1 Juan 3:1-24
3 ¡Diospa tsurinkuna nir qayashqa kanantsikta permitirmi,+ Teytaqa alläpa kuyamanqantsikta rikätsimarquntsik!+ Y noqantsikqa Diospa tsurinkunam kantsik. Tsëmi pëta mana reqishqa karnin,+ kë munduchö nunakuna reqimantsiktsu.+
2 Kuyë wawqikuna y panikuna, kananqa Diospa tsurinkunanam kantsik,+ peru manam musyatsimarquntsikraqtsu shamoq tiempuchö imanö kanapaq kaqta.+ Pë rasumpa imanö kanqanta rikänantsik kaptinmi, pë rikakämunqan tiempuchö pënö kanapaq kaqta musyantsik.
3 Y pëman confiakoqkunaqa, pë limpiu kaptinmi limpiu kawakur këkäyänan.+
4 Jutsata* ruraqkunaqa, leytam cäsukuykäyantsu, tsëmi jutsaqa leyta mana cäsukuy.
5 Qamkunaqa musyayankim, pëqa jutsantsikkunata* ushakätsinampaq shamushqa kanqantapis,+ y pëchöqa manam ima jutsapis kantsu.
6 Pëwan juknölla këkaqkunaqa manam jutsata* rurayantsu;+ pï nunapis jutsata ruraqqa, manam pëta rikashqatsu ni reqishqatsu.
7 Kuyë wamralläkuna, ama pï nunapis engañayäshuytsu; alli kaqta ruraqqa, allita ruraq nunam, pëpis allita ruraq kanqannö.
8 Jutsata* ruraqqa, Diablupitam shamun. Diabluqa qallanampitam* jutsata rurar këkashqa.+ Kërëkurmi Diospa Tsurinqa shamurqan: Diablu ruranqankunata ushakätsinampaq.+
9 Diospita yureqkunaqa,+ pëpa murun* pëkunachö imëpis kaptinmi jutsata* rurayantsu, y Diospita yurishqa karmi jutsa rurëta puëdiyantsu.+
10 Diospa tsurinkuna o Diablupa tsurinkuna kayanqanqa këchömi cläru rikakun: alli kaqta mana ruraq y nuna mayinta* mana kuyaqpis, manam Diospitatsu shamun.+
11 Qamkunaqa qallanampitam këta wiyayarqunki: juknintsik juknintsik kuyanakunapaq kaqta;+
12 y manam Cainnöqa kanantsiktsu. Pëqa Diablupita* shamurmi, mana llakipashpa* wawqinta wanuratsirqan.+ ¿Y imanirtan wanuratsirqan? Tsëtaqa rurarqan, kikin ruranqankuna mana alli kaptin,+ peru wawqin ruranqankunaqa alli kaptinmi.+
13 Wawqikuna y panikuna, ama espantakuyëtsu kë munduchö nunakuna chikiyäshuptiki.+
14 Noqantsikqa nuna mayintsikta* kuyarmi,+ wanushqanö këkanqantsikpita kananqa kawëkanqantsikta musyantsik.+ Nuna mayinta mana kuyaqqa wanushqanömi këkan.+
15 Nuna mayinta* chikeqkunaqa asesïnum kayan,+ y qamkunaqa musyayankim ni mëqan asesïnupis, imëyaqpis kawëta mana tarinampaq kaqta.+
16 Jesucristu noqantsikrëkur wanushqa kaptinmi,*+ kuyakoq kë imanö kanqanta musyarquntsik, y noqantsikpis nuna mayintsikrëkur* wanunapaqmi* obligädu këkantsik.+
17 Peru pï nunapis kë munduchö imëkayoq këkar y nuna mayin* pishipakoqta rikëkar mana llakipëta* munaptinqa, ¿imanöparaq nishwan Teyta Diosta kuyanqanta?+
18 Kuyë wamralläkuna, ama parlanqantsikllawan ni shimillapaqa kuyakoq kanqantsikta rikätsikushuntsu,+ sinöqa ruranqantsikwan+ y llapan shonquntsikwan rikätsikushun.+
19 Tsënömi musyashun rasumpa kaq ninqannö kawëkanqantsikta,* y Teyta Dios kuyamanqantsikpitam shonquntsikchö següru kashun,*
20 shonquntsik imapita acusamashqapis. Awmi, Teyta Diosqa shonquntsikpitapis masmi* y llapantam musyan.+
21 Kuyë wawqikuna y panikuna, shonquntsik mana acusamashqaqa, mana mantsakushpam* Teyta Diosman mañakuyta puëdintsik;+
22 y mandakunqanta cäsukunqantsikrëkur y pëta kushitsinqan kaqta ruranqantsikrëkurmi, llapan mañakunqantsikta pëpita chaskishun.+
23 Pëqa këta ruranapaqmi mandamarquntsik: Tsurin Jesucristupa+ jutinman markäkunapaq o yärakunapaq, y kikin mandamanqantsiknölla juknintsik juknintsik kuyanakunapaq.+
24 Y manam tsëllatsu, Teyta Dios mandakunqanta cäsukoqqa, Dioswanmi imëpis juknölla këkan, y Diosmi pëwan juknölla këkan.+ Y pëpita chaskinqantsik santu espïrituwanmi, noqantsikwan imëpis juknölla këkanqanta musyantsik.+
Nötakuna
^ Kënöpis niyanmi: Pecäduta.
^ Kënöpis niyanmi: pecäduntsikkunata.
^ Kënöpis niyanmi: pecäduta.
^ O “qallanqampitam”.
^ Kënöpis niyanmi: Pecäduta.
^ Tsënö nirqa, jeqamuyta o wayuyta puëdeq murupaqmi parlëkan.
^ Kënöpis niyanmi: pecäduta.
^ Griëgu idiömachöqa “wawqinta” ninmi.
^ Griëgu idiömachöqa “Mana Allita Ruraqpita” ninmi.
^ Kënöpis niyanmi: ankupashpa; kuyapashpa.
^ Griëgu idiömachöqa “wawqikunata” ninmi.
^ Griëgu idiömachöqa “Wawqinta” ninmi.
^ O “almanta entregashqa kaptinmi”.
^ Griëgu idiömachöqa “wawqintsikkunarëkur” ninmi.
^ O “almantsikta entreganapaqmi”.
^ Kënöpis niyanmi: ankupëta; kuyapëta.
^ Griëgu idiömachöqa “wawqin” ninmi.
^ Griëgu idiömachöqa “rasumpa kaqpita shamunqantsikta” ninmi.
^ O “shonquntsikta entienditsishun; shonquntsikta creitsishun”.
^ O “Teyta Diosqa kikintsikpitapis masmi reqimantsik”.
^ O “librim”.
