1. ¿Jas weneʼ knaʼtaj chqe are chiʼ kqata ri tzij toqʼobʼisabʼal wachaj?

ARE chiʼ kqata ri tzij toqʼobʼisabʼal wachaj, weneʼ kojchoman chrij jun winaq che sibʼalaj utz, kel ukʼuʼx y ksipanik. Weneʼ knaʼtaj chqe ri kʼutbʼal re ri utzalaj samaritano che xubʼij kan ri Jesús. Wajun achi riʼ xel ukʼuʼx che jun judío che xbʼan kʼax che kumal elaqʼomabʼ. Wajun samaritano riʼ «xel ukʼuʼx che» ri judío y wariʼ xubʼano che xraj xutoʼ (Luc. 10:29-37). Wajun kʼutbʼal riʼ kuqʼalajisaj jun chke ri jeʼlalaj taq ubʼantajik ri Dios che kukʼut ronojel taq qʼij: ri toqʼobʼisabʼal wachaj.

2. ¿Jas jun chi ubʼanik kbʼan che ukʼutik ri toqʼobʼisabʼal wachaj?

² Ri toqʼobʼisabʼal wachaj xuqujeʼ kkʼutik are chiʼ kkʼajisax ta uwach jun winaq che taqal che kkʼajisax uwach. Ri Jehová je ubʼanom qukʼ, junam rukʼ ri xubʼij ri xtzʼibʼan jun salmo: «Man uyoʼm ta ri tojbʼal chqe jas riʼ ri taqal chqe ri qetzelal xuqujeʼ taq ri e qamak» (Sal. 103:10). Are kʼu, kʼo jujun taq mul ri Jehová krilo che rajawaxik kukʼajisaj uwach jun winaq che ubʼanom jun nimalaj makaj.

3. ¿Jas preguntas kqil na pa wajun kʼutunem riʼ?

³ Pa wajun kʼutunem riʼ, kqil na ri respuesta che kuya ri Biblia chrij ri oxibʼ preguntas riʼ: ¿jasche ri Jehová kutoqʼobʼisaj wachaj?, ¿jas ubʼanik ri kʼajisabʼal wachaj rukʼ ri toqʼobʼisabʼal wachaj? y ¿jas kojtowik rech kqakʼut wajun bʼantajik riʼ?

4. ¿Jasche ri Jehová kutoqʼobʼisaj wachaj?

⁴ Rumal ri uloqʼoqʼebʼal. Ri apóstol Pablo xubʼij che ri Dios «sibʼalaj xel ukʼuʼx chqe». Pa ri textos riʼ, Pablo are tajin kchʼaw chrij ri eyebʼal che uyaʼom ri Dios chke ri e chaʼom, che paneʼ e ajmakibʼ kebʼe pa ri kaj (Efes. 2:4-7). Are kʼu ri Dios xaq xiw ta ri e chaʼom kutoqʼobʼisaj kiwach. Ri David xubʼij: «Ri Ajawaxel utz kukʼ konojel, rukʼ kʼu chʼuchʼujil  keʼuchajij ri e uchak» (Sal. 145:9). Rumal che ri Jehová keʼuloqʼoqʼej ri winaq, amaqʼel kutoqʼobʼisaj kiwach are chiʼ kajwatajik.

5. ¿Jas xubʼan ri Jesús che ukʼutik che Jehová kutoqʼobʼisaj wachaj?

⁵ Ri Jesús qas retaʼm che ri Jehová sibʼalaj kraj kutoqʼobʼisaj kiwach ri e winaq. Are chiʼ majaʼ kpe cho ri uwach Ulew, ri Jesús kʼi junabʼ kʼo chi rukʼ ri Jehová pa ri kaj (Prov. 8:30, 31). Pa kʼi taq mul, xrilo che ri Jehová xutoqʼobʼisaj kiwach ri e winaq (Sal. 78:37-42). Y are chiʼ xeʼutijoj ri winaq, ri Jesús amaqʼel xukʼut wajun jeʼlikalaj bʼantajik re ri uTat.

6. ¿Jas kʼutbʼal xuya kan ri Jesús che ukʼutik che Jehová kutoqʼobʼisaj wachaj?

⁶ Junam rukʼ ri xqil kan pa ri jun kʼutunem, rech xukʼutu che ri Jehová sibʼalaj utz krilo kutoqʼobʼisaj wachaj, ri Jesús xchʼaw chrij ri kʼutbʼal re ri alkʼwalaxel che xel bʼi pa ri rachoch ri utat che «xusachalaʼ [...] ri uqʼinomal, xubʼan ronojel jas ri urayinik» (Luc. 15:13). Are chiʼ xqʼax ri tiempo xrilo che utz ta ri tajin kubʼano, xukʼex ri uchomanik y xtzalij bʼi pa ri rachoch. ¿Jas kuchomaj riʼ ri utat? Ri ala aninaq xretaʼmaj ri kuchomaj. Ri Jesús xubʼij: «Kʼa kʼo kʼu chi naj, xilitaj apan rumal ri utat. Ri areʼ kʼut xel ukʼuʼx che, xxikʼinik xbʼek, xuqʼaluj ri ala, xutzʼumaj». Ri tat xuyaj ta ri ukʼojol xaneʼ xutoqʼobʼisaj uwach, xukuy ri umak y xukʼulaj chi jumul pa rachoch. Ri ala xubʼan kʼi taq makaj, are kʼu rumal che qas xukʼex ri ukʼaslemal, xtoqʼobʼisax uwach rumal ri utat. Wajun tat riʼ che xutoqʼobʼisaj uwach ri ukʼojol kjunamataj rukʼ ri Jehová. Rukʼ wajun jeʼlalaj kʼutbʼal riʼ, Jesús xukʼutu che Jehová qas kukuy kimak ri winaq che kibʼanom jun nimalaj makaj we qas kkikʼex ri kikʼaslemal (Luc. 15:17-24).

7. ¿Jas ubʼanik ri unojibʼal ri Jehová rukʼ ri utoqʼobʼisabʼal wachaj?

⁷ Rumal ri nimalaj unojibʼal. Ri Jehová xaq xiw ta kukʼut ri unojibʼal rumal che kʼo nim retaʼmabʼal. Ri Biblia kubʼij che ri noʼj re «ri Dios [...] nojinaq che elebʼal kʼuxaj xuqujeʼ che utzalaj taq wachinik» (Sant. 3:17). Junam rukʼ jun utzalaj tat, ri Jehová retaʼm che we kutoqʼobʼisaj kiwach ri e ralkʼwal kkiriq utzilal (Sal. 103:13; Is. 49:15). Y wariʼ kuya eyebʼal kʼuxaj chke e areʼ, paneʼ e ajmakibʼ. Rumal ri nimalaj unojibʼal, ri Jehová amaqʼel kutoqʼobʼisaj kiwach ri e ralkʼwal, we krilo che rajawaxik taj kukʼajisaj kiwach. Are kʼu, rukʼ utzalaj chomanik kukʼut wajun bʼantajik riʼ. Rumal che  xuqujeʼ kuya ta uwiʼ ri kubʼano. We rajawaxik kukʼajisaj kiwach ri winaq, kukʼajisaj.

8. ¿Jas rajawaxik kbʼan jujun taq mul y jasche?

⁸ Chqachomajampeʼ che jun upataninel ri Dios qas rukʼ ri uchomanik kubʼan kʼi taq mak. ¿Jas rajawaxik kbʼan rukʼ? Ri apóstol Pablo xutzʼibʼaj wariʼ: «Rajawaxik kitas iwibʼ chrij [...] ri je ubʼanik waʼ» (1 Cor. 5:11). Ri winaq che kkikʼex ta ri kikʼaslemal, keʼesax bʼi pa ri congregación. Qas rajawaxik che kbʼan wariʼ, rech kechajix ri e qachalal che e sukʼ y rech ktzʼilobʼ ta ri ubʼiʼ ri Dios. Are kʼu, e jujun winaq kkichomaj che we kesax bʼi jun winaq pa ri congregación, tajin ta kkʼutik che ri Dios kutoqʼobʼisaj wachaj. Chqilampeʼ we qastzij wajun chomanik riʼ.

9, 10. a) Junam rukʼ ri kubʼij Hebreos 12:5, 6, ¿jasche kqabʼij che are chiʼ kelesax bʼi jun winaq pa ri congregación kukʼutu che xa ktoqʼobʼisax uwach? b) ¿Jas kʼutbʼal kojtoʼw che uchʼobʼik?

⁹ Are chiʼ kbʼix pa ri congregación che jun winaq che sibʼalaj kqaj «Testigo ta chik», kqanaʼ jun nimalaj bʼis. Weneʼ kqachomaj, ¿la rajawaxik xelesax bʼi pa ri congregación? ¿La kukʼut wariʼ che ktoqʼobʼisax uwach ri xelesax bʼik? Jeʼ. We rajawaxik kkʼajisax uwach ri ajmak, utz riʼ we kbʼanik (Prov. 13:24). We kkʼajisax uwach, ¿la kutoʼ waʼ rech kukʼex ri ukʼaslemal? Kutoʼo. E kʼi chke che xkʼajisax kiwach rumal che xemakunik, xkilo che utz ri xbʼan chke, rumal che wariʼ xeʼutoʼ rech xkikʼex ri kikʼaslemal. Y xetzalij rukʼ ri Jehová (chasikʼij uwach Hebreos 12:5, 6).

¹⁰ Chojchoman chrij wajun kʼutbʼal. Jun ajyuqʼ krilo che yawabʼ jun chke ri e uchij. Retaʼm che rech kkunataj wajun chij, rajawaxik kutas chkixoʼl ri e nikʼaj chik. Are kʼu, qetaʼm che ri e chij amaqʼel kukʼam kibʼ, we kjach jun chke, kkixibʼij kibʼ. We ri ajyuqʼ kutas ri chij, ¿la kraj kubʼij wariʼ che xa kraj kubʼan kʼax che? Jeʼ taj. Retaʼm che we kuya kan wajun chij che yawabʼ chkixoʼl ri e nikʼaj chik, keʼutʼiq riʼ. Rumal laʼ we kutas ri yawabʼ, kubʼano che ri e nikʼaj keyawaj taj (chajunamisaj rukʼ Levítico 13:3, 4).

11. a) ¿Jasche kojkunik kqajunamisaj jun winaq che xelesax bʼi pa ri congregación rukʼ jun chij che yawabʼ? b) ¿Jas tobʼanik kyaʼ chke ri xeʼelesax bʼi pa ri congregación?

¹¹ Kojkunik kqabʼij che jun winaq che xelesax bʼi pa ri congregación, kjunamataj rukʼ ri chij, rumal che yawabʼ pa ri ukojonik (Sant. 5:14). Are chiʼ utz ta chi ri qakojonik, kjunamataj rukʼ jun yabʼil che kutʼiq ribʼ o kqʼax che jun chik. Rumal laʼ rajawaxik che jujun taq mul ktas ri ajmak che ri congregación. Wariʼ kukʼutu che ri Ajawaxel sibʼalaj keraj ri e sukʼ taq qachalal re ri congregación y kubʼano che ri ajmak kukʼex ri ukʼaslemal. Paneʼ xelesax bʼi ri ajmak, kkunik kbʼe pa ronojel taq ri e riqbʼal ibʼ rech jumul chik kukowirisaj ri ukojonik chrij ri Jehová. Xuqujeʼ kkunik keʼusikʼij ri qawuj y kril ri JW Broadcasting^®. Y, are chiʼ ri e kʼamal bʼe re ri congregación kkilo che tajin kukʼex ri ukʼaslemal, jujun taq mul kekunik kkiya jujun taq pixabʼ che rech kkitoʼo rech kux chi jumul testigo rech Jehová. *

12. ¿Jas ri más utz rajawaxik kkibʼan ri e kʼamal bʼe che jun winaq che ubʼanom jun nimalaj makaj y kukʼex ta ri ukʼaslemal?

¹² Rajawaxik che knaʼtaj chqe che xaq xiw keʼesax bʼi ri ajmakibʼ che kkikʼex ta ri kikʼaslemal. Ri e kʼamal bʼe qas ketaʼm che wariʼ are jun jastaq nim ubʼanik, rumal laʼ  aninaq ta kkichaʼ ubʼanik ri kkibʼano. Xuqujeʼ ketaʼm che ri Jehová kukʼajisaj wachaj «jas ri taqal» che ri winaq (Jer. 30:11). Ri e kʼamal bʼe qas kekiloqʼoqʼej ri qachalal, rumal laʼ kkaj taj kkibʼan jun jastaq che kubʼan kʼax che ri kachilanik rukʼ ri Jehová. Are kʼu, jujun taq mul, ri más utz kbʼan che uloqʼoqʼexik y utoqʼobʼisaxik uwach ri ajmak are che kesax bʼi pa ri congregación.

13. ¿Jasche xajwatajik che xesax bʼi jun cristiano pa ri congregación re Corinto?

¹³ Chqilaʼ ri xubʼan ri apóstol Pablo che jun ajmak. Wajun cristiano re Corinto tajin kubʼan jun itzelalaj jastaq, rumal che tajin kmakun rukʼ ri rixoqil ri utat. ¡Wariʼ sibʼalaj kʼixbʼal! Rumal che ri Jehová ubʼim kan wariʼ che ri tinamit Israel: «We kʼo jachin kwar rukʼ ri rixoqil ri utat, xresaj ukʼixbʼal ri utat. Rumal riʼ kkamisax na ri achi xuqujeʼ ri ixoq» (Lev. 20:11). Qastzij riʼ che ri Pablo, xubʼij ta chke ri congregación re Corinto che kkikamisaj wajun achi riʼ; are kʼu xubʼij che kesax bʼi pa ri congregación. Ri xubʼan wajun achi riʼ tajin kubʼan kʼax chke nikʼaj qachalal re ri congregación. Rumal che jujun chke kkibʼij che ri xubʼano are ta jun nimalaj makaj (1 Cor. 5:1, 2, 13).

14. ¿Jas xubʼan ri apóstol Pablo che ukʼutik che xutoqʼobʼisaj uwach ri achi re Corinto, y jasche xubʼano? (2 Corintios 2:5-8, 11).

¹⁴ Are chiʼ xqʼax ri tiempo, ri Pablo xretaʼmaj che ri achi riʼ xukʼex ri ukʼaslemal. Paneʼ xutzʼilobʼisaj ri ubʼiʼ ri congregación, are kʼu ri Pablo xubʼij chke ri e kʼamal bʼe che kraj taj che «sibʼalaj [kubʼan] kʼax ri [...]utzij» che ri ajmak. Y xubʼij wariʼ: «Chisachaʼ umak, chikubʼisaj ukʼuʼx». Xuqujeʼ xubʼij chke jasche rajawaxik jeʼ kkibʼano: «Rech man kkʼaxkʼobʼ ta rumal ri nimalaj bʼis». Ri Pablo xutoqʼobʼisaj uwach wajun achi riʼ rumal che xukʼex ri ukʼaslemal. Ri apóstol kraj taj che ri ajmak mat kutzukuj chi tobʼanik pa ri congregación rumal che sibʼalaj kbʼisonik (chasikʼij uwach 2 Corintios 2:5-8, 11).

15. ¿Jas kkibʼan ri e kʼamal bʼe che ukʼutik che qas kkichʼobʼo jampaʼ kkitoqʼobʼisaj uwach jun winaq y jampaʼ kkikʼajisaj uwach?

¹⁵ Junam rukʼ ri kubʼan ri Jehová, ri e kʼamal bʼe xuqujeʼ kkinaʼ toqʼobʼisabʼal wachaj. Are chiʼ kkilo che rajawaxik kkʼajisax uwach jun winaq, kkikʼajisaj uwach, are kʼu we kkilo che rajawaxik ktoqʼobʼisax uwach xuqujeʼ kkitoqʼobʼisaj uwach. We kkikʼajisaj ta uwach ri ajmak, tajin ta kkitoqʼobʼisaj uwach riʼ, xaq tajin kkiya  bʼe che rech kutaqej ubʼanik ri umak. Are kʼu, ¿la xaq xiw ri e kʼamal bʼe rajawaxik kkitoqʼobʼisaj wachaj?

16. Junam rukʼ ri kubʼij pa Proverbios 21:13, ¿jas kubʼan ri Jehová chke ri winaq che kkitoqʼobʼisaj ta wachaj?

¹⁶ Qonojel ri oj cristianos kqaj che kqatoqʼobʼisaj kiwach ri e nikʼaj chik junam rukʼ ri kubʼan ri Jehová. ¿Jasche? Jun rumal are che ri Jehová kutatabʼej ta ri kichʼawem ri winaq che kkitoqʼobʼisaj ta wachaj (chasikʼij uwach Proverbios 21:13). Sibʼalaj kqachajij qibʼ chuwach wariʼ, rumal che kqaj taj che ri Jehová kutatabʼej ta ri qachʼawem. Kqaj kqatatabʼej «ri ubʼochiʼnik ri mebʼaʼ», wariʼ kraj kubʼij che amaqʼel kqaj kqatatabʼej ri cristiano che tajin kuriq kʼax. Xuqujeʼ nim ubʼanik chqawach ri kubʼij pa ri Biblia: «Ri jun ri man elinaq ta ukʼuʼx chke nikʼaj chik, ri Dios man kel ta ukʼuʼx che ri areʼ are taq kuqʼat na tzij puwiʼ» (Sant. 2:13). We kojmachʼachʼik y kqachʼobʼo che kajwatajik ktoqʼobʼisax qawach, wariʼ kubʼano che oj kqaj kqatoqʼobʼisaj kiwach ri e nikʼaj chik. Más na kqaj kqakʼut wariʼ, are chiʼ jun winaq che ubʼanom jun nimalaj makaj ktzalij lo pa ri congregación.

17. ¿Jas xubʼan ri qʼatal tzij David che ukʼutik che rukʼ ronojel ranimaʼ xutoqʼobʼisaj kiwach ri e nikʼaj chik?

¹⁷ Pa ri Biblia, e kʼo kʼutbʼal che kojkitoʼ rech kqatoqʼobʼisaj kiwach ri e nikʼaj chik. Chojchoman chrij ri qʼatal tzij David, areʼ are jun winaq che kutoqʼobʼisaj kiwach ri e nikʼaj chik. Paneʼ ri Saúl xraj xukamisaj ri David, are kʼu ri David kʼo ta jumul xraj xutzalij ukʼaxel ri itzelal xbʼan che, rumal che are ri Jehová chaʼowinaq ri Saúl (1 Sam. 24:9-12, 18, 19).

18, 19. ¿Pa jas kebʼ bʼantajik ri David xutoqʼobʼisaj ta kiwach ri e nikʼaj chik?

¹⁸ Are kʼu, ri David amaqʼel ta xutoqʼobʼisaj kiwach ri e nikʼaj chik. Jun kʼutbʼal re, are chiʼ ri Nabal, jun achi che sibʼalaj kʼan, kʼax xchʼaw chkij ri David y ri e rachiʼl, y xuya ta kiwa. Ri David xpe royowal y xubʼij che kukamisaj ri Nabal y ri achijabʼ che e kʼo rukʼ. Rumal che ri rixoqil ri Nabal, aninaq xutzukuj ri xubʼano y rukʼ utzilal xchʼaw rukʼ ri David, wariʼ xubʼano che ri David xukamisaj ta chi ri Nabal (1 Sam. 25:9-22, 32-35).

¹⁹ Jumul chik, are chiʼ ri qʼaxal tzij Natán xutzijoj che ri David che jun qʼinomalaj achi xrelaqʼaj jun uchij jun achi che sibʼalaj mebʼaʼ. Ri David sibʼalaj xpe royowal are chiʼ xuta wariʼ y xubʼij: «¡Kinbʼan na ri chiʼnik ri qas kbʼan na pa ri ubʼiʼ ri Dios chi jachin ri xbʼanow we jasach riʼ taqal che chi kkamisaxik!» (2 Sam. 12:1-6). Areʼ retaʼm che ri Taqanik che xyaʼ che ri Moisés kubʼij che we jun winaq krelaqʼaj jun chij, rajawaxik kuya kajibʼ chij che ukʼaxel (Éx. 22:1). Are kʼu, are chiʼ xubʼij che ri achiʼ re ri kʼutbʼal rajawaxik kkamik, xa más xuya uwiʼ ri xubʼan che uqʼatik tzij. Ri qastzij, are che ri Natán xuya ubʼixik wariʼ rech kukʼut chuwach ri David che sibʼalaj nim ri  makaj xubʼan chuwach ri qʼinomalaj achi re ri kʼutbʼal. Y Jehová xutoqʼobʼisaj más uwach ri David, chuwach ri xubʼan ri David che ri achi re ri kʼutbʼal che xubʼij ri Natán (2 Sam. 12:7-13).

20. ¿Jas kukʼut ri ukʼutbʼal ri David chqawach?

²⁰ Ri David xubʼij che rajawaxik kekam ri Nabal y ri achijabʼ che e kʼo rukʼ rumal che petinaq royowal. Xuqujeʼ xuchomaj ta na are chiʼ xubʼij che ri achi re ri kʼutbʼal che xubʼij ri Natán, rajawaxik kkamik. Pa ri kʼisbʼal bʼantajik riʼ, weneʼ kqachomaj ¿jasche jun achi che sibʼalaj utz más xuya uwiʼ ri xubʼan che uqʼatik tzij? Are kʼu chojchoman chrij ri kriqitaj wi ri David, pa ri tiempo riʼ utz ta chi ri retaʼmabʼal ukʼuʼx. Rukʼ wariʼ kqilo che are chiʼ kqatoqʼobʼisaj ta kiwach ri e nikʼaj chik, kqakʼutu che xa utz ta chi ri qachilanik rukʼ ri Jehová. Ri Jesús xuya kan wajun pixabʼ riʼ: «Miqʼat tzij pa kiwiʼ juleʼ chik, rech man kqʼat ta tzij piwiʼ ix. Je kʼut jas kibʼan ix che uqʼatik tzij pa kiwiʼ juleʼ chik, je kbʼan na chiwe ix, kqʼat na tzij piwiʼ» (Mat. 7:1, 2). Rumal laʼ, maqaqʼat tzij pa kiwiʼ ri e nikʼaj chik, chqakojoʼ qachuqʼabʼ rech kqatoqʼobʼisaj kiwach junam rukʼ ri kubʼan ri qaDios.

21, 22. ¿Jas jastaq kojkunik kqabʼano rech kqatoqʼobʼisaj kiwach ri e nikʼaj chik?

²¹ Ri toqʼobʼisabʼal wachaj are ta jun jastaq che xaq xiw kqanaʼo; xaneʼ kojutaq che ubʼanik nikʼaj chi jastaq chke ri e nikʼaj chik. Rumal laʼ, kojkunik kojchoman chrij ri kqabʼan che kitoʼik ri qafamilia, ri e qachalal y ri e winaq che kqatzijoj ri utzij ri Dios chke. Qas kʼi ri kojkunik kqabʼan che utoqʼobʼisaxik kiwach. ¿La kʼo jun qetaʼm che kajwataj kubʼsal ukʼuʼx? Weneʼ kojkunik kqakʼam bʼi jun jastaq rech kutijo o jun chi kqabʼan che utoʼik. ¿La kʼo jun pa ri congregación che kʼa majaʼ naj xux chi jumul testigo rech Jehová che kajwataj kubʼsal ukʼuʼx o jun rachiʼl? ¿La kojkunik kqatzijoj ri utz taq jastaq kʼo pa ri Biblia che jun chi winaq? Wariʼ are jujun taq jastaq che kojkunik kqabʼano rech kqatoqʼobʼisaj kiwach ri e nikʼaj chik (Job 29:12, 13; Rom. 10:14, 15; Sant. 1:27).

²² We qas kqilo jas ri kkʼulmataj chqanaqaj, kojkunik kqatoqʼobʼisaj kiwach e kʼi chke ri winaq. We kqakʼut wajun bʼantajik riʼ, kqakikotisaj ri qaTat kʼo pa ri kaj, ri Dios che «sibʼalaj xel ukʼuʼx chqe».