Exodu 4:1-31
4 Tsënam Moisesqa nirqan: “‘Teyta Jehoväqa manam yuripushurqunkitsu’ nirnin mana creiyämaptin y mana cäsuyämaptinqa, ¿imataraq rurashaq?”.+
2 Tsënam Teyta Jehoväqa kënö tapurqan: “¿Imatataq aptarëkanki?”. Moisesnam, “tukrütam” nirqan.
3 Tsënam Teyta Diosqa “patsaman jitë” nirqan. Y jitëkuptinmi tukruqa culebraman tikraskirqan.+ Tsënam Moisesqa mantsar witikurqan.
4 Tsëpitanam Teyta Jehoväqa Moisesta, “chupampita aptarkuy” nirqan. Y Moises chupampita aptarkuptinmi culebraqa tukruman tikraskirqan.
5 Tsëpitanam Teyta Diosqa Moisesta nirqan: “Tsëta ruraptikim pëkunaqa cuentata qokuyanqa noqa Jehovä, unë kastëkikuna Abrahanpa, Isaacpa y Jacobpa Diosnin+ yuripunqaqta”.+
6 Tsëpitanam Teyta Jehoväqa, “makikita oqllanikiman churë” nirqan. Tsënam Moisesqa makinta oqllaninman churarqan, y sutariptinqa, ¡lepram makinta usharishqa karqan! Makinqa rashtanömi* yuraqpüru këkarqan.+
7 Tsëpitanam Teyta Diosqa, “makikita yapë oqllanikiman churë” nirqan. Tsënam Moisesqa makinta oqllaninman churarqan, y sutariptinqa, sänunam këkarqan.
8 Tsënam Teyta Diosqa nirqan: “Punta kaq milagruta mana creirpis y mana cäsuyäshurnikipis, juknin kaq milagruta rikarqa cäsuyäshunkim.+
9 Peru tsë ishkan milagrukunata rikëkarpis mana creiyäshuptiki y mana cäsuyäshuptikiqa, Nïlu mayupita* yakuta chaqarkurmi patsaman laqchinëki. Y laqchinqëki yakuqa yawarmi tikranqa”.+
10 Tsënam Moisesqa Teyta Jehoväta nirqan: “Teyta Jehovä, noqalläqa manam shumaq parlëta yachätsu, y manam kananllaraqtsu; sinöqa unëpitanam. Qallü watakaptinmi despaciulla parlä”.+
11 Tsënam Teyta Jehoväqa nirqan: “¿Pitan nunata shimiyoqta kamashqa? ¿Pitan permitin pï nunapis sordu o müdu* kananta? ¿Pitan nunata rikätsin o wiskuyäratsin o qaprayäratsin? ¿Manaku noqa Jehovä tsëta rurä?
12 ¡Ëwë! Noqam parlanqëki höra yanapashqëki. Y noqam nishqëki imata parlanëkipaq kaqta”.+
13 Tsënam Moisesqa nirqan: “Teyta Jehovä, ama noqataqa mandëkallämëtsu, jukta mandëkullë”.
14 Tsënam Teyta Jehoväqa cölerakurnin Moisesta kënö nirqan: “Levïta wawqiki Aaronqa+ yachanmi parlëta. Pëqa qam kaqtam shamuykan, y rikäshurnikiqa alläpam kushikunqa.+
15 Pëwan tinkuskirqa noqa ninqaqta willanki, y imata ninampaq kaqta yachatsinki.+ Parlayanqëki höraqa noqam yanapayashqëki, y noqam niyashqëki imata rurayänëkipaq kaqtapis.+
16 Pëmi qampa jutikichö llapan israelïtakunata parlapanqa, y qamqa noqapa jutïchömi llapan ninqaqta willanëki.*+
17 Y tsë tukruykita aparkurmi ëwanëki, y tsëwanmi milagrukunata ruranëki”.+
18 Tsëpitanam Moisesqa suegrun Jetrö+ kaqman kutirnin kënö nirqan: “Marka mayïkunata rikaqmi Egiptuman ëwëta munä, mä imanöshi këkäyan. ¿Manatsuraq ëwar rikäramüman?”. Tsënam Jetröqa “mä ëwë ari” nirqan.
19 Y Madianchö këkaptinmi, Teyta Jehoväqa Moisesta nirqan: “Ëwë, Egiptuman kuti, wanutsishuynikita munaqkunaqa llapannam wanur ushakäyashqa”.+
20 Tsënam Moisesqa warminta y ollqu tsurinkunata ashnuman montarkatsir Egiptuman viajarqan. Dios Yaya mandanqannömi tukrunta aparkur ëwarqan.
21 Y Teyta Jehoväqa Moisesta kënömi nirqan: “Egiptuchö yapë këkarqa, gobernaq rikänampaqmi podernïwan imëka milagrukunata ruranki.+ Tsënö kaptimpis Egiptuchö gobernaqqa noqa permitiptïmi rumi shonqu tikranqa,+ y manam ëwakuyänëkita munanqatsu.+
22 Tsëmi gobernaqta kënö ninëki: ‘Jehovämi këta nin: “Israelqa mayor kaq tsurïmi.+
23 Tsëmi adoramänampaq tsurï yarqunanta dejanëki. Tsëta mana ruraptikiqa mayor tsurikitam wanutsishaq”’”.+
24 Tsëpitanam, posadakuyänan sitiuman chëkäyaptinna Teyta Jehoväpa+ angelnin Moiseswan tinkurqan, y tsurintam wanutsita munarqan.*+
25 Tsënam Ziporäqa+ katsinqan alli fïlu pedernal rumiwan* wamranta ishpakunampa puntanchö señalarqan. Y señalarnin roqunqan qaranwanmi angelpa* chakinta topatsirqan. Y kënömi nirqan: “Këtaqa rurëkä kë yawarwan qowä o runä* cuenta tikrashqa kaptikim”.
26 Tsënam Teyta Diospa angelninqa* ëwakunanta dejaskirqan. Wamrampa ishpakunampa puntanchö señalashqa karmi Ziporäqa, “yawarwan qowä o runä* cuenta” nirqan.
27 Tsëpitanam Teyta Jehoväqa Aaronta kënö nirqan: “Wawqiki Moiseswan tinkuyänëkipaq tsunyaq sitiuman ëwë”.+ Tsënam Aaronqa Moiseswan tinkunampaq Dios Yaya akranqan jirkaman ëwarqan.+ Y Moiseswan tinkuskirqa mutsarmi saludarqan.
28 Tsëpitanam Moisesqa Teyta Jehovä llapan ninqanta wawqin Aaronta willarqan.+ Ima milagrukunata ruranampaq Teyta Dios mandanqantapis willarqanmi.+
29 Tsëpitanam Moiseswan Aaronqa israelïtakunata dirigeqkunawan parlayänampaq juntakäyarqan.+
30 Tsëchömi Aaronqa tsë dirigentikunata willarqan Moisesta Teyta Jehovä imakunata ninqanta. Y Moisesnam llapankuna rikëkäyaptin Teyta Dios mandanqan milagrukunata rurarqan.+
31 Y llapanmi Moisesta creiyarqan.+ Y imëka sufrimientukunapa pasayanqanta+ Teyta Jehovä rikëkanqanta y yanapanampaq kaqta musyaskirmi,+ israelïtakunaqa urkunkunapis patsaman chanqanyaq qonqurikuyarqan.
Nötakuna
^ Kënöpis niyanmi: rapinömi; jankanömi.
^ Kënöpis niyanmi: riupita.
^ Kënöpis niyanmi: upa.
^ Hebreu idiömachöqa “Dios cuentam pëpaq kanëki” ninmi.
^ Hebreu idiömachöqa “Jehovämi pëwan tinkurqan, y wanutsitam munarqan” ninmi.
^ O “pedernal rumipita cuchilluwan”.
^ Hebreu idiömachöqa “pëpa” ninmi.
^ Kënöpis niyanmi: ollqü.
^ Hebreu idiömachöqa “pëqa” ninmi.
^ Kënöpis niyanmi: ollqü.
