiʼ pa ri templo y kasikʼix chkiwach (Deut. 31:10-12). ¿La kojchoman chrij ri kʼax xkiriq che utatabʼexik wariʼ rumal che kʼi horas xaq ketakʼiʼ che utatabʼexik? (Neh. 8:2, 3, 7). Are chiʼ más kʼi mul kkita ri kbʼix chke más kkanaj kan pa kijolom y rech kkibʼan pa ri kikʼaslemal. Y are chiʼ kkamulix ubʼixik ri e tzij sibʼalaj nim ubʼanik más na are chiʼ are kyaʼ ubʼixik ri upixabʼ ri Dios y ri utaqanik (Lev. 18:4-22; Deut. 5:1).

¿Jas xbʼan che utzʼibʼaxik? Weneʼ 10% ri kubʼij ri Biblia are canciones, junam rukʼ ri xtzʼibʼax pa ri Salmos, El Cantar de los Cantares y Lamentaciones. Jujun taq canciones kʼo jun estribillo chupam. Ri estribillo riʼ che kkamulix ubʼixik ktobʼanik rech ksach ta chke ri winaq y are kchʼaw chrij ri ubʼiʼ ri canción. Rech más kqetaʼmaj chrij wariʼ chojchoman chrij ri kubʼij Salmo 115:9-11: «Aj israelibʼ taq, ¡chikubʼaʼ ikʼuʼx chrij ri Ajawaxel! Ri Areʼ kojutoʼ xuqujeʼ kujuchʼuqu. Kojol taq tabʼal toqʼobʼ,¡chikuʼbʼaʼ ikʼuʼx chrij ri Ajawaxel! Areʼ kujtoʼwik xuqujeʼ kujuchʼuqu. Ix ri nim kiwil wi ri Ajawaxel, ¡chijikibʼaʼ ikʼuʼx chrij! Ri areʼ kujutoʼ xuqujeʼ kujuchʼuqu». Are chiʼ jun winaq kubʼixoj wajun bʼix riʼ qastzij riʼ che qas kkanaj kan pa ujolom.

¿Jasche xtzʼibʼaxik? Jujun taq tzʼibʼanel re ri Biblia xkikamulij ubʼixik jujun taq tzij rumal che nim ubʼanik y kkaj che ketaʼmax ri kraj kubʼij. Jun kʼutbʼal, are chiʼ ri Jehová xuya ri taqanik chke ri israelitas che kkitij ta ri kikʼ, xubʼij che ri Moisés che kʼi mul kuya ubʼixik wajun taqanik riʼ chke. Ri Jehová xraj che ri israelitas kketaʼmaj che ri kikʼ are ri kʼaslemal (Lev. 17:11, 14). Are chiʼ xqʼax ri tiempo, ri apóstoles y ri kʼamal taq bʼe pa Jerusalén xechʼaw chrij ri rajawaxik kqabʼano rech kojqaj chuwach ri Dios xuqujeʼ xechʼaw chi jumul chrij ri kikʼ (Hech. 15:20, 29).

Paneʼ ri Biblia kukamulij ubʼixik jujun taq tzij, are kʼu wariʼ kraj ta kubʼij che ri Jehová kraj che xuqujeʼ kqakamulij ubʼixik jetaneʼ che xkʼaman chqe. Ri Jesús xubʼij: «Are taq kibʼan chʼawem rukʼ Dios, mibʼij [mikamulij] kʼi tzij ri man kʼo ta kipatan» (Mat. 6:7). Xuqujeʼ xubʼij kʼi taq jastaq che kojkunik kqataʼ pa ri qachʼawem y che kʼo ubʼanik rukʼ ri urayibʼal ri Dios (Mat. 6:9-13). Paneʼ kqakamulij ta ubʼixik ri e tzij are chiʼ kqabʼan qachʼawem che ri Jehová, are kʼu kojkunik kqataʼ kʼi mul che chrij jun jastaq (Mat. 7:7-11).

¡Sibʼalaj utz che ri Biblia kukamulij ubʼixik jujun taq tzij! Are waʼ ri kubʼan ri utzalaj qajtij Jehová che qatijoxik (Is. 48:17, 18).