Lücas 6:1-49
-
“Säbaduchö imata rurayänampaqpis mandakuyta puëdinmi” (1-5)
-
Makin wanushqa o wañushqa nunata alliyätsin (6-11)
-
Döci apostolkuna (12-16)
-
Jesus yachatsikun y nunakunata alliyätsin (17-19)
-
Pikuna kushikuyänampaq o llakikuyänampaq kaq (20-26)
-
Chikimaqnintsikkunata kuyanapaq (27-36)
-
Pitapis mana juzganapaq (37-42)
-
Cada plantatapis imata wayunqampitam reqiyan (43-45)
-
Alli rurashqa wayi; cimientunnaq wayi (46-49)
6 Juk kutinam Jesusqa trïgu kuchumpa säbadu junaqchö pasëkarqan, y qateqninkunam espïgakunata kipchur y makinkunawan qaqur* gränuta+ uchur qallëkuyarqan.+
2 Tsëmi wakin fariseukunaqa, “¿imanirtan qamkunaqa säbaduchö mana ruranata rurëkäyanki?” niyarqan.+
3 Tsënam Jesusqa kënö contestarqan: “¿Manaku qamkunaqa leyishqa kayanki David y pëwan këkaqkuna mallaqar imata rurayanqanta?+
4 ¿Manaku Teyta Diospa wayinman yëkur Diospaq kaq tantata chaskikurir mikurqan y pëwan këkaqkunatapis qararqan? Tsëtaqa manam ni pï mikunantsu karqan, sinöqa sacerdötikunallam”.+
5 Tsëpitanam, “Nunapa Tsurinqa, säbaduchö imata rurayänampaqpis mandakuyta puëdinmi” nirqan.+
6 Juk säbadunam+ Diosta adorayänan wayiman yëkur yachatsikur qallëkurqan. Tsëchömi derëcha makin wanushqa o wañushqa nuna këkarqan.+
7 Ley qellqaqkuna y fariseukunaqa Jesusta imallapitapis acusayänampaqmi, säbadu këkaptin tsë nunata alliyätsinqanta o mana alliyätsinqanta rikarëkäyarqan.
8 Imata pensëkäyanqanta cuentata qokurmi+ Jesusqa makin wanushqa nunata, “sharkur kë chowpiman* shamuy” nirqan. Tsënam pëqa sharkur chowpiman shäkurirqan.*
9 Tsëpitanam Jesusqa kënö nirqan: “Jukta tapuyashqëki: ¿ima rurëtan säbaduchöqa alli? ¿Allita rurëku o mana allita rurëku? ¿Pitapis salvëku o wanutsiku?”.+
10 Y lädunchö këkaqkunata rikëkurmi tsë nunata, “makikita kamämuy” nirqan. Y kamarkuptinnam, makinqa sänu tikraskirqan.
11 Tsënam pëkunaqa alläpa cölerar Jesusta imanayänampaq kaqta parlayarqan.
12 Tsë junaqkunam jirkaman mañakoq ëwarqan,+ y entëru paqasmi Teyta Diosman mañakur karqan.+
13 Patsa waräriptinnam qateqninkunata qayëkatsir döcita akrarqan, y pëkunatam apostolkuna nir qayarqan:+
14 Simonta, pëtam Pëdru nir jutin churarqan, wawqin Andresta, Santiäguta, Juanta, Felïpita,+ Bartolomëta,
15 Mateuta, Tomasta,+ Alfeupa tsurin Santiäguta, Llapan Shonqunwan Imatapis Ruraq* niyanqan Simonta,
16 Santiägupa tsurin Jüdasta,* y tiempu pasariptin Jesusta traicionaq Jüdas Iscariötita.
17 Tsëpitanam pëkunawan urämur pampachö shäkurirqan.* Tsëchömi atskaq qateqninkuna, y yachatsikunqanta wiyaq y qeshyankunapita alliyätsinampaq ëwaq entëru Judëa provinciapita, Jerusalenpita y Tïru y Sidon costa kinrëpita mëtsika nunakuna këkäyarqan.
18 Mana alli espïritukuna sufritsiyanqan nunakunapis alliyätsishqam kayarqan.
19 Jesuspita poder yarqur llapankunata alliyätsiptinmi, tsëchö mëtsika nunakunaqa yatëta munayarqan.+
20 Tsënam qateqninkunata rikëkur kënö nirqan:
“Kushikuyë waktsa kaqkuna, Diospa Gobiernunqa qamkunapaqmi kanqa.+
21 Kushikuyë kanan mallaqëkaqkuna, qamkunaqa pacha juntam mikuyanki.+
Kushikuyë kanan waqaqkuna, qamkunaqa kushishqam kayanki.+
22 Kushikuyë Nunapa Tsurinrëkur nunakuna chikiyäshuptiki,+ mana alli rikäyäshuptiki,+ insultayäshuptiki y despreciayäshurniki mana alli kayanqëkita niyaptin.
23 Tsënömi pëkunapa kastankunapis, unë witsan Diospa willakoqninkunata imëkata rurar sufritsiyarqan. Qamkunatapis tsëkuna pasayäshuptikiqa, ciëluchö chaskiyänëkipaq kaqman yarpar kushikuyë.+
24 Peru ¡allaw rïcu nunakuna,+ qamkunaqa llapan chaskiyänëkipaq kaqtanam chaskiyarqunki!+
25 ¡Allaw kanan pacha junta këkaqkuna, qamkunaqa mallaqäyankim!
¡Allaw kanan kushishqa këkaqkuna, qamkunaqa llakikurmi waqayanki!+
26 ¡Allaw llapan nunakuna qamkunapaq allita parlayaptin!+ Tsënöllam pëkunapa unë kastankunapis, Diospa willakoqnin tukoqkunapaq allita parlayarqan.
27 Peru qamkuna wiyëkämaqkunaqa, chikiyäshoqnikikunata kuyayë* y pëkunata alli tratayë,*+
28 maldiciyäshoqnikikunata bendiciyë,* y insultayäshoqnikikunapaq mañakuyë.*+
29 Pillapis cärëkichö laqyashuptikiqa, juknin lädu cärëkitapis kamëkapuy, y pillapis janan röpëkita apakuptinqa, rurin kaq röpëkitapis entreguëkuy.+
30 Imatapis mañakuyäshuptikiqa qarëkuy,+ y imëkitapis apakoq kaqtaqa, ama kutitsishunëkipaq nitsu.
31 Alli tratayäshunëkita munayanqëkinölla pitapis tratayë.+
32 Kuyayäshoqnikikunallata kuyarqa, ¿ima allitataq rurayanki? Jutsata* ruraqkunapis kuyaqninkunataqa kuyayanmi.+
33 Alli tratayäshoqnikikunallata alli tratarqa, ¿ima allitataq rurayanki? Jutsata* ruraqkunapis tsëtaqa rurayanmi.
34 Y kutitsiyäshuynikita puëdeqkunallata imatapis prestarqa,* ¿ima allitataq rurayanki?+ Kutitsiyänanllapaqqa jutsata* ruraqkunapis jutsa ruraq mayinkunata prestayanmi.
35 Qamkunaqa chikiyäshoqnikikunatam kuyayänëki,* alli kaqtam rurayänëki* y kutitsiyäshunëkita mana shuyarllam pitapis prestayänëki.*+ Tsëqa alläpa väleq premiutam chaskiyanki, y Llapanta Gobernaq Poderösu Diospa tsurinkunam kayanki, pëqa mana agradecikoqkunata y mana alli nunakunatapis llakipanmi.*+
36 Teytëkikuna llakipäkoq* kanqannölla qamkunapis llakipäkoq kayë.*+
37 Ama pitapis juzgayënatsu, mana imëpis juzgashqa kayänëkipaq.+ Amana pitapis castigayänampaq acusayëtsu, mana imëpis acusashqa kayänëkipaq. Perdonakoq kayë,* qamkunapis perdonashqa kayänëkipaq.+
38 Qarakoq kayë, qamkunatapis qarayäshunëkipaq.+ Mëtsikata, lasaq lasaqta, tapsi tapsïkur y junta juntam mellqanikikunaman winayämunqa. Awmi, mediyanqëki medïdawanmi qamkunapaqpis mediyämunqa”.
39 Tsëpitanam juk mas igualatsikuywan kënö nir yachatsikurqan: “Juk wisku o qapra nunaqa manam wisku mayinta pushëta puëdintsu, ¿aw? Tsëta ruraptinqa, ishkanchi uchkuman jeqarkuyanman, ¿aw?+
40 Yachakuykaqqa* manam yachatseqnimpita mejortsu. Peru pï nunapis alli yachatsishqa karqa, yachatseqninnömi kanqa.
41 ¿Imanirtan creikoq mayikipa nawinchö päjata rikanki, peru nawikichö këkaq terrädutaqa rikankitsu?+
42 Nawikichö terräduta mana rikëkarqa, ¿imanötan creikoq mayikita, ‘creikoq mayillä* nawikichö päjata jipiramushaq’ ninkiman? ¡Ishkë cära nuna! Puntataqa nawikichö terrädutaraq jipi, tsëran creikoq mayikipa nawinchö päjata imanö jipinëkipaq kaqta cläru rikanki.
43 Manam mëqan alli plantapis ismushqataqa wayuntsu, y manam mëqan ismushqa plantapis allitaqa wayuntsu.+
44 Cada plantatapis imata wayunqampitam reqiyan.+ Këllata niriyashqëki, nunakunaqa manam kashapitatsu hïgusta pallayan, y manam shirapitatsu üvasta rutuyan.
45 Alli nunaqa, shonqunchö allikuna kaptinmi allikunata parlan, peru mana alli nunaqa, shonqunchö mana allikuna kaptinmi mana allikunata parlan. Awmi, shonquchö ima kanqampitam nunaqa parlan.+
46 Tsëqa, ¿imanirtan ‘¡Señor! ¡Señor!’ niyämanki, peru ninqäkunataqa rurayankitsu?+
47 Noqa parlanqäta wiyar ninqänölla ruraq nuna piwan igualanqanta niyashqëki.+
48 Pëqa wayita ruranampaq ruri ruriyaq oqtïkur qaqa jananchö cimientuta ruraq nunanömi. Alläpa tamyaptin mayunöraq* mëtsika yaku shamur tsë wayiman fuertipa charpis alli rurashqa kaptinmi ishkitsirqantsu.+
49 Peru ninqäta wiyëkar imatapis mana ruraqqa,+ cimientunnaq wayita allpachö sharkatseq nunanömi. Mayunöraq* mëtsika yaku shamur tsë wayiman fuertipa charmi, tsë wayita ishkitsirqan y pasëpa* ushakäratsirqan”.
Nötakuna
^ Kënöpis niyanmi: kupar.
^ Kënöpis niyanmi: pullanman.
^ Kënöpis niyanmi: ichiskirqan.
^ O “Kushi Kushilla Imatapis Ruraq”.
^ Tadeu nirpis reqiyaqmi.
^ Kënöpis niyanmi: ichiskirqan.
^ Griëgu idiömachöqa “imëpis kuyayänampaqmi” nikan.
^ Griëgu idiömachöqa “imëpis alli tratayänampaqmi” nikan.
^ Griëgu idiömachöqa “imëpis mañakuyänampaqmi” nikan.
^ Griëgu idiömachöqa “imëpis bendiciyänampaqmi” nikan.
^ Kënöpis niyanmi: Pecäduta.
^ Kënöpis niyanmi: Pecäduta.
^ O “wachëninta kutitsiyäshunëkita mana shuyararlla prestarqa”.
^ Kënöpis niyanmi: pecäduta.
^ Griëgu idiömachöqa “imëpis kuyayänampaqmi” nikan.
^ Griëgu idiömachöqa “imëpis rurayänampaqmi” nikan.
^ Griëgu idiömachöqa “imëpis prestayänampaqmi” nikan.
^ Kënöpis niyanmi: ankupanmi; kuyapanmi.
^ Griëgu idiömachöqa “imëpis llakipäkoq kayänampaqmi” nikan.
^ Kënöpis niyanmi: ankupäkoq; kuyapäkoq.
^ Griëgu idiömachöqa “Imëpis perdonakoq kayänampaqmi” nikan.
^ O “Qateqninqa”.
^ Höraqa ollqupaq y warmipaq parlarmi Bibliaqa “wawqi” nin.
^ Kënöpis niyanmi: riunöraq.
^ Kënöpis niyanmi: Riunöraq.
^ Kënöpis niyanmi: jankat.
