Exodu 35:1-35
35 Tsëpitanam Moisesqa israelïtakunata qayëkatsir kënö nirqan: “Teyta Jehovämi këta ruranapaq mandakushqa:+
2 joqta junaqpam trabajayanki, peru säbadu junaqqa manam trabajayänëkitsu. Tsë junaqqa Teyta Jehoväta adorayänëkipaqmi kanqa.+ Säbadu junaqchö trabajaqtaqa wanutsiyänëkim.+
3 Säbadu junaqchöqa manam wayikikunachö ninata tsaritsiyänëkitsu”.
4 Moisesqa israelïtakunata kënöpis nirqanmi: “Këtam Jehovä Diosnintsik mandakushqa:
5 ‘Llapan puëdeq kaqkuna Teyta Jehoväpaq ima qarëllatapis apayämutsun.+ Pï nunapis llapan shonqunwan Teyta Jehoväpaq juk qarëta apamurqa,+ këkunatam apamunan: öruta, plätata, cobrita,
6 azul hïluta, millwapita granäti hïluta, puka hïluta, lïnupita rurashqa alli kaq hïluta, cabrapa millwanta,+
7 pukawan tiñishqa üsha qaratsata, föcapa qaratsanta, acacia qeruta,
8 chiwchikunapaq aceitita, y sagrädu aceitiman y shumaq pukutaq o mushkoq inciensuman winayänëkipaq balsamuta,+
9 önici rumikunata y tukuyläya shumaq rumikunata. Tsë rumikunatam mandakoq sacerdötipa mandilninman+ y pechëranman+ churayänëki.
10 Y imëka rurëta yachaq nunakunatam qayatsinëki.+ Pëkunam Teyta Jehovä llapan mandakunqanta rurayänan:
11 carpa* wayita, ruripa y janapa qataraqninkunata, ganchunkunata, marcunkunata, listonninkunata, columnankunata y tsëkunata jawiyänëkipaq* täcukunata;
12 Sagrädu Cäjata,+ listonninkunata,+ tsapananta+ y cortïnanta;+
13 mësata+ y listonninkunata, mësachö utilizäyänëkipaq kaqkunata y Teyta Diospaq tantata;+
14 candelabruta,+ candelabruchö utilizäyänëkipaq kaqkunata, chiwchinkunata y tsë chiwchikunapaq aceitita;+
15 inciensuta rupatsiyänëkipaq altarta+ y listonninkunata, sagrädu aceitita y shumaq pukutaq o mushkoq inciensuta;+ carpa* wayipa yëkunanchö ëwaq cortïnata;
16 ushakanqanyaq rupatsina qarëkunata rupatsiyänëkipaq altarta,+ cobripita rejïllanta, listonninkunata y altarchö utilizäyänëkipaq kaqkunata; jatun lavatoriuta y armazonninta;+
17 patiuta cercayänëkipaq bayëtakunata,+ listonninkunata y tsëkunata jawiyänëkipaq* täcukunata; patiupa yëkunanchö ëwaq cortïnata;
18 carpa* wayita tsapaq bayëtakunata watayänëkipaq estäcakunata, patiupa cercunchö bayëtakunata watayänëkipaq estäcakunata y waskakunata;+
19 carpa* wayichö sirwirnin vistikuyänampaq alli awashqa röpakunata,+ sacerdöti karnin Aaron vistikunampaq sagrädu röpakunata+ y sacerdöti karnin Aaronpa tsurinkuna vistikuyänampaq röpakunata’”.
20 Moises parlar ushariptinnam israelïtakunaqa ëwakuyarqan.
21 Llapan shonqunkunawanmi qarëta munayanqanta+ Teyta Jehoväpaq apayarqan. Tsë llapan apayanqanwanmi carpa* wayita, tsëchö utilizäyänampaq kaqkunata y sacerdötikunapaq röpakunata rurayarqan.
22 Llapan shonqunkunawanmi warmipis ollqupis, bröchikunata, zarcillukunata,* sortijakunata, tukuy cläsi jöyakunata, y örupita rurashqata imëkata apayarqan. Llapankunam Teyta Jehoväpaq örupita imëka qarëkunata* apayarqan.+
23 Tsënöllam azul hïluta, millwapita granäti hïluta, puka hïluta, lïnupita rurashqa alli kaq hïluta, cabrapa millwanta, pukaman tiñishqa üsha qaratsata y föcapa qaratsanta apayarqan.
24 Y llapankunam plätata, cobrita y acacia qerukunata Teyta Jehoväpaq apayarqan.
25 Imëka rurëta yachaq warmikunam+ shumaq putskëkur, azul hïluta, millwapita granäti hïluta, puka hïluta y lïnupita rurashqa alli kaq hïluta apayarqan.
26 Tsë llapan warmikunaqa kushishqam cabra millwata putskayarqan.
27 Israelïtakunata dirigeqkunapis mandakoq sacerdötipa mandilninman y pechëranman+ churayänampaqmi önici rumikunata y tukuyläya shumaq rumikunata apayarqan.
28 Tsënöllam chiwchikunapaq aceitita, sagrädu aceitiman+ y shumaq pukutaq o mushkoq inciensuman+ winayänampaq balsamuta apayarqan.
29 Llapan ollqukuna y warmikunam shonqunkuna ninqanmannö Teyta Jehoväpaq qarëkunata apayarqan. Tsë qarëkunataqa, Teyta Jehovä Moiseswan mandakunqanta rurayänampaqmi apayarqan.+
30 Tsëpitanam Moisesqa israelïtakunata kënö nirqan: “Teyta Jehoväqa Judä kastapita Bezaleltam akrashqa. Pëqa Urïpa tsurin y Hurpa willkanmi.+
31 Y poderninwan yanapaptinmi yachaq, musyaq kanqa, y imëka rurëtam yachanqa.
32 Tsënöpam llapan ruranampaq kaqta shumaq ruranqa, öruwan, plätawan y cobriwanmi imëkata ruranqa.
33 Shumaq rumikunatam llaqllanqa, y tsëkunata churanampaqmi chäpakunata ruranqa, y qerupitam imëkata ruranqa.
34 Bezalelta y Dan kastapita Ahisamacpa tsurin Oholiabtam+ Teyta Dios yanapanqa wakinkunata yachatsiyänampaq.
35 Y pëkunatam yanapanqa imatapis shumaq rurayänampaq,+ awëta yachayänampaq y azul hïluwan, millwapita granäti hïluwan, puka hïluwan y lïnupita rurashqa alli kaq hïluwan shumaq bordayänampaq. Tsë ishkan nunakunam imatapis shumaq rurayanqa.
Nötakuna
^ Kënöpis niyanmi: shakutsiyänëkipaq.
^ Kënöpis niyanmi: toldu.
^ Kënöpis niyanmi: toldu.
^ Kënöpis niyanmi: shakutsiyänëkipaq.
^ Kënöpis niyanmi: toldu.
^ Kënöpis niyanmi: toldu.
^ Kënöpis niyanmi: toldu.
^ Kënöpis niyanmi: arëtikunata.
^ O “puntaman y qepaman kuyutsiyänan qarëkunata”.
