¿LA KʼO jumul xanaʼo che kʼo ta nijun xuya tobʼanik chawe are chiʼ tajin kariq jun kʼax? Kamik oj kʼo pa «kʼaxalaj taq qʼij» y rumal laʼ kojbʼisonik, pero rajawaxik taj che xaq qatukel kqaqʼaxej ri kʼax che kqariqo (2 Tim. 3:1). Ri Biblia kubʼij che kojkunik keqariq utz taq qamigos are chiʼ oj kʼo pa taq «qʼijol re riqoj kʼax» (Prov. 17:17).

Ri apóstol Pablo xekʼojiʼ kʼi ramigos are chiʼ xeʼusolij ri congregaciones y nim tobʼanik xkiya che (Col. 4:7-11). Are chiʼ xyaʼ pa cárcel pa Roma, ri ramigos xkibʼan jujun taq chak che ri areʼ kkun ta chi che ubʼanik. Ri Epafrodito xubʼan toqʼobʼ xuya che ri apóstol Pablo jujun taq jastaq che ri e qachalal re Filipos xkitaq lo che (Filip. 4:18). Ri Tíquico xeʼujach ri cartas chke ri congregaciones che xutzʼibʼaj ri Pablo (Col. 4:7). a Rukʼ ri kitobʼanik ri ramigos, ri apóstol Pablo xkunik xubʼan ri uchak paneʼ tzʼapim pa rachoch y are chiʼ xtaq pa cárcel. ¿La kojkunik kqabʼan qe junam ri xkibʼan ri ramigos ri Pablo?

Kamik kojkunik kqilo che ri qastzij qamigos sibʼalaj nim kipatan. Chqilaʼ ri xuriq ri qachalal Elísabet, che precursora regular kel pa España. Are chiʼ xriqitaj cáncer che ri unan, ri Elísabet xyaʼ nim tobʼanik che rumal jun utzalaj ramiga, amaqʼel kutaq bʼi textos rech ri Biblia che pa mensajes. Ri qachalal Elísabet kubʼij: «Rukʼ ri mensajes che xutaq chwe, xinwilo che xaq ta nutukel in kʼolik y wariʼ xuya nuchuqʼabʼ ronojel taq qʼij» (Prov. 18:24).

Kojkunik kqabʼan ko che ri qachilanik kukʼ ri qachalal are chiʼ kqaya tobʼanik chke pa ri kikojonik. ¿La kojkunik kqatoʼ jun qachalal che nim chi ri ujunabʼ rech kbʼe pa ri e riqbʼal ibʼ o che utzijoxik ri utzij ri Dios? We kqabʼan wariʼ qastzij riʼ che kojkunik kqakubʼsaj qakʼuʼx chbʼil taq qibʼ (Rom. 1:12). Pero e kʼo jujun taq qachalal che kekun taj keʼel bʼi cho ri kachoch. ¿Jas kojkunik kqabʼano rech kqakʼutu che oj jun utz kamigo?

E kʼo jujun taq qachalal kekun taj kebʼe pa ri Ja rech Ajawbʼal rumal che weneʼ kʼo jun yabʼil chke o rumal nikʼaj chi jastaq. Are waʼ ri xuriq ri qachalal David che xuriq jun yabʼil ubʼiʼ linfoma, Rumal waʼ rajawaxik xbʼan quimioterapias che pa más che seis ikʼ. Rumal laʼ ri qachalal rukʼ ri rixoqil Lidia, xa pa videoconferencia xkil ri e riqbʼal ibʼ.

¿Jas xubʼan ri congregación che kitoʼik? Are chiʼ kkʼis ri e riqbʼal ibʼ, jujun chke ri qachalal kkiya  ki tiempo rech ketzijon kukʼ pa videoconferencia. Xuqujeʼ kkitaq bʼi mensajes chke are chiʼ kkito che ri qachalal David y ri rixoqil kkiya ki comentarios. ¿Jas xriqitaj rumal wariʼ? Ri qachalal David y Lidia xkinaʼo che qas keloqʼoqʼex kumal ri kamigos.

Utz che katzijoj ri utzij ri Dios kukʼ ri e qachalal che kekun taj keʼel cho ri kachoch. We qas utz ubʼanik kqabʼan che ri qa tiempo kojkun riʼ kqakʼut chke ri qachalal che e qasachom ta pa qajolom (Prov. 3:27). ¿La kojkunik kqatzijoj ri utzij ri Dios kukʼ pa cartas o pa teléfono? Y weneʼ ri kʼamal taq bʼe kekunik kkikoj ri videoconferencia are chiʼ kkibʼan ri riqbʼal ibʼ che utzijoxik ri utzij ri Dios. Are waʼ ri xbʼan kukʼ ri qachalal David y Lidia, rumal laʼ sibʼalaj kkimaltyoxij chke ri kʼamal taq bʼe che xkibʼan wariʼ. Ri qachalal David kubʼij: «Paneʼ xaq pa videoconferencia kqata ri riqbʼal ibʼ re utzijoxik ri utzij ri Dios y che kojkunik kqaya ri qa comentarios chrij ri xbʼix pa ri alaj riqbʼal ibʼ riʼ, qas xubʼano che xkʼojiʼ qachuqʼabʼ». Y we kʼo jun qa estudio re ri Biblia, ¿la kojkunik kqabʼij che che kqabʼan ri estudio re ri Biblia pa ri rachoch ri qachalal che kkun taj kel bʼi cho ri rachoch? Utz kqabʼan wariʼ we kojkunik kojopan cho rachoch ri qachalal y che kʼo ta kʼax kuriq ri qachalal.

Are chiʼ kqaya qa tiempo rech kojopan kukʼ ri qachalal che kekun taj keʼel cho ri kachoch, kojkunik kqil ri utz taq kibʼantajik y wariʼ kubʼano che kkʼojiʼ jun utz qachilanik kukʼ. Are chiʼ kqil ri kkibʼan che ukojik ri Utzij ri Dios che kitoʼik ri winaq, kubʼano che qas nim keqil wi. Are chiʼ kqaya ri qatobʼanik chke ri qachalal riʼ, kojkunik keqariq más qamigos (2 Cor. 6:13).

Ri apóstol Pablo sibʼalaj xkikotik che xkʼojiʼ ri Tito rukʼ che are jun utz ramigo (2 Cor. 7:5-7). Wariʼ kukʼut chqawach che kojkunik kqaya kubʼsal kʼuʼx chke ri qamigos xaq xiw ta rukʼ ri e qatzij, xaneʼ xuqujeʼ are chiʼ oj kʼo kukʼ y keqatoʼ che ubʼanik jujun taq jastaq (1 Juan 3:18).

Ri e qachalal che e kʼo pa Rusia e jun utz ejemplo rumal che amaqʼel kkitoʼlaʼ kibʼ. Chqilampeʼ ri xkiriq ri qachalal Serguéi rukʼ ri rixoqil Tatiana. Jun qʼij ri policías xeʼopan cho ri kachoch ri qachalal rech kekitzukuj ri qawuj, tekʼuriʼ xekikʼam bʼi ri e qachalal rech kkibʼan preguntas chke. Ri qachalal Tatiana are ri nabʼe xyaʼ bʼe che kbʼe cho rachoch. Ri qachalal Serguéi kubʼij jas xuriq ri qachalal Tatiana are chiʼ xopan cho rachoch, kubʼij: «Xaq kʼateʼ xopan cho ri qachoch jun qachalal ixoq. Y xeʼopan más qachalal rech kkitoʼ ri wixoqil che usukʼumaxik chi jumul ri qachoch».

Xuqujeʼ xubʼij:«Utz kinwil ri kubʼij Proverbios 17:17, che kubʼij: ‹Jun achiʼl amaqʼel kel ukʼuʼx, pa taq kʼu ri qʼijol re riqoj kʼax jachaʼ jun achalalaxik›. Kamik nim kinwil wi waʼ taq tzij riʼ rumal che tajin kbʼan kʼax chwe rumal ri nukojonik y kinchʼobʼo che kinkowin taj kinkochʼ ronojel ri tajin kinriqo xaq nutukel. Ri Jehová uyaʼom e utz taq amigos che kiyaʼom ri kitobʼanik chwe». b

Pa we kʼaxalaj taq qʼij riʼ, nim upatan che kkʼojiʼ utz taq qamigos che kojkitoʼo. Y are chiʼ kumajij ri nimalaj kʼaxkʼolil qastzij riʼ che keʼajwataj e utz taq qamigos. Rumal laʼ, chqakojoʼ qachuqʼabʼ kamik rech kojux utz taq amigos kukʼ ri qachalal (1 Ped. 4:7, 8).