¿Imanötan Jesuspa cuerpun karqan?
Biblia yachatsikunqan
Bibliachö mana willakuptinmi Jesuspa rikënin imanö kanqantaqa pï nunapis musyantsu. Tsëmi rikätsikun imanö rikakunqanqa mana alläpa precisanqanta. Tsënö kaptimpis, Bibliachö ninqanmi yanapamantsik Jesuspa rikënin imanö kanqanta maslla musyanapaq.
¿Imanötan karqan? Jesusqa judïum karqan, tsëqa Sempa kastan mamänin rikoqchi karqan (Hebrëus 7:14). Jesusqa manam wakin nunakunapita alläpa jukläyatsu karqan. Tsëmi juk kutiqa Galilëapita Jerusalenta ëwaptin fäcil reqita puëdiyarqantsu (Juan 7:10, 11). Pëwan seguïdu pureq qateqninkunapitapis manam alläpa jukläyatsu karqan. Tsëmi espädankunawan y garrutinkunawan mëtsika nunakuna prësoq chäyaptinqa, Jüdas Iscariötiraq Jesus pï kanqanta reqitsirqan (Mateu 26:47-49).
¿Imanötan aqtsanqa karqan? Bibliachömi willakun “ollqu jatun aqtsayoq kanqanqa penqakuypaq kanqanta”. Tsëqa Jesusqa manachi jatun aqtsayoqtsu karqan (1 Corintius 11:14).
¿Shaprayoqku karqan? Awmi, Jesusqa shaprayoqmi karqan. Pëqa mayorna nunakunapaq judïukunapa leyninchö kënö nir mandakunqantam cäsukurqan: “[Ama] shaprëkikunapa puntanta rutuyankitsu” (Levïticu 19:27; Gälatas 4:4). Sufrinampaq kaqta Bibliachö willakurpis Jesuspa shapranpaqmi parlan (Isaïas 50:6).
¿Imanötan cuerpunqa karqan? Jesusqa kallpayoq nunam karqan. Diospa Gobiernumpita yachatsikurqa karu sitiukunatam chakipa ëwarqan (Mateu 9:35). Ishkë kutim templuchö neguciuta ruraqkunata qarqurqan, mësankunatam jitar usharqan y waskapita chikutiwanmi animalninkunata qarqurqan (Lücas 19:45, 46; Juan 2:14, 15). Juk libruchömi kënö willakun: “Bibliachö Jesuspaq willakoq librukunachö ninqanmi rikätsikun [Jesusqa] alläpa alli saloryoq kanqanta” (Cyclopedia de M’Clintock y Strong, IV kaq libru, 884 kaq pägina).
¿Imanötan cäranqa rikakoq? Jesusqa kuyakoq y llakipäkoqmi karqan, y tsëqa cäranchöpis rikakoqchi (Mateu 11:28, 29). Tsëmi yanapananta y shoqananta munar tukuyläya nunakuna ashiyaq (Lücas 5:12, 13; 7:37, 38). Pëwan këkarqa wamrakunapis kushishqam kayaq (Mateu 19:13-15; Marcus 9:35-37).
Jesus imanö rikakunqampaq nunakuna creiyanqan
Wakinkuna creiyanqan: Apocalipsis libruchö Jesuspa aqtsan millwanö kanqanta y ‘chakinkunapis rawrëkaq broncinö chipapäkunqanta’ niptinmi, wakinkunaqa pensayan Jesusqa yana qarayoq kanqanta (Apocalipsis 1:14, 15, Teyta Diospa Willakïnin).
Rasumpa kaq: Apocalipsis libruchö willakunqanqa ima pasanampaq kaqtam rikätsikun (Apocalipsis 1:1). Aqtsan y chakin imanö kanqanta willakurqa, manam Patsachö kanqan witsan Jesus imanö kanqampaqtsu parlëkan, sinöqa kawariramur imanö kanqantam rikätsikun. Apocalipsis 1:14 textuchö “peqan o uman y aqtsanqa millwanö y rashtanö” yuraq kanqanta nirqa, manam Jesuspa aqtsan millwanö o rashtanö kanqantatsu nikan, sinöqa ima color kanqantam rikätsikun. Yuraq aqtsayoq kanqanqa atska watapana kawashqa karnin Jesus alläpa yachaq kanqantam rikätsikun (Apocalipsis 3:14).
Tsë willakunqanchömi nin Jesuspa ‘chakinkunaqa hornuchö këkar chipapaq alliyätsishqa cobrinö kanqanta’, y ‘cäranqa chipapäkuykaq intinö o rupaynö kanqanta‘ (Apocalipsis 1:15, 16). Tsë color qarayoqqa manam pï nunapis kantsu, tsëmi tsënö nirqa Jesus tsënö kanqantatsu rikätsikun. Tsë textukunachöqa kawariramur Jesus “alläpa chipapëkaq y espantëpaq sitiuchö kawaptinmi” pë imanö këkanqampaq parlëkan (1 Timoteu 6:16).
Wakinkuna creiyanqan: Jesusqa dëbilmi y delicädum karqan.
Rasumpa kaq: Jesusqa manam dëbiltsu karqan, tsëpa rantinqa kallpayoq y valientim karqan. Masllata musyarinapaq, espädankunawan y garrutinkunawan mëtsika nunakuna prësoq chäyaptinmi, ashikäyanqan nuna kanqanta mana mantsakushpa nirqan (Juan 18:4-8). Jesusqa carpintëru karmi alli trabajanan karqan, tsëqa alli kallpayoqchi karqan (Marcus 6:3).
Tsëqa, ¿imanirtan sufrimientu qeruta apar yanapayarqan? ¿Y imanirtaq qeruchö warkurëkaqkunapita mas puntata wanurqan? (Lücas 23:26; Juan 19:31-33). Manaraq wanutsiyaptinmi Jesusqa kallpannaqna këkarqan. Alläpa llakikur y imëkapaq yarpachakurmi tsë paqasqa punushqatsu karqan (Lücas 22:42-44). Tsë paqasqa judïukunam imëka rurar sufritsiyarqan, waränin junaqnam romänukuna alläpa sufritsiyarqan (Mateu 26:67, 68; Juan 19:1-3). Tsë llapanta pasashqa karchi Jesusqa wakimpita mas puntata wanurqan.
Wakinkuna creiyanqan: Jesusqa imëpis llakishqallam këkarqan.
Rasumpa kaq: Jesusqa ciëluchö këkaq Teytan Jehovä imanö kanqantam cläru rikätsikurqan, y pëpaqmi Bibliachö willakun “kushishqa” Dios kanqanta (1 Timoteu 1:11; Juan 14:9). Manam tsëllatsu, Jesusqa wakinkunatam yachatsirqan imata rurarnin kushishqa kayänampaq kaqta (Mateu 5:3-9; Lücas 11:28). Tsëqa Jesuspa cäranqa kushishqa kanqantachi rikätsikoq.
Capaz këkunapis gustashunki
ENSEÑANZAS IMPORTANTES DE LA BIBLIA
¿Imanirtaq Biblia rasumpa kaqta ninqanman markäkushwan?
Bibliata Dios qellqatsishqa kaptinqa, wakin librukunapitam jukläya kanman.
REQIYÄMË
¿Munankimanku visitayänaqta?
¿Munankiku Bibliapita maslla yachakuyta o Jehoväpa testïgunkuna imanö kayanqanta musyëta?