1 Corintius 2:1-16
2 Tsëmi wawqikuna y panikuna qamkunaman shamurqa, manam yachaq nunakuna parlayanqannö parlartsu o yachaq tukurtsu+ Diospa pakarëkaq sagrädu noticianta willarqaq.+
2 Qamkunawan këkarqa, Jesucristullapita y pëta qeruchö wanutsiyanqanllapitam qamkunata parlapäyarqaq.*+
3 Kallpannaq këkar, mantsakuykar y karkaryëkarmi qamkunaman shamurqä.
4 Y qamkunata parlapäyarniki y willayarnikiqa, manam yachaq nunakunanötsu creitsiyäshuynikita munar parlapäyarqaq, sinöqa parlanqäqa santu espïritupa podernintam rikätsikurqan,+
5 tsënöpa nunakuna yachayanqanman mana confiakuyänëkipaq, sinöqa Teyta Diospa poderninman.
6 Noqantsikqa poqushqa nunakunachömi yachëpita parlantsik,+ peru manam kanan witsan* nunakuna yachayanqampitatsu ni kanan witsan gobernaqkuna yachayanqampitatsu, pëkunaqa llapanmi ushakäyanqa.+
7 Noqantsikqa pakarëkaq sagrädu noticiapita, awmi, Teyta Diospa pakarëkaq yachënimpitam parlantsik.+ Tsëtaqa väleqpaq churashqa kanampaqmi, unë witsanna* Teyta Dios dispunirqan.
8 Tsë yachëtaqa manam kanan witsan* mëqan gobernaqkunapis reqiyashqatsu;+ reqirninqa manam puëdeq Señor Jesusta wanutsiyanmantsu* karqan.
9 Peru tsëqa kënö nir qellqarëkanqannömi: “Manam pï wiyashqatsu ni rikashqatsu ni manam shonqunkunachö ichikllapis pensayashqatsu kuyaqninkunapaq Teyta Dios alistanqanman”.+
10 Noqantsiktam Teyta Diosqa santu espïritunwan musyatsimarquntsik.+ Awmi, santu espïrituqa+ imëkatam alli musyan,* Diospa pakarëkaq yachënintapis.+
11 ¿Pï nunatan musyan juk nuna imata pensanqanta? Kikin nunallam shonqunchö* ima kanqanta musyan. Tsënöllam Teyta Diospa kaqkunatapis, mana ni pï musyantsu, sinöqa Teyta Diospa santu espïritunlla.
12 Noqantsikqa manam kë munduchö nunakunanötsu pensantsik o kawantsik, sinöqa Teyta Diospa santu espïrituntam chaskirquntsik,+ tsënöpa alli kar Teyta Dios noqantsikpaq ruranqanta musyanapaq.
13 Noqantsikpis tsëkunapitam parlantsik, peru manam yachaq nunakuna yachatsimanqantsik palabrakunawantsu,+ sinöqa santu espïritu yachatsimanqantsik palabrakunawanmi.+ Awmi, santu espïritupita shamoq palabrakunawanmi, Diospa kaqkunata entienditsikuntsik.
14 Peru nunakunanö pensaq nunaqa, pëpaq mana imapaqpis väliptinmi, Teyta Diospa santu espïritun musyatsikunqankunata chaskikuntsu y santu espïritu yanapaptinraq pï nunapis musyëta* puëdiptinmi tsëkunata musyëta puëdintsu.
15 Tsënö kaptimpis, santu espïritu pushananta permiteq nunaqa, llapantam alli musyan,*+ peru pëtaqa manam pï nunapis juzguëta puëdintsu.
16 “¿Pitan Jehovä* pensanqanta musyan, pëta yachatsinampaq?”.+ Peru noqantsikqa Cristu pensanqannömi pensantsik.+
Nötakuna
^ Kënöpis niyanmi: parlaparqä.
^ O “imëkapis imanö këkanqanchö”. Rikäri “Bibliachö palabrakunata entiendinapaq” neqta.
^ O “imëkapis imanö këkanqankuna manaraq kaptin”. Rikäri “Bibliachö palabrakunata entiendinapaq” neqta.
^ O “imëkapis imanö këkanqanchö”. Rikäri “Bibliachö palabrakunata entiendinapaq” neqta.
^ O “qeruchö wanutsiyanmantsu”.
^ O “alli averiguan”.
^ O “pensëninchö”. Griëgu idiömachöqa “espïritunchö” ninmi.
^ O “averigüëta”.
^ O “alli averiguan”.
