Ezequiel 12:1-28
12 Teyta Jehovämi yapë parlapämarqan, y kënömi nimarqan:
2 “Nunapa tsurin, qamqa mana cäsukoq nunakunawanmi kawëkanki. Pëkunaqa nawiyoq karpis manam rikäyantsu y rinriyoq karpis manam wiyayantsu,+ tsënöqa kayan mana cäsukoq karmi.+
3 Qamqa nunapa tsurin, prësu ëwanëkipaqnö qepikita alistë, y rikëkäyäshuptiki prësu ëwëkaqnö junaqpa ëwakuy, wayikita dejëkur, rikëkäyäshuptiki juk läduta ëwakuy. Tsënö ëwakoqta rikäyäshurnikiqa, mana cäsukoq karpis capaz cuentata qokuyanqa.
4 Rikëkäyäshuptiki qepikita junaqpa alistë prësu ëwakunëkipaqnö, tsëpitana ampinqan o tsakanqan* höra rikarëkäyäshuptiki prësu ëwëkaqnö ëwakuy.+
5 Rikarëkäyäshuptiki perqata uchkuskir, tsë uchkupa cösasnikikunawan yarqunki.+
6 Rikarëkäyäshuptiki qepikita hombruykiman churarkur, ampinqan o tsakanqan* höra yarqunki, y patsata mana rikänëkipaq cärëkita tsaparkur yarqunki. Tsëta ruranqëkiwanmi, israelïtakuna cuentata qokuyanqa imakunapa pasayänampaq kaqta”.+
7 Noqaqa nimanqannöllam rurarqä. Llapankuna rikëkäyaptinmi, prësunö ëwanäpaq qepïta junaqpa alistarqä. Y ampirkuptinnam o tsakarkuptinnam* makïllawan perqata uchkurqä. Tsëpitanam maslla ampirkuptin qepïta hombrüman churarkur tsë uchkupa yarqurqä.
8 Patsa waräriptinnam Teyta Jehoväqa yapë parlapämar kënö nimarqan:
9 “Nunapa tsurin, ¿mana cäsukoq Israel nunakunaqa, ‘¿imatataq rurëkanki?’ nirmi tapuyäshurqunki aw?
10 Kënö nï: ‘Llapanta Gobernaq Teyta Jehovämi kënö nin: “Kë willëkanqaqqa, Jerusalen markachö mandakoqta+ y Jerusalen markachö kawaq nunakunatam pasanqa”’.
11 Kënömi ninëki: ‘Pasakunqankunata qamkunata musyatsinäpaqmi këchö këkä.+ Llapan ruranqäkunata rikäyanqëkinöllam, pëkunata juk nacionkunaman prësu apakuyanqa.+
12 Markachö mandakoqmi qepinta hombrunman churarkur ampipa o tsakëpa* yarqunqa. Murällata uchkuskirmi llapan cösasninkunawan tsëpa yarqunqa+ y patsata mana rikänampaqmi cäranta tsapakunqa’.
13 Noqanam animalkunata tsarina* mällawan tsaparkushaq.+ Tsëpitanam Babiloniaman, caldeu nunakuna kawayanqan markaman apashaq. Peru manam mëpa apanqäta rikanqatsu. Tsë markachömi wanunqa o wañunqa.+
14 Y pëwan këkaq nunakunata, yanapaqninkunata y soldädunkunatapis mëtsëpam qarqushaq.+ Espädata aptarkurmi qatikachäshaq.+
15 Mëtsë nacionkunaman y mëtsë markakunaman qarquptïmi musyariyanqa noqa Jehovä kanqäta.
16 Peru wakin nunakunataqa manam ni espädawan, ni mallaqëwan ni raslla o saslla wanutsikoq qeshyawan wanutsishaqtsu. Tsë wallkaq nunakunaqa, ëwayanqan nacionkunachömi willakuyanqa imëka mana allikunata rurashqa kayanqanta. Y musyariyanqam noqa Jehovä kanqäta”.
17 Teyta Jehoväqa yapë parlapämarmi kënö nimarqan:
18 “Nunapa tsurin, mantsakashqa y karkaryar tantëkita mikuy, yakutapis alläpa yarpachakur llakishqa upuy.+
19 Tsë nacionchö kawaq nunakunata kënö nï: ‘Israelchö këkaq Jerusalen markachö nunakunatam, Llapanta Gobernaq Teyta Jehovä kënö nin: “Kë markachö kawaq nunakuna, imëka mana allikunata rurayanqëkipitam markëkikuna ushakanqa.+ Tsëmi tantatapis llakishqa mikuyanki y yakutapis mantsakashqam upuyanki.+
20 Mëtsika nuna kayanqan markëkikunam juchur* ushanqa y tsunyëkarmi quedanqa.+ Y qamkunaqa musyariyankim noqa Jehovä kanqäta”’”.+
21 Teyta Jehoväqa yapë parlapämarmi kënö nimarqan:
22 “Nunapa tsurin, Israelchöqa imëpis kënömi parlayan: ‘Junaqkuna pasariptinqa llapan rikäyanqankunapis manam cumplikantsu’. ¿Imanirtan tsënöqa parlayan?+
23 Pëkunata kënö nï: ‘Llapanta Gobernaq Teyta Jehovämi kënö nin: “Kananqa mananam Israelchö tsënö parlayanqanatsu”’. Peru kënömi ninëki: ‘Kananqa llapan rikäyanqankuna cumplikänampaqqa ichikllanam pishin’.+
24 Israelchöqa, manam sueñuchönö mana kaqkunata rikar willakoq nuna kanqanatsu, ni manam ulipänampaq o llullapänampaq brüjupis kanqanatsu.+
25 ‘“Kananqa noqa Jehovämi parlashaq. Llapan parlanqäkunam, manaraq alläpa tiempu pasaptin cumplikanqa.+ Mana cäsukoq Israel nunakuna,+ parlanqäkunaqa manaraqpis wanuyaptikim llapan cumplikanqa” ninmi Llapanta Gobernaq Teyta Jehovä’”.
26 Teyta Jehoväqa yapë parlapämarmi kënö nimarqan:
27 “Nunapa tsurin, Israel nunakunaqa parlayan, imëka suëñuchönö rikanqëkikunaqa mëtsika tiempu pasariptinraq cumplikänampaq kaqtam y willakunqëkikunapis mëtsika watakuna pasariptinraq cumplikänampaq kaqtam.+
28 Pëkunata kënö nï: ‘Llapanta Gobernaq Teyta Jehovämi kënö nin: “‘Llapan parlanqäkunaqa ichik tiempullachönam cumplikanqa. Llapan parlanqäkunam cumplikanqa’ ninmi Llapanta Gobernaq Teyta Jehovä”’”.
Nötakuna
^ Kënöpis niyanmi: tutapanqan.
^ Kënöpis niyanmi: tutapanqan.
^ Kënöpis niyanmi: tutaparkuptinnam.
^ Kënöpis niyanmi: tutapëpa.
^ Kënöpis niyanmi: achkuna.
^ Kënöpis niyanmi: laqmar.
