¿Imatan bautizakuyqa?
Bibliachö yachatsikunqan
Bibliachö bautizakuypaq parlarqa, pitapis yakuman tullpuyanqanta y tsëpita yapë yarqamunqantam rikätsikun. a Tsëmi Jesuspis jatunraq mayuchö bautizakurqan (Mateu 3:13, 16). Tsënöllam Etiopïapita nunapis, “mëtsika yaku kanqanman” charnin bautizayänampaq mañakurqan (Hëchus 8:36-40).
¿Imatataq bautizakunqantsikqa rikätsikun?
Bibliachöqa wanushqa nunata pampayanqantawanmi bautizakuyta igualatsin (Romänus 6:4; Colosensis 2:12). Bautizakunqantsikqa rikätsikun, imëka wanureq cuenta unë imanö kanqantsikta dejanqantsikta, y tsëpitaqa cristiänuna karnin Diosta sirwirna kawanapaq kaqtam. Bautizakunqantsikwan y manaraq bautizakurnin ruranqantsikwanmi, Teyta Diosqa yanapamantsik Jesucristu wanunqanman markäkurnin o yärakurnin limpiu concienciayoq kanapaq (1 Pëdru 3:21). Jesuspis nirqanmi qateqnin këta munaqkunaqa bautizakuyänampaq kaqta (Mateu 28:19, 20).
¿Yakuchö bautizakurqa jutsantsikpita limpiunaku kantsik?
Manam. Bibliachöqa willakun Jesuspa yawarninlla jutsantsikpita limpiamënintsikta puëdinqantam (Romänus 5:8, 9; 1 Juan 1:7). Peru Jesus wanunqan yanapamänantsikta munarqa, pëmanmi markäkunantsik o yärakunantsik, imanö kawanqantsikta cambiarmi Jesus yachatsikunqannöna kawanantsik y bautizakunantsikmi (Hëchus 2:38; 3:19).
¿Bibliachöqa ninku llullu wamrakunata bautizayänampaq?
Manam. Bibliachöqa manam nintsu llullu wamrakunata bautizayänampaq. Wakin religionkunachöqa, peqankunaman o umankunaman yakuta jicharmi llullu wamrakunata “bautizayan” y jutinkuna churayan. Peru Cristu mandakunqannö bautizakoq nunaqa, “Diospa Gobiernumpita alli noticiakunata[m]” alli entiendinan y yachakunqanmanmi creinan, y llullu wamraqa manam tsëta rurëta puëdintsu (Hëchus 8:12). Bautizakuyta munaq nunaqa, Bibliapitam yachakunan, yachakunqanmanmi creinan y arrepentikunanmi. Tsëkunataqa manam llullu wamraqa rurëta puëdintsu (Hëchus 2:22, 38, 41).
Bibliachömi willakun papäninkuna Diosta mana dejëpa sirwiyaptinqa, manaraq mayor kaq wamrankunapis Teyta Diospa rikënimpaq limpiu y püru kayanqanta (1 Corintius 7:14). Llullu wamrakunata bautizayanqan allilla kaptinqa, manam tsë wamrakunaqa Diospa rikëninchö limpiu kayänampaq papäninkuna yanapayänanta wanayanmantsu. b
Bautizakuypaq nunakuna creiyanqan
Wakinkuna creiyanqan: Nunakunataqa peqankunaman o umankunaman yakuta jicharpis bauticëta puëdiyanmi, manam entëru cuerpuntaraqtsu yakuman tullpuyänan.
Rasumpa kaq: Bibliachö bautizakuyanqampaq willakurqa, llapan cuerpunkunata yakuman tullpuyanqantam willakun. Maslla musyarinapaq, Bibliachömi willakun Etiopïapita nunata Felïpi bautizaptinqa, ishkankuna ‘yakuman yëkuyanqanta’ y yakuman tullpuriptin yarqayämunqanta (Hëchus 8:36-39). c
Wakinkuna creiyanqan: Biblia ninqanmi entienditsikun llapan familiata bautizayaptinqa, llullu wamrakunatapis bautizayanqanta. Maslla musyarinapaq, Filïpus markapita carcel täpaq nuna bautizakunqampaq parlarmi Bibliachö kënö willakun: “Pë y familiankuna[m] bautizakuyarqan” (Hëchus 16:31-34).
Rasumpa kaq: Bibliachö willakunqanmi rikätsikun, carcel täpaq nuna y familiankunaqa manaraq bautizakurnin, “Jehoväpa palabranta” alli entiendiyanqanta y alläpa kushikuyanqanta (Hëchus 16:32, 34). Tsëmi rikätsikun, carcel täpaq nunapa wayinchö llullu wamrakuna kashqa kaptinqa, pëkunata mana bautizayanqanta. Tsë llullu wamrakunaqa, manam Jehoväpa palabranta entiendita puëdiyarqanraqtsu.
Wakinkuna creiyanqan: Diospa Gobiernunqa wamrakunapaqmi nirqa, Jesusqa llullu wamrakunata bautizayänampaqmi nikarqan (Mateu 19:13-15; Marcus 10:13-16).
Rasumpa kaq: Jesusqa tsënö nirqa, manam bautizakuypaqtsu parlëkarqan. Sinöqa Diospa Gobiernunqa, tsë wamrakunanö humildi y yachakuyta munaqkunapaq kanqantam (Mateu 18:4; Lücas 18:16, 17).
a Griëgu idiömapita “bautizakuy” nir traduciyan, palabraqa “tullpuy” ninan palabrapitam shamun (rikäri Compendio del Diccionario teológico del Nuevo Testamento niyanqan diccionariupa 97 kaq päginanta).
b The International Standard Bible Encyclopedia niyanqan libruchömi nin, “Mushoq Testamentuchöqa llullu wamrakunata bautizayänampaq mana willakunqanta”. Willakunmi nunakunaqa, “bautizakuyta alläpa väleqpaq churar y ima kanqanta mana alli entiendir” llullu wamrakunata bautizayanqanta. Nunakunaqa creiyaq bautizakurqa jutsankunapita limpiuna kayanqantam (vol. 1, pägk. 416, 417).
c Diccionario Enciclopédico Salvat niyanqan diccionariuchömi kënö nin: “Unë BAUTIZAKOQKUNATAQA [...] yakuman tullpurmi punta cristiänukuna bautizayaq” (1967, vol. 2, päg. 577).
Capaz këkunapis gustashunki
¿IMA NINTAQ BIBLIACHÖ?
¿Llapan religionkunaku yanapakun Diosnintsikta alli adoranapaq?
Bibliam ishkë formapa adorayanqanta nimantsik.
ENSEÑANZAS IMPORTANTES DE LA BIBLIA
¿Llapan religionkunaku Diospaqqa alli kayan?
Llapan religionkuna allilla kayanqantam mëtsikaq nunakuna creiyan.
BIBLIACHÖ IMA NINQAN
Bibliapita shumaq yachatsikuyanqäpita masllata musyari
Jehoväpa testïgunkunawan Bibliapita grätislla yachakuy.