Bibliachöqa nimantsik Teyta Dios nunakunata, tukuyläya a animalkunata y plantakunata kamanqantam (Genesis 1:12, 21, 25, 27; Revelacion [Apocalipsis] 4:11). Bibliachöqa nin, punta teytantsikkuna Adanwan Ëvapita llapan nunakuna mirashqa kanqantsiktam (Genesis 3:20; 4:1). Juk planta o juk animal ichik cambianqantaqa b Bibliachöpis ninmi; peru manam nintsu imëkapis illaqpita yurishqa kanqanta o juk animalpita yurishqa kanqantsiktaqa.

•  ¿Imatatan wakin nunakuna niyan?

•  Imapis illaqpitam yurishqa o juk animalpitam shamuntsik niyanqanwanqa, ¿Biblia ninqan igualku?

•  Nunakuna, animalkuna y plantakuna mëchöpis yachakäyanqanqa, ¿kikinlla yurishqa kayanqantaku rikätsikun?

 Kikinllapitam imëkapis yurishqa niyanqanqa, imëkatam rikätsimantsik. Tsëpaqmi juk reqishqa libru nin, “Diosqa imapis kanqanllapitam imëka kawëkaqkunatapis kamashqa”.

 Kikinllapitam imëkapis yurishqa niyanqanqa këkunapis kanmanmi:

•   Kanan witsan nunakuna, animalkuna y plantakunaqa; unë witsan juk ishkë animalkunallapitam yuriyashqa.

•   Imapis kawaqpitaqa, imëkamanmi tikrarita puëdin y atskamanmi mirarin.

•   Imanö kaptimpis, Teyta Diosmi tsë llapantaqa ruran.

 Nunakuna niyanqan rasumpa kaptinqa, manam Bibliachö Genesis libru ninqanqa rasumpatsu kanman. Peru Jesusqa, tsë willakuy rasumpa pasakushqa kanqantam nirqan (Genesis 1:26, 27; 2:18-24; Mateu 19:4-6). Bibliachöqa nin, Jesus manaraq Patsata shamur Teyta Dios “llapan imëkapis” ruranqanchö yanapashqa kanqantam (Juan 1:3). Tsëkunam cläru rikätsimantsik, nunakuna niyanqanwan Biblia ninqanqa mana igual kanqanta.

 Bibliachöqa, Teyta Dios kamanqan animalkuna y plantakunaqa ichik cambiayanqantaqa ninmi. Juk animalta jukläya animalwan cruzatsiptikiqa, ichik jukläyam yurin; y juk plantata juk markaman apaptikiqa, ichik cambianqam. Peru nunakunaqa tsëkunata rikarmi, kikinllapita imëkapis yurishqa kanqanta niyan.