KʼUTUNEM 23
«Chtastaj ri bʼiʼ la»
«Ajawaxel, [Jehová] ri bʼiʼ la re chbʼe qʼij saq» (SAL. 135:13).
BʼIXONEM 10 ¡Chqayaʼ uqʼij ri qaTat Jehová!
RI KQETAʼMAJ NA *
1, 2. ¿Jas chrij sibʼalaj utz kqilo kojchʼaw wi ri oj testigos rech Jehová?
RI NIMALAJ uQʼatbʼal tzij ri Dios xuqujeʼ ri uchʼajchʼobʼisaxik ri ubʼiʼ are jastaq nim kibʼanik che kʼo chqawach. Ri oj testigos rech Jehová sibʼalaj utz kqilo kojchʼaw chrij ri jastaq riʼ kukʼ ri e winaq. Are kʼu, ri e kebʼ jastaq riʼ ¿la kʼo kibʼanik chbʼil kibʼ? Kʼo jubʼiqʼ.
2 Qonojel qetaʼmam che rajawaxik kchʼajchʼobʼisax ri ubʼiʼ ri Dios xuqujeʼ kkʼutik che ri ubʼanik ri uqʼatbʼal tzij are más utz. Rajawaxik che qas kqachʼobʼ ri e kebʼ jastaq riʼ xuqujeʼ nim kqil wi.
3. ¿Jas kukʼut ri ubʼiʼ ri Jehová?
3 Ri ubʼiʼ ri Jehová kuqʼalajisaj ronojel ri e ubʼantajik ri qaDios, xuqujeʼ ri kubʼan che uqʼatik tzij. Rumal laʼ, we kqabʼij che ri uchʼajchʼobʼisaxik ri ubʼiʼ ri Jehová are nim ubʼanik, xuqujeʼ tajin kqabʼij che ri kubʼan che uqʼatik tzij are ri más utz. Ri ubʼiʼ kʼo ubʼanik rukʼ ri kubʼan che ri utaqanik rumal che are ri nimalaj Qʼatal tzij cho ronojel ri kajulew (chawilaʼ ri recuadro « Jalajoj taq jastaq che kʼo ubʼanik rukʼ ri ubʼiʼ ri Dios»).
4. a) ¿Jas kubʼij Salmo 135:13 chrij ri ubʼiʼ ri Dios? b) ¿Jas preguntas kqil na urespuestas pa wajun kʼutunem riʼ?
4 Ri ubʼiʼ ri Jehová sibʼalaj nim ubʼanik xuqujeʼ kʼo ta rukʼ kjunamataj wi (chasikʼij uwach Salmo 135:13). ¿Jasche sibʼalaj nim ubʼanik? ¿Jas ri nabʼe molom tzij xbʼix chrij ri bʼiʼaj riʼ? ¿Jas kubʼan ri Dios che uchʼajchʼobʼisaxik? Xuqujeʼ ¿jas kqabʼan oj rech kojtobʼan che uchʼajchʼobʼisaxik? Pa wajun kʼutunem riʼ kqil na ri respuestas re ri preguntas riʼ.
¿JASCHE NIM UBʼANIK RI BʼIʼAJ?
5. ¿Jas preguntas weneʼ kkichomaj ri e winaq are chiʼ kkita ri e tzij «Chtastaj ri bʼiʼ la»?
5 Jesús xubʼij che jun chke ri jastaq che rajawaxik kqataʼ pa ri qachʼawem are: «Chtastaj ri bʼiʼ la» (Mat. 6:9). ¿Jas kraj kubʼij ri e tzij riʼ? Kraj kubʼij kbʼan tastalik o chʼajchʼoj che. Weneʼ jun kuchomaj: «¿La xa tastal taj o chʼajchʼoj ta ri ubʼiʼ ri Dios? ¿Jasche rajawaxik kchʼajchʼobʼisaxik?». Rech kqachʼobʼ wariʼ, rajawaxik kqetaʼmaj ri kraj kubʼij jun bʼiʼaj.
6. ¿Jasche nim ubʼanik jun bʼiʼaj?
6 Jun bʼiʼaj xaq xiw ta jun tzij che ktzʼibʼax cho jun wuj o kbʼixik. Ri Biblia kubʼij: «Are kʼo kechbʼex na we kʼo utzalaj tzijol, ri man kʼu ta wi yoqʼobʼal, chuwach ri kʼiʼalaj qʼan pwaq xuqujeʼ saq pwaq» (Prov. 22:1; Ecl. 7:1). ¿Jasche nim ubʼanik? Rumal che ri e nikʼaj chik kʼo kkichomaj chrij ri ubʼantajik ri winaq man xaq xiw ta chrij ri ubʼiʼ. Are ta nim ubʼanik jas kbʼan che utzʼibʼaxik jun bʼiʼaj o ri kbʼan che ubʼixik, xaneʼ ri más nim ubʼanik are ri kkichomaj ri e winaq are chiʼ kkilo o kkita ri bʼiʼaj.
7. ¿Jas kibʼanom ri e winaq che utzʼilobʼisaxik ri ubʼiʼ ri Dios?
7 Are chiʼ ri winaq kkimol tzij chrij ri Jehová, tajin kkiyoqʼ ri ubʼantajik o tajin kkitzʼilobʼisaj ri ubʼiʼ. Ri nabʼe molom tzij che xbʼix chrij ri Dios xuqujeʼ ri ubʼantajik xkʼulmataj pa ri jardín de Edén. Chqilaʼ jas kqetaʼmaj chrij wajun bʼantajik riʼ.
RI NABʼE MOLOM TZIJ CHRIJ RI UBʼIʼ RI JEHOVÁ
8. a) ¿Jas ketaʼm ri Adán y Eva? b) ¿Jas preguntas kbʼanik?
8 Adán y Eva ketaʼm ri ubʼiʼ ri Jehová, xuqujeʼ ketaʼm che areʼ ri yaʼowinaq ri kikʼaslemal, ri kotzʼiʼjalaj ulew che kekʼasiʼ chuwach xuqujeʼ jun utzalaj kikʼulanem (Gén. 1:26-28; 2:18). Are kʼu, ¿la xechoman chrij ronojel ri xuya ri Jehová chke? ¿La xkinimarisaj ri kiloqʼoqʼebʼal xuqujeʼ ri kimaltyoxinik che kkinaʼ che? Xqʼalajinik are chiʼ xekoj pa taqchibʼal rumal ri ukʼulel ri Dios.
9. Junam che kubʼij Génesis 2:16, 17 y 3:1-5, ¿jas xubʼij Jehová che ri Adán y Eva, xuqujeʼ jas xubʼan Satanás che uyaʼik uwiʼ ri qastzij?
9 (Chasikʼij uwach Génesis 2:16, 17; 3:1-5). Satanás xukoj jun kumatz rech xubʼij wariʼ che ri Eva: «¿La ubʼim ri Dios chiwe chi man kitij ta ri kiwach ri cheʼ ri e kʼo pa ri tikonijibʼal?». Qas xnaʼw che ubʼanik ri pregunta. Ri ubʼim ri Dios are che kekunik kkitij uwach ronojel ri cheʼ xa jun yaʼtal taj kkitijo. Qastzij riʼ che kʼo kʼi uwach taq cheʼ che kekunik kkitijo (Gén. 2:9). Qas qʼalaj che Jehová xusipaj kʼi jastaq chke. Are kʼu xubʼij chke che kʼo jun cheʼ che kkitij ta uwach. Rukʼ ri pregunta che xubʼan ri Satanás xuya uwiʼ ri qastzij jetaneʼ xuya ubʼixik che ri Dios kuya ta ronojel chke. Weneʼ Eva xuchomaj che kʼo jun utz jastaq che ri Dios tajin ta kuya chke.
10. ¿Jas nimalaj molom tzij xubʼij ri Satanás chrij ri ubʼiʼ ri Dios xuqujeʼ jas xkʼulmatajik?
10 Pa ri tiempo riʼ, Eva kniman che ri Jehová. Xubʼij che ri Satanás ri taqanik yaʼom chke rumal ri Dios. Xuqujeʼ xubʼij che, che kekun taj keqebʼ rukʼ ri cheʼ. Eva retaʼm che kekamik we kkinimaj ta ri Dios. Satanás xnaʼw che ubʼixik: «Man kixkam taj» (Gén. 3:2-4). Are jun nimalaj molom tzij chrij ri ubʼiʼ ri Dios, jetaneʼ xubʼij che Jehová xubʼij ta ri qastzij chke. Jewaʼ ri Satanás xux jun itzel, jun bʼanol tzij. Eva xsubʼ uwach, rumal laʼ are xunimaj ri Satanás (1 Tim. 2:14). Xukubʼsaj más ukʼuʼx chrij ri Satanás chuwach ri Jehová, rukʼ wariʼ xuchaʼ ubʼanik jun kʼaxalaj jastaq pa ri ukʼaslemal: xunimaj ta ri Dios xuqujeʼ xutij uwach ri cheʼ che yaʼom ta chke, tekʼuriʼ xuya che ri Adán rech kutijo (Gén. 3:6).
11. ¿Jas xkibʼan ta ri Adán y Eva?
11 We ta ri Eva jeʼ xubʼij wariʼ che ri Satanás: «Wetaʼm ta awach, are kʼu ri nuTat Jehová qas wetaʼm uwach. Qas kinloqʼoqʼej xuqujeʼ kinkubʼsaj nukʼuʼx chrij. Uyaʼom ronojel ri kajwataj chqe. ¿Jasche kamol tzij chrij? ¡Jat!». Qas ta xkikot riʼ ri Jehová we ta ri umiʼal xukʼut ri uloqʼoqʼenik xuqujeʼ ri usukʼilal rukʼ ri e tzij riʼ (Prov. 27:11). Are kʼu ri Eva xuqujeʼ Adán qas ta kkiloqʼoqʼej ri Jehová. Rumal laʼ xkitoʼ ta uwiʼ ri ubʼiʼ.
12. ¿Jas xubʼan Satanás rech xubʼan kebʼ ukʼuʼx ri Eva xuqujeʼ jas ri xkibʼan ta ri Adán y Eva?
12 Junam rukʼ ri xqilo, Satanás xumaj umolik tzij chrij ri Jehová are chiʼ xukoj uchuqʼabʼ rech ri Eva kuchomaj che Jehová qas ta jun utz Tat. Adán y Eva xkitoʼ ta uwiʼ ri ubʼiʼ ri Jehová. Wariʼ xubʼano che xkikoj ri molom tzij che xubʼij ri Satanás xuqujeʼ xkinimaj ta ri kiTat Jehová. Kimik, xa junam kubʼan ri Satanás. Kubʼan kʼax che ubʼiʼ ri Dios rukʼ molom taq tzij y ri kekojon che ri molom taq tzij riʼ kkixutuj ri uqʼatbʼal tzij ri Jehová.
JEHOVÁ KUCHʼAJCHʼOBʼISAJ RI UBʼIʼ
13. ¿Jas kubʼan Ezequiel 36:23 che ukʼutik ri qas kuya ubʼixik ri Biblia?
13 ¿La xaq xuta ri Jehová ri molom tzij xbʼix chrij? Xaq taj. Ronojel ri kʼo pa ri Biblia kukʼut ri ubʼanom ri Jehová che ukʼutik che ri xubʼij ri Satanás pa ri jardín de Edén are jun molom tzij (Gén. 3:15). Ri qas kuya ubʼixik ri uTzij ri Dios are waʼ: rumal ri Qʼatbʼal tzij che kʼo pa uqʼabʼ ri Jesús, Jehová kuchʼajchʼobʼisaj ri ubʼiʼ xuqujeʼ kutzalij lo ri jamaril xuqujeʼ ri sukʼilal cho ri uwach Ulew. Ri Biblia kuya ubʼixik ri kubʼan ri Jehová che uchʼajchʼobʼisaxik ri ubʼiʼ (chasikʼij uwach Ezequiel 36:23).
14. ¿Jas xubʼan ri Jehová rech kuchʼajchʼobʼisaj ri ubʼiʼ rukʼ ri xkʼulmataj pa ri jardín de Edén?
14 Satanás ukojom uchuqʼabʼ rech Jehová kubʼan ta ri uchomam ubʼanik, are kʼu kuninaq ta che uqʼatexik. Ri Biblia kukʼut ri ubʼantajik ri Jehová xuqujeʼ kukʼutu che kʼo ta jun kjunamataj rukʼ. Qastzij che ri xubʼan ri Satanás xuqujeʼ ri e teren chrij kiyaʼom jun nimalaj bʼis che ri Jehová (Sal. 78:40). Are kʼu ukʼutum nojibʼal, paciencia xuqujeʼ sukʼilal. Pa jalajoj taq jastaq ukʼutum ri nimalaj uchuqʼabʼ. Xuqujeʼ ri uloqʼoqʼebʼal kilitaj pa ronojel ri jastaq kubʼano (1 Juan 4:8). Jehová amaqʼel chakuninaq rech kuchʼajchʼobʼisaj ri ubʼiʼ.
Satanás xumol tzij chrij ri Jehová chuwach ri Eva, jeʼ tajin kubʼan na kimik. (Chawilaʼ ri párrafos 9, 10 y 15). *
15. ¿Jas tajin kubʼan ri Satanás che umolik tzij chrij ri Dios kimik xuqujeʼ la utz elenaq ri ubʼanom?
15 Kimik, Satanás uyaʼom ta kan uyoqʼik ri Jehová. Kukoj uchuqʼabʼ rech kubʼan kebʼ kikʼuʼx ri e winaq chrij ri uchuqʼabʼ, ri usukʼilal, ri unojibʼal xuqujeʼ ri uloqʼoqʼebʼal ri Dios. Jun kʼutbʼal, kubʼano che ri e winaq kkichomaj che kʼo ta ri Jehová. Are kʼu we jun kkojon chrij ri Dios kubʼano che ri e winaq kkichomaj che ri e utaqanik ri Dios e sukʼ taj xuqujeʼ kʼax kinimaxik. Xuqujeʼ kubʼano che ri e winaq kkichomaj che ri Jehová are jun itzel Dios rumal che keʼuya ri e winaq pa qʼaqʼ. Weneʼ ri e winaq riʼ kkikoj ri e molom tzij riʼ kkixutuj ri utaqanik ri Jehová. Rumal che kʼo na ri Satanás, kukoj na uchuqʼabʼ che umolik tzij xuqujeʼ kubʼano che kojkʼojiʼ ta chi chunaqaj ri Jehová. ¿La kkun che ubʼanik?
RI KQABʼANO RECH KOJTOBʼAN CHE UCHʼAJCHʼOBʼISAXIK RI UBʼIʼ RI DIOS
16. ¿Jas xkibʼan ta ri Adán y Eva, che oj kojkunik kqabʼano?
16 Jehová kuya bʼe rech ri winaq ajmakibʼ ketobʼan che uchʼajchʼobʼisaxik ri ubʼiʼ. Rumal laʼ pa qajujunal kojkunik kqabʼan ri xkibʼan ta ri Adán y Eva. Paneʼ e kʼi ri e winaq keyoqʼon chrij ri Jehová xuqujeʼ kkimol tzij chrij, oj kojkunik kqatoʼ uwiʼ ri qastzij: che Jehová chʼajchʼoj, sukʼ, utz xuqujeʼ kloqʼoqʼenik (Is. 29:23). Kojkunik kqakʼutu che kqaj che Jehová kux Qʼatal tzij pa qawiʼ xuqujeʼ kqaya ubʼixik che xaq xiw ri uqʼatbʼal tzij sukʼ, kukʼam lo jamaril xuqujeʼ kikotemal chke konojel ri winaq (Sal. 37:9, 37; 146:5, 6, 10).
17. ¿Jas xubʼan ri Jesús che uyaʼik ubʼixik ri ubʼiʼ ri uTat?
17 Are chiʼ kqatoʼ uwiʼ ri Jehová, kqakʼutu che kqabʼan qe junam rukʼ ri Jesucristo (Juan 17:26). Ri Jesús xaq xiw ta xukoj ri ubʼiʼ ri loqʼalaj uTat xaneʼ xuya ubʼixik chke ri e winaq xuqujeʼ xuya ubʼixik ri qas ubʼantajik ri Jehová. Jun kʼutbʼal, ri fariseos xkikʼutu che ri Jehová are jun Dios ko ranimaʼ, kukʼex ta ri uchomanik, itzel xuqujeʼ kubʼano che kʼo kʼaxkʼolil, are kʼu ri Jesús xeʼutoʼ ri e winaq rech kkilo che ri uTat utz ranimaʼ, paciente, kloqʼoqʼenik xuqujeʼ kel ukʼuʼx chke ri e nikʼaj chik. Rumal che pa ronojel ri jastaq che xubʼan pa ukʼaslemal xukʼut ri e ubʼantajik ri uTat rumal laʼ ri e winaq xekunik xketaʼmaj chrij ri Jehová (Juan 14:9).
18. ¿Jas kqabʼan che ukʼutik che xa molom tzij xuqujeʼ yoqʼonik kkibʼan ri e ukʼulel ri Jehová chrij?
18 Rech kqabʼan qe junam rukʼ ri Jesús, rajawaxik kojchʼaw chrij ri qetaʼm chrij ri Jehová che are jun Dios sibʼalaj kloqʼoqʼenik xuqujeʼ sibʼalaj utz. Rukʼ wariʼ kqakʼutu che ri kkibʼij ri e ukʼulel xa molom tzij xuqujeʼ yoqʼonik. Kqachʼajchʼobʼej ri ubʼiʼ ri Jehová xuqujeʼ keqatoʼ ri e winaq che uchʼobʼik che areʼ are jun tastalikalaj Dios. Paneʼ oj ajmakibʼ, kojkunik kqesaj uwach ri Jehová (Efes. 5:1, 2). Are chiʼ kqakʼut ri qas ubʼantajik ri Jehová rukʼ ri kqabʼij xuqujeʼ ri kqabʼano, tajin kojtobʼan che uchʼajchʼobʼisaxik ri ubʼiʼ. Xuqujeʼ kojtobʼan che uchʼajchʼobʼisaxik are chiʼ keqatoʼ ri e winaq che ukʼexik ri utz ta kichomanik chrij ri Dios. * Xuqujeʼ, kqachʼajchʼobʼisaj ri ubʼiʼ ri Jehová are chiʼ kojux sukʼ chuwach paneʼ oj ajmakibʼ (Job 27:5).
Kqaj keqatoʼ ri tajin kqaya etaʼmanik chke rech kkichʼobʼo che Jehová sibʼalaj utz xuqujeʼ kloqʼoqʼenik. (Chawilaʼ ri párrafos 18 y 19). *
19. Junam rukʼ ri kubʼij Isaías 63:7, ¿jas ri qas rajawaxik kqakʼut chkiwach ri e winaq are chiʼ kqaya tijonik chke?
19 Kʼo chi jun jastaq che kojkunik kqabʼano rech kojtobʼan che uchʼajchʼobʼisaxik ri ubʼiʼ ri Jehová. Are chiʼ kqaya etaʼmanik chrij ri Biblia, amaqʼel kojchʼaw chrij ri nimalaj uqʼatbʼal tzij ri Dios. Rumal che qas yaʼtal che kuqʼat tzij pa uwiʼ ri kajulew. Paneʼ nim ubʼanik kqakʼut ri utaqanik ri Dios are kʼu ri más nim ubʼanik are ukʼutik chkiwach ri e winaq che rajawaxik kkiloqʼoqʼej xuqujeʼ keʼux sukʼ che ri Jehová. Rumal laʼ, rajawaxik amaqʼel kqakʼut ri utz taq ubʼantajik (chasikʼij uwach Isaías 63:7). We jeʼ kqabʼano, kubʼano che ri e winaq kkiloqʼoqʼej más ri Jehová xuqujeʼ keniman che rumal che qas kkaj keʼux sukʼ che.
20. ¿Jas pregunta kqil na pa ri jun chi kʼutunem?
20 Junam rukʼ ri qilom chik, ri uchʼajchʼobʼisaxik ri ubʼiʼ ri Jehová kʼo kʼi kraj kubʼij, ¿jas kqabʼano rech ri qabʼantajik xuqujeʼ ri kqakʼutu kuya uqʼij ri Dios xuqujeʼ keʼutoʼ ri e nikʼaj chik rech keqebʼ rukʼ? Pa ri jun chi kʼutunem kqil ri respuesta.
BʼIXONEM 2 Jehová ri abʼiʼ
^ párr. 5 ¿Jas kʼax keriqitaj wi konojel ri winaq xuqujeʼ ri ángeles? ¿Jasche nim ubʼanik xuqujeʼ jas kqabʼano rech kojtobʼan che usukʼumaxik? Ri respuestas re ri preguntas riʼ xuqujeʼ re ri nikʼaj chik kubʼan más ko che ri qachilanik rukʼ ri Jehová.
^ párr. 18 Jujun mul, ri e qawuj kibʼim che rajawaxik taj kbʼan chʼajchʼoj che ri ubʼiʼ ri Jehová, rumal che kʼo ta nijun ubʼim che taqal ta wajun bʼiʼaj riʼ che. Are kʼu pa ri reunión anual re ri junabʼ 2017 xsukʼumax wajun chomanik riʼ. Ri kʼamal bʼe re ri programa xubʼij: «Kʼo ta kubʼano che kqabʼij pa qachʼawem che kchʼajchʼobʼisax ri ubʼiʼ ri Jehová, rumal che rajawaxik kkʼutik che xa molom tzij xbʼan chrij» (chawilaʼ ri programa re enero 2018 pa jw.org®, chuxeʼ ri sección BIBLIOTECA > JW BROADCASTING®).
^ párr. 62 RI KUKʼUT RI WACHBʼAL: Ri Itzel xuyoqʼ ri Jehová are chiʼ xubʼij che ri Eva che are jun bʼanol tzij. Xumaj lo pa ri Edén, Satanás tajin kumol na tzij chrij ri Dios, kubʼij che are jun itzel Dios xuqujeʼ che are ta xbʼanow ri winaq.
^ párr. 64 RI KUKʼUT RI WACHBʼAL: Jun qachalal tajin kukʼut ri ubʼantajik ri Dios are chiʼ tajin kuya etaʼmanik re ri Biblia.
