Ceiba markachömi yurirqä, tsëqa këkan Hondüraschömi. Noqakunaqa pitsqaqmi kayarqä, chusku warmi y noqallam ollquqa karqä. Sordum yurirqä, tärayanqächö nunakunaqa mana allim kayarqan. Y alläpa waktsam kayarqä, chusku watayoq këkaptïmi papänï trabäjunchö wanukïkurqan.

 Mamänïqa pachata mikuyänällapaqmi qellëta tinkutseq, y manam röpäkuna rantimunampaqqa qellënin kaqtsu. Tsëmi alaläyaq kayä y masran tamya witsanqa.

 Ichikllapa ichikllapam Hondüraschö sëñasta yachakur qallëkurqä. Tsëqa yanapamarqan wakin mana wiyëta puëdeqkunawan parlanäpaqmi. Mamänïwan panïkunaqa manam sëñasta yachayaqtsu. Tsëmi pëkunaqa ichik yachayanqanllawan sëñaspa parlapäyämaq. Tsënö kaptimpis, mamänïqa washkuta upyë y drögakuyqa mana alli kanqantam nimarqan. Mamänï tsënö yachatsimanqampitaqa ¡alläpam agradecikü!

 Mamänïqa misa wiyaqmi apamaq. Peru imatapis mana wiyar y pillapis mana yanapamaptinmi, tsëchöqa aburrikoqlla kä. Tsëmi chunka watayoq këkarqa iglesiaman ëwarqänatsu. Tsënö kaptimpis, Teyta Diostaqa reqita munarqämi.

 1999 wata 23 watayoq këkarmi, juk evangëlica warmita reqirqä. Pëqa Estädus Unïdus sëñastam yachatsimarqan y Diospitam parlapämarqan. Tsë yachakunqä gustamaptinmi pastor tikranäpaq churapakarqä. Tsëmi Puertu Rïcu nacionman ëwarqä mas yachakunäpaq. 2002 wata Ceibaman kutikurmi amïgükunawan juk iglesiata patsätsiyarqä. Tsëchömi këkarqan Patricia y pëwanmi casakuyarqä.

 Tsë iglesiachö pastor karmi, dibüjukunata rurëkur sordukunata sëñaschö yachatseq kä. Y juk markachö këkaq sordukunata yanapaqpis ëwaqmi kä. Y Diospita yachatsikoqmi Estädus Unïdusta y Zambiatapis ëwarqä. Tsënö kaptimpis, Bibliapitaqa manam yacharqällatsu. Rikanqä dibüjukunapita y niyämanqan kaqllapitam yachatsikoq kä. Mëtsikam tapukuynïkuna karqan, peru manam tsë tapukuynïkunapita musyaqtsu kä.

 Juk kutim borrächu kanqäta y warmïta engañanqäta nir iglesiäpita warmikuna mana kaqta parlayarqan. Tsëqa alläpam llakitsimarqan. Tsëmi warmï Patriciawan, tsë iglesiapita yarqukuriyarqä.

 Jehoväpa testïgunkunaqa atska kutim wayïman shayämushqa kayarqan. Peru noqakunaqa manam wiyayarqätsu. Iglesiäkunata dejariyaptïqa Patriciaqa Thomaswan y Liccywanmi Bibliapita yachakur qallëkuyarqan. Sordu mana këkarpis, sëñas idiömata yachayanqanqa espantëpaqmi karqan. Tsëmi noqapis pëkunawan yachakur qallëkurqä.

 Pëkunawanqa Bibliapita yachakuyaq kayä, videukunata sëñaschö rikarmi. Peru amïgükunaqa niyämarqan Testïgukunaqa juk nunallata qatiyanqantam. Tsëmi Bibliapita yachakuyta dejariyarqä. Thomasqa imëkanöpam rikätsimarqan mana tsënö kanqanta, peru manam creirqätsu.

 Killakuna pasariptinmi, warmïqa qeshyakurkurqan. Tsëmi Teyta Diosman mañakurqan Testïgukuna yapë watukayämänampaq. Tsëllachömi Jehoväpa testïgun vecïna watukäyämarqan. Y pëqa Liccywan parlanampaq kaqtam niyämarqan. Liccyqa alläpa kuyakoq panim karqan. Cada semänam warmïta watukaq shamoq yachatsinampaq y yanapanampaq. Peru noqaqa manaran Testïgukunawan yachakuyta munarqäraqtsu.

 2012 watam Jehoväpa testïgunkunaqa Hondüras sëñaschö, ¿Rasumpa kaqta musyëta munankimantsuraq? neq videuwan yachatsikuyarqan. Tsë videuta Liccy churarkamuptinmi, infiernupaq y mana wanoq almayoq kanqantsikpaq yachatsikunqäqa, mana rasumpa kanqanta rikärirqä. Bibliaqa manam tsëta yachatsikoqtsu.

 Tsëpitam Thomaswan parlayänäpaq reunionman ëwarqä. Tsëchömi nirqa sordukunata Bibliapita yachatsita munanqäta. Peru Testïgu këtaqa manam munarqätsu. Noqaqa munarqä sordukunapaq juk iglesiata patsätsitam. Tsënö niriptïmi Thomasqa Efesius 4:5 leyimurqan. Tsëchöqa nin Diospa sirweqninkuna juntu kayänampaq kaqtam.

 Thomasqa Los testigos de Jehová: una historia de fe viva. Parte 1: Salen de la oscuridad neq videutam sëñas idiömachö qaramarqan. Tsëchömi rikarqä, juk grüpu nunakuna imanö yachakuyanqanta. Tsë nunakunanöllam noqapis Bibliapita alli yachakuyta munarqä. Tsëchömi rikarqä Jehoväpa testïgunkuna yachatsikuyanqanqa llapampis Bibliapita kanqanta. Tsëmi warmïwan noqaqa 2014 watachö Jehoväpa testïgun kayänäpaq bautizakuriyarqä.

 Bibliachö yachakuyanqanmannö kawakuyanqan, respetanakuyanqan y kuyanakuyanqanmi testïgukunapitaqa gustaman. Pëkunaqa yachanëpaqmi kayan, yamëmi kawakuyan y juknin jukninmi yanapanakuyan. Y më tsëpita kar o ima idiömata parlarpis llapankunam Diospita juknölla yachatsikuyan.

 Bibliapita yachakuyqa gustamanmi. Tsëchömi yachakushqa Teyta Jehoväqa Llapanta Puëdeq y Mandakoq kanqanta. Wiyaqkunata y mana wiyaqkunatapis kuyanmi. Y noqallätapis kuyamanmi. Y ichikllachöna mana wanurnin y mana qeshyapäkurnin kawakunäpaq kaqtapis yachakushqämi. ¡Tsë junaq chämunantaqa imanömi munëkü!

 Kananqa kushishqam warmï Patriciawan wiyëta mana puëdeqkunata yachatsiyä. Unë iglesiächö reqiyanqä nunakunatapis yachatsiyämi. Kananqa Bibliapitam yachatsikü, manam pastor kanqä witsannötsu. Mëtsikam tapukuynïkuna karqan, peru Jehoväpa testïgunkunawanmi tsë llapampita Bibliachö yachakushqä.