1, 2. ¿Jas kʼax kkiriq e kʼi Testigos?

RI APÓSTOL Pablo xubʼij che ri Timoteo y chqe oj ri cristianos che utz kqabʼan che ri qachak (2 Tim. 4:5). Qonojel kqakoj qachuqʼabʼ che utz ubʼanik ri qachak kqabʼano are kʼu kʼax ubʼanik. E kʼi qachalal kkikoj kichuqʼabʼ rech kkitzijoj ri utzij ri Dios (2 Tim. 4:2). Chojchoman chkij ri e qachalal che e kʼo pa taq ri tinamit ri qʼatem wi uwach ri qachak che ri Dios kumal ri e qʼatal taq tzij. Are chiʼ kkitzijoj ri utzij ri Dios xaq kebʼ pa kiwiʼ rumal che ketaʼm taj weneʼ kekʼam bʼi pa cárcel.

² Ri testigos rech Jehová kkiriq jalajoj uwach taq kʼax che kuya bʼis chke. E kʼo qachalal kʼi horas kechakun ronojel taq qʼij are kʼu xaq xiw kkichʼak ri kkitijo. Weneʼ kkaj kkitzijoj más ri utzij ri Dios are kʼu rumal che e kosinaq kekun taj. E kʼo jujun weneʼ kiriqom jun yabʼil che kkunataj ta chik, nim chi kijunabʼ o kekun taj keʼel bʼi pa ri kachoch wariʼ kubʼano che nim ta tiempo kkitzijoj ri utzij ri Dios. Y e nikʼaj chik kkichomaj che kʼo ta kekunik kkibʼano. Jun qachalal re Oriente Medio Mary ubʼiʼ, * kubʼij: «Are chiʼ kinchoman chrij ri jastaq che kinkun taj kinbʼano kqaj nuchuqʼabʼ y kresaj nutiempo ri kinkoj che uyaʼik uqʼij ri Jehová».

3. ¿Jas kqil na pa wajun kʼutunem riʼ?

³ Apastaneʼ ri kʼax che kqariqo, ri Jehová kuya qachuqʼabʼ rech kqachʼijo y rech kojkunik kqapatanij. Pa wajun  kʼutunem riʼ kqil ri kubʼan ri Jehová che qatoʼik, are kʼu nabʼe kqil na jas xubʼan che utoʼik ri apóstol Pablo y ri Timoteo rech utz xkibʼan che ri kichak paneʼ xkiriq kʼax.

4. ¿Jas taq kʼax xuriq ri Pablo?

⁴ Ri Pablo xuriq kʼi kʼax, are chiʼ xchʼayik, xbʼukʼ rukʼ abʼaj y xtzʼapix pa cárcel (2 Cor. 11:23-25). Rumal laʼ jujun taq mul xubʼij che sibʼalaj kbʼisonik (Rom. 7:18, 19, 24). Xuqujeʼ, rukʼ chuqʼabʼ xutaʼ che ri Dios rech ktoʼ chuwach ri kʼax tajin kuriqo che kjunamataj rukʼ «kʼix» che kʼo pa ri ucuerpo (2 Cor. 12:7, 8).

5. ¿Jas xkunik xubʼan ri Pablo paneʼ xuriq kʼi kʼax?

⁵ Ri Jehová xuya uchuqʼabʼ ri Pablo rech xuchʼij ri kʼax. Chojchoman chrij ri xubʼano are chiʼ tzʼapim pa Roma, rukʼ kikotemal xutzijoj ri utzij ri Dios chkiwach ri e kʼamal bʼe judíos y weneʼ chke e jujun winaq che nim kibʼanik pa ri qʼatbʼal tzij (Hech. 28:17; Filip. 4:21, 22). Xuqujeʼ xutzijoj chke ri chajinelabʼ y ri winaq che xeʼopan che uchʼabʼexik (Hech. 28:30, 31; Filip. 1:13). Pa ri tiempo riʼ ri Dios xukoj ri Pablo rech xutzʼibʼaj jujun cartas che xuya utzilal pa ri kikʼaslemal ri cristianos ojer y uyaʼom utzilal chke ri cristianos kimik. Y, rumal ri ukʼutbʼal ri Pablo, ri e qachalal re Roma xkowir ri kikojonik y «sibʼalaj xkichajij animaʼ che utzijoxik ri utzij ri Dios man rukʼ ta xeʼn ibʼ» (Filip. 1:14). Xubʼan ronojel ri xkun che ubʼanik y xubʼij che ronojel ri xuriq pa ri ukʼaslemal xtobʼanik rech xtzijox más ri utzij ri Dios (Filip. 1:12).

6. Junam rukʼ ri kubʼij 2 Corintios 12:9, 10, ¿jas xtoʼw ri Pablo rech xuya ta kan ubʼanik ri uchak che ri Dios?

⁶ Ri Pablo retaʼm che ronojel ri xkunik xubʼano are ri Dios xyaʼow uchuqʼabʼ che ubʼanik. Rumal laʼ xutzʼibʼaj kanoq che ri uchuqʼabʼ ri Dios «kkʼutun [...] pa ri tuqaril» (chasikʼij uwach 2 Corintios 12:9, 10). Rumal ri utobʼanik ri uxlabʼixel, ri Pablo xubʼan ri uchak che ri Dios paneʼ xuriq kʼi kʼax.

7. ¿Jas kʼax xuchʼij ri Timoteo rech xuya ta kan ubʼanik ri uchak che ri Dios?

⁷ Ri Timoteo xuqujeʼ xajwataj ri utobʼanik ri Dios che. Jun kʼutbʼal, xbʼe rukʼ  ri Pablo che utzijoxik ri utzij ri Dios pa jalajoj taq tinamit. Xuqujeʼ xtaq bʼi rumal ri Pablo che kisolixik y uyaʼik kichuqʼabʼ ri congregaciones (1 Cor. 4:17). Weneʼ ri Timoteo xunaʼo che sibʼalaj kʼi ri chak xya che, rumal laʼ ri Pablo xubʼij wariʼ che: «Mayaʼ chke ri winaq chi kketzelaj awach xa rumal rech chi at akʼal achi na» (1 Tim. 4:12). Jun chi kʼax che xuriq ri Timoteo are che amaqʼel kyawajik (1 Tim. 5:23). Are kʼu retaʼm che are ri Jehová kyaʼow uchuqʼabʼ rech kuya ta kan utzijoxik ri utzalaj taq tzij y kitoʼik ri e qachalal (2 Tim. 1:7).

8. ¿Jas kubʼan ri Jehová che uyaʼik qachuqʼabʼ kimik?

⁸ Kimik ri Jehová kuya ri «nimalaj kuʼinem» chqe o ri nimalaj chuqʼabʼ rech kqaya ta kan upatanexik (2 Cor. 4:7). Chqanikʼoj kajibʼ tobʼanik che uyaʼom ri Jehová chqe rech oj ko pa ri qakojonik y rech kqaya ta kan upatanexik: ri chʼawem, ri Biblia, ri e qachalal y ri utzijoxik ri utzij.

9. ¿Jas kubʼan ri chʼawem che qatoʼik?

⁹ Ri chʼawem. Pa Efesios 6:18, Pablo xubʼij: «Mitanabʼaʼ ri ubʼanik chʼawem rukʼ Dios». We ronojel qʼij kqabʼan qachʼawem, ri Dios kuya qachuqʼabʼ. Jun qachalal che kel Bolivia Jonni ubʼiʼ, kubʼij che sibʼalaj xtoʼ rumal ri Jehová are chiʼ xqʼax pa kʼi uwach kʼax. Ri utat unan y ri rixoqil junam tiempo xeqaj chuwach kisok rumal che xeyawajik, kuriq ta chi ri kubʼan che kilik. Ri unan xkamik y ri utat y ri rixoqil sibʼalaj kʼax xkiriqo rech xeʼutzir chi jumul. Ri qachalal Jonni kubʼij: «Are chiʼ kinriq ta chik jas kinbʼano, ri Jehová kinutoʼo are chiʼ kinbʼij che ri qas rajawaxik chwe». Ri Jehová xuya uchuqʼabʼ pa ronojel ri kʼax che xuriqo. Jun chi qachalal Ronald ubʼiʼ xretaʼmaj che ri unan kʼo cáncer che y are chiʼ xqʼax jun ikʼ xkamik. ¿Jas xyaʼow uchuqʼabʼ rech xuchʼij ri kʼax? Ri areʼ kubʼij: «Kinnaʼ ri utobʼanik ri Jehová are chiʼ kinjaq ri wanimaʼ chuwach y wetaʼm che sibʼalaj kuchʼobʼ ronojel ri kinnaʼo». Weneʼ jujun taq mul kqanaʼo che kqariq taj jas kqabʼij pa ri qachʼawem, are kʼu ri Jehová kubʼij chqe che utz kojtzijon rukʼ paneʼ kojkun taj kqabʼij ri kqanaʼo (Rom. 8:26, 27).

10. Junam rukʼ ri kubʼij Hebreos 4:12, ¿jasche nim ubʼanik che kqasikʼij uwach ri Biblia y kojchoman chrij?

¹⁰ Ri Biblia. Kojkunik kqabʼan qe ri xubʼan ri Pablo rech kqariq qachuqʼabʼ y kubʼsal qakʼuʼx (Rom. 15:4). Are chiʼ kojchoman chrij ri kqasikʼij uwach pa ri Biblia, ri Jehová kukoj ri ruxlabʼixel rech kqachʼobʼo jas kqabʼan che ubʼanik pa ri qakʼaslemal (chasikʼij uwach Hebreos 4:12). Ri qachalal Ronald che xojchʼaw chrij pa ri jun kan párrafo, kubʼij: «Utz che xinnaqʼatisaj wibʼ che usikʼixik uwach ri Biblia ronojel taq chaqʼabʼ. Kinchoman chrij ri ubʼantajik ri Jehová y ri kubʼan che kiloqʼoqʼexik ri kepatanin che. Sibʼalaj kuya nuchuqʼabʼ».

11. ¿Jas xubʼan ri Biblia che uyaʼik uchuqʼabʼ jun qachalal ixoq che xuriq kʼax?

¹¹ Uchomaxik rij ri kqasikʼij uwach kojutoʼo rech are ta kbʼe qakʼuʼx chrij ri kʼax kqariqo. Chqila ri xukʼulmaj jun qachalal ixoq che xkanaj kan malkaʼn. Jun kʼamal bʼe re ri congregación xubʼij che chi utz kusikʼij uwach ri wuj re Job. Are chiʼ xusikʼij uwach, xuchomaj wariʼ  chrij ri Job: «Job, ¿jasche xaq xiw chrij ri utz taj katchoman wi?». Rukʼ wariʼ xuchʼobʼo che je tajin kubʼan areʼ, ri ubʼantajik y ri uchomanik xaq junam rukʼ rech ri Job. Wariʼ xutoʼ rech xusukʼumaj ri uchomanik y xuya uchuqʼabʼ rech kbʼison ta chi más rumal che kʼo ta chi ri rachajil rukʼ.

12. ¿Jas kubʼan ri Jehová che kikojik ri e qachalal rech kkiya qachuqʼabʼ?

¹² Ri e qachalal. Ri Jehová xuqujeʼ keʼukoj ri qachalal che uyaʼik qachuqʼabʼ. Ri Pablo xutzʼibʼaj che sibʼalaj kraj kril kiwach ri e rachalal rech kkiya laʼ kichuqʼabʼ chbʼil taq kibʼ (Rom. 1:11, 12). Ri qachalal Mary che xojchʼaw chrij pa ri párrafo 2 sibʼalaj utz krilo kkʼojiʼ kukʼ ri e qachalal. Kubʼij: «Ri Jehová e ukojom ri qachalal rech kkiya tobʼanik chwe, paneʼ qas ta ketaʼm jas tajin kinkʼulmaj. Xkikubʼsaj nukʼuʼx y xkitaq lo alaj taq wuj chwe y xopan pa wanimaʼ ri kitzʼibʼam lo chupam. Xuqujeʼ kinutoʼo are chiʼ kinchʼaw kukʼ e nikʼaj chi qachalal ixoqibʼ che junam kʼax qakʼulmam kukʼ. Y ri e kʼamal taq bʼe sibʼalaj kiyaʼom tobʼanik chwe rech kinnaʼo che kinkaj ri e qachalal».

13. ¿Jas kqabʼano rech kqaya laʼ qachuqʼabʼ chbʼil taq qibʼ pa ri e riqbʼal ibʼ?

¹³ Pa ri qariqbʼal ibʼ kqaya laʼ qachuqʼabʼ chbʼil qibʼ. Rumal laʼ, utz che kqabʼij chke ri e qachalal che keqaj y kqamaltyoxij ri chak che tajin kkibʼano. Jun kʼutbʼal, are chiʼ xkʼis ri riqbʼal ibʼ jun kʼamal bʼe a Piter ubʼiʼ xubʼij wariʼ che jun qachalal che Testigo ta ri rachajil: «Sibʼalaj kojkikotik che amaqʼel kqil awach pa ri riqbʼal ibʼ kukʼ ri e seis awal y che kkiya utz taq comentarios». Ri qachalal sibʼalaj xmaltyoxinik y xqaj uwaʼl uwach xubʼij: «Qas kajwataj ri tzij riʼ chwe kimik».

14. ¿Jas kojutoʼ wi ri utzijoxik ri utzij ri Dios?

¹⁴ Ri utzijoxik utzij ri Dios. Wariʼ kuya utzilal chqe y qachuqʼabʼ paneʼ ri winaq kojkitatabʼej taj (Prov. 11:25). Jun qachalal Stacy ubʼiʼ je xukʼulmaj. Are chiʼ xesax bʼi jun rachalaxik pa ri congregación sibʼalaj xbʼisonik. Y kubʼij che ajmak jubʼiqʼ rumal che xkun ta che utoʼik. ¿Jas xtoʼw chuwach wariʼ? Areʼ kubʼij: «Pa ri tiempo riʼ xinriq jun winaq che xumaj retaʼmaxik chrij ri Biblia y aninaq xkʼiy pa ri ukojonik, wariʼ xuya nim nuchuqʼabʼ. Ri qas kyaʼow kikotemal chwe are utzijoxik utzij ri Dios». Rukʼ wariʼ kqilo che ri xyaʼow tobʼanik che ri qachalal are utzijoxik utzij ri Dios y kitoʼik ri e winaq.

15. ¿Jas kukʼut chqawach ri xubʼij ri qachalal Mary?

¹⁵ Weneʼ kqachomaj che rumal ri kojriqitaj wi kojkun taj kqatzijoj más ri utzij ri Dios. Are kʼu chnaʼtaj chqe che we kqabʼan ronojel ri kojkun che ubʼanik, ri Jehová sibʼalaj kkikot qukʼ. Ri qachalal Mary che xojchʼaw chrij nabʼe kubʼij che are chiʼ xqʼax chi pa jun congregación re jun chi chʼabʼal xuchomaj che kʼo ta ktobʼan wi. Kubʼij: «Kʼo jun tiempo xaq xiw kinkunik kinya jun comentario o kinsikʼij jun texto o kinya kan jun wuj chke ri winaq». Ri kubʼano kjunamataj ta kukʼ ri qachalal che qas ketaʼm ri chʼabʼal, are kʼu xrilo che rajawaxik kusukʼumaj ri uchomanik rumal che ri Jehová nim kril ri tajin kubʼano, kubʼij: «Paneʼ qas ta kinkunik kinchʼaw pa ri chʼabʼal are kʼu nim ubʼanik ri kinbʼano rumal che kukʼex ri kikʼaslemal ri e winaq y pa ri Biblia kwesaj wi ri kinbʼij».

16. ¿Jas kyaʼow kichuqʼabʼ ri kekun taj keʼel bʼi pa ri kachoch?

 ¹⁶ Xuqujeʼ we kojkun taj kojel bʼi pa ri qachoch, ri Jehová nim krilo che qas kqaj kqatzijoj ri utzij. Kojutoʼ rech kqatzijoj chke ri kepe che qilik o ri kunanelabʼ. We kqajunamaj ri kqabʼan kimik rukʼ ri xqabʼan ojer weneʼ xa kuqasaj qachuqʼabʼ. Are kʼu, we are kojchoman chrij ri kubʼan ri Jehová che qatoʼik, kqachʼij apachike uwach kʼax.

17. Junam rukʼ ri kubʼij Eclesiastés 11:6, ¿jasche rajawaxik kqaya ta kan utzijoxik utzij ri Dios?

¹⁷ Chqakojoʼ qachuqʼabʼ che utzijoxik utzij ri Dios rumal che qetaʼm taj jampaʼ kok pa kanimaʼ ri winaq (chasikʼij uwach Eclesiastés 11:6). Jun kʼutbʼal, jun qachalal che kʼo más che 80 ujunabʼ Barbara ubʼiʼ kutzijoj ri utzij ri Dios pa teléfono y pa carta. Jun chke ri sobres che xutaq bʼik xuya bʼi ri wuj La Atalaya 1 re marzo 2014 chupam, che kʼo jun kʼutunem chupam ubʼiʼ «¿Jas ubʼanom ri Dios pa awiʼ?». Areʼ retaʼm taj che ri wuj xopan pa kiqʼabʼ jun kʼulaj che 27 junabʼ e Testigos ta chik. Ri kʼulaj kʼi mul xkisikʼij uwach ri wuj. Ri qachalal achi xunaʼo che jetaneʼ are ri Jehová tajin kchʼaw rukʼ. Rukʼ wariʼ xkimaj chi bʼenam pa ri e riqbʼal ibʼ y xeʼux chi Testigos. Sibʼalaj nim riʼ ri kikotemal xuya che ri qachalal Barbara are chiʼ xrilo che utz xel ri uchak y xa rukʼ jun wuj.

18. ¿Jas rajawaxik kqabʼano rech kuya qachuqʼabʼ ri Jehová?

¹⁸ Junam rukʼ ri qilom chik ri Jehová kʼi kubʼan che uyaʼik qachuqʼabʼ, chqakojoʼ ri tobʼanik uyaʼom chqe, junam rukʼ ri chʼawem, ri Biblia, ri e qachalal y ri utzijoxik ri utzij. We je kqabʼano, kqakʼutu che qas kqakubʼsaj qakʼuʼx chrij y kqaj kojutoʼo. Chqatzukuj ri utobʼanik ri qaTat kʼo pa ri kaj rumal che «kuya kichuqʼabʼ ri qas kkikubʼaʼ kikʼuʼx chrij» (2 Crón. 16:9).