Jeremïas 49:1-39
-
Ammon nunakunata ima pasanampaq kaqta willakun (1-6)
-
Edom nunakunata ima pasanampaq kaqta willakun (7-22)
-
Edomqa mananam nacionnatsu kanqa (17, 18)
-
-
Damascu nunakunata ima pasanampaq kaqta willakun (23-27)
-
Quedar y Hazor nunakunata ima pasanampaq kaqta willakun (28-33)
-
Elam nunakunata ima pasanampaq kaqta willakun (34-39)
49 Ammonpita+ nunakunapaqmi Teyta Jehovä këta nin:
“¿Manaku Israelpaqa tsurinkuna kan? ¿O manaku pëpita yureqkuna kan?
¿Imanirtan Malcam*+ santuqa,Gadpa+ kastankuna kawayanqan kinrëpita duëñutsakushqa?
¿Imanirtan Malcam santuta adoraqkunaqa, Israel nunakunapa markankunachö kawayan?”.
2 “‘Tsëmi ichikllachöna Ammonchö+ këkaq Rabä+ markachöguërra kanampaq willakuyänanta* permitishaq.
Rabä markaqa ushakashqam quedanqa,y amänunchö markakunatam ninawan ushakätsiyanqa’ ninmi Teyta Jehovä.
‘Y jukkuna duëñutsakuyanqan markakunam, yapë israelïtakunapa kanqa’+ ninmi Teyta Jehovä.
3 ‘¡Hai markata ushakätsishqa kayaptinHesbon markapita nunakuna waqayë!
Rabä markapa amänunchö kawaq nunakuna llakikur büllayë,y chukru tëlata janëkikunaman churakuyë.
Malcam santuta, sacerdötinkunata y dirigeqninkunatam juk nacionman apakuyanqa.
Tsëmi rumipita üsha corralkuna këkanqanchö wakman këman waqar cörrikachäyë.+
4 Traicionakoq warmi wamranö kaqkuna,¿imanirtan alli regashqa pampayoq* kayanqëkipita gälakuyanki?
Qamkunaqa väleq cösasnikikunaman confiakurmi,“¿pitan noqantsikwan pelyaq shamunqa?” niyanki’”.
5 “‘Imëka mana allikunatam qamkunaman chätsimushaq, y amänuykikunachö këkaqkunapitam shamunqa.
Wakpa këpam qeshpir ëwakuyanki.
Qeshpir ëwakoqkunataqa, manam ni pï juntayäshunkitsu’
ninmi Llapanta Gobernaq angelkunata mandaq Teyta Jehovä”.
6 “‘Peru tsëpitaqa mëtsëman apashqa kayanqampitamAmmonpita nunakunata juntamushaq’ ninmi Teyta Jehovä”.
7 Edompita nunakunapaqnam angelkunata mandaq Teyta Jehovä këta nin:
“Teman kinrëchöqa manam yachaq nunakuna kannatsu.+
Imatapis alli entiendeqkunapis, manam shumaqnatsu consejakuyan.
Y yachaq kayanqampis, manam imapaq sirwinnatsu.
8 Castiganä junaq chämuptinmiEsaüpa kastankunaman imëka mana allikunata chätsimushaq.
Tsëqa Dedanpita nunakuna,+ tumarir qeshpir ëwakuyë,y mas rurichö këkaq sitiukunaman ëwar tsëchö kawayë.
9 Üvasta cosechaqkuna shamurqa,¿manatsuraq imallatapis dejayanman qepankunata shamoqkuna pallapakuyänampaq?
Ladronkuna paqaspa shamurpis,munayanqanllatachi apakuyanman.+
10 Tsënö kaptimpis, noqaqa imannaqtam Esaüpa kastankunata dejashaq.
Manana qeshpir ëwakuyänampaqmi,qeshpir ëwakur më sitiuman ëwayanqanta musyatsikushaq.
Tsurinkunata, kastankunata y vecïnunkunatam ushakätsiyanqa,+tsënöllam kikinkunatapis ushakätsiyanqa.+
11 Papäninnaq kaqkunata makïchö dejëkuy.
Pëkunataqa noqam cuidashaq,y viudakunapis noqamanmi confiakayämunqa”.
12 Teyta Jehovämi këta nin: “¡Rikë! Cöleräwan junta këkaq cöpata, mana upuyänampaq kaqkunapis, upuyänan këkaptinqa, ¿manatsuraq qamkunanäqa masraq castigashqa kayanki? Tsë cöpapitaqa, qamkunapis upuyänëkim. Castiganäpitaqa* qamkunapis manam salvakuyankitsu”.+
13 “Bozrä markaqa tsunyaq sitium tikranqa, tsë kinrë markakunapis, imëpis ushakashqam kayanqa.+ Tsëta rikarmi, mëtsë nacionpita nunakuna alläpa mantsakäyanqa,+ y pïmëmi, tsë kinrëpita nunakunata insultayanqa y maldiciyanqa. Tsënöqa kanqa kikïpa jutïchö, tsënö kanampaq jurashqa kaptïmi” ninmi Teyta Jehovä.
14 Teyta Jehovämi parlapämashqa,y mëtsë nacionpita nunakunata kënö ninampaqmi willakoqninta mandashqa:
“Pelyaq ëwayänëkipaq alistakuyë, y llapëki juntakëkurEdom kinrëpita nunakunawan pelyayë”.+
15 “¡Rikë! Mëtsë nacionkunapa rikëninchömimana kaqlla kayanki, y pïmëmi despreciayäshunki.+
16 Qamkunaqa qaqakunachöy mas altu taksha jirkachömi kawayanki.
Pïmëta mantsakätsishqa kar y shonquykikunachö allish tukurmikikikikunaman confiakuyarqëki.
Pichakkunanö* qeshuykikunata altuchö rurayaptikipistsëpitam bajatsiyämushqëki” ninmi Teyta Jehovä.
17 “Edom kinrëta pasanqanta rikarmi, mëtsëpita nunakuna alläpa mantsakäyanqa.+ Y llapan tsëpa pasaqkunam mantsakashqa rikaräyanqa, y imëka mana allikunata pasayanqanta rikarmi, burlakur wichyayanqa.
18 Sodöma, Gomörra y amänunchö markakuna+ ushakäyaptin, mana ni pï tsëkunachö kawanqannöllam, kë kinrë markakunachöpis ni pï kawanqatsu, y manam ni juk nunapis kanqatsu”+ ninmi Teyta Jehovä.
19 “¡Rikäyë! Jordan kinrëchö mana alli plantakunapita yarqamur, animalkuna següru kawakuyanqan sitiukunaman ëwaq leonnömi,+ juk nuna shamunqa. Peru juk rätullachömi, kë kinrë markakunapita qeshpir ëwakunanta permitishaq. Tsë kinrë markakunata rikänampaqmi, akranqä nunata churashaq. Tsëkunata ruraptïqa, ¿piraq noqanö kanman? ¿Piraq noqawan discutinman? ¿Mëqan mitsikoqraq noqapa conträ kanman?+
20 Tsëmi Edompita nunakuna y Temanpita+ nunakuna, noqa Jehovä qamkunapaq decidinqäta wiyayë:
Üshëkikunapa wawankunatam qaracharkur apakuyanqa.
Mana allikunata rurayanqëkipitam kawayanqëki markakunatapis tsunyaq sitiutanö dejanqa.+
21 Ishkir ushakäyaptikim entëru patsapis kuyurishqa.
¡Mëtsëchömi büllata ruranqan wiyakan!
Y büllayanqanqa, Puka lamaryaqmi+ wiyakan.
22 ¡Rikäyë! Älankunata kichëkur mikuyman ëwaq pichaknömi*+pëqa Bozräpita+ nunakunaman shamunqa.
Tsë junaqqa wamran yuriptin warmi sufrinqannömi,Edompita pelyëta yachaq puëdeq soldädukunapis sufriyanqa”.
23 Damascupita+ nunakunapaqnam këta nin:
“Mana alli noticiakunata wiyayanqampitamHamat+ y Arpad markakunapita nunakunaqa, penqakatsishqa kayashqa.
Shonqunkunapis mantsakashqam këkan,y wakman këman laqcheqyëkaq lamar yakunömi tranquïlutsu këkäyan.
24 Damascupita nunakunaqa kallpannaqmi* këkäyan.
Tumëkur qeshpir ëwakuyänampaq këkarmialläpa mantsakar ima rurëtapis puëdiyantsu.
Wamran yurinampaqna këkaq warminömi sufrir y nanatsikur këkäyan.
25 ¿Imanöpatan alabëpaq markatay nunakuna kushishqa kawayanqan markataqa dejayashqatsu?
26 Jövinkunatam pläzankunachö ushakätsiyanqa,tsë junaqqa llapan soldädukunatam wanutsiyanqa o wañutsiyanqa” ninmi angelkunata mandaq Teyta Jehovä.
27 “Damascu markapa murällankunatam ninawan tsaritsishaq,tsë nina ëwarmi Ben-Hadadpa+ alli murallashqa törrinkunatapis ushakätsinqa”.
28 Babiloniachö gobernaq Nabucodonosor duëñutsakunqan Quedar+ markapaq y Hazor kinrëchö markakunapaqmi, Teyta Jehovä këta nin:
“Quedar kinrëman witsäyëy inti o rupay yarqamunan läduchö täkoq* nunakunata ushakätsiyë.
29 Carpankunata* y üshankunatam apakuyanqa.
Awmi, carpankunapa tëlankunata y imëkankunatam apakuyanqa.
Tsënöllam camëllunkunatapis apakuyanqa, y fuertipam kënö büllayanqa:
‘¡Mëtsëchömi imëka mantsakëpaq pasakuykan!’”.
30 “¡Hazorpita nunakuna, qeshpir karuta ëwakuyë!
Mas rurichö këkaq sitiukunaman ëwar tsëchö kawakuyë.
Babiloniachö gobernaq Nabucodonosorqa, qamkunawan pelyaq shamunampaqmi imëkata patsätsishqa.
Puntallapitanam imëkata alistashqa” ninmi Teyta Jehovä.
31 “¡Yamë y següru kawakoq nunakunawan pelyaq ëwayë!
Markankunapaqa manam punkunkuna ni trancankuna kantsu,y wakinkunapita karuchömi kawakuyan” ninmi Teyta Jehovä.
32 “Guërrachö venciyäshurnikim camëlluykikunatay mëtsika animalnikikunata apakuyanqa.
Llapllankunata* rutukoqkunataqa,+ mëtsëman apayänantam permitishaq,y mëtsëpitam imëka mana allikunata pëkunaman chätsimushaq” ninmi Teyta Jehovä.
33 “Hazor kinrëchöqa,chacalkunallanam* pärayanqa,y imëyaqpis tsunyaq sitiullanam kanqa.
Manam ni pï tsëchö kawanqanatsu”.
34 Judächö Sedequïas+ gobernar qallanqan witsanmi, Teyta Jehoväqa Elampita+ nunakunata pasanampaq kaqta parlapar, willakoqnin Jeremïasta kënö nirqan:
35 “Angelkunata mandaq Teyta Jehovämi këta nin: ‘Elampita+ nunakunapa flechakuyänanta pakirmi, puëdeq kayanqanta ushakätsishaq.
36 Elampita nunakunamanmi, patsapa chuskun lädupita vientuta apamushaq, y mëtsëman apayänantam permitishaq. Tsënömi Elampita nunakunataqa mëtsë nacionman apayanqa’”.
37 “Chikeqninkunapa y wanutsita munaqkunapa puntanchö, Elampita nunakuna alläpa mantsakäyänantam permitishaq. Pëkunawan alläpa cölerakurmi, imëka mana allikunata pëkunaman chätsimushaq. Y llapankunata espädawan ushakätsiyänantam permitishaq” ninmi Teyta Jehovä.
38 “Elamchömi+ gobernar täkunäta churashaq, y gobernaqninta y dirigeqninkunatam ushakätsishaq” ninmi Teyta Jehovä.
39 “Peru ushanan junaqkunachöqa, juk nacionman apayanqampitam, Elampita nunakunata juntamushaq” ninmi Teyta Jehovä.
Nötakuna
^ Rikäri “Bibliachö palabrakunata entiendinapaq” neqta.
^ O capazchi “guërrachö këkaqnö büllayänanta”.
^ O “ruri pampayoq”.
^ Kënöpis niyanmi: Castigayänaqpitaqa.
^ Kënöpis niyanmi: Ankakunanö; Pichakakunanö.
^ Kënöpis niyanmi: ankanömi; pichakanömi.
^ O “gänasninnaqmi”.
^ Kënöpis niyanmi: täraq; päraq.
^ Kënöpis niyanmi: Toldunkunata.
^ Kënöpis niyanmi: Llipllinkunata.
^ Tsë animalqa atoq niraqmi.
