Esdras 3:1-13
3 Markankunachöna këkarmi, israelïtakunaqa watapa qanchis kaq killanchö*+ juk yarpëlla Jerusalenchö juntakäyarqan.
2 Tsëchö këkarnam Jehozadacpa tsurin Jesüa,+ sacerdöti mayinkuna, Sealtielpa+ tsurin Zorobabel+ y wawqinkuna altarta yapë rurayarqan. Tsëtaqa rurayarqan animalkunata pishtëkur Israelpa Diosnimpaq rupatsiyänampaqmi. Tsë altarchöqa, Diospa sirweqnin Moises+ qellqanqan Leychö mandakunqannömi qarëkunata rupatsiyänan karqan.
3 Amänun markakunachö nunakuna atacayänanta mantsëkarpis,+ punta kanqanllachömi altarta rurayarqan. Tsëpitanam patsa waraptin y tardiyaptin animalkunata pishtëkur Jehovä Diospaq rupatsir qallëkuyarqan.+
4 Y Ley mandakunqannömi+ Ramäda Fiestata rurayarqan, y cada junaqmi alistayanqan qarëkunatapis rupatsiyarqan.+
5 Tsëpita witsëpaqa cada junaqmi Teyta Diospaq animalkunata pishtëkur rupatsiyarqan,+ llullu killa junaqchöpis+ y Jehoväpaq rurayanqan fiesta junaqchöpis.+ Tsënöllam voluntäninkunapita Jehovä Diospaq apayanqan qarëkunatapis rupatsiyarqan.+
6 Teyta Jehoväpa templunta shäritsiyänampaq cimientuta manaraq churarpis, qanchis kaq killa+ qallëkunqan junaqpitam animalkunata pishtëkur Jehovä Diospaq rupatsir qallayarqan.
7 Tsëpitanam templuta sharkatsiyänampaq, rumi llaqllaqkunata+ y imëkata rurëta yachaqkunata+ pagayarqan. Y lamarllapa Lïbanupita Jöpi+ markayaq cedru qeruta apayämunampaqmi, Tïru y Sidon nunakunatapis mikuywan, aceitiwan y vïnuwan pagayarqan. Tsë llapantaqa rurayarqan Persia nacionpa gobernantin Cïru mandakushqa kaptinmi.+
8 Jerusalenman chäyanqampitaqa juk wata y juk killanam pasashqa karqan. Tsëmi qateqnin kaq killachö Sealtielpa tsurin Zorobabel y Jehozadacpa tsurin Jesüa, Teyta Diospa templunta rurar qallëkuyarqan.+ Pëkunatam yanapayarqan marka mayinkuna, sacerdötikuna, levïtakuna y Jerusalenman llapan kuteqkuna. Y veinti watayoqpita witsëpa kaq levïtakunatam churayarqan Jehovä Diospa templunchö trabajaqkunata dirigiyänampaq.
9 Tsënöllam Judäpa kastan Jesüa, tsurinkuna, wawqinkuna, Cadmiel y tsurinkunapis Teyta Diospa templunta rurayaptin dirigir yanapakuyarqan. Y Henadadpa+ kastankunapis levïta karninmi, tsurinkunawan y familiankunawan yanapakuyarqan.
10 Jehovä Diospa templumpa cimientunta churar qallëkuyaptinmi,+ sacerdötikunaqa sagrädu röpankuna vistishqa y trompëtankunawan,+ y Asafpa kastan levïtakunapis platïllunkunawan këkäyarqan. Tsëpitanam Israelpa gobernantin David mandakunqannö Jehovä Diosta alabayarqan.+
11 Jehovä Diosta agradecikurmi cambianakuypa kënö nir alabayarqan:+ “Pëqa alläpa kuyakoqmi, y Israeltaqa imëpis kuyëkashqallam”.*+ Tsëpitanam Jehoväpa templumpaq cimientuta churashqa karnin, Jehovä Diosta fuertipa alabar qallëkuyarqan.
12 Y tsëchö këkaq wakin sacerdötikuna, levïtakuna y familiankunachö mandakoq edäyashqa nunakunam yarpäyarqan unë kaq templu imanö kanqanta.+ Pëkunaqa mushoq templuta shäritsiyänampaq cimientuta churayanqanta rikarmi, punta kaq templupaq yarparkur alläpa llakikur waqayarqan. Wakinnam cimientuta patsätsiyaptin kushikur llapan kallpankunawan qayëkachäyarqan.+
13 Tsënö fuertipa qayëkachäyaptinmi, nunakuna musyayarqantsu ni mëqankuna kushikur qayëkachäyanqanta ni mëqankuna waqar qayëkachäyanqanta. Tsënö fuertipa qayëkachäyanqanqa karuyaqmi wiyakarqan.
Nötakuna
^ Tsëqa judïukunapa calendariunchö 7 kaq killam karqan. Rikäri “Masllata musyanapaq” neqchö B15 kaqta.
^ O “alläpam kuyan”.
