1, 2. a) We jun cristiano kraj kkʼuliʼk, ¿jas chrij nabʼe kchoman wi? b) ¿Jas chrij kojchʼaw wi are chiʼ kqabʼij che e kebʼ winaq tajin kkichʼabʼej kibʼ? (Chawilaʼ ri «Chomanik nim ubʼanik»).

 ¿LA KAWAJ katkʼulik? Paneʼ rajawaxik taj kkʼuliʼ jun winaq rech kkikotik, pero e kʼi qachalal kkaj kekʼulik. Are kʼu are chiʼ jun winaq kraj kkʼuliʼk, rajawaxik qas ko ri ukojonik, krilo we kkun che utzuqik jun familia y we qas tzʼaqat chi ri uchomanik (1 Cor. 7:36). a We ri winaq kubʼan wariʼ qas kkikot riʼ pa ri ukʼulanem.

² Qastzij che kʼax uriqik jun winaq rech katkʼuliʼ rukʼ (Prov. 31:10). Y paneʼ kariq jun winaq che kawaj kachʼobʼ más uwach, are kʼu weneʼ katkun ta na kamajij uchʼabʼexik. b Pa wajun kʼutunem riʼ kqil na jas kubʼan jun qachalal rech kumaj uchʼabʼexik jun winaq rech kkʼuliʼ rukʼ. Xuqujeʼ  kqil na ri kkibʼan ri qachalal rech kekitoʼ ri kkaj kekʼulik.

¿JAS KATTOʼWIK RECH KARIQ JUN AKʼULAJ?

3. ¿Jas rajawaxik kuchomaj jun cristiano che kʼulan taj are chiʼ kraj kutzukuj jun winaq rech kkʼuliʼ rukʼ?

³ Are chiʼ majaʼ kamajij uchʼabʼexik jun winaq, rajawaxik kawetaʼmaj jas ubʼanik ri winaq che kawaj katkʼuliʼ rukʼ. We awetaʼm taj jas bʼantajik katzukuj che jun winaq weneʼ kawil ta riʼ che kʼo jun chanaqaj che utz chawe o weneʼ kamaj uchʼabʼexik jun winaq che qas ta utz chawe. Are kʼu, rech katkunik katkʼuliʼ rukʼ jun winaq rajawaxik ujachom chi ri ukʼaslemal che ri Jehová (1 Cor. 7:39). Are kʼu, wariʼ kraj ta kubʼij che apachike winaq che ubʼanom chi uqasanjaʼ utz kux akʼulaj. Are utz che nabʼe katchoman chrij wariʼ: «¿Jas metas kwaj kinbʼano? ¿Jas utz taq bʼantajik kwaj che kʼo rukʼ ri winaq? ¿La qas utz ri kinchomaj chrij ri winaq che kwaj kinkʼuliʼ rukʼ?».

4. ¿Jas kkitaʼ pa ri kichʼawem jujun qachalal che e kʼulan taj?

⁴ We kawaj katkʼulik, weneʼ abʼanom chi achʼawem che ri Jehová chrij wariʼ (Filip. 4:6). Are kʼu ri Jehová ubʼim taj che areʼ ktzukun ri winaq rech katkʼuliʼ rukʼ. Are kʼu ri areʼ nim kril ri kanaʼo y ri kajwataj chawe, rumal laʼ katutoʼo rech kariq jun winaq rech katkʼuliʼ rukʼ (Sal. 62:8). Rumal laʼ amaqʼel chabʼij che ri kawaj y ri kanaʼo, chabʼij che che kuya apaciencia y anojibʼal (Sant. 1:5). Jun qachalal che kʼulan taj che kel pa Estados Unidos ubʼiʼ John c kubʼij ri kutaʼ pa uchʼawem: «Kinbʼij che ri Jehová ri e bʼantajik che kwaj  che kʼo rukʼ jun qachalal ixoq. Kinbʼij che che kinutoʼ che uriqik jun che kwaj kinchʼobʼ uwach. Y kinbʼij che che kinutoʼo rech kkʼojiʼ utz taq nubʼantajik y rech kinux jun utz achajil». Jun qachalal ixoq che kel pa Sri Lanka ubʼiʼ Tanya kubʼij: «Kintaʼ che ri Jehová che kinutoʼo rech kinux sukʼ, kkʼojiʼ jun utz nuchomanik y che amaqʼel kinkikotik kʼa kinriq na ri winaq che kux jun utz achajil chwe». Y we tajin kqʼax ri tiempo y majaʼ kariq ri winaq che katkʼuliʼ rukʼ. ¿Jas kubʼan na ri Jehová? Ri areʼ kubʼij che kuya ronojel ri kajwataj pa ri akʼaslemal y katutoʼo rech katkikotik (Sal. 55:22).

5. ¿Jas ketoʼw ri e kʼulan taj rech kkichʼobʼ kiwach nikʼaj chi qachalal? (1 Corintios 15:58; xuqujeʼ chawilaʼ ri wachbʼal).

⁵ Ri Biblia kubʼij: «Amaqʼel chixok il che ri uchak ri Ajawaxel» (chasikʼij 1 Corintios 15:58). We kabʼan wajun pixabʼ riʼ, katkun riʼ katkʼojiʼ kukʼ kʼi qachalal achijabʼ ixoqibʼ. Y xaq xiw ta kariq utz taq awachiʼl xaneʼ xuqujeʼ kachʼobʼ kiwach nikʼaj chi qachalal che e kʼulan taj che xuqujeʼ tajin kkikoj kichuqʼabʼ che upatanexik ri Jehová. Y rumal che tajin kapatanij ri Jehová, qas katkikot riʼ.

6. ¿Jas rajawaxik knaʼtaj chke ri e kʼulan taj we kkaj kekʼulik?

⁶ Are kʼu, kabʼan taj che utzukuxik jun kʼulaj are kux más nim ubʼanik pa ri akʼaslemal (Filip. 1:10). Ri más kuya kikotemal che jun winaq are jun utz rachilanik rukʼ ri Jehová are ta ri kʼulanem (Mat. 5:3). Xuqujeʼ we at kʼulan taj katkunik kapatanij más ri Jehová (1 Cor. 7:32, 33). Rumal laʼ sibʼalaj kʼi chabʼanaʼ che upatanexik ri Jehová. Jun qachalal ubʼiʼ Jessica, che kel pa Estados Unidos che xkʼuliʼk are chiʼ xa jubʼiqʼ kraj che 40 ujunabʼ, kubʼij: «Are chiʼ majaʼ kinkʼulik, are más xintzijoj ri utzij ri Dios rech kinkikotik».

QAS CHAWILAʼ NA RI UBʼANTAJIK RI WINAQ

7. ¿Jasche rajawaxik nabʼe kawil na ri qas ubʼantajik ri winaq, tekʼuriʼ kabʼij che che utz kawilo? (Proverbios 13:16).

⁷ ¿Y we ya xariq jun winaq che kawilo che utz kux awixoqil o awachajil? ¿La aninaq kabʼilaʼ che ri kanaʼo? Ri Biblia kubʼij che ri winaq che kʼo unojibʼal, nabʼe kretaʼmaj na tekʼuriʼ kubʼan ri kuchomaj ubʼanik (chasikʼij Proverbios 13:16). Rumal laʼ qas utz che katchoman na y kachʼobʼ na uwach ri winaq are chiʼ majaʼ kabʼij che ri kanaʼo. Jun qachalal che kel pa Países Bajos ubʼiʼ Albert kubʼij: «Ri kunaʼ jun winaq aninaq kkʼiyik. Rumal laʼ are utz che kaya atiempo rech qas kachʼobʼ uwach ri winaq y aninaq taj kamajij uchʼabʼexik». Y are chiʼ más achʼobʼom uwach ri winaq, weneʼ kawilo che are ta laʼ ri utz chawe.

8. ¿Jas kubʼan jun qachalal che kʼulan taj che retaʼmaxik uwach jun winaq che utz krilo? (Xuqujeʼ chawilaʼ ri wachbʼal).

⁸ Weneʼ kachomaj: «¿Y jas kinbʼan che retaʼmaxik uwach ri winaq rech kretaʼmaj taj?». Weneʼ pa ri Ja rech Ajawbʼal o are chiʼ ix kʼo kukʼ ri e qachalal kawilo jas ubʼantajik y we qas ko ri ukojonik. ¿E jachin taq kerachilaj? ¿Jas chrij ktzijon wi? (Luc. 6:45). ¿La kjunamataj ri umetas rukʼ ri awech at? Weneʼ katkunik kattzijon kukʼ ri kʼamal taq bʼe rech ri ucongregación o nikʼaj chi cristianos che nim ri kikojonik y che qas kkichʼobʼ uwach (Prov. 20:18). Y rech kkibʼij chawe ri qas ubʼantajik katkunik kataʼ chke jas kkichomaj chrij y jas utz taq ubʼantajik kʼolik  (Rut 2:11). Are kʼu are chiʼ kawaj kachʼobʼ uwach wajun winaq riʼ, mawesaj ukʼixbʼal. Nim chawilaʼ ri kunaʼo y ri kraj taj kabʼan chkiwach ri nikʼaj chik.

9. Are chiʼ majaʼ kabʼij che jun winaq che utz kawilo, ¿jas rajawaxik kawetaʼmaj?

⁹ Are kʼu, ¿jampaʼ tiempo kaweyej rech kabʼij che ri winaq che kawaj kawetaʼmaj uwach? We aninaq kabʼij che che utz kawilo, weneʼ kuchomaj che xa tajin kaya bʼe che ri kanaʼo (Prov. 29:20). Are kʼu we ri winaq krilo che utz kawilo y kʼo ta kabʼij che, weneʼ kuchomaj che awetaʼm taj jas kawaj kabʼano (Ecl. 11:4). Chnaʼtaj chawe che are chiʼ kabʼij che jun winaq ri kanaʼo wariʼ kraj ta kubʼij che rukʼ katkʼuliʼ wi. Are kʼu ri rajawaxik are che qas awetaʼm che ya katkun chik katkʼulik y che weneʼ ri winaq riʼ are ri más utz chawe.

10. ¿Jas kabʼano we kʼo jun che utz katrilo are kʼu kʼo ta kanaʼ at che?

¹⁰ ¿Y we kawilo che kʼo jun utz katrilo? ¿Jas katkunik kabʼano? We kʼo ta kanaʼ che ri winaq, are utz che kabʼij che. Rumal che utz ta riʼ we man kabʼij che che kʼo ta kanaʼo y che xaq kaya bʼe che kuriq kʼax (1 Cor. 10:24; Efes. 4:25).

11. ¿Jas rajawaxik kabʼano we pa ri alugar kʼo costumbres junam rukʼ ri kubʼij ri párrafo?

¹¹ Pa jujun taq lugares are ri e nan tat o ri ufamilia ketzukun ri ukʼulaj ri ala o ri ali che kraj kkʼulik. Y pa nikʼaj chi lugares, are ri kifamilia o ri kachiʼl ketzukun ri ala o ri ali, tekʼuriʼ kkibʼano che kkichʼobʼ kiwach y kkilo we utz kkinaʼ kachilaxik kibʼ. We kkibʼij chqe che kqabʼan wariʼ chojchoman chrij ri kajwataj chke ri kebʼ winaq. We kqilo che ya xqariq jun winaq che ri qachiʼl o jun qafamiliar, qas chqilaʼ ri ubʼantajik y más na ri ukojonik. Jun utz achilanik rukʼ ri Jehová más nim na ubʼanik chuwach ri pwaq, ri tijobʼal o ri ubʼanik ri winaq chkiwach ri nikʼaj chik. Are kʼu masach pa qajolom che ri kchaʼowik we kkʼuliʼk o kkʼuliʼ taj are ri ala y ri ali (Gál. 6:5).

¿JAS KABʼAN CHE UCHʼABʼEXIK JUN WINAQ?

12. We kawaj kachʼabʼej jun winaq, ¿jas kabʼan che ubʼixik che?

¹² We kawaj kachʼabʼej jun winaq, ¿jas kabʼano rech kabʼij che? Weneʼ katkunik kattzijon rukʼ are chiʼ e kʼo kʼi winaq, pa teléfono o pa jun videollamada. Chabʼij  che che utz kawilo y che kawaj kachʼobʼ más uwach (1 Cor. 14:9). We kubʼij chawe che kuchomaj na, chayaʼ tiempo che rech kuchomaj (Prov. 15:28). Y we kubʼij chawe che kraj taj nim chawilaʼ wi ri kuchomaj y ri kunaʼo. d

13. ¿Jas rajawaxik kabʼano we kʼo jun winaq kubʼij chawe che utz katrilo? (Colosenses 4:6).

¹³ ¿Jas kabʼano we kpe jun y kubʼij chawe che utz katrilo? Chnaʼtaj chawe che xajwataj chuqʼabʼ che rech xubʼij chawe ri kunaʼo, rumal laʼ nim chawilaʼ wi y rukʼ utzilal chabʼij che ri kachomaj (chasikʼij Colosenses 4:6). We kanaʼo che rajawaxik na katchoman chrij, chabʼij che. Are kʼu katbʼeyetaj taj y chabʼilaʼ che ri kachomaj (Prov. 13:12). We man kawaj kachʼabʼej wajun winaq riʼ qas chabʼij che che kawaj taj, are kʼu rukʼ utz taq tzij. Jun qachalal che kel pa Austria ubʼiʼ Hans kubʼij ri xubʼano are chiʼ jun qachalal ixoq xubʼij che che kraj kuchʼobʼ uwach. «Rukʼ utzilal xinbʼij che che ri in kʼo ta kwaj rukʼ, aninaq xinbʼilaʼ che rech kuriq ta kʼax are chiʼ kqʼax ri tiempo. Y rumal wariʼ qas kinchoman na chrij ri kinbʼan che uchʼabʼexik rech jun ta wi ri kuchomaj». Are kʼu, we kawaj che wajun winaq riʼ kuchʼobʼ awach, chabʼij che ri kanaʼo y chabʼij che jas kibʼan che uchʼabʼexik iwibʼ. Weneʼ ri cultura y nikʼaj chik kubʼano che e kebʼ winaq jalajoj ri kkichomaj.

¿JAS KQABʼAN CHE KITOʼIK RI E KʼULAN TAJ?

14. We kqaj keqatoʼ ri e kʼulan taj, ¿jas rajawaxik kqabʼano?

¹⁴ ¿Jas kojkunik kqabʼan qonojel rech keqatoʼ ri kkaj kekʼulik? Nabʼe, qas kqachomaj na ri kqabʼij (Efes. 4:29). Chojchoman chrij wariʼ: «¿La kinbʼij tzij che kresaj ukʼixbʼal? Are chiʼ tajin kenwil kebʼ qachalal che tajin ketzijonik, ¿la aninaq kinchomaj che xa utz kkil kibʼ?» (1 Tim. 5:13). Maqabʼano che ri qachalal kuchomaj che rajawaxik na kkʼulik rech kkikotik. Ri qachalal Hans, che xojchʼaw kan chrij pa ri jun párrafo kanoq, kubʼij: «Jujun qachalal kkibʼij: ‹¿Jasche katkʼuliʼ taj? Ya tajin kbʼe ri ajunabʼ›. Ri e tzij riʼ kubʼano che ri e kʼulan taj kkinaʼo che nim ta keʼil wi y che xa tajin ketaqchixik rech kekʼulik». Ri kqaj are che kqabʼij  tzij chke che kuya kichuqʼabʼ (1 Tes. 5:11).

15. a) Junam rukʼ kubʼij Romanos 15:2, ¿Jas nabʼe kojchoman chrij we kqaj kqatoʼ jun chik rech kuriq ukʼulaj? (Xuqujeʼ chawilaʼ ri wachbʼal). b) ¿Jas utz xawil pa ri video? (Chawilaʼ ri nota).

¹⁵ ¿Jas kqabʼano we kqilo che e kebʼ qachalal kekunik keʼux jun utz kʼulaj? Ri Biblia kubʼij che rajawaxik kojchoman chrij ri kkinaʼ ri nikʼaj chik (chasikʼij Romanos 15:2). E kʼi qachalal che e kʼulan taj utz taj kkilo che ri nikʼaj chik e areʼ kebʼin chke jachin ri utz kux kikʼulaj y rajawaxik nim kqil wi ri kkichomaj (2 Tes. 3:11). Y nikʼaj chik weneʼ utz kkilo we ketoʼik, are kʼu xaq xiw keqatoʼo we kkibʼij chqe (Prov. 3:27). e Nikʼaj chik kkaj che ketoʼik are kʼu kkaj taj che ketaʼmaxik. Jun qachalal che kʼulan taj che kel pa Alemania ubʼiʼ Lydia kubʼij: «Are chiʼ oj kʼi kojbʼe pa waʼkatem utz kqabʼij che ri qachalal achi o ixoq che kbʼe qukʼ. Xaq xiw kqatzukuj ri kqabʼano rech kekunik ketzijon e kebʼ».

16. ¿Jas rajawaxik knaʼtaj chke ri e kʼulan taj?

¹⁶ Paneʼ oj kʼulanik o oj kʼulan taj, kojkunik kojkikot pa ri qakʼaslemal (Sal. 128:1). Rumal laʼ we kawaj katkʼulik are kʼu majaʼ kariq ri winaq che utz chawe, are más chatchoman chrij upatanexik ri Jehová. Jun qachalal ixoq che kel pa Macao ubʼiʼ Sin Yi kubʼij: «Kjunamataj ta ri tiempo che at kʼo atukel kamik rukʼ ri junabʼ che katkʼojiʼ na rukʼ ri akʼulaj pa ri Kotzʼiʼjalaj uwach Ulew. We at kʼulan taj chatkikotoq y chapatanij más ri Jehová». Are kʼu ¿we ya xariq ri winaq che utz chawe y ya xamajij uchʼabʼexik? Pa ri jun chi kʼutunem kqil na ri katkunik kabʼano rech ronojel utz kelik are chiʼ kichʼabʼej iwibʼ.