1 Rëyes 12:1-33
12 Llapan israelïtakunam Rehoboamta gobernanti churayänampaq+ Siquem+ markata ëwayarqan y tsëmanmi Rehoboampis ëwarqan.
2 Tsëtam Nebatpa tsurin Jeroboanqa musyarqan (pëqa Salomonpita qeshpir ëwakushqa karmi Egiptuchö täkurqan).*+
3 Israelïtakunaqa Jeroboantam qayatsiyarqan. Tsëpitanam israelïtakunaqa pëwan juntakarkur Rehoboam kaqta ëwayarqan kënö niyänampaq:
4 “Papänikiqa alläpam trabajatsiyämashqa.+ Pënöqa amana trabajatsiyämënatsu. Mañakuyanqäta cäsuyämaptikiqa sirwiyashqëkim”.
5 Tsënam Rehoboamqa nirqan: “Këpita kima junaqta kutiyämunki y tsëran willayashqëki imata pensanqäta”. Tsënö niptinmi israelïtakunaqa kutikuyarqan.+
6 Tsënam gobernanti Rehoboamqa papänin Salomonta sirwishqa dirigentikunata kënö tapurqan: “¿Ima nïmantan tsë nunakunata?”.
7 Tsënam pëkunaqa niyarqan: “Tsë nunakuna niyäshunqëkita ruraptiki y shumaq parlapaptikiqa imëpis sirwiyäshunkim”.
8 Tsënö nikäyaptimpis Rehoboamqa manam dirigeqkunata cäsurqantsu. Tsëpa rantinqa, pëwan winashqa yanapaqnin jövin mayinkunatam+ tapurqan,
9 kënö nir: “Tsë nunakunaqa niyämashqa papänïnö alläpa mana trabajatsinäpaqmi, ¿ima niyämankitan? ¿Imataraq nïküman?”.
10 Tsënam jövinkunaqa niyarqan: “‘Papänikiqa alläpam trabajatsiyämashqa, amana pënöqa trabajatsiyämënatsu’ niyäshoqniki nunakunata kënö nï: ‘Noqaqa papänïpitapis masraqmi exigiyashqëki.*
11 Papänïqa alläpam trabajatsiyäshurqëki, peru noqaqa pëpitapis masraqmi trabajatsiyashqëki. Papänïqa chikutiwanmi astayäshurqëki, peru noqaqa fiërru puntayoq chikutiwanmi astayashqëki’”.
12 Rehoboam, “kima junaqta kutiyämunki”+ nishqa kaptinmi, israelïtakunaqa Jeroboanwan kima junaqta kutiyarqan.
13 Tsënam Rehoboamqa dirigentikuna niyanqanta mana cäsurnin, nunakunata qayapëpa parlaparqan.
14 Jövin mayinkunata cäsurmi kënö nirqan: “Papänïqa alläpam trabajatsiyäshurqëki, peru noqaqa pëpitapis masran trabajatsiyashqëki. Papänïqa chikutiwanmi astayäshurqëki, peru noqaqa fiërru puntayoq chikutiwanmi astayashqëki”.
15 Tsënö nirmi Rehoboamqa nunakuna mañakuyanqanta cäsurqantsu. Tsënöqa pasakurqan Jehovä Dios permitishqa kaptinmi.+ Jehovämi Silö markachö täkoq* willakoqnin Ahïyata+ mandashqa karqan, tsënö pasakunampaq kaqta Nebatpa tsurin Jeroboanta willanampaq.
16 Rogakuyanqanta Rehoboam mana cäsuptinmi israelïtakunaqa kënö niyarqan: “¿Acäsu Davidpitaku kawantsik pëpa kastankunata sirwinantsikpaq? ¡Por ultimu manam Davidpa kastantsu kantsik tsurinta qatiränantsikpaq! Davidqa kikimpa kastankunata mandakutsun. Israel kaqkunaqa, diosninkunaman kutikuyätsun”. Tsënö nirmi Israel nunakuna wayinkunata kutikuyarqan.+
17 Rehoboamqa Judä markakunachö kawaq+ israelïtakunallatanam gobernarqan.
18 Tsëpitanam Rehoboamqa trabajaqkunapa mandaqnin Adoramta+ israelïtakunaman mandarqan. Peru israelïtakunaqa rumiwanmi Adoramta wanuskatsiyarqan, tsëmi Rehoboampis mantsakar Jerusalen markata carrëtanwan qeshpir ëwakurqan.+
19 Tsë junaqpitam israelïtakunaqa Davidpa kastankuna mandaqninkuna kananta munayannatsu.+
20 Egiptupita Jeroboan kutimushqa kanqanta musyarirmi, israelïtakunaqa gobernantinkuna kanampaq churayarqan.+ Davidpa familianqa Judä kastallachönam mandakurqan.+
21 Jerusalen markaman Rehoboam+ chëkurnam, pëpita rakikashqa israelïtakunaman pelyaq ëwayänampaq Judäpa kastankunapita y Benjaminpa kastankunapita cientu ochenta mil valienti soldädukunata qayatsirqan. Tsëtaqa rurarqan llapan israelïtakuna mandädunchö kayänanta munarmi.
22 Tsënam Teyta Diosqa+ willakoqnin Semäyata kënö nirqan:
23 “Judä kastapa mandaqnin Salomonpa tsurin Rehoboamta, Judäpa kastankunata, Benjaminpa kastankunata y wakinkunatapis kënö nï:
24 ‘Këtam Jehovä Dios mandakushqa: “Noqam kë pasakunanta permitirqö. Ama israelïta mayikikunawan pelyaq ëwayëtsu, tsëpa rantinqa wayikikunata kutikuyë”’”.+ Tsënö Jehovä Diospa willakoqnin Semäya niptinmi, Jehovä Dios mandakunqanta cäsukur llapankuna kutikuyarqan.
25 Tsëpitanam Jeroboanqa Efrainpa jirkankunachö këkaq Siquem+ markata alli seguratsirqan y tsëmanmi täkoq* ëwarqan. Tsëpita ëwarnam Penuel+ markatapis alli seguratsirqan.
26 Jeroboanqa kënömi pensarqan: “Kananqa yapëmi Davidpa familian+ llapan israelïtakunata mandakur qallëkunqa.
27 Pishtashqa animalkunata Jehoväpaq rupatsiyänampaq+ Jerusalenman* israelïtakuna seguïdu ëwarqa, Rehoboam gobernantinkuna kanantachi munayanqa. Tsëqa noqata wanuratsimarchi Judäpa gobernaqnin Rehoboampa mandädunman kutiyanqa”.
28 Tsënö nirmi Jeroboanqa alli tapukurir örupita ishkë mallwa törukunata ruratsirqan+ y llapan israelïtakunatam kënö nirqan: “Teyta Diosta adorayänëkipaq Jerusalenman ëwayänëkiqa alläpa karum. Këchönam këkan Egiptupita pushayämushoqniki Diosnikikuna”.+
29 Tsënö nirmi, juk mallwa töruta churarqan Betel+ markaman y juknintanam Dan+ markaman.
30 Y mëtsika israelïtakunam Dan markata ëwayaq tsë mallwa töruta adorayänampaq, tsëta rurarmi jutsallakuyarqan.*+
31 Jeroboanqa altu sitiukunachö templukunata rurëkatsirmi, mana levïta kaq nunakunata sacerdöti kayänampaq churarqan.+
32 Tsënöllam Judächö rurayanqan fiestatanö,+ puwaq kaq killapa quinci junaqninchö fiestata rurayänampaq mandakurqan. Y Betel+ markachö ruratsinqan altarchömi, örupita mallwa törukunapaq animalkunata rupatsirqan. Y tsëchömi sacerdötikunata churarqan altu sitiukunachö këkaq templukunaman trabajaq ëwayänampaq.
33 Kikin Jeroboan akranqan puwaq kaq killapa quinci junaqninchömi, Betel markachö ruratsinqan altarchö qarëkunata rupatsir qallëkuyarqan. Israelïtakuna fiestata rurayänampaqmi mandakurqan y kikinmi altarman ëwëkur qarëkunata rupatsir qoyätsirqan o qoshnitsirqan.
Nötakuna
^ Kënöpis niyanmi: tärarqan; pärarqan.
^ Hebreu idiömachöqa “llullu dëdüqa papänïpa tseqllampitapis mas titam o tetam kanqa” ninmi.
^ Kënöpis niyanmi: täraq; päraq.
^ Kënöpis niyanmi: täraq; päraq.
^ O “templuman”.
^ Kënöpis niyanmi: pecäduta rurayarqan.
