Efesius 1:1-23
1 Teyta Dios munaptin Cristu Jesuspa apostolnin noqa Pablupita, Ëfesuchö+ këkaq limpiu nunakunapaq y Cristu Jesuspa confiakuypaq qateqninkunapaq:
2 Teytantsik Dios y Señornintsik Jesucristu qamkunawan alläpa alli këkuyätsun y yamë kayänëkipaq yanapëkuyäshuy.
3 Señornintsik Jesucristupa Teytan y Diosnin alabashqa katsun. Pëqa Cristupa qateqnin kanqantsikrëkurmi, santu espïritunwan ciëluchö këkaq sitiukunachö imëkawan bendicimarquntsik.+
4 Pëqa Cristuwan juntu kanapaqmi patsachö nunakuna manaraq yurikur qallayaptin akramarqantsik, tsënöpa kuyakoq kanqantsikchö pëpa rikëninchö limpiu+ nunakuna y imachöpis mana pishipänapaq.
5 Pëqa allitanö rikanqanmannö y munanqanmannömi,+ tsurinkunatanö legitimänapaq,+ Jesucristurëkur puntallapitana akramarqantsik,+
6 tsënöpa llakipämarnintsik* kuyë Tsurinwan+ alläpa alli kanqanta rikätsimanqantsikpita alabanapaq.+
7 Teyta Dios alläpa alli karnin Tsurimpa yawarninwan pagakur salvamashqantsik kaptinmi,+ libri këta puëdirquntsik, awmi, jutsantsikpita* perdonashqa karquntsik.+
8 Teyta Diosqa noqantsikwan alläpa alli karmi, yachaq y alli juiciuyoq kanapaq* yanapamarquntsik,
9 tsëtaqa rurarqan, munanqanmannö këkaq pakarëkaq sagrädu+ noticiata musyatsimarnintsikmi. Allitanö rikanqanmannömi kikin decidirqan
10 dispunishqa tiempukuna cumplikäriptin llapan imëkata rikänampaq, tsënöpa Cristupa puntanchö kayänampaq ciëluchö y patsachö kaqkunata juntanampaq.+ Awmi, Cristupa puntanman llapan imëkata juntanampaq.
11 Imëka patsätsinqanta munanqannölla ruraq Teyta Dios munanqanmannö puntallapitana akrayämashqa kaptinmi,+ pëwanqa juknölla këkäyä y herenciata chaskiyänäpaq akrashqa kayarqö,
12 tsënöpa noqakuna Cristuman puntata markäkoq o yärakoq kaqkunarëkur, Teyta Dios alabashqa y alläpa respetashqa kanampaq.
13 Peru qamkunapis rasumpa kaqta wiyarmi, awmi, salvashqa kayänëkipaq alli noticiakunata wiyarmi, pëman markäkuyarqëki o yärakuyarqëki. Tsëpitanam pëman creikoqna kar, Cristuwan Teyta Dios änikunqan santu espïrituwan sellashqa kayarqunki,+
14 tsëqa chaskinantsik herenciapa garantïanmi,*+ tsënöpa pagakushqa kanqanwan+ sirweqninkuna libri kayaptin,+ Teyta Dios alläpa alabashqa kanampaq.
15 Tsëmi noqapis, Señor Jesusman markäkuyanqëkita o yärakuyanqëkita y limpiu nunakunawan kuyakoq kayanqëkita wiyanqäpita,
16 qamkunapita Teyta Diosta imëpis agradecikü. Qamkunapaqmi imëpis mañakü,
17 Señornintsik Jesucristupa Diosnin, awmi, chipapëkaq Teyta, pëpita rasumpa kaqta yachakuyänëkipaq, yachaq kayänëkipaq y revelacionkunata entiendiyänëkipaq poderninwan yanapayäshunëkipaq.+
18 Pëmi këkunata musyayänëkipaq shonquykikunata kichashqa: imata shuyäyänëkipaq qayayäshunqëkita, limpiu nunakunapaq alli bendicionkunata herenciatanö katsinqanta+
19 y creikoqkunata alläpa puëdeq kanqanta rikätsimanqantsikta.+ Tsë alläpa puëdeq kanqanqa, tsë puëdeq poderninwan ruranqanchömi rikakun.
20 Tsë poderninwanmi wanushqampita Cristuta kawatsimur ciëlukunachö derëcha lädunman+ jamatsishqa,
21 y llapan gobiernupa, autoridäkunapa, poderkunapa, mandakoqkunapa+ y kanan witsan* y shamoq tiempuchöpis, imëka carguyoqkunapa janampa kanampaqmi churashqa.
22 Pëqa llapan imëkatapis cargunmanmi* churashqa,+ y congregacionchö llapan imëkata rikänampaqmi churashqa.+
23 Congregacionchö kaqkunaqa cuerpunmi kayan+ y pëqa manam imankuna faltatsintsu.
Nötakuna
^ Kënöpis niyanmi: ankupämarnintsik; kuyapämarnintsik.
^ Kënöpis niyanmi: pecäduntsikpita.
^ O “imatapis alli entiendinapaq”.
^ O “adelantunmi; prendanmi”.
^ O “kanan imëkapis imanö këkanqanchö”. Rikäri “Bibliachö palabrakunata entiendinapaq” neqta.
^ O “chakin jawanmanmi”.
