Xinalax pa Székesfehérvár, jun tinamit re Hungría che kʼi chi junabʼ kʼolik y kʼi taq jastaq kʼulmatajinaq chilaʼ. Are kʼu ri más knaʼtaj chwe are ri kʼax che xqariq pa ri Segunda Guerra Mundial.

Kukʼ ri watiʼt numam xinkʼiy wi. Ri más knaʼtaj chwe are ri watiʼt ubʼiʼ Elizabeth. Ri areʼ xukʼut chnuwach chrij ri Dios. Are chiʼ kʼo oxibʼ nujunabʼ ronojel taq chaqʼabʼ kqabʼan ri Padrenuestro. Are kʼu, chiʼ qʼaxinaq chi 30 junabʼ xwetaʼmaj jas kraj kubʼij wajun chʼawem riʼ.

Amaqʼel xinkʼojiʼ kukʼ ri watiʼt numam, rumal che ri nutat nunan chi paqʼij chi chaqʼabʼ kechakunik rech kkiloqʼ jun qachoch. Are kʼu, kʼa chukabʼ sábado kqamulij qibʼ kukʼ konojel ri familia rech kqatij qawa. Qas knaʼtaj wariʼ chwe.

Ri nutat nunan xekunik xkiloqʼ ri qachoch pa ri junabʼ 1958: xojkunik xojkʼojiʼ pa jun utzalaj ja. ¡Sibʼalaj xinkikotik rumal che kinkun chik kinkʼojiʼ kukʼ! Are kʼu, naj ta xuchʼij ri nukikotemal; rumal che chiʼ qʼaxinaq chi seis ikʼ, xkam ri nutat rumal cáncer.

Sibʼalaj xinbʼisonik. Knaʼtaj chwe che xinbʼij wariʼ che ri Dios: «Xinta toqʼobʼ chawe che katoʼ ri nutat. ¡Xwaj taj che kkamik! ¿Jasche xinatatabʼej taj?». Are kwaj kwetaʼmaj jawiʼ kʼo wi ri nutat. Amaqʼel xinchomaj: «¿La xbʼe pa ri kaj, o la xsach uwach?». Are chiʼ kewil ri nikʼaj chi akʼalabʼ che e kʼo kukʼ ri kitat sibʼalaj kinbʼisonik.

Pa kʼi taq junabʼ amaqʼel xinbʼe pa ri camposanto. Kinxukiʼ jawiʼ xmuq wi ri nutat y kinbʼij che ri Dios: «Chabʼanaʼ toqʼobʼ, kwaj kwetaʼmaj jawiʼ kʼo wi ri nutat». Xuqujeʼ xintaʼ che, che kinutoʼ che retaʼmaxik jasche xojubʼano.

Chiʼ kʼo 13 nujunabʼ xwaj xwetaʼmaj ri chʼabʼal aleman rumal che xinchomaj che weneʼ kinkunik kinriq ri kirespuestas ri nupreguntas pa ri kiwuj ri alemanes. Y pa ri junabʼ 1967 xinbʼe pa ri tinamit Jena che xuqujeʼ are ri Alemania oriental, rech kenbʼanaʼ estudiar chilaʼ. Xinsikʼij ronojel ri kiwuj ri filósofos alemanes, más na ri kchʼaw chrij jasche xbʼan ri achi. Are kʼu paneʼ utz xwil ri xinsikʼij, xinriq ta kirespuestas ri nupreguntas. Rumal laʼ xinya ta kan utaʼik che ri Dios che kinutoʼ che uriqik ri respuestas.

Xintzalij pa Hungría pa ri junabʼ 1970 chilaʼ xwetaʼmaj wi uwach ri ixoq che xux wixoqil, Rose ubʼiʼ. Pa ri tiempo riʼ Hungría kʼo chuxeʼ ri utaqanik ri comunismo, are kʼu chiʼ oj kʼulan chik xojbʼe pa Austria. Rumal che qachomam chik che kojbʼe pa Sydney, che kʼo pa Australia y che chilaʼ kʼo jun nutío.

Chiʼ qʼaxinaq chi jubʼiqʼ tiempo xinriq nuchak pa Austria. Chilaʼ jun chke ri e wachiʼl xubʼij chwe che ri Biblia kkunik kutzalij uwach ri nupreguntas y xuya kebʼ wuj chwe che kchʼaw chrij wariʼ. Xinkʼis usikʼixik ri wuj riʼ are kʼu kwaj kwetaʼmaj más, rumal laʼ xintaʼ apan más wuj chke ri testigos rech Jehová rech kkitaq lo chwe.

Ri qʼij rech ri nabʼe qaniversario xul jun ala qukʼ che testigo rech Jehová. Xukʼam lo ri wuj che xinta apanoq y xutzujuj jun etaʼmanik re ri Biblia chwe. Y xinbʼij che, che utz rumal che kwaj kwetaʼmaj más chrij ri Biblia, kamul pa jun semana xyaʼ ri etaʼmanik chwe, ¡y kajibʼ horas kqabʼano!

Sibʼalaj xinkikot rumal ri tajin kkikʼut ri Testigos chnuwach chrij ri Biblia. Y are chiʼ xkikʼut ri ubʼiʼ ri Dios chnuwach pa ri Biblia húngaro, sibʼalaj xinmayo. Paneʼ 27 junabʼ xinbʼe pa misa nijun mul xinta ri bʼiʼaj Jehová. Sibʼalaj xinmay ri kukʼut ri Biblia. Y más utz xinto che ri kaminaqibʼ kʼo ta ketaʼmabʼal, jetaneʼ xa tajin kewarik (Eclesiastés 9:5, 10; Juan 11:11-15). Y xinwetaʼmaj che pa ri petinaq kojkʼojiʼ na pa jun kʼakʼ uwach Ulew jawiʼ «kʼo ta chi kamikal» (Apocalipsis 21:3, 4). Kimik qas wetaʼm che kʼo na jun kʼastajibʼal pa jun kʼakʼ uwach Ulew y che kwil chi na uwach ri nutat (Hechos 24:15).

Rose rukʼ ronojel ranimaʼ xinutoʼo. Xa pa kebʼ ikʼ xqakʼis rilik ri wuj che tajin kkoj qukʼ che uyaʼik ri etaʼmanik. Xojbʼe pa ronojel ri kiriqbʼal ibʼ ri testigos rech Jehová; y sibʼalaj xqamay ri utzilal, ri achilanik, y ri loqʼoqʼebʼal che kʼo chkixo’l (Juan 13:34, 35).

Pa ri junabʼ 1976 xojbʼe pa Autralia. Are chi’ xojopanik, aninaq xeqatzukuj ri Testigos y sibʼalaj utz xkibʼan che qakʼulaxik xqanaʼo che jetaneʼ cho qachoch xojopan wi. Y pa ri junabʼ 1978 xojux testigos rech Jehová.

Xinriq ri kirespuestas ri nupreguntas che ojer inchomanaq chrij. Xuqujeʼ xinriq jun utzalaj tat che are ri Jehová (Santiago 4:8). Y xaq xiw ta wari’, xuqujeʼ kinkubʼsaj nukʼuʼx che kwil chi na uwach ri nutat pa ri kotz’i’jalaj uwach Ulew che utzujum ri Dios (Juan 5:28, 29).

Pa ri junabʼ 1989 xojtzalij lo pa Hungría rech kqakʼut ri utzij ri Jehová chkiwach ri qafamiliares, ri e qachiʼl y nikʼaj chi winaq. Sibʼalaj kojkikotik rumal che e kʼi chi winaq e qatoʼom. Más che setenta e testigos rech Jehová chik, y jun chke are ri nunan.

17 junabʼ xinbʼan nuchʼawem che ri Dios y xinbʼij che, che kinuto’ che uriqik ri kirespuestas ri nupreguntas, y qʼaxinaq chi 39 junabʼ xinutoʼ che uch’ob’ik. Kimik kʼa kinbʼan na nuchʼawem y kinbʼij che: «Maltyox, loqʼalaj qaTat rumal che xatzalij uwach ri nuchʼawem che xinbʼan chawe are chiʼ kʼa in akʼal na».