1, 2. a) Pa kebʼ oxibʼ qʼij, ¿jas kkiya na ubʼixik konojel ri e tinamit? b) ¿Jas preguntas rajawaxik kqilo?

CHQACHOMAJ che konojel ri e tinamit kʼateʼ xkibʼij ri e tzij: «Utz oj kʼolik, man kʼo ta kqakʼulmaj». Weneʼ sibʼalaj kkinimarisaj kibʼ che ubʼixik che kʼo ta chi jun winaq kuxibʼij ribʼ rumal che kʼo ta chi kʼax pa ronojel ri uwach Ulew. Xuqujeʼ kkaj che kqachomaj che kʼo kitaqanik pa uwiʼ apachike jastaq. Are kʼu ri qastzij are che kekun taj kkiqʼatej uwach ri xa jubʼiqʼ chi kraj kkʼulmatajik. ¿Jasche kekun taj? Rumal che ri Biblia kubʼij che xaq kʼateʼ «kpe na ri sachbʼal wachaj pa kiwiʼ» xuqujeʼ man kekolotaj ta kanoq (1 Tes. 5:3).

² Wariʼ kubʼano che, kʼo jujun preguntas nim ubʼanik rajawaxik kqilo: ¿Jas kkʼulmataj na pa ri «nimalaj kʼaxkʼolil»? ¿Jas kraj ri Jehová kqabʼano? Xuqujeʼ ¿jas kojkunik kqabʼan kimik rech kojux sukʼ pa ri nimalaj kʼaxkʼolil? (Mat. 24:21).

3. Junam rukʼ ri kubʼij Apocalipsis 17:5, 15-18, ¿jas kubʼan na ri Dios che usachisaxik uwach ri «Nimalaj Babilonia»?

³ (Chasikʼij uwach Apocalipsis 17:5, 15-18). Ri «Nimalaj Babilonia» ksachisax na uwach. Junam rukʼ ri qabʼim chik, konojel ri e tinamit kʼo ta kitaqanik pa uwiʼ apachike jastaq pa ri qʼij riʼ. ¿Jasche kʼo taj? Rumal che ri Dios uyaʼom «pa kanimaʼ chi kkibʼan ri uchomanik ri areʼ». ¿Jas chomanik riʼ?  Usachisaxik kiwach ri e qastzij taj kojonem, xuqujeʼ ri cristiandad o ri e qastzij taj cristianos. * Dios kuya pa kanimaʼ «ri lajuj ukʼaʼ» re ri «kaq rij itzel awaj». Ri e lajuj ukʼaʼ kraj kubʼij konojel ri e qʼatal taq tzij che kkiya ri kitobʼanik che ri «itzel awaj», wariʼ kraj kubʼij, ri Naciones Unidas (Apoc. 17:3, 11-13; 18:8). Ri chʼoj che kkibʼan ri e qʼatal taq tzij riʼ chkij ri qastzij taj kojonem kukʼutu che xmajtaj ri nimalaj kʼax. Are jun jastaq che xaq kʼateʼ kkʼulmatajik xuqujeʼ kuya nimalaj xibʼin ibʼ.

4. a) ¿Jas weneʼ rumal che kkibʼan chʼoj konojel ri e tinamit chkij ri e qastzij taj kojonem? b) ¿Jas weneʼ kkibʼan ri e winaq che xekʼojiʼ pa ri e kojonem riʼ?

⁴ Qetaʼm ta ri rumal che konojel ri e tinamit kkibʼan chʼoj chrij ri Nimalaj Babilonia. Weneʼ kkibʼij che kimak ri e kojonem che kʼo ta jamaril xuqujeʼ che amaqʼel kkinim kibʼ pa política. O weneʼ kkichomaj che kimulim kʼi qʼinomal xuqujeʼ kʼi jastaq kʼo kukʼ (Apoc. 18:3, 7). Weneʼ kqachomaj che wajun chʼoj kkibʼan ri e tinamit kraj taj kubʼij che kekamisax konojel ri e winaq che e kʼo pa ri e kojonem riʼ. Xaneʼ, qʼalaj che konojel ri e tinamit are kkisachisaj kiwach ri organizaciones re ri qastzij taj kojonem. Are chiʼ konojel wariʼ sachisam chi kiwach, ri e winaq qas kkilo che xa molom tzij xbʼix chke kumal ri e kʼamal kibʼe nabʼe kanoq xuqujeʼ weneʼ keʼel bʼi pa ri e kojonem riʼ.

5. ¿Jas ubʼim ri Jehová chrij ri nimalaj kʼaxkʼolil, xuqujeʼ jasche?

⁵ Ri Biblia kubʼij taj jampaʼ tiempo kuchʼijo are chiʼ ksachisax uwach ri Nimalaj Babilonia, are kʼu ri qas qetaʼm are che xa jubʼiqʼ tiempo kuchʼijo (Apoc. 18:10, 21). Ri Jehová ubʼim che «kukoʼpisaj» o kuya taj che naj kuchʼij ri nimalaj kʼaxkʼolil rech kekolotaj «ri winaq ri e uchaʼom» xuqujeʼ ri qastzij kojonem (Mar. 13:19, 20). Tekʼuriʼ, ¿jas kraj ri Jehová kqabʼano chiʼ umajim chi ri nimalaj kʼaxkʼolil xuqujeʼ are achiʼ xa jubʼiqʼ chi kraj kumajij ri Armagedón?

6. ¿Jas kraj ri Jehová che kqabʼan ri oj upatanelabʼ?

⁶ Junam rukʼ ri xqil kan pa ri jun kʼutunem, Jehová kraj che ri upatanelabʼ keʼel chupam ri Nimalaj Babilonia. Are kʼu kʼo más kajwatajik kqabʼano. Rajawaxik che kqaya ta kan upatanixik ri Dios. Chqilaʼ kebʼ jastaq ri kqabʼan che ubʼanik.

7. a) ¿Jas kqabʼano rech kqakʼutu che qas kqanimaj ri e sukʼ taq utaqanik ri Jehová? b) Junam rukʼ ri kubʼij Hebreos 10:24, 25, ¿jasche nim ubʼanik che kqamulij qibʼ, más na kimik?

⁷ Nabʼe, rajawaxik qas kqanimaj ri e sukʼ taq utaqanik ri Dios. Kqaj taj kqabʼan ri e chomanik xuqujeʼ ri e jastaq re ri uwach Ulew. Jun kʼutbʼal, kqaxutuj ri inmoralidad sexual, wariʼ xuqujeʼ kchʼaw chrij jun achi che kqʼoyiʼ rukʼ jun achi o jun ixoq rukʼ jun ixoq (Mat. 19:4, 5; Rom. 1:26, 27). Ukabʼ, rajawaxik kqaqʼijilaj ri Dios pa junamil kukʼ ri e qachalal. Kqaya uqʼij pa apachike lugar oj kʼo wi, pa ri Ja rech Ajawbʼal, weneʼ pa rachoch jun qachalal o pa jun lugar che kilitaj taj. Apastaneʼ ri kqakʼulmaj, kqaya ta kan umulixik qibʼ che upatanixik ri Dios. Qastzij wi che, rajawaxik kqamulij qibʼ más na rumal che tajin «knaqajin ri qʼij» (chasikʼij uwach Hebreos 10:24, 25).

8. ¿Jas weneʼ kekʼextaj na che ri kqabʼan che ubʼixik ri e utzalaj taq tzij?

⁸ Qetaʼm che weneʼ pa ri nimalaj kʼaxkʼolil kkʼextaj ri e tzij kqaya ubʼixik. Kimik kqaya ubʼixik ri e utzalaj taq tzij re ri uQʼatbʼal tzij ri Dios xuqujeʼ kqaj keqatoʼ ri e winaq rech keʼux tijoxelabʼ. Are kʼu weneʼ pa ri qʼij re ri nimalaj kʼax kqaya na ubʼixik e tzij re qʼatoj tzij, che ri Biblia keʼujunamisaj rukʼ nimaʼq taq saqbʼach (Apoc. 16:21). Weneʼ kqaya ubʼixik che xopan ri tiempo che ksachisax uwach ri itzelal re wajun uwach Ulew che kʼo pa uqʼabʼ ri Satanás. Are chiʼ kqʼax ri tiempo, kqetaʼmaj na ronojel ri ubʼanik riʼ ri e tzij che kqaya na ubʼixik xuqujeʼ ri kqabʼan che ubʼixik. ¿La are na ri e chakubʼal keqakojo ri e qakojom pa más che cien junabʼ, o kekʼextaj na? Rajawaxik kqeyej rech kqetaʼmaj. Apastaneʼ ri kkʼulmatajik, kukʼutu che rukʼ kowil kʼuʼx kqaya na ubʼixik ri e tzij re ri uQʼatoj tzij ri Jehová (Ezeq. 2:3-5).

9. ¿Jas weneʼ kkibʼan konojel ri e tinamit are chi kkitaʼ ri e tzij che kqaya ubʼixik, are kʼu jas ri qas qetaʼm?

⁹ Weneʼ ri e utzalaj taq tzij kqaya ubʼixik kubʼano che konojel ri e tinamit kkaj kojkiqʼatej che ubʼanik ronojel. Junam rukʼ ri kqabʼan che ukubʼsaxik qakʼuʼx chrij ri Jehová kimik che utzijoxik ri utzij, xuqujeʼ jeʼ kqabʼan na pa ri qʼij re ri nimalaj kʼaxkʼolil. Qas qetaʼm che ri qaDios kuya na más qachuqʼabʼ che ubʼanik ri kraj (Miq. 3:8).

10. Junam rukʼ ri xyaʼ kan ubʼixik pa Lucas 21:25-28, ¿jas kkibʼan na ri e winaq are chiʼ kkil ri kkʼulmataj pa ri nimalaj kʼaxkʼolil?

¹⁰ (Chasikʼij uwach Lucas 21:25-28). Pa ri nimalaj kʼaxkʼolil, ri e winaq sibʼalaj kkixibʼij kibʼ rumal che kkilo che ko ta upatan ri xkikubʼsaj wi kikʼuʼx. Kkiriq na «kʼax» xuqujeʼ kkixibʼij kibʼ chuwach ri kamikal are chiʼ kumajij ri tiempo che sibʼalaj kʼax, che kʼo ta jumul kʼulmatajinaq (Sof. 1:14, 15). Pa ri tiempo riʼ, konojel kkiriq na kʼax xuqujeʼ ri upatanelabʼ ri Dios. Qastzij riʼ che kqariq kʼax rumal che kqabʼan ta ri e jastaq re wajun uwach Ulew riʼ. Weneʼ kqariq kʼax che kiriqik ri e jastaq che kajwataj chqe junam rukʼ ri kqatijo o ri kqakojo.

11. a) ¿Jasche itzel kojkil na ri e winaq? b) ¿Jasche kqaxibʼij ta qibʼ pa ri nimalaj kʼaxkʼolil?

 ¹¹ Kopan na ri qʼij che ri e winaq kkilo chiʼ ksachisax uwach ri kikojonem, kpe nimalaj koyowal rumal che ri testigos rech Jehová kiyaʼom ta kan ri kikojonem e areʼ. Qastzij riʼ che wariʼ kubʼano che kechʼojin ri winaq chrij, weneʼ kyaʼ ubʼixik pa ri taq redes sociales. Ri e winaq xuqujeʼ ri qʼatal tzij, Satanás, itzel kojkil riʼ rumal che xaq xiw chi ri qakojonem oj kʼo na kanoq. Xekun ta che ubʼanik ri kkaj, usachik uwach konojel ri e kojonem. Rumal laʼ kchʼobʼtajik che xaq xiw ri qakojonem oj kʼo chi kanoq. Rukʼ wariʼ ri e winaq riʼ are keʼux Gog re Magog. * Kkimulij na kibʼ che usachisaxik uwach ri utinamit ri Jehová (Ezeq. 38:2, 14-16). Rumal che qetaʼm ta ronojel chrij, weneʼ kqaxibʼij qibʼ che ri kkʼulmataj na. Are kʼu ri nim ubʼanik are: kqaxibʼij ta qibʼ pa ri nimalaj kʼaxkʼolil, rumal che ri Jehová kubʼij na chqe ri rajawaxik kqabʼano rech kojkolotaj kanoq (Sal. 34:19). Rukʼ kikotemal ko kojtakʼiʼk rumal che ri qakolotajem naqaj chik kʼolik. *

12. ¿Jas tobʼanik uyaʼom «ri jikalaj pataninel, utz uchomanik» chqe rech kojux sukʼ pa ri nimalaj kʼax?

¹² «Ri jikalaj pataninel, utz uchomanik» tajin kuya ri rajawaxik chqe rech kojux sukʼ pa ri nimalaj kʼax (Mat. 24:45). Jalajoj ubʼanom che qatoʼik, chojchoman chrij jujun: ri nimaʼq taq riqbʼal ibʼ re oxibʼ qʼij pa taq ri junabʼ 2016 kopan 2018. Ri e riqbʼal ibʼ riʼ uyaʼom tobʼanik chqe rech kkʼojiʼ utz taq qabʼantajik che kajwatajik chiʼ knaqajin ri uqʼij ri Jehová. Chqanikʼoj jujun chke wariʼ.

13. ¿Jas kqabʼan che ukʼutik sukʼilal che ri Jehová kimik xuqujeʼ jasche rajawaxik kqabʼano?

¹³ Ri sukʼilal. Pa ri nim riqbʼal ibʼ 2016 ubʼiʼ «Chojux sukʼ chuwach ri Jehová». Xqetaʼmaj che kojux sukʼ we kʼo jun utzalaj qachilanik rukʼ ri Jehová. Xqetaʼmaj che kojqebʼ rukʼ ri Jehová rukʼ ri chʼawem xuqujeʼ ri etaʼmanik chrij ri Biblia. Wariʼ kuya qachuqʼabʼ rech kqachʼij ri kʼax kqariq pa ri qakʼaslemal. Are chiʼ knaqajin chi ri usachik uwach ri uqʼatbʼal tzij ri Satanás, ri qasukʼilal che ri Dios xuqujeʼ che ri uQʼatbʼal tzij kkoj na pa kʼax. Weneʼ ri winaq kkitzeʼj na qawach (2 Ped. 3:3, 4). Jun chke ri rumal are che kqanim ta qibʼ pa política. Rajawaxik che kimik kqakʼut sukʼilal rumal che wariʼ kojuto chiʼ kpe na ri nimalaj kʼax.

14. a) ¿Jas jastaq kkʼextajik che kʼo ubʼanik kukʼ ri qachalal che kkikʼam bʼe rukʼ ri chak che tajin kbʼan cho ri uwach ulew? b) ¿Jasche rajawaxik kqakʼut na sukʼilal?

¹⁴ Pa ri nimalaj kʼaxkʼolil, kkʼextaj na ri jastaq che kʼo ubʼanik kukʼ ri e qachalal che kkikʼam bʼe che ri chak tajin kbʼan cho ri chuwach Ulew. Xaq kʼateʼ, konojel ri e chaʼom che e kʼo na cho ri uwach Ulew kebʼe na pa ri kaj rech ketobʼan pa ri chʼoj Armagedón (Mat. 24:31; Apoc. 2:26, 27). Wariʼ kraj kubʼij che e kʼo ta chi ri Jupuq Ajkʼamal bʼe cho ronojel uwach Ulew qukʼ. Paneʼ kʼo kʼax, ri kʼiʼalaj winaq kkʼojiʼ cholajil chkixoʼl. Ri e kʼamal taq bʼe kkikʼam kibʼe konojel ri e qachalal. Rajawaxik kqakʼut sukʼilal are chiʼ keqatoʼ ri e qachalal riʼ xuqujeʼ chiʼ kqanimaj ri  pixabʼ kkiya chqe che petinaq rukʼ ri Dios. Rumal che wariʼ kʼo ubʼanik rukʼ ri qakolotajem.

15. ¿Jas kqabʼan che ukowirisaxik ri qakochʼonik xuqujeʼ jasche nim ubʼanik che kimik kqakowirisaj?

¹⁵ Ri kochʼonik. Ri nim riqbʼal ibʼ 2017 ubʼiʼ «¡Makʼistaj akʼuʼx!». Xojutoʼ rech kʼo nim qakochʼonik chuwach taq ri e kʼax. Xqetaʼmaj che kojkunik kqakʼut kochʼonik paneʼ kʼo kʼaxkʼolil xuqujeʼ che kojkunik kqakowirisaj ri qakochʼonik are chiʼ kqakubʼsaj qakʼuʼx chrij ri Jehová (Rom. 12:12). Masach chqe wajun utzujunik ri Jesús riʼ: «Apachin kʼut ri ko ktakʼik kʼa pa ri kʼisbʼalil, are kesax na pa ri kʼax» (Mat. 24:13). Wajun tzujunik riʼ kraj kubʼij che qonojel rajawaxik kojux sukʼ apastaneʼ ri kʼax kqariqo. Uchʼijik ri kʼax kimik kojutoʼ rech kojux sukʼ pa ri nimalaj kʼaxkʼolil.

16. ¿Jas kojtowik rech kqaxibʼij ta qibʼ xuqujeʼ jas kqabʼan che ukowirisaxik ri ukowil qakʼuʼx kimik?

¹⁶ Ri kowil kʼuxaj. Pa ri nim riqbʼal ibʼ 2018 ubʼiʼ «¡Mubʼan kebʼ akʼuʼx!». Xqetaʼmaj che ri qastzij kowil kʼuxaj kqariq taj rumal ri kojkun che ubʼanik, xaneʼ are ri ukubʼsaxik qakʼuʼx chrij ri Jehová, junam rukʼ ri kochʼonik. ¿Jas rajawaxik kqabʼano rech kqakubʼsaj más qakʼuʼx chrij ri Jehová? Usikʼixik uwach ri Biblia ronojel taq qʼij xuqujeʼ uchomaxik chrij ri xubʼan Jehová che kikolik ri upatanelabʼ ojer (Sal. 68:20; 2 Ped. 2:9). Are chiʼ ri winaq kkibʼan kʼax chqe pa ri nimalaj kʼaxkʼolil, rajawaxik riʼ che kqaxibʼij ta qibʼ xuqujeʼ che kqakubʼsaj más qakʼuʼx chrij ri Jehová (Sal. 112:7, 8; Heb. 13:6). We kqakubʼsaj qakʼuʼx chrij kimik, kojutoʼ na are chiʼ Gog kraj kubʼan kʼax chqe. *

17. ¿Jasche kqaxibʼij ta qibʼ che ri Armagedón? (Chawilaʼ ri wachbʼal re ri uwach ri wuj).

¹⁷ Junam rukʼ ri xqetaʼmaj kan pa ri jun kʼutunem, kʼi chqe xojalax pa ri kʼisbʼal taq qʼij riʼ. Are kʼu xuqujeʼ kqaj kojkʼasiʼ kan pa ri nimalaj kʼaxkʼolil. Ri chʼoj re Armagedón kusachisaj ronojel uwach itzelal cho ri uwach  Ulew. Are kʼu, kʼo ta rumal kqaxibʼij qibʼ rumal che are uchʼoj ri Dios (Prov. 1:33; Ezeq. 38:18-20; Zac. 14:3). Are chiʼ ri Jehová kuya ri taqanik, Jesucristo kumaj ri chʼoj. Rukʼ kekʼojiʼ wi ri e chaʼom che e kʼastajisam xuqujeʼ ri sibʼalaj e kʼi ángeles. Konojel, kechʼojin rukʼ ri Satanás, ri demonios xuqujeʼ ri e winaq che e kʼo cho ri uwach Ulew (Dan. 12:1; Apoc. 6:2; 17:14).

18. a) ¿Jas utzujum ri Jehová chqe? b) ¿Jas tobʼanik kuya Apocalipsis 7:9, 13-17 chqe rech rukʼ kubʼsal kʼuʼx kojchoman chrij ri petinaq?

¹⁸ Jehová utzujum wariʼ chqe: «Kʼo ta kʼu jun bʼanowinaq ta ri chʼojibʼal ri kkun ta che usachisaxik awach» (Is. 54:17). «Kʼiʼalaj winaq» che e sukʼ kekolotaj kan pa ri «nimalaj kʼaxkʼolil» xuqujeʼ kkiya ta kan uyaʼik qʼijilanik che ri Dios (chasikʼij uwach Apocalipsis 7:9, 13-17). Ri Biblia kuya kʼi taq rumal rech rukʼ kubʼsal kʼuʼx kojchoman chrij ri petinaq. Qetaʼm che Jehová «keʼuchajij kʼut ri jik kanimaʼ» (Sal. 31:23). Qonojel ri kqaloqʼoqʼej xuqujeʼ kqaya uqʼij ri Jehová sibʼalaj kojkikot riʼ are chiʼ kuchʼajchʼobʼisaj ri ubʼiʼ (Ezeq. 38:23).

19. ¿Jas e utzalaj taq jastaq kekʼulmataj na pa kebʼ oxibʼ qʼij?

¹⁹ Chojchoman chrij ri kubʼan na 2 Timoteo 3:2-5 che ubʼixik ri kibʼantajik ri e winaq pa ri kʼakʼ uwach Ulew, are chiʼ kʼo ta chi ri utaqanik ri Satanás (chawilaʼ ri recuadro « ¿Jas kibʼanik riʼ ri e winaq pa ri petinaq?»). Ri qachalal George Gangas, * xux jun chke ri Jupuq Ajkʼamal bʼe cho ronojel uwach Ulew, xubʼij wariʼ: «¡Sibʼalaj utz kux ronojel riʼ are chiʼ kachalal kibʼ konojel! Xa jubʼiqʼ chi kraj, kekʼojiʼ pa jun kʼakʼ uwach ulew. Ri kikʼaslemal kux junam rukʼ ri xraj ri Jehová. Ri qakʼaslemal kʼo ta ukʼisik». ¿La qastzij che are jun utzalaj eyebʼal?