Jeremïas 1:1-19
1 Këchömi qellqarëkan Hilquïaspa tsurin Jeremïas* willakunqan. Hilquïasqa karqan sacerdötikuna täkuyanqan* Anatot+ markapitam. Tsë markaqa karqan Benjamin kastakuna kawayanqan markakunachömi.
2 Judächö trëci watapana Amonpa+ tsurin Josïas+ gobernëkaptinmi Teyta Jehoväqa Jeremïasta parlaparqan.
3 Tsënöllam Teyta Diosqa Jeremïasta parlaparqan, Josïaspa tsurin Jehoiaquim+ Judächö gobernanqampita Josïaspa juk kaq tsurin Sedequïas+ Judächö onci watapa gobernanqanyaq. Tsëqa karqan, Jerusalenpita nunakuna pitsqa kaq killachö+ juk nacionman apashqa kayanqan witsanyaqmi.
4 Teyta Jehoväqa kënö nirmi parlapämarqan:
5 “Mamëkipa pachanchö manaraq kamarnikim qamtaqa reqirqaqna,*+y manaraq yuriptikim mëtsë nacionkunachö willakoqnï kanëkipaq akrarqaq”.+
6 Peru noqanam nirqä: “¡Llapanta Gobernaq Teyta Jehovä!
Noqaqa jövinllaran* kallä,+ manam alli parlëtapis yachätsu”.+
7 Tsënam Teyta Jehoväqa nimarqan:
“Ama ‘jövinllaraqmi kä’ nimëtsu.
Qamqa llapan mandanqaq nunakunamanmi ëwanëki,y llapan mandanqaqtam pëkunata willanëki.+
8 Ama pëkuna imanö kayanqanta rikar mantsakëtsu.+
Noqa Jehovämi nï: ‘Salvanaqpaqmi qamwan këkäshaq’”.+
9 Tsëpitanam Teyta Jehoväqa shimïta yatëkamurqan.+ Y kënömi Teyta Jehovä nimarqan: “Imata willakunëkipaq kaqtam shimikiman churamurqö.+
10 Kananmi mëtsë nacionpita nunakunata y gobiernukunata noqa ninqäkunata willanëkipaq akrarqoq. Tsënöllam jipinëkipaq y ishkitsinëkipaq, ushakätsinëkipaq y juchutsinëkipaq,* ruranëkipaq y plantanëkipaqpis akrarqoq”.+
11 Teyta Jehoväqa yapë parlapämarmi, “Jeremïas, ¿imatataq rikëkanki?” nimarqan. Tsënam noqaqa, “almendrupa rämantam rikëkä” nirqä.
12 Tsënam Teyta Jehoväqa nimarqan: “Allitam rikarqunki. Noqapis tsënöllam parlanqäta cumplinäpaq alkäbu alkäbum këkä”.
13 Tsëpitanam Teyta Jehoväqa yapë parlapämar, “¿imatataq rikëkanki?” nir tapumarqan. Noqanam nirqä: “Anchu shimiyoq manka puwëkaqtam* rikëkä, y shiminqa norti lädupitam sur läduman ishkinarëkan”.
14 Tsënam Teyta Jehoväqa nimarqan:
“Kë nacionpita nunakunamanqa norti lädupitamimëka mana allikuna chämunqa.+
15 ‘Norti läduchö këkaq llapan familiakunatam qayëkätsimü,tsë familiakuna shamurmiJerusalenman yëkuna punkunkunachö,+entëru markapa murällankunachöy Judä kinrë markakunachö+ gobernar täkuyänankunata churayanqa’ ninmi Teyta Jehovä.+
16 Noqata dejarayämanqampita,+santukunapaq qarëkunata rupatsiyanqampita,+makinkunawan rurayanqan santukunaman qonqurikuyanqampita+y imëka mana allikunata rurayanqampitam pëkunata castigashaq.
17 Peru qamqa llapan mandanqäkunatapëkunata ëwar willanëkipaqmi listu këkänëki.*
Ama pëkunata mantsëtsu.+
Mantsakaptikiqa pëkunapa puntanchö mas mantsakänëkitam permitishaq.
18 Judächö gobernaqkunapa y dirigeqkunapa,sacerdötikunapa y kë nacionchö nunakunapa puntanchö,alli murallashqa markanö, fiërrupita columnanö+y cobripita murällanö kanëkipaqmi permitishaq.+
19 ‘Noqa qamwan karnin salvapteqmi,+qampa contrëki pelyaqkunapisvenciyäshunkitsu’ nïmi noqa Jehovä”.
Nötakuna
^ Kënöpis niyanmi: täräyanqan; pärayanqan.
^ Tsëqa capazchi, ‘Jehovä reqishqata tikratsin’ ninan.
^ O “akrarqaqna”.
^ O “wamrallaran”.
^ Kënöpis niyanmi: laqmatsinëkipaq.
^ Kënöpis niyanmi: timpuykaqtam.
^ Hebreu idiömachöqa “tseqllëkitam alli watanëki” ninmi.
