Ri Biblia xukʼex ri kikʼaslemal

¿JAS xubʼan jun achi rech xuya kan ri itzel ukʼaslemal y xuya kan ri itzelal che kunaʼ chke ri winaq che saq kitzʼumal? ¿Jas xubʼan jun ala rech xuya kan ri itzel ukʼaslemal y xchakun ta chi kukʼ ri ajkʼayil taq drogas? Chqilaʼ ri kkiya ubʼixik.

«Xinwesaj ri itzelal che kʼo pa ri wanimaʼ» (HAFENI NGHAMA)

UJUNABʼ: 34

TINAMIT: ZAMBIA

NIKʼAJ CHIK: XUX RASTAFARI

RI OJER NUKʼASLEMAL: Rumal ri chʼoj, ri nunan xanimaj bʼi pa Namibia y xuya ri utobʼanik che ri Organización rech África pa ri Suroeste (SWAPO, ri siglas riʼ pa inglés kʼo wi). Ri guerrilleros tajin kechʼojin kukʼ ri qʼatbʼal tzij rech Sudafrica che tajin ktaqan pa uwiʼ Namibia y ri nunan xkʼam bʼi pa jun campo de refugiados pa Zambia, y chilaʼ xinalax wi.

Ri nabʼe taq quince junabʼ re ri nukʼaslemal xinbʼe pa kʼi taq campos de refugiados. Ri oj alabʼom che oj kʼo pa ri campos re SWAPO, xojtijox chrij ri política y xkʼut chqawach che kqetzelaj kiwach ri winaq che saq kitzʼumal.

Kʼateʼ 11 nujunabʼ chiʼ xwaj xinbʼan ri nuconfirmación rech kinux cristiano, rumal laʼ xinbʼe rukʼ jun pastor rech jun iglesia, che chilaʼ keʼopan wi católicos luteranos, anglicanos, y nikʼaj chik. Are kʼu ri pastor xraj taj. Rumal laʼ sibʼalaj xinbʼisonik y xinux ateo. Ronojel wariʼ xinbʼano chiʼ kʼo 15 nujunabʼ, xinnim wibʼ pa ri política y pa ri kikojonem ri rastafaris. Xinbʼan wariʼ rumal che utz kinta ri música reggae, y rech kbʼan ta kʼax chke ri qʼeq kitzʼumal rech África. Xinpachʼuj ri nuwiʼ junam rukʼ ri kkibʼan ri rastafaris, xinmajij utijik marihuana, kintij ta tiʼj y xintobʼanik rech kbʼan ta kʼax chke ri qʼeq kitzʼumal. Paneʼ je waʼ xinbʼano, are kʼu xinkʼex ta ri nukʼaslemal y xinya ta kan rilik ri películas che k’o chʼoj chupam. Y kinbʼij itzel taq tzij.

RI BIBLIA XUKʼEX RI NUKʼASLEMAL: Pa ri junabʼ 1995, are chiʼ kʼo 20 nujunabʼ, xinchoman chrij ri kinbʼan pa ri nukʼaslemal. Kʼi chi tiempo tajin kinsikʼij ri kiwuj ri rastafaris y paneʼ kʼo jujun textos re ri Biblia chupam, are kʼu kukubʼsaj ta nukʼuʼx ri kʼo pa ri kiwuj. Rumal laʼ xinsikʼij ri Biblia pa nutukel.

Xinriq jun wuj rukʼ jun wachiʼl che bʼanom kumal ri testigos rech Jehová. Xinmajij unikʼoxik rukʼ ri Biblia. Qʼaxinaq chi ri tiempo xentzukuj ri Testigos y, rukʼ ri kitobʼanik xwetaʼmaj más chrij ri Biblia. Are kʼu chiʼ majaʼ kinmajij ri etaʼmanik xinkʼex kʼi jastaq pa ri nukʼaslemal.

Kʼax xinbʼan kan che uyaʼik ri sikʼ y ri qʼabʼarik (2 Corintios 7:1). Xinkʼex ri nubʼantajik y xinsokaj ri nuwiʼ, xinwil ta chi películas che kʼo chʼoj chupam y xinwil ta chi pornografía, y xinbʼij ta chi itzel taq tzij (Efesios 5:​3, 4). Chiʼ xqʼax ri tiempo, itzel ta chi kenwil ri winaq che saq kitzʼumal (Hechos 10:​34, 35). Rech xinkunik xinya kan wariʼ rajawaxik xinya kan utaʼik música che kʼax kchʼaw chkij winaq re jun chi tinamit y xenwachilaj ta chi ri winaq che kinkitaqchiʼj che ubʼanik ri itzelal.

Chiʼ xinya kan ubʼanik ri itzel taq jastaq, xintzukuj jun Ja rech Ajawbʼal kech ri testigos rech Jehová. Y xinmajij jun etaʼmanik chrij ri Biblia tekʼuriʼ xinbʼan nuqasanjaʼ. Ri nufamilia utz ta xkil ri xinbʼano. Ri nunan xubʼij chwe che utz we kinbʼe pa apachike «kojonem» are kʼu kraj taj che kinbʼe kukʼ ri Testigos. Y jun chke ri ufamilia ri nunan are jun qʼatal tzij che nim ubʼanik, y che kʼax kchʼaw chrij ri xinchaʼ ubʼanik.

Paneʼ ri nufamilia itzel xinkilo y kʼax xechʼaw chwij, are kʼu xinchʼij ronojel ri xkibʼan chwe y xinbʼan pa ri nukʼaslemal ri xinwetaʼmaj chrij ri Jesús. Xuqujeʼ wetaʼm che ri Testigos are ri qastzij kojonem, rumal che ri kkikʼut chnuwach pa ri Biblia kkesaj wi. Ri e areʼ amaqʼel kkinimaj ri utaqanik ri Dios che kʼo pa ri Biblia, y kkitzijoj ri utzij ri Dios chke nikʼaj chik (Mateo 28:​19, 20; Hechos 15:14). Xuqujeʼ kkinim ta kibʼ pa política (Salmo 146:​3, 4; Juan 15:​17, 18).

RI TEWCHIBʼAL CHE NURIQOM: Unimaxik ri pixabʼ re ri Biblia uyaʼom utzilal chwe. Kintij ta chi marihuana, y kinsach ta chi kʼi pwaq ronojel taq ikʼ che uloqʼik. Kimik utz chi ri nuchomanik, y kinyawaj ta chik.

Chiʼ in nitzʼ na xwaj xinriq utzilal pa ri nukʼaslemal y, kimik nuriqom wariʼ. Ri más nim ubʼanik chnuwach, are che in kʼo naqaj che ri Dios (Santiago 4:8).

«Xinya kan ri oyowal» (MARTINO PEDRETTI)

UJUNABʼ: 43

TINAMIT: AUSTRALIA

NIKʼAJ CHIK: XUKAMISAJ WINAQ Y XUKʼAYIJ DROGAS

RI OJER NUKʼASLEMAL: Kʼa in nitzʼ na are chiʼ rukʼ ri nufamilia kojbʼe pa jalajoj taq lugar; xojkʼojiʼ pa alaj taq tinamit, jun nim tinamit. Naj tiempo xqabʼan pa jun lugar che oj nabʼe xojopan chilaʼ y knaʼtaj na chwe are chiʼ xinkʼojiʼ kukʼ ri nuprimos y nutíos. Kojbʼe che kichapik taq kar, y keqachap taq chikop rech keqatijo y kqabʼan bumeranes, y nikʼaj chi jastaq.

Amaqʼel kinchʼayanik, ri nutat are jun boxeador, y xukʼut wariʼ chnuwach are chiʼ kʼa in nitzʼ na. Are chiʼ in ala xinmaj utijik tzam pa taq ri bares. Utz kqilo kqatzukuj chʼoj kukʼ ri wachiʼl. Kqakʼam bʼi navajas y kqakʼam bʼi cheʼ che kkoj che béisbol, kojchʼojin kukʼ veinte winaq o más.

Rech kinchʼak pwaq, kinkʼayij drogas y jastaq che xa elaqʼam kumal ri ajchakibʼ che e kʼo chuchiʼ taq ri muelles. Xuqujeʼ kinchakun kukʼ ri winaq che kkikʼayij drogas kentaʼ ri kipwaq chke ri winaq che kʼo kikʼas kukʼ y kenxibʼij rukʼ pistola. Ri amaqʼel kinbʼij are: «Kinkamisanik, o kinkamisaxik». Ri kwaj, are che kenkamisaj ri winaq.

RI BIBLIA XUKʼEX RI NUKʼASLEMAL: Knaʼtaj chwe che nutom chkij ri testigos rech Jehová are chiʼ kʼa in nitzʼ na. Are kʼu kʼateʼ xwaj xwetaʼmaj chkij are chiʼ más veinte chi nujunabʼ, xintaʼ che ri nunan we kuchʼobʼ kiwach. Kʼateʼ qʼaxinaq kebʼ qʼij xopan jun Testigo cho wachoch Dixon ubʼiʼ. Naj tiempo xojtzijon rukʼ, tekʼuriʼ xinubʼan invitar pa ri e riqbʼal ibʼ. Are ri nabʼe mul che xinbʼek y, chilaʼ xinmajij wi, y qʼaxinaq chi veinte junabʼ nuyaʼom ta kan bʼenam pa ri e riqbʼal ibʼ. Utz xinwilo che amaqʼel kkikoj ri Biblia chiʼ kkitzalij uwach ri nupreguntas.

Xkikʼut chnuwach che ri Jehová nim keril konojel ri winaq (2 Pedro 3:9). Xinwetaʼmaj che ri areʼ are jun Tat che sibʼalaj kloqʼoqʼenik che kinuchajij paneʼ ri nikʼaj chik kinkichajij taj. ¡Xukubʼsaj nukʼuʼx are chiʼ xinwetaʼmaj, che we kinkʼex ri nukʼaslemal, ri areʼ kukuy numak! Kʼo jun texto che xopan pa wanimaʼ: Efesios 4:​22-24. Chilaʼ kubʼij che rajawaxik kqesaj ri «ojer» qakʼaslemal y che kqatzʼyaqij «ri kʼakʼ kʼaslemal, jas ri kqaj chuwach ri Dios».

Qastzij che kʼax xinbʼan kan che uyaʼik ri ojer nukʼaslemal. Kinkunik kintij ta drogas pa kʼi taq qʼij, are kʼu chiʼ kopan ri fin de semana y kinbʼe kukʼ ri wachiʼl, kinmaj chi ubʼanik ri kinbʼan kan nabʼe. Xinwilo che kinkun taj kinkʼex ri nukʼaslemal we amaqʼel in kʼo kukʼ, rumal laʼ xenwachilaj ta chik y xinbʼe pa jun chi tinamit. Are kʼu xebʼe jujun wukʼ y xkimaj chi uyaʼik ri drogas chwe. Xinbʼij chke che kwaj ta chik kintijo y, chiʼ xojopan pa ri jun chi lugar xqajach qibʼ. Tekʼuriʼ majaʼ naj xinto che xekibʼanaʼ elaqʼ pa jun banco kukʼam bʼi jun escopeta recortada.

RI TEWCHIBʼAL CHE NURIQOM: Are chiʼ xenya kan ri achilanik riʼ, kʼax ta chi xinbʼan che ukʼexik ri nukʼaslemal. Tekʼuriʼ pa ri junabʼ 1989 xinbʼan nuqasanjaʼ. Xuqujeʼ ri wanabʼ y ri nunan nutat xkibʼan kiqasanjaʼ.

Kimik Martino 18 junabʼ chik kʼulanik y e kʼo oxibʼ ralkʼwal. Ri areʼ kubʼij: «Kimik kpe ta chi woyowal, paneʼ kintzurik. Xuqujeʼ xinwetaʼmaj kiloqʼoqʼexik konojel kiwach winaq, apastaneʼ ri kitinamit o kichʼabʼal (Apocalipsis 7:9). Ksach ta chwe ri utzij ri Jesús, che kubʼij»: «We kixjeqiʼ pa ri nutzij, qas ix nutijoxelabʼ riʼ. Kiwetaʼmaj kʼu na ri qastzij, areʼ kʼu ri qastzij kixtzoqopin na» (Juan 8:31, 32).

[Comentario]

Rech xinkunik xinya kan wariʼ rajawaxik xinya kan utaʼik música che kʼax kchʼaw chkij winaq re jun chi tinamit

[Comentario]

Utz kqilo kqatzukuj chʼoj kukʼ ri wachiʼl. Kqakʼam bʼi navajas y kqakʼam bʼi cheʼ che kkoj che béisbol, kojchʼojin kukʼ veinte winaq o más