1, 2. ¿Jas kjunamataj wi ri kʼax che kqakʼulmaj oj kimik rukʼ ri xkikʼulmaj ri judíos che xetzalij pa Jerusalén? (Xuqujeʼ chawilaʼ ri recuadro « Pa taq ri uqʼij ri Ageo, ri Zacarías y ri Esdras»).

 ¿LA KATBʼISON chrij ri kakʼulmaj na pa ri petinaq? Weneʼ kʼo ta achak y katchoman chrij jas kabʼan riʼ che uyaʼik ri kajwataj chke ri afamilia. O weneʼ kʼo chʼoj tajin kbʼan pa ri tinamit che at kʼo wi, rumal laʼ weneʼ katbʼisonik rumal ri weneʼ kukʼulmaj ri afamilia y weneʼ ri e qʼatbʼal tzij kkiya taj che kitzijoj ri utzij ri Dios. We tajin kakʼulmaj jun chke ri kʼax riʼ kukubʼsaj akʼuʼx riʼ retaʼmaxik che ri Jehová xeʼutoʼ ri israelitas are chiʼ xkiriq kʼax.

² Ri judíos che kʼi junabʼ e kʼolinaq pa Babilonia xajwataj kikojonik rech xkiya kan ri qʼinomal, ri tinamit y kebʼe pa jun lugar che kkichʼobʼ ta uwach. Are chiʼ majaʼ naj keʼopan chilaʼ, xkiriq kʼax rumal ri política, rumal che kʼo ta chi kipwaq y kumal ri kikʼulel. Rumal che kʼi kʼax xkiriq pa ri kikʼaslemal kʼax xkibʼan che usukʼumaxik ri templo. Rumal laʼ pa ri junabʼ 520 ri Jehová xutaq ri Ageo y ri Zacarías rech kkiya kichuqʼabʼ ri judíos (Ageo 1:1; Zac. 1:1). Junam rukʼ ri kqil na, utz xel ri kichak che xkibʼano. Are kʼu okʼowinaq chi 50 junabʼ jumul chik xubʼan chi kebʼ kikʼuʼx. Rumal laʼ ri Esdras, che kʼo pa Babilonia xtzalij pa Jerusalén rech kkitoʼ ri tinamit y kkimajij chi uqʼijilaxik ri Jehová (Esd. 7:1, 6).

3. ¿Jas preguntas kqanikʼoj na? (Proverbios 22:19).

³ Ri profecías rech Ageo y Zacarías xeʼutoʼ ri upatanelabʼ ri Jehová re ojer rech kkiya ta kan upatanexik  ri Jehová paneʼ xkiriq kʼax, xuqujeʼ kukubʼsaj qakʼuʼx oj kimik y kojutoʼo apastaneʼ ri kqakʼulmaj (chasikʼij uwach Proverbios 22:19). Pa wajun kʼutunem riʼ kqetaʼmaj na ri xuya ubʼixik ri Jehová che ri tinamit are chiʼ xukoj ri Ageo y ri Zacarías, y kqil na ri ukʼutbʼal ri Esdras. Wariʼ kojutoʼo rech kqetaʼmaj ri kirespuestas ri preguntas riʼ: ¿jas xubʼan chke ri judíos ri kʼax che xkiriqo are chiʼ xetzalij pa ri kitinamit?, ¿jasche rajawaxik kqaya ta kan upatanixik ri Jehová are chiʼ kqariq kʼax? y ¿jas kojtoʼwik rech más kqakubʼsaj qakʼuʼx chrij ri Jehová apastaneʼ ri kqakʼulmaj?

4, 5. ¿Jas jujun kʼax xkiriq ri judíos are chiʼ e kʼo chi pa Jerusalén?

⁴ Are chiʼ ri judíos xetzalij pa Jerusalén, kʼo kʼi chak che rajawaxik kkibʼano. Xa pa jubʼiqʼ tiempo xkisukʼumaj ri altar y xkibʼan ri utakʼilabʼal ri templo (Esd. 3:1-3, 10). Are kʼu naj ta xuchʼij ri kikikotemal. ¿Jasche? Xaq xiw ta xkibʼan ri templo, xaneʼ xuqujeʼ rajawaxik kkibʼan ri kachoch y kkitik uwach ri ulew rech kʼo kkitijo (Esd. 2:68, 70). Y ri e kikʼulel, xkitzukuj ri xkibʼano rech kyaʼ kan ubʼanik ri templo (Esd. 4:1-5).

⁵ Ri judíos xuqujeʼ xkiriq kʼax rumal che kʼax xkibʼan che uriqik ri pwaq y rumal ri política. Pa ri tiempo riʼ ri kulew kʼo pa uqʼabʼ ri qʼatbʼal tzij re Persia. Are chiʼ kaminaq chi ri qʼatal tzij Ciro pa ri junabʼ 530 nabʼe chuwach ri qaqʼij, ri xkanaj kan che ukʼexwach are ri Cambises, xeʼumulij ri rajchʼojabʼ rech kechʼojin rukʼ Egipto. Are chiʼ xebʼe che ubʼanik chʼoj, weneʼ xeqʼax bʼi kukʼ ri judíos y weneʼ xkitaʼ bʼi kijoron, kiwa y qastzij riʼ che wariʼ más xuya kʼax chke. Y are chiʼ xumajij uqʼatik tzij ri jun chi qʼatal tzij ubʼiʼ, Darío I, xmajtaj kʼi chʼoj re políticas chkixoʼl ri persas. Ronojel wariʼ xubʼano che ri judíos che xetzalij pa Jerusalén xebʼison chrij ri kkibʼan che uyaʼik ri kajwataj chke ri kifamilia. Rumal ri tajin kkʼulmatajik jujun chke xkichomaj che weneʼ are utz we kyaʼ kan ubʼanik ri templo (Ageo 1:2).

6. ¿Jas jun chik kʼax xkiriq ri judíos, y jas xubʼij ri Zacarías chke? (Zacarías 4:6, 7).

⁶ (Chasikʼij uwach Zacarías 4:6, 7). Xaq xiw ta wariʼ xkikʼulmaj ri judíos, xaneʼ xuqujeʼ xbʼan kʼax chke rumal ri kikojonik. Pa ri junabʼ 522 ri kikʼulel xekunik xekiqʼatej rech xkiya kan ubʼanik ri templo. Are kʼu ri Jehová xukoj ri Zacarías rech xubʼij che ri tinamit che rukʼ ri ruxlabʼixel kresaj apachike kʼax che kkikʼulmaj. Pa ri junabʼ 520, ri qʼatal tzij Darío xaq xiw ta xubʼij chke che kkimajij chi ubʼanik ri templo xaneʼ xuqujeʼ xuya pwaq, ronojel ri kajwataj chke y xuya jun taqanik chke ri qʼatal taq tzij che e kʼo chilaʼ che kekitoʼo (Esd. 6:1, 6-10).

7. ¿Jas tewchibʼal xkiriq ri judíos rumal che are xkiya pa nabʼe upatanexik ri Dios?

 ⁷ Ri Jehová xukoj ri Ageo y ri Zacarías, rech kuya ubʼixik chke ri upatanelabʼ che we kkiya ta kan ubʼanik ri templo, ri Jehová keʼutoʼ na (Ageo 1:8, 13, 14; Zac. 1:3, 16). Rukʼ ri xbʼix chke kumal ri profetas, ri judíos xkimajij chi ubʼanik ri templo pa ri junabʼ 520 y xa pa 5 junabʼ xkikʼis ubʼanik. Paneʼ xkiriq kʼax, are kʼu are xkiya pa nabʼe lugar upatanixik ri Jehová. Rumal laʼ ri Jehová xuya ri xajwataj chke pa ri kikʼaslemal y pa ri kikojonik. Rukʼ kikotemal xkipatanij ri Jehová (Esd. 6:14-16, 22).

8. ¿Jas kojutoʼ wi Ageo 2:4 rech are nabʼe kqapatanij ri Dios? (Xuqujeʼ chawilaʼ ri nota).

⁸ Qetaʼm che ri nimalaj kʼaxkʼolil naqaj chi kʼo wi. Rumal laʼ, rajawaxik kojniman che ri taqanik che yaʼom chqe che kqatzijoj ri utzij ri Dios chke ri winaq (Mar. 13:10). Are kʼu, weneʼ kʼax kqabʼan che ubʼanik wariʼ are chiʼ kʼo ta qapwaq o are chiʼ ri qʼatal taq tzij kojkiqʼatej che ubʼanik. ¿Jas kojkunik kqabʼano rech kqaya nabʼe pa ri qakʼaslemal upatanixik ri Jehová? Utz che kqakubʼsaj qakʼuʼx chrij ri Jehová «ri kʼo ronojel ukuʼinem» b amaqʼel kʼo qukʼ. Ri areʼ kojutoʼo are chiʼ kqakoj qachuqʼabʼ che upatanixik y are kqabʼan ri kqaj chuwach. Rumal laʼ kqaxiʼj ta qibʼ (chasikʼij uwach Ageo 2:4).

9, 10. ¿Jasche kqabʼij che Mateo 6:33 xtzʼaqat pa ri kikʼaslemal jun kʼulaj?

⁹ Chojchoman chrij ri kikʼutbʼal ri Oleg e Irina, c che e precursores. Are chiʼ xebʼe pa jun chi congregación che uyaʼik ri kitobʼanik kʼax xkibʼan che uriqik kichak pa ri tinamit che xebʼe wi. Y jun junabʼ xkibʼano che ri kichak xaq re jujun taq qʼij, are kʼu amaqʼel xyaʼ ri tobʼanik chke rumal ri Jehová y jujun taq mul xetoʼ kumal ri qachalal. ¿Jas xkibʼano rech xkiya ta kan upatanixik ri Jehová? Ri qachalal Oleg, che nabʼe xubʼan kebʼ ukʼuʼx, kubʼij wariʼ: «Are chiʼ más xqatzijoj ri utzij ri Dios xqilo che are waʼ ri más nim ubʼanik». E kebʼ rukʼ ri rixoqil tajin kkitzukuj kichak are kʼu más xkiya kitiempo che utzijoxik ri utzij ri Dios.

¹⁰ Are chiʼ xetzalij lo che utzijoxik ri utzij ri Dios, jun vecino xubʼij chke che jun kachiʼl 160 kilómetros xubʼinbʼej  rech xusipaj kan kebʼ bolsas che kʼo jastaq chupam che ktijowik. Ri qachalal Oleg kubʼij: «Pa riʼ ri qʼij xqilo che ri Jehová y ri e qachalal oj sachinaq ta pa kijolom. Rukʼ wariʼ xqilo che ri Jehová y ri e qachalal sibʼalaj kojkiloqʼoqʼej. Qas qetaʼm che ri Jehová kojsach ta pa ujolom, paneʼ kqachomaj che ri kʼax che tajin kqakʼulmaj ksukʼumataj taj» (Mat. 6:33).

11. ¿Jas kuya na ri Jehová chqe we are más kqapatanij?

¹¹ Ri Jehová kraj che are más kqaya qatiempo che utzijoxik ri utzij, rumal che ktobʼan chke ri winaq. Junam rukʼ ri xqil pa ri  párrafo 7, Ageo xubʼij che ri tinamit che kkimaj chi ubʼanik ri templo. Jetaneʼ xubʼij chke che kkimajij rukʼ ri cimientos y che ksach pa kijolom ronojel ri junabʼ che nabʼe kanoq kʼo ta xkibʼano. We kenimanik, ri Jehová keʼutewchij na (Ageo 2:18, 19). Qas qetaʼm che je kubʼan ri Jehová qukʼ, kojutewchij na we are más kqaya qatiempo che upatanexik.

12. ¿Jasche xajwataj nim ukojonik ri Esdras y ri xebʼe rukʼ?

¹² Pa ri junabʼ 468 ri Esdras xel bʼi pa Babilonia rech kbʼe pa Jerusalén rukʼ ri ukabʼ jupuq judíos. Xajwataj ukojonik rech kkunik ktzalij pa Jerusalén. Kbʼe pa jun bʼe che xibʼibʼal, rumal che kukʼam bʼi oro y plata che kkoj che ri templo y che wariʼ kubʼano che weneʼ ri elaqʼomabʼ kkesaj kan che (Esd. 7:12-16; 8:31). Tekʼuriʼ xkilo che Jerusalén are ta jun lugar che kekunik kkitoʼ wi kibʼ, rumal che e kʼi ta winaq e kʼo chilaʼ y ronojel ri tapya y ri uchiʼ ri tinamit e utz ta chik. ¿Jas kojutoʼ wi ri ukʼutbʼal ri Esdras rech más kqakubʼsaj qakʼuʼx chrij ri Jehová?

13. ¿Jas xtoʼw ri Esdras rech más xukubʼsaj ukʼuʼx chrij ri Jehová ? (Xuqujeʼ chawilaʼ ri nota).

¹³ Ri Esdras xrilo are chiʼ ri Jehová xeʼutoʼ ri upatanelabʼ are chiʼ xkiriq kʼax. Pa ri junabʼ 484, are chiʼ ri qʼatal tzij Asuero xubʼij che ksachisax kiwach ri judíos che e kʼo pa ri tinamit Persia, weneʼ ri Esdras kʼo pa Babilonia (Est. 3:7, 13-15). Kʼo pa kʼax ri ukʼaslemal. Are chiʼ xuta wariʼ, ri judíos re «konojel ri utzʼaqatil ri ajawibʼal» sibʼalaj xebʼisonik xuqujeʼ xkibʼan ayuno y weneʼ xkitaʼ che ri Jehová che ketoʼ rumal (Est. 4:3). Chojchoman chrij ri xunaʼ ri Esdras y ri judíos are chiʼ xketaʼmaj che are ri kikʼulel ri ksachisax kiwach (Est. 9:1, 2). Ronojel ri xukʼulmaj ri Esdras wariʼ xtobʼan che rech kretaʼmaj jas kubʼan chuwach ri kʼax che kuriq chi na, y qastzij riʼ che xukubʼsaj ukʼuʼx che ri Jehová kutoʼ ri utinamit are chiʼ kbʼan kʼax che. d

14. ¿Jas xril jun qachalal ixoq are chiʼ kʼo ta chi uchak?

¹⁴ Are chiʼ kqilo che ri Jehová kojutoʼo are chiʼ kqariq kʼax, kubʼano che más kqakubʼsaj qakʼuʼx chrij. Chojchoman chrij ri xukʼulmaj ri qachalal Anastasia, che kel pa ri Este re Europa. Ri e rachiʼl pa ri chak xkitaqchiʼj rech kunim ribʼ pa política, y ri areʼ xuya kan ri uchak rumal che kraj taj kuya utobʼanik che jun política. Ri qachalal Anastasia kubʼij: «Man kʼo ta jumul waʼ nukʼulmam che kʼo ta chi nupwaq». Y kubʼij chik: «Xinbʼij che ri Jehová ri tajin kinkʼulmaj, ri areʼ amaqʼel xinutoʼo. We  jumul chik kʼo ta nuchak, kinxeʼj ta wibʼ. Rumal che ri Jehová kinutoʼo».

15. ¿Jas xbʼanowik che ri Esdras xuya ta kan ukubʼsaxik ukʼuʼx chrij ri Jehová? (Esdras 7:27, 28).

¹⁵ Ri Esdras xrilo are chiʼ xtoʼ rumal ri Jehová. Are chiʼ xchoman chrij ri ubʼanom ri Jehová che utoʼik wariʼ xubʼano che más xukubʼsaj ukʼuʼx chrij. Chojchoman chrij ri tzij riʼ «rukʼ kʼut ri utobʼanik», che kriqitaj pa Esdras 7:27, 28 (chasikʼij uwach). Ri wuj Esdras che kʼo pa ri Biblia, ri Esdras cinco mul xukoj tzij che kejunamatajik (Esd. 7:6, 9; 8:18, 22, 31).

16. ¿Jas kqabʼan che rilik ri utobʼanik ri Jehová are chiʼ kqariq jun kʼax? (Xuqujeʼ chawilaʼ ri e wachbʼal).

¹⁶ Ri Jehová kkunik kojutoʼo are chiʼ kqariq kʼax. Jun kʼutbʼal, weneʼ kqataʼ che ri qapatrón che kuya bʼe chqe rech kojbʼe pa ri nim riqbʼal ibʼ o che kuya chqe che kqakʼex ri hora re ri qachak rech kojkunik kojbʼe pa ri qariqbʼal ibʼ. Ri Jehová kojutoʼo are chiʼ kqakʼulmaj wariʼ, weneʼ kqamay ri kubʼan che qatoʼik y wariʼ kubʼano che más kqakubʼsaj qakʼuʼx chrij.

17. ¿Jasche kqabʼij che ri Esdras xukʼut machʼachʼem are chiʼ xuriq kʼax? (Chawilaʼ ri wachbʼal re ri uwach ri wuj).

¹⁷ Ri Esdras xux jun machʼalik achi y xutaʼ ri utobʼanik ri Jehová. Are chiʼ kunaʼo che kkun ta che ubʼanik ri eqeleʼn che yaʼom che, amaqʼel kutaʼ che ri Jehová pa chʼawem rech ktoʼ rumal (Esd. 8:21-23; 9:3-5). Jujun are chiʼ xkilo che ri Esdras amaqʼel xukubʼsaj ukʼuʼx chrij ri Dios, xkitoʼo y xkibʼan ke junam rukʼ ri xubʼano (Esd. 10:1-4). Are chiʼ kojbʼison chrij ri kajwataj chqe o ri kʼax che kkiriq ri qafamilia y weneʼ kok ta chi qawaram rumal, rajawaxik kqabʼan qachʼawem che ri Jehová rech kojutoʼo.

18. ¿Jas kojtoʼwik rech más kqakubʼsaj qakʼuʼx chrij ri Jehová?

¹⁸ Qastzij che más kqakubʼsaj qakʼuʼx riʼ chrij ri Jehová we kqamachʼ qibʼ y kqataʼ ri utobʼanik xuqujeʼ kqayaʼo che ri qachalal kojkitoʼo. Jun qachalal ubʼiʼ Erika, che kʼo oxibʼ ral amaqʼel xukubʼsaj ukʼuʼx chrij ri Jehová paneʼ xuriq kʼi kʼax pa ri ukʼaslemal. Xkam ri alaj ral che majaʼ kkʼojiʼk, tekʼuriʼ majaʼ naj tiempo okʼowinaq xkam chi ri rachajil. Rukʼ ronojel ri xukʼulmaj, ri areʼ kubʼij wariʼ: «Awetaʼm taj jas kubʼan ri Jehová che atoʼik. Jujun taq mul kamay ri kubʼan che atoʼik. Jujun taq mul are chiʼ kinwil ri kkibʼan ri wachiʼl che nutoʼik y ri  kkibʼij chwe kukʼut chnuwach che are waʼ ri urespuesta ri nuchʼawem che xinbʼan che ri Jehová. We kinbʼij chke ri tajin kinkʼulmaj kʼax ta kkibʼan riʼ che nutoʼik».

19, 20. ¿Jas kqetaʼmaj chkij ri judíos che xekun taj xetzalij pa Jerusalén?

¹⁹ Xuqujeʼ kʼo kqetaʼmaj chkij ri Judíos che xekun ta chik xetzalij pa Jerusalén weneʼ rumal ri kijunabʼ, ri yabʼil o rumal che kkiya ri kajwataj che ri kifamilia. Paneʼ xekun taj xetzalij pa Jerusalén, are kʼu xkiya bʼi kʼi jastaq chke ri xekunik xebʼek (Esd. 1:5, 6). Y weneʼ 19 junabʼ chik qʼaxinaq che ri nabʼe jupuq judíos e kʼo chi pa Jerusalén, ri xekanaj kan pa Babilonia amaqʼel kkitaq bʼi ri kikuchuj (Zac. 6:10).

²⁰ Paneʼ qas ta chi kojkunik kqapatanij más ri Jehová, are kʼu nim kril ri chuqʼabʼ che kqakoj che upatanexik. ¿Jasche kqabʼij? Rumal ri xubʼij ri Jehová che ri Zacarías. Xubʼij che che kkibʼan jun corona rukʼ ri oro y ri plata che xkitaq bʼi ri judíos che e kʼo pa Babilonia (Zac. 6:11). Ri «corona» riʼ are jun «naʼtabʼal» re sipanik (Zac. 6:14). Rumal laʼ qas qetaʼm che ri Jehová ksach ta pa ujolom ronojel ri kqabʼan che upatanixik paneʼ kqariq kʼax (Heb. 6:10).

21. ¿Jas kojtoʼwik rech kqaxiʼj ta qibʼ che ri kkʼulmataj na?

²¹ Rumal che oj kʼo chi pa ri kʼisbʼal taq qʼij kqariq na más kʼi kʼax (2 Tim. 3:1, 13). Are kʼu kqaya taj che ri bʼis kubʼano che kubʼan kebʼ qakʼuʼx. Chnaʼtaj chqe ri xubʼij ri Jehová chke ri upatanelabʼ pa taq ri uqʼij ri Ageo: «In kʼu kʼo iwukʼ [...]. Mixeʼj iwibʼ» (Ageo 2:4, 5). Ri oj xuqujeʼ kojtoʼ na rumal ri Jehová we kqakoj qachuqʼabʼ che upatanexik. We kqabʼan pa ri qakʼaslemal ri qetaʼmam chrij ri profecías che kchʼaw chkij ri Ageo y ri Zacarías xuqujeʼ ri Esdras, amaqʼel kqakubʼsaj qakʼuʼx riʼ chrij ri Jehová, apastaneʼ ri kkʼulmatajik.